ni 18.8.2017 (zirtawpni)

SAWRKAR KUTA HLAN AIIN HALRAL DUH ZAWK :
Ngur Branch YMA leh YMA Sub-hqrs. Champhai tangkawpten niminpiah tlai-a Tiau-kam Zilhri phai-a an man,  Pseudoephedrin (Khehpuam) mum 7,80,000 chu nimin khan YMA Sub-hqrs. Champhai Office tual, Tlangrawt-ah Champhai District Session Judge R. Vanlalena'n a hairal.
Ngur khaw kal tlanga Myanmar ram Ngente kai a lakluh tur ni ngei a hriat Pseudoephedrine Mum Nuai 7 leh sing 8, Tualchhung hralhna a chhut a Cheng Nuai 117 leh Sing 6 man chu niminpiah chawhnu khan Ngente kai Tiau kam Zilhri phai-ah Ngur Branch YMA hruaitute chuan hmu-in,YMA Sub-hqrs. Champhai hruaitute an hrilh hnuah a neitu an changzui a. He Khehpuam senghawitu hi an chan chhuah mai loh avangin nizan hmasa khan YMA Sub-hqrs. Champhai hruaitute chuan an senghawi a.
He Khehpuam venga YMA hruaituten nizan hmasa a an tlaivarpui hnuah sorkar lama thubuai ziaklut lo va tihral mai tha-a an hriat vangin, nimin chawhnu khan YMA Sub-hqrs. Champhai President C. Lalbiakzauva kaihhruaina hnuaiah District Session Judge R. Vanlalena chuan YMA Office tual Tlangrawtah a halral ta a ni. Pseudoephedrine halral a nih rual hian YMA Sub-hqrs. Champhai Kumpuan Sub-Committee in Ganja a man tawh sa Kg 60 pawh halral nghal a ni bawk. Sorkar Dan leh thupek kengkawhtuten ruihhlo chi hrang hrang tam tham tak YMA leh khawtual mite hriatpui a man tawhte leh hriatpuitu a an tanna-te, dehral a nih dan mumal taka inhrilh hriat a ni tawh thinlo chu an enghelh thu he hunah hian  tarlang a ni.
Hetihlai hian Champhal District Excise Force-a Sub-Inspecrtor Jerry Lalduhawma Punte chuan Pseudoephedrine mum 12,48,000; Rs. 1,84,32,000 man hu manna kawnga a thawhhlawk avangin nimin khan Mizoram DGP Thianghlima Pachuau hnen atangin 'Good Service mark' lawmman a dawng.

GRAPE RAH THAT LOH AVANGIN DUHKHAWP HMULO MAI THEI :
Champhai Grape Growers' Society te chuan kuminah Grape rah Quintal 495 an lei tawh. Champhai Grape Growers' Society te  chuan Tlangsam Winery a dah turin Grape rah an lei mek zel a Kumin chhungin Quintal 495 an la tawh a. Grape rah te hi Society member ta chauh lei sakin Kg 1 Cheng 30 zelin an lei sak a, Grape hi vawiinah an lak chhunzawm leh dawn a ni. Tarlan tawh angin kumin hian ruahtui a tlak tam avangin Grape rah hmin thei lo leh Grape hnah natna avangin Grape chingtute chuan an beisei ang Grape an thar chhuak thei lo va. Grape hi rah tha mah se ruahtui a tam avangin a hmin te pawh a thlum tur  angin a thlum theih loh bakah a rah a  til nasa hle a, hei vang hian Champhai Grape Growers' Society te hian an duh khawp Grape rah lei tur an hmuh a beisei awm loh a ni. Grape rah hi kartin vawi 2 lei sak thin niin, karkhatah qtl 190 bawr vel lak thin niin, tunah hian qtl 500 vel bawr lak a ni tawh a, kum khatah qtl 1800 vel bawr leisak thin a ni. Heng grape rah an Iakte hi um nghal zelin Zowine, Champwine leh Zawlaidi-ah te siam chhuah leh thin a ni a. Champhai dawr hrang hrangah te zawrh theih tura pekchhuah leh thin a nih bakah Guwahati thleng pawha thawn thlak thin a ni bawk.

CHALAH KAP :
Nimin zing dar 8:00 vel khan Champhai Dinthar Vang, Pu Rosiama fapa, Lalawmpuia kum 20 mi chuan Pu Funghleikhama (L) fapa Laldinpuia kum 15 mi chu Air Gun (.177) in a chalah a kap palh a, Laldinpuia hi Champhai District Hospital-ah dahluh a ni.
Thu dawn danin anni pahnih hi, nimin zing khan, daiah sava vehin an chhuak dun a, Lalawmpuia hian a thianpa Laldinpuia chu Air Gun kau lohin a tin der a. Kah theih tura load hnu ah, a silai lek  chho chuan hmet puak palhin. Laldinpuia chaldar veilamah a kap palh ta a ni. X-ray-a a Ian danin Air Gun mu hi Laldinpuia lu inches 2 vel a thukah a tang ni a hriat a ni. An in tihpalh hnu hian Laldinpuia hi a luak bakah a hnarah thi chhuakin, a biak hleih theih loh a. Damdawi in thlenpui a nih hnu erawh chuan amah hi harhin, a biak theih thung a ni. Hetih lai hian, vanduaina tawk chhungte hi an inbiakrem avangin. Champhai Police te chuan thubuai an ziaklut lo a ni.

DAN ZAWM TURIN HRIATTIR:
Nimin chawhma khan Kahrawt YMA Hall-ah Champhaia Cable TV pahnih LCN Zokhawpui leh Champhai Cable network te chuan an Sub-Operator-te kokhawmin meeting an nei a. He meeting-ah hian System thar Digital signal pek anih tawh thute inhrihhriain channel package thlan danah rate an inhrilhflah a, sorkarin tih tur a tih angte lungrual taka ti tura inhrilhhriat a ni. Sorkar dan zawm tura mawhphurhna hlen turin LCN leh CCN neitu C. Vanlalhmuaka leh Lalhmingmawia Pachuau te chuan Sub-Operator te an hriattir a, khawtin leh veng tinah sorkar rate siam zawm tur leh rate inang tlang hmang turin Sub Operator te an hriattir nghal bawk.

DINCHAM LAWM :
Ruantlang Branch YMA te chuan an Branch Rising day vawi 62-na Iawmna hun an hman chu nizan hmasa khan a tiak ta.
Ruantlang Branch YMA hi Kum 1955 khan din tan niin an Rising ding vawi 62-na pual hian Thawhlehni zan atang khan hun hmangin Section hrang hrangten Lengkhawm hla leh Solfa bakah Outdoor Games hlimawm tak tak hmangin intihsiakna an nei a. Nizan hmasa khan result puan leh Iawmman semna hun hmangin hun an khar a. Kharna inkhawmah hian Ruantlang Branch YMA Vice President Lalramluaha hnen atangin Ram leh Hnam humhalh tih thupui ngaihthlak a ni a. Ruantlang Branch YMA ah hian member 575 awm mekin Section 4 ah an inthen a ni.

TURA HMANGTUTE AN CHUNG A RIP: 
Nilaini khan Khuangthing ram chhunga Ramkhek lui chu tur hmanga suasam a ni a, chakai tam tak an thi a, tur hmanga suasamtute Khuangthing Br YMA chuan an man nghal.
Thu dawn danin Khuangthing Branch YMA chuan an thu dawn bawhzuiin Ramkhek lui tura hraitu Lalthanmawia, Lallawmsanga leh Reuben Lalsiamtluanga te chu an man a. Khuangthing Branch YMA te hian kumin chhung hian an khaw ram chhunga Dynamo hmang thin leh tur hmang thinte mi eng emaw zat a man tawh a, an chungah na takin action Iak thin a ni tih thu kan dawng.

THIM ENG THIM ENG:
'132KV Saitual to Khawzawl Line, Tuivawl kama leimin avanga hrui pawh that hna Dt. 12-15 August, 2017 khan thawh zawh a ni a, amaherawhchu Line hi a FAULT zui hlauh mai a, a FAULT chhan hi Disc Insulator puncture ni a rin a mi. Disc Insulator puncture zawn chhuah hi hna hautak tak a ni a, hemi avang hian 132KV Line chu Saitual atangin Khawzawlah pek theih a ni lo. Power Supply hi 33KV level-in Bukpui atanga dawn a ni a, hei hi Champhai District tan khawp kham a ni lo a. Dt. 12 August, 2017 atang khan zantin load shedding a Power sem a ni. Vawiin, Dt. 18 August, 2017 lamah pawh line chhe lai siam that hna thawh mek, Khawzawl field staff te pui turin Champhai lam atangin EE leh SDO hoin tukin dar 5: 00 khan Champhai field staff te tirh thlak an ni.  132KV Line, Saitual to Khawzawl athat hma chuan Load Shedding siam thin a ngaih dawn avangin mipui te hnatthiamna kan ngen tak meuh meuh a ni e, tiin Pu Thanglura Sailo, EE Power Project Division, Champhai chuan a tarlang.

Petrol : Service tanky  (65.24)
Diesel : Sem rual  (55.52)

0 comments: