ni 22.8.2017 (thawhlehni)

A ZUNG CHAWPIN HALRAL:
Tuipuiral Group huam chhunga Khuangthing Branch YMA te chuan an ram chhunga Ganja kung 10,000 chuang chu a bulah pawt phawiin nimin khan an halral.
Khuangthing Branch YMA-te hian ruihhlo do leh luidung nungcha humhalh kawngah, tha thlah lovin hma an la reng a, niminpiah chawhma inkhawm ban khan, zu zuar dapin, zu thlawr lai bungbel leh hmanrua eng emaw zat an Iak sak a. Chawhnu lamah Khuangthing khaw chhung leh dai hnaia Ganja kung engemaw zat an suat hnuah nimin zing khan hmalak chhunzawmin Lailak nikanga Kapkima, Lalvena leh J.Lallawmawma te thlawhlaia Ganja, buh kara an chin chu suatin Ganja kungte hi an phur hawng a. Khuangthing khelmual hlui Community Hall kawt-ah nimin khan, Khuangthing VCP B. Lawmkima‘n an a halral nghal a ni.

MI 213 TEN DAMNA CHANG :
July thla chhung khan Champhai District Hospital-ah mi 2156 an inentir. OPD a inentir mi 2156 atangin mi 274 te chu Admit an ni a, Admit zingah hian mi 213 te chu dama chhuak awmin mi 9 te chu an boral a ni. Casualty ah mi 402 an lut bawk. Zaipui tawk mi 25 awmin zai tenau tawk mi 669 an awm a, khum luah hi za zelah 46.26 awm ang a chhut a ni a, khum luah sawn hi za zeiah 3.79 awm ang a chhut a ni bawk.

KHAWCHHUNG LEH PAWNAHTE FEHCHHUAH PUI :
Sorkar Laipui thuchhuak angin Aadhaar Card leh Sim Card thlunzawm chu kalpui mek a ni a. Aircel chuan khaw chhung mipui Office pan harsa te tan khaw chheh vel thingtlang khaw hrang hrangah fehchhuakin Sim Card leh Aadhaar Card thlunzawm hna hi Kar hmasa atang khan an kalpui a, khaw chhung mite tan Aircel Officeah Addhaar Card leh Sim Card thlunzawm hi kalpui mek a ni bawk. Hetih lai hian Airtel pawhin Sim Card leh Aadhaar Card thlun zawm hi June thla atang khan kalpui a ni a. Airtel thawktute pawh hian thingtlang lamah kalchilhin thlunzawm hna hi an thawk mek a, khaw chhung mipui te tan pawh thlun zawm hna hi Airtel Office ah neih chhunzawm zel a ni a, he hna thawh mek hi February 2018 thleng a neih tur a ni ang.

CHAW CHHUN DAWNNA ATAN BEIHPUI THLAK :
Thla thar September atanga Aadhaar Card nei Io zirlaiten Midday Meal an dawn theih tawh dawn Ioh avangin, Khawzawl RD Block huam chhungah, tun thla chhung ngeia Aadhaar Card an siam vek theihnan ngawrh takin zirna lnte tan Biometric Enrollment kalpui mek a ni.
Khawzawl RD Block huam chhungah hian Midday Meal  dawng thei, Primary School 39 leh Middle School 37 an awm a, nimin khan Govt. Little Flower School zirlaite tan Biometric Enrollment tih a ni a; School 7 zawhfel a ni tawh. Tun thla chhunga tuam kim hman ngei tumin, vawiin atang hian khaw hrang hranga ti tur pawh tirh chhuah tum a ni.

0 comments: