ni 24.8.2017 (ningani)

KAWNG SIAM THATNA HUN AWMLO :
Nimin khan Champhai Venglai Community Hall-ah DRDA Champhai leh Krishi Vigyan Kendra (KVK) hmalakna in India sorkar hmalakna thar New India Movement chungchang zir ho a ni a. Champhai North Bialtu TT.Zothansanga, Parliamentary Secretary chu khuallian niin he hun hi a hmanpui.
He hun hi Vanlalngaihsaka, Champhai DC chuan a kaihruai a, Sankalp Se Seddhi- New Indian Manthan chu kum 75 India zalenna lawmna chikhat a nih thu sawiin, India ram atanga retheihna te, natna thlentu bawlhhlawh te leh eirukna te tihbo hi a tum ber a ni tih a sawi.
Khuallian TT.Zothansanga, Parliamentary Secretary chuan thu sawiin, India chuan kum 2022-a khawvela ram ropui ber te zinga tel turin hma a la mek a. New India ni tura hma kan lakna hian kan awmna hmunah hian kan lo tang ve thei a ni, a ti a. Mizote hian New Mizoram kan siam thei a nih chuan New India siamna kawngah nasa takin a pui dawn a, India hi ram changkang leh fai taka siam turin mitin kan pawimawh a ni, a ti.
Champhai kawng chhia chungchang sawi langin Mizoram kutah kawng siamna tur hi dah tura ngen a nih laiin BRTF chuan a phal lo a, hei vang hian kawngpui hi khawih hleithei lovin Mizoram sorkar a awm a. Kumin March 31 khan Mizoram sorkar kutah a awm chauh avangin kaa5npui siamthatna hun a awm lo, a ti a. Mipui hriatthiamna a ngen tih a sawi a. Seling leh Champhai inkar chu double lane a siam tura ruahman a nih thu leh, a hlawhtlin theihna tura chak taka umzui mek niin, tun fur zawh hian siam a nih tur thu a sawi tel bawk.
SK Ahmed, Scientist (Animal Science), KVK, Champhai chuan in hmel hriattirna neiin, KVK thiltum leh hnathawh tlangpui a tarlang a. DAO, DHO leh KVK Champhai District atangin Loneitute tana kawng an sial sak dan leh an hmalakna te an tarlan bakah, Esther Malsawmkimi Colney, APO; DRDA, Champhai chuan New India chungchang zau zawkin a sawifiah bawk. Nimin hun hmanna-ah hian loneitu leh VC te an tel a ni.

ZIRLAI NAUPANGIN KAWNG SIAM :
Khawbung WATSAN Sub-Division PHE Dept staff leh Khawbung HSS zirlai naupang leh zitirtu tangkawp chuan nimin khan Khawbung khaw chuanchung Village Internal Road, Farkawn Ruam atanga Khawbung Community Hall panna kawng chu hnatlangin an siam tha.
Khawbung Higher Secondary School te hian an lo tih than angin kum tin khawtlang tana hna tangkai vawi 2/3 thawkin, thingphun leh khawtlang thenfai hnatlang an nei thin a. Hemi denchhenin kumina ruahtui tlak fam avanga khaw chhung inkalpawhna kawng chhia, Farkawn Ruam atanga Community Hall panna kawng kal hleih theih loh chu siamin an hnatlang a. He kawng hi PHE Office panna kawng a nih pah bawk avangin Khawbung WATSAN Sub-Division PHE Dept chuan kawng siamna tur lung (boulder) ngaihtuahin Dept Staff te nen nimin khan an hnatlang a, kawng chhe zual Iai an phah zo a ni.

AADHAAR CARD SIAM NASA :
July thla atang khan DC Office hnuaia Enrollment Agency te chuan Aadhaar Card siamin khaw hrang hrang an tuam leh mek. Tunah hian khaw chheh vela thingtlang khaw hrang hrangah Aadhaar Card nei lote tan Aadhaar Card siam sakin thawktute chu an kal kual leh mek a, tuna kal kual leh hi final na ni tawhin heng khua bakah hian school naupang tan tih mek a ni bawk. Champhai khaw chhung tan DC Office ah leh Hnamte Institute of Technology, Venglai Champhai, Selluaia Traffic Point bulah te engtiklaia pawha siam theih reng a nih bakah hming dik lo siam that ta a tih theih a, tunah hian school naupang leh khaw chhung mite chuan an pan mek a ni. Champhai khawchhung bakah hian Ngopa, Khawzawl, Khawbung ah te siam theih reng niin siam mek a ni bawk.
Tunah hian zirlai naupang te'n Mid Day Meal an neih thin chu Aadhaar card neih vek a ngaih tawh avangin tunlai hian Adhaar Card siam an pung hle nia thudawn a ni.

NUAR VE THO :
India ram hmundangte rualin nimin khan Champhai Dak In pawhin nawrh zawmin nimin khan mipui dawr theih lohin khar a ni a, an thil phut ziahna chu dak in kawngkaah an tar chhuak bawk.
All India Postal Employees Union thil phut zingah hian Department of Post-a hnaruak awm zawng zawng hnawh khah te, GDS hman dan chungchang te bakah a nghet lova chhawrte hlawh ennawn chu a Iangsar zual a ni. Champhai Dak in hi bank anga pawisa vawn thatna atana hman a nih bawk avangin dawrtu an thahnem hle a, hei bakah hian tun dinhmunah Champhaia courier service zinga bungraw thawn chhuak thei tlemte zinga mi a nih bawk avangin hmang tangkaitu an thahnem hle a ni.

IN SIPEL SIAK :
Vawiin hian Spelling Bee a tel tur School aiawh zitirtu pakhat theuhte chu I&PR Auditorium CHANEM building -ah chawhma dar 11:00 hian kalkhawm a ni a, Spelling Bee a tan a hriat tur te sawiho a ni ang. Lehkha siam hman a nih tawh loh avangin media lama in hriattirna bak hi hriattirna dang chhuah a ni loh thu MZP Champhai Hqrs hruaitute hnen atangin thu kan dawng.

Petrol : Free Sale  (65.66)
Diesel : Service tanky  (55.30) 

0 comments: