ni 31.8.2017 (ningani)

KRISTIANNA HI A THA BIK A NI TIH LANTIR TUM:
Nimin khan Champhai Press Club-ah PRISM hruaitute chuan Press Conference neiin, Kum 2018 MLA Election neih tur atana PRISM MLA Candidate atana sawmna hun an hmang a. Nakkum Mizoram tinthlanpui neih tura PRISM-in inthlan chuh an tum leh an ruahmanna hrang hrangte an phochhuak nghal bawk. RL Liantluanga General Secretary GHQ chuan Press mite hnenah Candidate tura mipui aiawh an zawn thu leh ram siamthat a tul zia te sawiin, Press mite zawhna a chhang a: PRISM Gen. Secretary chuan, Kan ram siamthat a tul thu hi mi tam takin an lo aupui tawh thin a, siamthat duh mihring tam tak pawh an beidawng hman hial a ni. Hetih lai hian siamthat duh avanga penchhuak tura beidawng tawhte thinlung erawh chuan beiseina a la nei fan a, mithiam leh a ngaihna hria tam tak ten ram siamthat duhna rilru puin kawng hrang hrangin hma an la mek a ni, a ti a.
PRISM hian Kum 10 chuang kan Ram leh Hnam siamtha tur hian hma kan lo la tawh a, kan ram hnam leh sakhua hi him se, a chhunga cheng mipui mai nilo ram danga cheng Zo hnahthlakte pawhin thinlunga pankhawm/haw khawm an chak theihna tura kan ram siamthat kan duh avanga sorkara kan rawt thin te leh corruption a awm tawh loh nana kan hmalakna ten rahtha eng emaw zat chhuah mah se, hei hi duhkhawp lo va nasa zawka hma la tura mipui min nawrna avangin, PRISM chuan kristianna hi a tha bik a ni tih lantir a, kan Pathian chawimawi tur te; kan chhehvel hnamte aia ropui zawk kan nihna lan tir tur te; Zo hnahthlakte inpumkhatna atana kan unaute hipkhawm tur te-in Mizoram-ah hian ram ralmuang, dik leh fel taka ro inrel, hna neilo awm lohna, mi hrisel leh hlim chenna, ram hausa, hnam dang ten tlawh an chak ram din kan tum a. Kan ramri, sakhua leh hnam dikna leh chanvo te humhim a, Dan kalha kan rama cheng hnam dangte an rama thawn kir kan tum a ni, ati.
PRISM MLA Election Manifesto, 2018 chu August 1, 2017 khan kan tlangzarh tawh a. Hetah hian huaisen chungchuang taka hma lak ngai.1)Assam enkawl lai Innerline Reserved Forest laklet te; 2) Hmang tangkai si lo va ram zau pui pui neite ram chhuhsak te; 3) Eiruk hmangte man leh an eiruk sa chhuhsak te; 4) Sorkar hnuaia awm zinga privatise emaw management outsource theih chi te privatise emaw outsource te; 5) Administrative reform kalpuia inawp leh inrelbawlna ramri siamthat te; 6) Department awmdan en nawna allocation of business siam that te; 7) RTI Section 4 tihpuitlin te a awm a.
Kan ram hmasawn chak theih loh chhan bulpui ber eirukna laka fihlim tur ngei Minister leh MLA kan duh a. Chu mai ni lovin Minister leh MLA nih chakawm loh rawk khawpin 1) Minister, MLA etc. hlawh leh facility tihtlem tur a ni a; 2) Kum tin an thil neih an puanzar a ngai dawn bawk a; 3) Constituency Development Committee dinin MLA LAD Fund hi he committee thu hian hman tur a ni a; 4) MLA ten an bial chhungah office an nei dawn a 5) Dan zawma Dan hnuaia kunin dik taka hun an vawn a ngai dawn a; 6) Ataka thuneihna semzai kalpuiin an pawimawh nep hle dawn a; 7) Sports association velah hruaitu an ni thei dawn lo a ni.
Amaherawh chu PRISM MLA Election Manifesto, 2018 hi tihhlawhtlin a nih hunah chuan 1) Ram zau zawk, hausa, Chen nuam, him leh thang chak tak kan nei ang a; 2) Kawlphetha hnianghnar, inkalpawhna tha, industrial leh digital state kan ni ang a; 3) Hnam huaisen, intodelh, hrisel leh damrei, inthurual leh hlim kan ni ang a; 4) Chhungkaw tinin chenna in leh eizawnna tha kan nei vek ang a; 5) Sorkar chak, tuan rang, Dan kengkawh leh langtlang kan nei ang a; 6) Sorkar hnathawk tha neiin corruption a bo ang a; 7) Boruak nuam, sa leh va tamna leh zalenna ram kan ni ang.
Mipui huapzo sorkar tak tak neih kan duh avangin mipuiah candidate tur kan rawn zawng a. MLA Inthlan lo awm tura in candidate ngam, mahni ropuina leh hamthatna tur ni lo va, kan Ram leh Hnam dinchhuahna tur a mipui te tana hma la tur tak tak min rawn zawm turin kan sawm a. Pawl leh mimal tupawhin candidate atana it zawng kan neih chuan rawtna rawn Siam turin kan sawm nghal a ni, RL Liantluanga chuan a ti.
PRISM Gen. Secretary hi PRISM Champhai District hruaitu Dr R.Laldinthara, H. Vanlalrova Ieh Lalramzauva Ralte ten an tawiawm a ni.

HUN PAWTSEI HRET :
EST & P-NULM hnuaia Skills training dil theih hun chhung chu September ni 12, 2017 thleng pawh sei a ni a.  Sept ni 14, 2017 ah result hi UD&PA Deptt. office. CHANEM Building-ah tar chhuah a ni ang tih thu kan dawng.

EKZAM BEI TURTE TAN :
Director of SCERT chuan thuchhuah tarlan dan chuan State level national talent search exmination (NTSE) 201718 chu November 4, 2017 khian buatsaih a ni dawn a. Recognised school-a Class X zirlaite tan ni ang a. Mental ability test (MAT), Language comprehensive test leh Scholastic aptitute test (SAT) ah te exam hi neih a ni ang. Champhai District chhunga Principal/ Headmaster te chuan DIET Zotlang, Champhai atanga form lachhuaka fill-up hnuah October 25 2017 hma thehluh leh vek tur a ni ang.

0 comments: