ni 9.8.2017 (nilaini)

MAHNI BIKE HRALHNA SUM MIDANG TANPUINAN :
Nimin khan Zomi Donghu Kipawlna te' n Mizorama tuilian tuarte tanpuina leh chhawmdawlna tur YMA Sub-Headquarters Champhai hnenah an hlan.
Tuilian tuarte tanpuina leh chhawmdawlna inhlanna hun hi YMA Sub-Headquarters Conference Hall, Tlangrawtah hman niin, C.Lalbiakzauva, YMA Sub-hqrs President chuan a kaihruai a; Pastor C. Lalngaihthanga‘n hunserh a hmang a. Lalnunpuia, Zomi Donghu Kipawlna President chuan thu sawiin, Mizorama tuilian tuarte tanpuina leh chhawmdawlna chu Central YMA ah direct-a hlan mai awm tak a nih laiin kum 2015-a Myanmar rama tuilian tuarte tana CYMA in vehbur a khawn Pawisa fai, buhfai leh thawmhnawte a hmun ngeia hlana zirchiangtu an nih avangin YMA Sub-hqrs kaltlanga hlan an ni tih a tarlang a. Mizoramah tuilian tuar tanpui ngai an awm a ni tih Zomi unaute‘n kan hriatin mipui rilru a hneh em em a, naupang atanga tar thlengin Mizoramin chhiat an tawk a ni tih kan hriatin kan mittui a tla a. Mahni ei ai bakah mahni bike hial hralh phahte an awm a ni, a ti a. Tanpuina an rawn ken chu a tam lam ni loin unau, lai-chin kan nih avanga hlan kan ni tih Mizo mipui te chuan hria se a duh tih a sawi bawk.
Siakham Taw, Vice President ZDK pawhin thu sawiin, Mizoram miten kan chhiat tawh avanga in hmangaihna luan chhuahtir a, hmangaihna thlai chi in rawn tuh kha vawiinah Zomite thinlung ah tiakin intan kan rawn thawk chhuak ve a ni, a ti a. Mizoram miten min rawn tanpui avangin ei leh in tur nei lo ten ei tur an nei a, In leh lo neilote pawh In nuam takah an cheng mek a ni, a ti a. Tanpuina min rawn pekte kha kan chaw thlengah a la awm reng a, kan thinlungah hian a la cham reng a ni, a ti bawk.
Mirethei ber atanga a hausa ber thlengin kan tan ui in nei lo va, Mizoram chhungah unau kan nihna hre renga tanpui kan ngaihna hmunah min en hrang hauh loin min tanpui thin a. Mizorama chhiat kan tawhin inthliarna awm hauh lo va zoram chhunga chengte'n hmangaih taka min tuam hlawm thin avangin kan lawm hle a ni, a ti bawk.
Kan tanpuina pawisa hi India pawisa chuan tlemte a ni a. Kan buhfai rawn ken pawh hi he lai buhfai aiin a tui bik dawn lo tih kan hria a. Kan neih vang leh kan theih vang ni loin a rethei atanga hausa ber thlenga kan khawn khawm niin, lawm taka min lo dawn sawn avangin kan lawm a. A tam leh tlem lam ni loin unau kan inhmangaihna vang a ni tih min hriat sak ula kan duh a ni, a ti bawk.
Zomi Donghu Kibawlna te hian Mizorama tuilian tuarte tanpuina leh chhawmdawlna atana Vehbur an khawn khawm, Myanmar Kyat Nuai 170, India pawisa-a Rs. 8,50,000 leh Buhfai Bag 100 chu YMA Sub-hqrs Champhai hnenah hian an hlan a,  YMA Sub-hqrs Champhai hian Central YMA ah an hlan chhawng ve leh dawn a ni. He hunah hian Zomi Congress for Democracy Party, Zomi Culture Society Champhai, MZP Hqrs, MHIP leh MUP aiawhte hnen atangin thusawi ngaihthlak a ni bawk.

VC TE TAN TRAINING BUATSAIH:
Ni 3 chhung awh tur Champhai District chhunga VC te tana buatsaih Mizoram Finance Commission Grant Account vawn dan training chu nimin khan tan a ni. Training hi Kahrawt Community Hall-ah neih niin C. Vanlalhruaia chuan a kaihruai a, AG leh Local Fund Audit atanga an sumte Audit a nih dawn avangin VC te chu dik taka sum hmang turin a chah a ni. Lalhmuakliana, DLAO pawhin thu sawiin khawtlang inrelbawlna kawnga hmalatu leh entawn an nih angin dik tak leh felfai takin sum hmang turin a chah a. Commission Grant sumte hi dan anga hman tur a nih angin danin min phut ang takin kan hmang tur a  ni, a ti. An sum hmante fel fai taka ziak turin a chah a, Training chu hlawk taka hmang turin leh thiam loh an neih te thiam ngei tura zir turin duhsakna a hlan a ni.
He training-ah hian Champhai North leh South A/c huam chhunga VC 42 atangin VC President leh Treasurer te koh an ni a, Account vawn dan bakah 1-st Mizoram Finance Commission Grant Release Order pekchhuah nghal an ni bawk a. Vawiin hian Tuichang AC, Lengteng Ac leh Biate te tan Training hi neih leh tur a ni a, naktuk hian East Tuipui AC huam chhunga VC te tan neih leh tur a ni ang.

HLAWHTLINNA KAWNG A INHAWNG : 
Nimin khan Kahrawt Field ah Champhai District Volleyball Association huaihawtin I-Day Volleyball Tournament chu khelh tan a ni.
He tournament hawnna-ah hian Champhai DSYO Lalngilneia Colney chu khuallian a ni a. Thu sawiin Sport Discipline hrang hrangah Champhai District chhuanawm a tih thu a sawi a, hei hi volleyball Game ah pawh chhawmnun zel a duh thu a sawi a ni. Tum ruhna leh mahni inthununna a pawimawh tih sawiin eng game ah pawh rilru nei leh mahni inthunun mi tan chuan hlawhtlinna kawng a awm tih a sawi bawk. DSYO chuan I-Day Volleyball Tournament chu hlawhtling taka kalpui a nih theih nan tanpuina a hlan bawk.
Hawnna inkhawm hi Lallianpuia, Jt. Secretary CDVA  in a kaihruai a, Lalnunmawia, Adviser CDVA; Lalhlupuia, President CDVA ten an tawiawm a ni. Tournament-ah hian Champhai khaw chhung leh pawn atangin Mipa Team 19 leh Hmeichhia Team 7, an vaiin Team 26 an chhuak a ni. Nimin inkhel Mipa lamah MZ Home l in 2-0 in Tuipui an hneh a, Vengthlang North in 2-0 in Zion Veng an hneh a; PC Lalsangliana Memorial V/C in 2-1 in Sazep an hneh a. Tlangsam in 2-0 in M2 Home II an hneh bawk. Hmeichhe lamah Dungtlangin 2-0 in Vengthlang North an hneh a, Ruantlangin 2-1 in Forever Young an hneh a; PC Lalsangliana Memorial in 2-0 in Comet an hneh bawk.

NAUPANG 8 TEN NORTH EAST UNITED ACADEMY ZAWM DAWN :
North East United Academy-a lut tur Champhaia thlanna neihah rawlthar 8 thlan anni a chungte chu : Lalnunsanga, Vengthlang North; Jessy Lalmawizuala, Vengthlang; CB Lalbiakdika, Vengthlang; R. Ramdinthara, Kanan; Thangsiansanga, Bethel; Khualngaihsiama, Hnahlan; Lalthapuia, Rabung leh Lalchhandama, Vengthar te an ni a. Final Selection an la hmachhawn leh dawn a ni.

A HUN SAWN :
Horticulture Deptt in Champhai Town Hall-a District level crop exhibition,14-15 August-a neih tura ruahman chu remchan zawkna avangin ni 15-16, August 2017-ah neih a ni dawn a. Pangpar leh thlai entir siak turte hi ni 14. 8. 2017 Zing dar 10:00 atangin Town Hall-ah hian registration tih theih a ni ang.

FOOTBALL TOURNAMENT:
Independence Day Football Tournament chu niminpiah chawlh lailawk a nih hnuah nimin khan Chhangphut Field-ah khelh chhunzawm leh a ni. Nimin khan Match 3 awmin inkhel hmasa berah FC Vengthlang North leh Vengthlang FC inkhel in Vengthlang North in 3-2 in hnehna an chang a. Hnahlan Vengthlang in 3-0 in Champhai United an hneh a.  Inkhel hnuhnung berah Vengsang FC chuan 3-1 in Rabung Zone an hneh bawk.
Vawiin hian khelh chhunzawn leh a ni ang a, North Khawbung Zone leh Zokhawthar Zone an inkhel ang a, Hnahlan Vengthlang FC leh Rabung Zone an lnkhel bawk ang.

HEALTH CARE CHUNGCHANG ZIRTIRNA:
Nimin khan RSBY/ Health Care hnuaia New enrollment training chu I&PR Auditerium Hall ah neih ani.
He hun ah hian Dr. Vanlalnghaki, CMO Champhai in training hawnna hun a hmang a, main Centre pathum Champhai, Bungzung, Sesih hnuaia Health Worker leh Staff te hnenah training hi pek niin, training-ah hian mi 50 vel zet an tel a ni.

Petrol : Service tanky  (63.85)
Diesel : Sem rual  (55.04) 

0 comments: