ni 16.9.2017 (inrinni)

MIPA AIIN HMEICHHIA TAM ZAWK :
Nimin khan Draft Electoral Roll 2018 chu mitin hmuh theih turin DC Conference Hall Keifang Tlangah tlangzarh a ni
Election Commission of India thu chhuak anga Champhai District chhung Assembly Constituency 5-a Electoral Roll 2018 Special Summary Revision neih zawh a nih hnuah Draft Electoral Roll 2018 chu mitin hmuh theiha tarchhuah turin nimin khan Champhai DC Conference Hall-ah District Election Officer (DEO) leh DC, Vanlalngaihsaka chuan a tlangzarh a. Draft Electoral Roll 2018 tarchhuah tura tlangzarh chu he hun hmanpuitu Political Party tin hnenah DEO chuan a pechhuak nghal bawk.
DEO leh DC Vanlalngaihsaka chuan Draft Electoral Roll 2018 felfai tak, a hun taka tarchhuah theih a ni chu Electoral Roll khawihtute bakah political party-te leh mipui-ten thawhhona tha an neih vang a nih thu tarlangin, lawmawm a tih thu a sawi a. Champhai District chhung AC 5 huam a Vote nei theite District Election Branch-in Electoral Photo Identity Card (EPIC) a pechhuak vek thin chu fakawrn a tih thu leh Electoral Roll Summary Revision neih leh turah pawh thawh hona tha nei chhunzawm zel turin a ngen bawk. Electoral Draft Roll tarchhuah takah hian Election Officer Lalremruata Kullai chuan Champhai District huam Assembly Constituency 5, (21 Lengteng, 22 Tuichang, 23 Champhai North, 24 Champhai South leh 25 East Tuipui Constituency) dinhmun tlangpui a tarlang a. Polling Station 135 a awm mek thu leh Voter 82,851 awm zingah mipa 41,128 leh hmeichhia 41,723 a nih thu a sawi a. Electoral Roll awmsa aia Draft Electoral Roll-a a punna hi voter 349 a ni.
Draft Roll 2018 tlangzarh zawh hian District Level Standing Committee thukhawm zui nghal-in, Special Summary Revision neih leh tur chungchang an thlir ho a ni. Political party lam atanga zawhna awmte chhan a nih bakah sawi hona neih a ni a. He Draft Roll tlangzarh tak a sawisel duh neite tan October 13, 2017 thleng hun hawn niin, September ni 16 atanga 30 chhung khian EPIC thlalak tur a ni a. September 23 leh October 7, 2017 khian Draft Roll a sawisel neite endik a ni dawn a. November 11, 2017 ah sawiselna awmte chinfel vek a ni ang. December 20, 2017-ah tih tur awmte chinfel vek tura duan lawk niin, Final Electoral Roll 2018 hi January 15, 2018 ah tarchhuah a ni ang. 
Nimin chawhnu dar 2:00 khan Lalremruata Kullai, Election Officer chuan Champhai North leh South huamchhunga BLO te chu kokhawmin training a pe nghal a. He hunah hian BLO 65 vel kal theiin an hnenah hian vote nei thar tur leh siam that ngai te tana siam theihna form chi hrang hrangte chu a dahkhah dan tur leh hriat tur pawimawh tak tak te chu hrilhhriat an ni a, heng form te hi practical a dah khah tir nghal an ni bawk. 

RUNTHLAK HNATLANG NEI :
Ram pum huap faina beihpui thlakna kal mekah Mizoram sorkarin District Heaquarters thuthmun khawpui 8 zinga khawpui fai a thlan turah khawpui fai leh thianghlim ber ni turin Champhai khawpui chhung a Veng hrang hrangte chuan faina beihpui an thlak chhunzawm zel.
Faina lama India in hma a sawn theihna tura Faina beihpui kalpui mekah Mizoram sorkar chuan District Headquarters thuthmun khawpui zualte thlang chhuak a, lawmman a buatsaih turah Champhai chu khawpui fai leh thianghlim ber ni turin, khawpui chhunga veng, hrang hrangte chuan an huamchhung kawtthler leh vantlang ram thenfai hnatlang an neih mek bakah chhungkaw tinten an ram chin an thianfai mek bawk a. VC thenkhat te chuan runthlak hnatlang an kovin kawtthler, kawngpui dung leh vantlang ram thenfai hnatlang an nei hlawm a ni. Mizoram khawpui fai ber inelna hmasaber turah hian, September 1 -20, 201 7 chhungin khawpui tin ten faina lama inbuatsaihna kawng hrang hrang an neih phal a ni a. Nimin meeting, a rel angin kar leh September ni 18-23, 2017 chhungin Panel of Experts Member te chu Team 3-ah in siamin district capital leh khawpui dangte an endik dawn a ni.

NAUPANG 30 THLANG CHHUAK :
Gospel Singers Ministry leh CCN tangkawpa buatsaih Gospel Idol Kids 2017 chu nimin khan audition round zawh fel a ni. 
Nizan hmasa khan he zai intihsiakna hi Rev H. Vanlalruata Vengthlang bialtu pastor chuan ahawng a, nimin khan Champhai District hmun hrang hranga naupang zaithiam 53 te chuan intihsiakna an nei a, rimawi tel lovin audition round-ah hian hla Chang hnih leh a thu nawn an rawn sa a ni. Intihsiakna result hi nizan khan puanchhuah nghal a ni a, seeond round-ah mi 30 an tling a, heng mite hian karleh atang khian intihsiakna an nei chhunzawm leh dawn a ni.

0 comments: