ni 8.9.2017 (zirtawpni)

NLUP DAWNG TUR DAWNGLO LA AWM NUAL :
NLUP Implementing Board Chiarman J H Rothuama chuan MLA bialtinah NLUP la dawng lo chhungkaw 200 atanga 400 vel te hnenah a tul dana zira tanpuina pek leh tum anih thu a sawi.
Nimina NLUP Implementing Board, NIB Conference Hall-a an thutkhawmna ah hian NLUP kalpui mek dan leh dinhmun te, line department hrang hrangte hmalak dan bakah NIB hmalakna tur ruahmanna thar chi hrang hrangte sawiho a ni a.
NLUP thil tum pakhat ramngaw humhalh leh tuihna siam kawnga chak lehzuala ke pen turin hmalak dan tur te, hemi atana mawhphur tur committee din leh a tam thei ang ber mipui leh tlawmngai pawl hman tangkai dan tur te sawiho a ni. Hei bakah hian NLUP hmalakna uar lehzuala puanzar dan tur ruahmanna siam a ni a, Line Department hrang hrang ten NLUP hnuaia an hmalakna leh sum an hman dan te report an pek bakah NEDP-NLUP Convergence Scheme chungchang sawiho a ni a. Heng bakah hian NLUP chungchang seminar buatsaih te, Talk Show buatsaih leh zirlaite pual inelna chi hrang hrang siam tum a ni bawk. 
NLUP Implementing Board thutkhawmah hian official member Ieh non-official member bakah Line Department aiawh te an tel a ni.

KHAWDANG RUALIN INFIAM MITE INPE:
Mizoram Sport & Youth Services hmalaknaa thisen pek runpui nimina neihah Champhai-ah chuan District Sport Committee huaihawtin District chhunga Sport Diciplince hrang hranga infiam miten Champhai Dist. Hospital Blood Bank-a dah turin thisen an pe a. Blood Bank a thawkte’n Vanlallawma Indoor Stadium-ah thisen Unit 59 an la a. Thisen petute hi hmeichhe 19 leh mipa 40 an ni a. Thisen lak a nih hma hian DC Vanlalngaihsaka hoin inkhawm neih a ni.

MI 22 TE THILZAWRH MANSAK :
Nimin khan Champhai Police-te chuan Champhai khaw chhunga Dan phal loha Diesel leh Petrol zuarte an endik. Hei hi tunlai a tuialhthei tlem ta viau te, Petrol & Diesel pawlh dal vanga motor leh khawl chi hrang hrang chhe hma ta lutuk te leh dan lo va petrol zawrhna hmun, kangmei laka a him loh zual tak em vangte leh mipui mimir him zawkna tur atana neih a ni a. Mi 22 an man a, Petrol 4132 ltrs leh Diesel 3930 ltrs an hren sak a. Heng oil an hrensak man hi Rs, 5,45,700 man vel niin vawiin hian Champhai Police Station-ah in report tura tih an ni tih thu kan dawng. 

GATE BULAH MAN :
Nimin tlai dar 4:00 vel khan Zokhawthar Police tc chuan Zokhawthar Trade & Commerce Main gate bulah Obeda Ramhermawia (25) s/o T. Vanlalruata, Ramthar Veng Aizawl hnen atangin Heroin, No. 4 hawng khat (13 grms), Rs 50,000 man vel an man a, ND&PS Act hnuaiah thubuai siam sak a ni. 

CHENNA IN CHHUAHSAN :
Nizan dar 9:00 bawr vel khan Champhai IB Venga Holy Angels School thlang lam chu a min a, thi leh hliam an awm lo. Leimin chhak lama In tan a hlauhawm avangin nizan khan an insawn chhuak nghal a, mi tlawmngai ten an buangruate hi an thiarpui tih thu kan dawng.

KAWNG SAWI HO :
Nimin khan NGO Coordination Comt chuan PWD Highway Division hotute kawmin, Champhai panna kawng chhe lutuk siam that dan tur leh a chhe zual siam thatna atana lung supply dan turte an sawiho a. Champhai via Rabung to Aizawl kawngpui thar siam dan turte an sawi ho bakah hemi atan hian proposal thehluh chungchang te an sawi ho tel bawk.

0 comments: