ni 16.11.2017 (ningani) 

CDFA LEH HOTEL HRANGA PLAZA INREM:
Champhai District Football Association leh Hotel Hranga Plaza te chuan kum 2 chhung atan thawh hona thuthlung nizan hmasa khan an ziak. MoU ziahna hun hi Hotel Hranga Plaza-ah neih a ni a, CDFA aiawhin President C. Hualrikhuma leh Hotel Manager Lalduhawma ten MoU hi an ziak a. He thawh hona turah hian mikhual thlen leh sponsorship chungchang te ziahlan a ni. 

NIHNIH CHHUNG SERVICE DAWNLO:
Champhai - Aizawl Maxi Cab Service Welfare Committee chuan tukin dar 10:00 aṭang hian PD Sena Hall, Champhai Kanan Vengah Annual General Conference an neih dawn avangin vawiin leh naktuk hian Maxi Cab Services a awmdawn lo va, mipui hriatthiamna an ngen. Chawhma lamah rorel hun hmangin, Agenda 5 : Champhai Traffic Police ten Champhai to Aizawl Maxi Cab Service timing chungchanga hma an lak dan, Rate ennawn, Stand chungchang leh annual fee lak dan tur chungchangte an rel ho dawn a ni. 

QUARTER FINAL :
Champhai District Inter High School Quiz 2017 chun nizan hmasa khan second round zawh fel a ni a, team 8 an la dam. Nizan hmasa khan match 4 zawhfel a ni a, heta ṭang hian team 4 te chuan third round an lut a ni. 3rd round hi zanin hian neih a ni dawn a, intum turte chu : BC Lalthlamuana English Academy ll leh PES Khawzawl Vengthar ll; Govt. Bungzung High School leh PES Khawzawl ll; Bethel Mission School I leh PES Khawzawl Vengthar I; PES Khawzawl I leh St.Joseph School, Khawzawl l te an ni.
3rd round-ah hian an zirlai aṭangin zawhna pangngai 5 an chhan bakah zawhna inhlanchhawn theih 5 an chhang tel dawn a. An zirlai aṭangin Visual 1 leh GK atangin 1 bakah GK leh audio zawhna pakhat theuh an chhang tel dawn bawk a ni. 3rd round aṭang hian team 4-te chuan final an lut ang a, karleh Thawhṭanni zanah final hi neiin quiz hi khar a ni ang. He intihsiaknaa pakhatna hian Rs. 20, 000 leh citation an dawng ang a, pahnihna hian Rs. 10,000 leh citation dawngin pakhatna leh pahnihna school te hnenah memento hlan a ni bawk ang.

PAWL A TLA ṬAN TA:
Champhai zawla loneitute chuan buh seng mekin hmun thuma ṭhena hmun hnih te chuan an seng zo tawh a, pawl a tla ṭanta. Champhai zawla loneitute chuan buh seng mekin buh thar hma ching hote chuan an seng zo thawkhat tawh a, thar tlai chingte erawhchuan an la seng lo thung a, tunah hian hmun thuma thena hmun hnihte chu an pawl tla fel tawh a. Nimin thleng khan buh la zai lo la awmin ruah a tla a nih loh chuan tunkar chhung chuan buh te hi zai zawh tawh beisei niin karleh khi chuan lo neitu zawng zawngte tan pawl tla fel tawhin a rinawm bawk. Buhte hi khawl hmanga seng awm bawk mah se, mihring tha deuh veka seng niin, Kumin hian beisei aiin buh thar a hlawk lo hle a, loneitu tam zawkte chuan nikuma an buhthar an pha lo va, loneitu ṭhenkhat erawhchuan nikum lam aiin an thar hlawk thung ani.

0 comments: