ni 21.11.2017 (thawhlehni) 

PWD IN KAWNG SIAMṬHA:
Champhai PWD chuan Champhai khawchhung kawng thawmthat ngai te a thuam tha mek.
Kar hmasa ningani atang khan kawngpui chhe zual lai te chu siam tha tura hma lak tan a ni a, Zotlang leh Ruantlang inkar kawng chu siam zawh fel tawh niin tunah hian Taxation Office kawng leh Venglai Presbyterian Kohhran kawng chhuk thla chu thawm that leh mek a ni bawk. Heng hmun bakah hian kawng siam that tur hmachhawp a awm nual a, Govt. Champhai College, TT Road, Vety Road leh Zote kawng te tun hnaia siam that tura ruahman sa te an ni a, Champhai khawchhung mai bakah District chhung khaw hrang hrang kawngte siam a ni dawn bawk a ni.
Kawng siam that na tur sum hi NEDP atanga an hmuh niin khawchhung chei that na atan hian cheng Nuaih 71.57 hmuh a ni a, District huam chhung khaw hrang hrang siam tahtna atan hian cheng Nuaih 94 hmuh tawh a ni a, kawng chhiat dan a zirin sum hi hmuh belh a la ni thei bawk a ni.
Pu C. Lalrinsanga SDO chuan mipuite chu kawng chhia veitu chauh ni lova, a siam that kawnga hmala tu ni turin a chah a, kawngpui a motor silna thli luang la awm thin te hian kawng a ti chhe hma a ni a ti a, insa mek te'n kawngpuiah Rod chhut ngil kan la ching fo te hian harsatna min thlen thin avangin mipuite'n kan kawngpui a lo that rei zawk na atan dim dawi zawk a enkawl a, kawngpui chhiatna tur engmah ti tawh lo turin a ngen a ni.
KUM 14 HNUAILAM INKHEL:
Inter District Sub Junior U-14 Football Championship vawi 13 na chu vawiin hian Chhangphut Field ah khelh tan a ni dawn.
Inter District Sub Junior U-14 Football Championship hi Mizoram District hrang hrang aiawhte chuan an khel thin a, kumin atana District hrang hrang aiawhte pawh in Champhai an lo thleng fel tawh a, a thleng tu CDFA pawh Tournament tan tur hian a inpeih tawh bawk.
CDFA hian academy a kalpui mek a, grassroot football training ah naupang 70 training a pe mek bawk. Inter District Sub Junior hi under 14 te inelna lian ber a nih a vangin district tinin an players tharual an tir thin a, tunah hian Mizoram District hrangte an tel kim dawn a, heng mikhual te hi football club hrang hrangin an thleng hlawm a.
Age level intihsiakna ni mahse Mizoram hmun hrang hrang atanga players tharual intihsiak tur an nih avangin a hmuhnawm hle beisei a ni.
Champhai DFA players turte hi Chhangphut Field ah camp neiin zing leh tlaiah training an kalpui a, veng leh khua hrang hrang atangin player te hi lakkhawm niin AIFF D license neipha Lalfakzuala Vengthlang North in a enkawl a ni. District hrang hrangte hi Pool hnihah then niin Pool A -ah Aizawl, Kolasib, Siaha leh Serchhip District te an awm a. Pool B ah a thlengtu Champhai, Lunglei, Mamit leh Lawngtlai District te an awm bawk. Pool a point hmusang pahnihte'n semifinal an lut dawn a ni. Vawiin dar 12:30 ah Aizawl leh Kolasib an inkhel ang a, chawhnu dar 2:30 ah Siaha leh Serchhip an inkhel bawk ang.

BIAK IN HAWNG DAWN :
Niminpiah khan Champhai Zotlang Presbyterian Kohhran atanga indang Zotlang North Biak In hawnna hun hman a ni.
Hawnna hun hi Champhai South Presbytery Moderator Pastor Lalnunmawia Pachuau chuan kaihruaiin Kohhran hmel thar kan hmu thei hi hmasawnna ropui tak a ni a ti a, he Kohhran thara lawi tu te chu rinawm taka awm tur leh an theih ang tawkah rawngbawl hna an ko a tla te hlen chhuak turin a chah a, Biak In thar hi a hawng a ni.
Hawnna Inkhawm tawi neih zawhah Biak In chhungah Biak In thar lawmna inkhawm neih chhunzawm nghal a ni a, Zotlang Kohhran te chuan an Biak In kharin Zotlang North Biak In hawnna lamah an kal vek a, zaipawl leh thusawi ngaihthlak thin niin Biak In thar lawmna hun hi Chawhnu Inkhawm thlengin hman a ni.
Biak In sak na atan Synod atangin cheng nuaih 15 an dawn bakah Tualchhung Kohhran sum cheng nuaih 124 sang 4 475 an seng a, Biak In sak na atan a an sum sem zawng zawng hi cheng nuaih 139 sang 4 475 a ni.
Biak In tharah hian Kohhran In 200 vel bawr indangin Dan zawh kim 500-700 inkar vel lawi thei tura beisei an ni a, Kohhran Upa 7 leh Tualchhung Upa 1 an nei bawk a ni. Nizan atang khan Biak In thara lawi te chuan Kohhran Inkhawm pangngai an nei chhunzawm nghal tawh dawn a ni.

PAVALAI INTAWK KHAWM:
Tuipuiral Presbytery Inkhawmpuiin a lo rel tawh angin nizanhmasa atang khan
Tuipuiral Presbytery Pavalai Meet vawi 1-na chu Khawbung Vengpui
Kohhranah neih a ni.
Kumin 2017 October thlaa Tuipuiral Presbytery inkhawmpuiin a lo rel tawh angin, tlangram buhseng zawk November ni 19 Pathianni hmangin Tuipuiral Presbytery Pavalai inkhawmpui hmasa ber chu Khawbung Vengpui Kohhran Biak In-ah nghah a ni a. Presbytery huam chhunga Pastor leh
Pro Pastor te chu Speaker-a hmangin, thupui chi hrang hrang — chhungkua, khawtlang, ram leh kohhrana pavalaite mawhphurhna
chungchanga Pathian thuchah ngaihthlâk a ni a. Kohhran hrang hrang Pavalai Zaipawl te’n inkhawm apiangin Fak Hla an rem bawk a ni.
Pavalai Meet hi Presbytery Moderator Rev. Lalhunliana Royte-in a kaihruai a, Presbytery puipa dangte'n an tawiawm bawk a ni. Tuipuiral Presbytery huam chhungah hian Pastor Bial 5 - Khuangleng, Vanzau,
Vaphai, Farkawn leh Khawbung Pastorl Bial a awm a. Heng Pastor Bial 5 huam chhungah hian Kohhran 26, Branch Church 1 (Saikhumphai) leh Preaching Station 1 (Thinghrangkawn) a awm bawk a ni. Pavalai Meet-ah hian khawtlangin chhiat an tawh avanga tel thei lo Leisenzo Kohhran
tih loh chu an tel kim thei a.Palai riak lût 210 awmin lânga tel mi 50 vel an awm bawk a ni.

RAM HUMHALH NAN MEIHAWL KHUR TICHHE DAWN:
N.Diltlang khawtlang chuan an ram chin humhalh nan hma an la dawn ta.
Nimin zing dar 7:30 khan N.Diltlang Branch YMA RUN-ah khaw chhung paho kal khawm chuan, an ram chhung (Tuiṭhoh kam)a khaw dang mi ten meihawl an rawh chu rem ti lovin, ram ngaw chereu zel tur ven nan, naktuk Thawhlehni hian, khawchhunga mipa zawng zawng chhuah khawma, khaw dang mite Meihawl khur zawng zawng tihchhiatsak turin an rel.
N. Diltlang ram chhungah hian, khaw dang mi, meihawl rawh an awm nual a. Hei hi khawtlang VC, YMA leh MHIP Joint Committee chuan remti lovin, chawlhsan turin an ngen tawh a, ngenna pawisa lova tilui an la awm zel avangin, nimin zinga pa ho kal khawm chuan, Meihawl khur hi tihchhiatsak vek ni se tiin an rel ta a ni.
N. Diltlang ramin a huam chin, Ṭiau lui leh Tuiṭhoh luia nungcha engpawh, tûr chi hrang hrang leh Dynamo-a man khap tlat a ni a. Thupek awih lova tilui leh mante chu, an hmanrua hrensak leh thuneitute hnena report zel a nih tur thu kan thudawnna chuan a sawi.

0 comments: