ni 9.11.2017 (ningani)

MI 2882 MITHAR MI 609 PAIH :
Champhai District chhung A/C 5 huama Electoral Rolls khawihtu,  DEO, ER0, AERO leh BLO te chu Mizoram State Chief Electoral Officer (CEO) Pu SB Shashank (IAS) in Champhai DC Conference Hall-ah nimin khan a kawm a. A/C 5 huamchhunga Electoral Rolls Special Summary Revision 2018 kalpui anih dan tlangpui tarlang tura CEO in a ngen angin ERO leh AERO te bakah BLO ten an hmalakna tlangpui an tarlang.
Champhai District Electoral Officer leh DC Pu Vanlalngaihsaka kaihhruai he inkawmhona-ah hian CEO chuan India ramah inthlanna thianghlim leh felfai neih zel anih theih nan ER rintlak leh innghahna tlak neih a pawimawh thu a sawi a.  Champhai District chhung A/C 5 huama ER khawihtuten tha thlah miah lova, inpumpekna rilru puchung a thahnem ngai taka thawk tur leh hun bituk chhunga engkim peihfel thin turin a chah a.  Inthlanpui neih leh hma chuan tun hi ER Special Summary Revision neih hnuhnun ber anih theih thu leh Chief Election Commission in thupek a chhuah ang zulzui zel a kal a tul thu CEO chuan a sawi a.
India ram chu Democracy ram,  mipuiten ram kaihruaitu an aiawh tur an thlanna ram anih angin tun kum hnih/thum kal ta atanga khan khawvel thiamna hmangin Electoral Roll leh inthlanna hmanrua leh kalpui dan phung thar tha leh zanengkimgkhai hmuhchhuah zel a niin,  langtlang taka engkim kalpui chhoh anih thu CEO Pu SB. Shashank chuan a tarlang bawk.  Vawiin chhun khan Champhai District huam A/C 5 a ERO leh AERO te chu DC Conference Hall-ah Electoral Roll Special Summary Revision chungchangah zirtirna pek chhunzawm leh an ni.
Tuntum ER Special Summary Revision neih mekah Champhai District chhung A/C 5 huamchungah ER a Form 6 hmanga thunluh thar diltu mi 2882 awmin,  Form 7 hmanga paih diltu mi 609 an awm a,  Form 8 hmanga siamthat diltu mi 787 awmin,  Form 8A hmanga insawn diltu mi 181 an awm a ni.

BUHFAI AH LUNG TAM CHI RETAILER-AH :
Nimin khan Champhai North leh south Block MNYF te chuan Champhai Kudam an tlawh.
Champhai Kudamah hian niminpiah atang khan buhfai ala thleng char char a, heng buhfai thleng ah hian Refill a tam tih report an dawn bawhzui in nimin khan Champhai North leh South Block MNYF te chuan Kumdam-a buhfai thleng te hi an enfiah a, buhfai rawn thlengte hi a tam zawk chu refill a ni tih an finfiah a, Kudam-a Unload tawh te pawh a tam zawk chu Refill a ni a, unload loh Truck trip 3 chu Refill hlang a ni bawk. Congress Sawrkar hian Champhai mipuite hi khawilai Supply Kudam a buhfai bua ruhkhawm mai mai ei tawk chauhah min ngai em ni tiin sawrkar chu zawhna an zawt a ni.
Heng Buhfai Refill te hi Retailer te pawhin lak an hreh thin hle tih Retailer te chuan an sawi a, Buhfai Bag refill an lak ah hian lungte leh bawlhhlawh paih tur a tam thin thu an tarlang a, anmahni dawrtu mipui te lakah pawh an inthlahrun thin thu an tarlang a ni.
Hetih lai hian tunah hian Champhai Kudam-ah buhfai qtl 3000 unload tawh a ni a, unload loh ala awm bakah kawnga thang mek a la awm bawk. Buhfai rawn thleng te hi retailer te hnenah pekchhuah nghal zel a ni.

INHRIATSIAK TAN A NI TA :
RMSA leh CCN te tangkawpa buatsaih Champhai District Inter High School Quiz 2017 chu nizanhmasa atang khan tan a ni
Hawnna inkhawmah Pu C.Hualrikhuma, Dy DPC RMSA chuan thu a sawi a. Champhai District Inter High School Quiz hi zirna lama Champhai District hmasawnna tur liau liauva buatsaih a ni, a ti a, a rah chhuah chu kan hmu mek a, Quiz avang hian Champhai District matric result a thah phah hle nia hriat a ni a, hei hi a lawmawm hle a ni, a ti. Dy DPC RMSA chuan Quiz-a telte chu hlawk taka hmang turin a chah a, hei hi matric exam hmachhawn turte tana inbuatsaihna kawng tha tak niin, a tel ve lote pawhin quiz chu in lamah lo thlir a, an zirna puitu atana hmang turin a chah a. RMSA kalphung leh hmalakna te a tarlang tel bawk a ni.
Hemi zan hian match thum a awm a, team 9 te inlanin an zirlai atangin zawhna 8 leh GK zawhna 2 an chhang a ni. Zanin hian first round chhunzawm leh tur a ni a, match 5 a awm dawn a ni. First round-ah hian mark hmu sang 16 te chuan second round an lut ang. Quiz hi zanin dar 7 hian 1CCN ah live-a pek chhuah a ni ang.

THINGPUI LEH A HMEH A THLAWNIN :
Ruantlang Branch KTP te chuan an branch din champha vawi 59 na pualin nimin zingkar khan Ruantlang dawrkawnah a duh apiang te tan coffee leh a hmeh a thlawnin an sem a, mipuiin an hlut hle. Nimin chhun khan Champhai District Jail tlawhin tangte chu programe hmanpui rawngbawlna an nei zui bawk a ni.

LIRTHEI PART ZUAR ENFIAH :
Nimin khan Champhai District Consumer leh Legal Metrology te tangkawp chuan Champhai khaw chhunga lirthei part zawrhna dawr an endik.
District Consumer leh Legal Metrology te hi hmun hnihah inthenin lirthei part zawrhna dawr hrang hranga an thil zawrh te an endik a, dan anga hralh tur hralh si loh te, a man dik tak tarlan thai chhiat te chu an en ber a ni a, MRP anga zawrh chhuah te leh MRP thai chhia a an duh zat zat chhiara an hralh te chu an man sak a, heng an mante hi Legal Metrology Office ah dah rih a ni ang a, Hqrs lamah theuhluh leh a nih hnuah heng dan bawhchhia a zuar tute hi hrem an nih dan tur ngaihtuah a ni dawn a, cheng nuaih 3 thleng chawitir theih an ni dawn a ni.
Consumer leh Legal Metrology thawktute chuan mipui te chu an thil lei reng reng MRP aia sanga lei lo turin an ngen a, a zuartu te pawhin MRP ang thlap a an thil zawrh te hralh chhuak turin an ngen bawk.

EXCISE CHETVELNA :
October thla khan Champhai District Excise & Narcotics Dept te chuan MPLC Act hnuaiah thubuai 12 ziak lutin ND&PS Act hnuaiah thubuai 8 an ziak lut bawk.
Champhai District Excise & Narcotics Dept te hian October thla chhung khan Rakzu litre 321 an man a, IMFL Bottle 4, Beer um 10 leh Beer Canned 108 leh Ramdang Beer can 2 an man bawk a. MLPC Act hnuaiah thubuai 12 ziak lutin mi 14 an man bawk. ND&PS Act hnuaiah thubuai 8 ziak lutin mi 9 an man a, Heroin Gram 53.450 leh Alphrazolam tablet 490 an man bawk.

TLAWMNGAI PAWL IN TLAWMNGAIH CHHUAH :
Muallai ram, Lungphunlian a Pu Lalpianga thlawh-hma chu Lungphunlian Branch YMA te kaihhruainain khaw mipuiten buh an seng sak.
Pu Lalpianga nupui Pi Heleni hi thla hmasa mai khan nausen thla 9 mi pai chungin a eirawngbawl lai a luhai a tlu a. Eirawngbawlna thuk meiah a dul leh taksa dang na takin a kang a. Hun engemaw chen Champhai District Hospital-a enkawl a nih hnuah Aizawl Civil Hospital-ah refer a ni a. Pi Heleni hian tha takin naute kar hmasa khan Civil Hospital-ah a nei a ni.

DAWR THEIH TA :


Ni hnih chhung khawl upgrade avanga Champhai Post Office dawr theih lohva an inkhar hnuah nimin atang khan mipui dawr theihin an inhawng leh tawh tih thu dawn a ni.

0 comments: