ni 10.1.2018 (nilaini) 

BIATE MZP DIAMOND JUBILEE MLA IN HMANPUI :
         Nimin chawhma dar 10 khan Zialung Community Hall Biateah MZP Headquarter Biate chuan  Diamond Jubilee lawmna hun an hmanga. He hun hi Cooperation, Sericulture, Fisheries Dept changtu Minister leh bialtu MLA nibawk Pi Vanlalawmpuii Chawngthu chuan khuallian niin a hmanpui.
         Khuallian Pi Vanlalawmpuii Chawngthu chuan MZP Hqtr. Biate ten Pathian kaihhhruaina dawnga Diamond Jubilee an lawm thei  chu a lawmpui tak zet thu a sawi a. Lawmna hun hmang tura Zialung Comminity Hall-a kalkhawm zirlaite chu thiamna tak tak zirchhuaka nakin huna ram leh hnam innghahna nih tum theuh turin a fuih a. Zirlai nih chhung chuan social media hman kawngah chin tawk neih a ngaih thu leh thu dik leh diklo thlifim thiama, belhchian dawllo thehdarhlo turin a chah a. Zofate inpumkhatna kawnga Mizo Zirlai Pawl (MZP) hmalakna chu fakawm tiin, Zohnahthlakte chu a takin awmho thei rihlo mah ila rilru hmunkhat pu chung zela kan thawhho a ngai a ni, a ti a. Bialtu MLA chuan zirlaite chu nupui pasal zawn kawngah fimkhura mahni hnampui ngei nei turin a chah a. Hnam tidaltu niloa chawinungtu nih a ngai a ni, a ti. Hnam changkang leh ropui apiangin zirna an ngaihpawimawh thu sawilangin zirlaite chu zirna ngai pawimawha, Mizoram tan engnge ka thawh ve theih ang tih ngaihtuah thin turin a chah a. Zirna lama tan lak a tul thu sawiin hemi kawngah hian zirlai hruaitute chu hmahruaitu entawntlak leh kawng kawhhmuhtu an nih a ngai a ni, a ti a. Kalkhawmte chu ngaihsan tur  dik tak ngaihsanna chang hre tura a duh thu sawiin, dik taka thawka mahni kutkawih leh thawhchhuah ngei mai hmanga nung thinte kan ngaihsan a hun tawh a ni, a ti a. Hun vawn dik kawngah nasa zawka tan lak angaih thu tarlangin zirlai hruaitu leh zirlaite chuan hun vawn dik kawngah hmahruaitu an nih a tul thu a sawi a. Ram leh hnam humhalh a tul thu sawiin zofate hian kan ram neih chhun hi kan humhim angaia, anih loh chuan tu fa mahin min tih sak dawn lo a ni, a ti a. Diamond Jubilee hmang tura kalkhawmte chu hun hlimawm tak hmang turin duhsakna hlan nghal a ni.
         Nimin chawhma Diamond Jubilee lawmna hun hi Pu H.Laldinpuia, President MZP Hqtr. Biatein a kaihruaia. Diamond Jubilee puala buatsaih Zialung Souvenir chu Khuallianin a tlangzarha. MZP Hqtr Biate ten chawimawina Pu R. Lalremkunga President, Biate Branch YMA leh TV L Ramdinliana Renthlei, Presodent MZP Gen. Hqtr-te hnenah an hlan a. He hunah hian Pu L.Malsawma Colney, Adviser, MZP Gen. Hqtr leh Tv L. Ramdinliana Renthlei, President, MZP Gen. Hqtr-te pawhin thu an sawi bawk a ni. Chawhnu lamah programme hi chhunzawm niin hruaitu hlui chawimawina neih a ni a. Hemi zawhah hian Diamond Jubilee puala buatsaih ruai theh niin zan lamah zirlaite pualin hun hlimawm tak hmanho leh a ni.  
        Nimin zing dar 7 khan Diamond Jubilee hriatrengna lungphun chu Tv L. Ramdinliana Renthlei chuan a lo hawng tawh bawk a ni. Nimin Diamond Jubilee lawmna hunah hian zirlai, khawtlang hruaitute leh MZP hruaitu thahnem tak an tel a ni.

REPUBLIC DAY LAWM DAN TUR REL:
         Nimin khan Champhai DC Conference Hall-ah District Level Republic Day Celebration Committee thutkhawm ani. He hun hi DC Vanlalngaihsaka'n a kaihruai a. Kumin Republic Day lawmna Champhai a neih tur chu ropui taka hman nise tiin he thutkhawmnaah hian rel ani. Republic Day hmanna atan Chhangphut Field ruat a ni a, Chawhma dar 10:00 ah Republic Day lawmna tan tura tih a niin, Hnam puanzar pawtpharh turin Champhai DC Vanlalngaihsaka chu ruat a ni a; At Home chu DC Bungalow-a neih turin duan a ni bawk.
        Champhai a Republic Day ropui taka lawm a nih theihna tura ruahmanna hrang hrang duanfel nghal a nih bakah Champhai a Sorkar Department te mawhphurhna leh chanvo nei turte ruatfel nghal a ni a. Republic Day lawmna senso phuhrukna turin Champhai a Sorkar Department hrang hrangte thawhlawm pek dan tur pawh rel fel nghal a ni. Parade Contingent Armed &
Unarmed bakah School naupang atangin Contingent atam thei ang ber tel thei tura beisei a niin, Pipe Band pawh awm thei tura beisei a ni a. Republic Day lawmna puala Champhai District FootballAssociation in Football Tournament a buatsaih chu Final khelh a ni bawk ang.
       Mawhphurhna hetiang hian siam a ni a. Decoration DC Office, Seat arrangement DC + College, PHE  tui, Health Deptt First Aid duty. District Education in School Parade Contingent, Education + Principal, HSS + Principal Govt Champhai College + SE PHE in Pipe Band. SP + DEO in Parade Judge. Prize 2000/1500/1000. Arm Contingent 2nd IR Hqrs. Khawzawl beisei. Govt. Chpi College Principal-in Usher, P&E in Power supply, UD&PA in Field & a chheh vel tihfai. SP Office Line marking; Horti Decoration; 10 AR in Tent (Puan in) ; Sound System I&PR + CDFA, Announcer Nl. Zairemtluangi Khiangte leh Tv. F. Ramfangzauva
KHAWCHHUNG KAWNG SIAM:
         PWD chuan khaw chhung kawng siam leh thawmthat hna chu a thawh chhunzawm mek.
        Chang Nuai 272 hmanga Champhai khaw chhung leh thingtlang kaw kawng siam hna an thawh mek chu hunpui chawlh an hman hnuah Nilaini kalta atang khan kawng siam that hna hi thawh chhunzawm leh a ni a. Cheng Nuai 117 senga siam tur hmun 8 atangin Sasaw, Khawbung kawng te, Khawbung Mini Sport Complex kawng te, Keitum, Chekawn, Khawbung, Mualkawi kawng te, District Hospital leh Falkawn kawng te chu siam that hna thawh mek a ni a. Khuangleng, P&E Sub-Station kawng leh Ruantlang kawn leh World Bank inkar kawngte chu siam zawh tawh a ni a, Hnahlan Presbyterian Kohhran leh Community Hall inkar leh Tlangsam kawng te chu la khawih rih loh a ni thung.
        Cheng Nuai 55 senga siam tur hmun 7 ah hmun 5, Govt. Champhai College chhung kawng, New Saron kawng te, Venglai leh Vengthlang inkar te, Zotlang leh Ruantlang inkal pawhna kawng te leh Vety kawng te chu thawm that ngai lai te thawm that zawh fel tawh a ni a, hetihlai hian TT Road Vengsang leh Zote khawchhung kawng cheithat hna erawh thawh a la ni lo thung.
        Zotlang kawng leh a khaw chhung kawng hrang hrang hmun 9 te chu nikum October thla khan Cheng Nuai 100 senga siam zawh tawh a ni tih Er. Vanlaldika, EE PWD chuan a sawi.
FOOTBALL TOURNAMENT KALPUI ZEL:
Nimin khan CDFA buatsaih Republic Day Football Tournament chu khelh chhunzawm leh a ni.
         CDFA-in 2nd Div Club te tana a buatsaih Republic Day Football Tournament chu Chhangphut Field-ah khelh tan a ni a, nimin khan Match 4 awmin Venglai FC leh Kahrawt FC te inkhelin Venglai FC te chuan si 1 faiin hnehna an chang a. TMFC Melbuk leh Ngaizawl FC te match hnihnaah inkhelin TMFC te chuan si 6 faiin Ngaizawl FC te an hneh bawk. Match thumnaah Zotlang FC leh Kanan FC te inkhel ve lehin Kanan FC  te chuan si 3 faiin Zotlang FC te an hneh a, Match 4 naah New Champhai FC leh LKS Hnahlan te inkhelin 1-1 in an inhneh tawk a ni.
      Vawiin hian Republic Day Football Tournament chu Chhangphut Field-ah khelh chhunzawm leh a ang a, Match khatna a Tlangsam leh Hmunhmeltha, Match 2 naah Ruantlang leh Mualkawi, Match thumnaah Vengsang FC leh Zote FC Match 4 naah Vengthar FC leh ZOFEC, Zokhawthar te an inkhel leh dawn a ni. 

TOURNAMENT UPA BER HAWNG:
       Nimin khan Tuipuiral Annual Meet 45-na chu Sazep Play ground-ah tan a ni a, Bialtu MLA T. Sangkunga'n a hmanpui.
        T.Sangkunga chuan Tuipuiral Annual Meet ah hian duh ang thlapa thutlukna fel neih a harsa thei a, tihdik loh palh leh chetsual palh chu mihring nih chhungin a awm ngei ang tih sawiin, a theih chin chinah tun tum Annual Meet-ah hi chuan Official Ieh Player-te a dik thei ang bera thil ti turin a chah a. A bial chhunga inunaunate a chhe palh ang tih hlau tak a, unau an nih inhre renga infiam tur leh an infiamna hmanga inunauna vawng nung zel turin a fuih a; Bial chhung mite tan Silpauline a sem bawk.
        T.Sangkunga chuan Sport Minister chak leh rem hria kan nei a, infiammi tam takin eizawnna tham hlawhtlinna an hmu tawh a, hei hi hriain sorkar chuan infiam mite tan hma a la zel dawn, a ti. Tuipuiral Annual Meet hi Mizoram chhunga Tournament upa ber leh hlun beta ngaih a ni a. Tuipuiral (East Tuipui bial) -ah hian khaw 27 awmin kumin hian khaw 17 atangin football leh Volleyball team 17 an tel a ni.

0 comments: