Skip to main content
ni 10.2.2018 (inrinni) 

LO HMUAK:
Headquarter 23 Sector Assam Rifles (Mizoram Range) bultuma  buatsaih tak National Integration Tour 2018 hmanga India ram khawpui Delhi-a kal zirlai 18 leh zirtirtu  2 te lo lawmna leh hmuahna programme tawi chu nimin chawhma dar 10 khan Assam Rifles Helipad, Champhaiah neih a ni a. 
             National Integration Tour 2018 in a tum  ber chu zirlaite thinlunga hnam impumkhatna, India ram chiang zawka hmelhriattirna leh zirlai puitu
hmanrua atana tih a ni a. Tour kharna hunah hian Champhai SP Pu Brijendra Kumar Yadav, Brigadier Brijendra Singh, Commandant 10 Battalion Assam Rifles, zirlai hruaitu leh zirlai chhungte an tel a ni.
              Champhai SP Pu Brijendra Kumar Yadav chuan Zirlai National Integration Tour-a kalte chu an thil hmuh leh zirchhuahte a taka nunpuia tangkai thei ang bera hmang thiam thei turin a fuih a. Hetiang ang hun tha zirlai naupangte tiphura cho na pe thei Tour hlawhtling tak huaihawt tu Assam Rifles-te inpekna leh thil phalna chu fakawm a tih thu a sawi a.
             National Integration Tour-a kal te hi January ni 21 khan Champhai DC Pu Vanlalngaihsaka chuan Assam Rifles Helipad Champhai atangin a vai liam a. Silchar atangin train-ah chuangin New Delhi chu January ni 25-ah an thleng a. Delhi an cham chhung hian hmun pawimawh tak tak fangin Republic Day lawmna New Delhi a neihah an tel ve bakah India President Ram Nath Kovind chu January ni 31 ah a chenna in Rastrapati Bhavan-ah an hmu a. President hian zirlaite tan thingpui ruai buatsaih sakin zirlaite chu an zirlaiah rilru pe chunga nasa zawka tang sauh sauh turin a fuih a ni.
         Tour kalte hian Union Minister of State for Home Affairs Kiren Rijiju an kawm bakah Indian National Shooting Team-te pawh hmuh pui an ni a. Heng bakah hian India Gate, National Art Gallery, Rail Museum leh Humayun’s Tomb te pawh fan kual pui an ni bawk a ni. Aizawl an lo thlenin DIG, Assam Rifles  hovin an lo hmuaka , Mizoram larsap nen pawh Tour team te hian inkawmna hun hmangin report -e a hnenah hian an pe  bawk a ni.
         January 21 atanga February 8 chhung khan 23 Sector Assam Rifles chuan Mizo zirlaite tan National Integration Tour a buatsaih a. He tour-ah hian Aizawl District, Lunglei District, Champhai District leh Serchhip District atangin pawl 8 atanga pawl 10 zirlai mipa 9 leh hmeichhia 9 bakah zirtirtu pahnih an kal a. Assam Rifles lam aiawhin Major Dhruva Gaur leh Sub. Manvar Singh-ten an ho a ni.

JNV BUILDING SAK CHAWLHSAN TUM :
         JNV Khawzawl Building sak hna chawlhsan anih chungchangah leh JNV Contractor ten an Bill lak turte an lak theih loh vanga lungawi lohna lantirnan JNV Khawzawl Building khar an tum nia awm chungchangah nimin Ningani tlai khan Khawzawl Joint Students' Union hruaitute an thukhawm.
           Khawzawl khawpui chhunga zirlai pawl hrang hrang - MSU, MZP leh Khawzawl Students Association (KSA) leh JNV Building satute inkawmhonaah hian JNV Contractor te chuan an harsatna tawh mekte chu zirlai hruaitute hi an hrilh a. Tunah hian JNV sak hna enkawltu, Working Agency MAMCO Managing Director in NVS, Delhi a dawr duh loh vangin an Bill hmuh tur neihte chu an hmu thei lova, kum 2013 atangin Bill hi an la tawh lova, tuna NVS a sum awmsa pawh an la thei lova. Hemi chungchang hi Chief Minister Pu Lal Thanhawla leh Governor Lt Gen (Retd.) Nirbhay Sharma te hnenah pawh an thlen tawh thu leh Chief Minister in hma a laksak chung pawhin MAMCO Managing Director hian hma a la duh chuang lo tih sawiin hetiang anih vang hian an harsatna sutkian anih theihna tura kawng awm chhun nia an hriat, JNV Building khar turin hmalak an tum ta tih an sawi a. JNV in Khawzawl Judo Hall an luahlai chu a chhiat em vangin leh zirlaite tan pawh a him loh avangin JNV Building thar an sak mek chu kum 2016 November thla khan JNV hian an luah lut tih sawiin tunah hian Building thar hi luah lut tawh mahse Dan ang takin inhlanchhawnna an la nei lova, hei vang hian Dan angin tuna JNV Building luahlai hi an kut a awm ala ni a. Hei vang hian an harsatna tawh meka MAMCO Managing Director in hma a lak sak theihna tura nawrnan JNV Building khar hi an tum ta tih an sawi a ni.
           Khawzawl Joint Students Union hruaitute chuan JNV Contractor te chu zirlaite hma khua ngaia JNV Building kharsak lo turin an ngen a. An harsatna tawh mek chu chin fel anih theihnan leh an hnathawh chawlhsan laite pawh an chhunzawm thuai theihna turin an theih angin hmalakpui an tum thu an sawi a. Chief Minister Pu Lalthanhawla leh JNV kaihhnawih Sawrkar hotu dangte pawh a tul anga hmalaksak turin dawr an tum tih JNV Contractor te chu hrilhin an hmalakna ngaichang turin an ngen a. JNV Contractor te pawhin zirlai hotute ngenna hi pawmin, KJSU hruaitute hmalakna ngaihchan rih an remti ta a ni. JNV Contractor te hian nimin chawhma lam khan Champhai D.C. Pu Vanlalngaihsaka, IAS pawh hmuin an harsatna tawh mekte sawipuiin an hmalak tum dante an hrilh a, D.C. hian JNV Contractor te chu School khar lo turin alo ngen a ni.

CTU IN MOTOR DANG :
        Nimin atang khan Champhai Transport Union (CTU) te chuan Zokhawthar atang bungraw phurh chhuah tur Mualkawi daiah an dang.
       Champhai Transport Union te'n kan palai an hrilh danin January ni 17 ah Champhai Transport Union (CTU) leh Zokhawthar Transport & Worker Union-te nen inremna siamin Zokhawthar atanga bungraw phurhchhuah tur te common seniority a phurh chhuah nise tia inremna an siam laiin ZTU lamin seniority a ko lovin an mahni duhsak zawng phurh tirin hma miim an sawi a, CTU te hian ZTU lamin an duhsak zawng zawng bungrua an phurh tir mai chu kalphung fel lo nia hriain January ni 31 ah ZTU hnenah rawtna thar an siam leh a, hei hi ZTU lamin pawm lovin CTU nen an thawh dun loh thu leh ZTU hnuaia CTU ten bungrua an phurh ve phalsak chauh an nih thu an lo sawi ta niin CTU te chuan an sawi a, hei hi duh lovin CTU te hian ZTU nen a an in zawmna zawng zawng chhu chatin Zokhawthar atanga bungraw kal tur reng reng an lo dang ta a ni.
        January ni 15-17 inkar khan CTU leh ZTU inkarah hian buaina a lo awm tawh avangin bungruate hi dan tawh a ni a, hemi hnuin hian inberemin inremna siam a ni a, heng inremna an siamte hi ZTU lamin an bawh chhiat tak avang leh CTU ten tha taka thawhpui a an inngaih laia ZTU lamin thawhpuia an ngaih tak loh avangin bungruate hi dangta niin an insawi a. Inremna tluantling leh tha zawk a awm hma chu Zokhawthar atanga bungraw phurh chhuah reng reng dan tlat an tum thu CTU hruaitute chuan kan palai an hrilh.

PRINCIPAL TE ZIRTIR :
         Ni hnih awh Measles Rubella (MR) Vacccination Campaign kalpuina chi khat Sensitization Workshop, Champhai Block leh Khawbung Block huamchhunga zirna In-a Principal-te tana buatsaih chu nimin khan I&PR Auditorium, CHANEM Building, Champhaiah zawh fel a ni.
           MR Vaccination campaign hi April ni 16 atanga tan tur a ni a. Campaign hian kar nga (5) chhung a awh dawn a ni. A tir kar hnih chhung hi School-a neih tur a ni a, kar hnih dang hi khawchhung (community) a neih tur a ni. A tawpna ber kar ngana hi naupang vaccine pek hmaih ho thual nawnna (Sweep-up) atana a hman tur a ni a.
          He Vaccination campaign hi hlawhtling taka kalpui anih theih nan Champhai District chhunga Zirna In tina Principal zawng zawngte Sensitization Workshop neih pui tum a ni a. Hemi bawhzuina kal zelah February ni 6, 2018 khan Khawzawl block leh Ngopa block huamchhunga Zirna In-a Principal theuhte chu Khawzawl Vengthar YMA Hall-ah koh khawm niin an tan hian Sensitization Workshop buatsaih a lo ni tawh bawka, he hunah hian zirtirtu 163 an kal khawm a ni.
          Heng Sensitization Workshop-ah te hian Resource person Dr. R. Lianmawia, SMO/DIO leh Dr. Benjamin Laruatdika, DRCHO-te hnen atangin Measles (Sentut) leh Rubella (German Sentut) chungchang leh MR-Vaccination campaign kalpui dan tur chungchangte ngaihthlaka zir ho a ni.

KHAWTLANG TAN LUANGCHHUAK :
         Nimin chawhma dar 10:30 khan Headquarter 23 Sector Assam Rifles hnuaia awm Thundering 10th Battalion Assam Rifles, Champhai chuan khawtlang tana luanchhuahna ‘Civic Action Programme’ chi khat an kalpuina atan Solar Power Plate 12, Battery 3 leh Inverter 2, avaiin cheng nuai 2 man hu zet chu Genesareth Gospel Home, Champhai hnenah an hlan.
          Hlanna hunah hian Champhai SP Pu Brijendra Kumar Yadav, 10th Battalion Assam Rifles Commandant Brigadier Brijendra Singh, Home-a awm naupang leh thawktute an tel a ni.
           Assam Rifles thuchhuah in a tarlan dan chuan Assam Rifles-te chuan chanhai leh fahrahte tan hnathawh zel an tum a, harsatna vanga an tum leh chak zawngte an thlen phak loh hi Assam Rifles chuan dik a ti lova, puih an ngaih changin an phak tawkah chuan Assam Rifles-te chu an in hawng reng a ni.
          Assam Rifles chu tlangmite thian anih angin a theihna ang anga zokhawmite tanpui  leh inthianthatna thuk zawk siam hi a tum a ni.
          Genesareth Gospel Home, Champhaia thawktu leh Home-a enkawl mek naupangte chuan 10th Battalion Assam Rifles-te tanpuina leh tuamhlawmna avangin an chungah lawmthu an sawi a ni.

DAMDAWI IN FAI LAWM:
         Khawzawl Damdawi Ina thawktute chuan niminpiah khan Kalyakalp hnuaia faina leh thianghlimna kawnga Damdawi In intisiakna, Champhai District huamchhunga neihah Public Health Centre zinga pathumna an nih lawmna an nei.
        Damdawi In fai pathumna nih lawmna hi Pu K.C. Lalrouzauva, H/S in kaihhruaiin Khawzawl SDO (Civil) Pu Lalremruata Sailo, MCS in khuallian niin a hmanpui a. Thu sawiin khuallian chuan Khawzawl Damdawi In in Damdawi In fai inelnaa pathumna an ni thei chu chhuanawm a tih thu leh faina leh thianghlimna kawnga hmala chho zel a, Damdawi In dangte entawntlak nih tum turin a fuih a. Faina leh thianghlimna kawngah India ramin nasa takin hma a la, Khawzawl khawpui pawh faina leh thianghlimna lamah hma kan sawn chho hle nia sawiin khawpui fai ni tura hmalak mekna, Swachh Survekshan 2018 chungchangah pawh Department hrang hrang leh NGO ten SDO (C) leh BDO hmalakna turah dah lovin, a neitu thinlung pu a hmalatu nih kan tum a tul zawk a ni a ti.
          Niminpiah a Damdawi In fai lawmman dawn lawmnaah hian Khawzawl Damdawi Ina Medical Officer Dr. Thanmawii bakah Khawzawl Joint Village Council aiawhte leh Joint YMA aiawhten thu an sawi a. NGO hruaitute leh MJA Member ten he hun hi hmanpuiin tlaiah chawhlui an kilho a ni.

HRIATRENGNA LUNG PHUN :
          Kum 2015 March ni 3 a Zokhawthiang daia HPC (D) helpawlten a thian dangte 2 nena an kahhlum, Sakawrdai Police O.C. S.I. Zoramthara Khawlhring, Pu K. Hrangawna fapa, Khawzawl Dinthar veng lung chu niminpiah khan phun a ni.
         S.I. Zoramthara Khawlhring te HPC (D) helpawlin an lambun tuma MLA 3 tel ve zinga pahnih, MLA Pu R.L. Pianmawia leh Minister Pi Vanlalawmpuii Chawngthu te bakah IGP Pu Lalrammawia leh S.I. Zoramthara thawhpui Police Officer engemawzatin an telpui a. MLA 2 - Pu R.L. Pianmawia leh Pi Vanlalawmpuii te hian HPC (D) helpawlten an lambun laia an thil tawnte sawiin S.I. Zoramthara leh anmahni vengtu Police te huaisenna leh inpekna ropui an tih thu an sawi a. IGP Pu Zorammawia pawhin thu sawiin S.I. Zoramthara leh a thiante 2 thihna vang hian Mizoram Sawrkar chuan ral kut a boral Police te chu cheng nuai 1 a ral zel turin kalphung thar a duang a, hei hi vawiin ni thlengin hman chhoh zel a ni a ti. S.I. Zoramthara pa Pu K.Hrangnawna pawhin thu sawiin a fapa thihna chuan Mizoramah remna leh muanna thlen se a duh thu a sawi a ni.

CHAMPHAI TLANGVAL TELNA CHAMPION:
            Khello India boys football tournament khelh zawh takah Champhai Naupang 2 F. Malsawmzuala leh F Lalnuntluanga te telna Mizoram Team te chu an Champion.
           February ni 2 atang khelh tan Khello India Boys football Tournament chu Niminpiah tlai khan Delhi ah khelhzawh a ni a, Finalah hian Champhai  District naupang pahnih F.  Malsawmzuala New Champhai leh F Lalnuntluanga Ngopa te telna Mizoram leh Punjub inkhelin Mizoram hian 3-2 a hnehna changin an champion a, He tournament ah hian india ram state thlan bik State 8 an tel a, pool hnih ah min then Mizoram hi West Bengal, Haryana leh Kerela te  nen an ho a, Mizorma hian an match hmasa berah West Bengal 5-1 in an hneh a, Haryana 2-1 a hneh in Kerela si 5 faia hneh lehin Pool Champion an ni a Semifinalah a thlengtu Delhi si 5 fai bawka hnehin Final hi lutin Finalah Punjab hnehin an champion ta a ni. Mizoram player Lalnunzama chu Best player atan thlan a ni bawk.

Comments

Popular posts from this blog

Bethel YMA (BYMA)

BRANCH EXECUTIVE COMMITTEE NEIH A NI
Bethel. March.27Sunday) : Branch Executive Commiittee vawi thumna chu ni 24.3.09(Thawhleh) zanah YMA Office-ah neih a ni.
Branch Executive Committeee hi President Pu Lalsanglura Zote in kaihruaiin member sawm pariat an kal thei a, Pu C.Lalfaka Senior Adviser chuan Committee te tluang taka neih theih nan Pathian hnenah tawngtaina neiin rorel tan a ni.
Rorel I-na Kan Branch Vice President Pu S.Lalruatsanga chawlh dilna chu ngun taka sawi ho a nih hnuin a rawn dilna chu zahawm viau mahse tun atan chuan la pawm sak lo mai ni se an ti.
Rorel II-na Branch-ina a thunun mek Pu Nanghekmanga, Pi Nianglianchini, Pu Thangkhanlanga te ngaihdam dilna chu ngun taka ngaihtuah a nih hnuah an dilna pawm sakin thunun an nihna chu hlih sak a n ni.
Rorel III-na Central YMA atang Branch tina YMA chhang din theih ni se an tih chu kan Branch-ah pawh ngun taka sawi ho a nih hnuin kum 2009 atan kan Branch-ah pawh din ve nise an ti a, Section Wise-a din nise April thla chhunga …

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…
ni 14.2.2018 (nilaini) 
ZOKHAWTHAR ATANGIN FOREIGN BUNGRUA A CHHUAK TUR A NI LO :
Nimin chawhnu khan Champhai DC Charge lal mek tu Lalsangpuii Hmar chuan Zokhawthar Border Trade kaltlanga sumdawnna khawihtute chumeeting a neihpui.
He hunahhian Sumdawng pawl hrang hrang SITU, EXIM, ZTU leh CTU bakah YMA, Champhai Jt. VC leh MJA aiawhte an tel a. Lalsangpuii Hmar chuan Zokhawthar kaltlanga sumdawnnaah harsatna leh buaina awm thin chupawi a tih thu sawiin, hei hian nasa takin khawtlang a nghawng a. Chuvang chuan harsatna