Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

Vengchhung

Renewable Energy Day
Free Concert nen hmang dawn
Vengthlang,24th August (Pathianni) : Zirtawpni khan District Education Office Champhaiah Champhai District-in Rajiv Gandhi Akshay Urja Diwas, Renewable Energy Day 2008 hman dan tur ngaihtuahin Committee an thukhawma, kum danga kan hman dan lo ang deuhin tun kum hi chuan Dt.29.8.2008 (Zirtawp) zanah Free Concert neih turin an rel fel. Renewable Energy Day hi District dangah chuan a ni tak August ni 20 khan an hmang tawh hlawma, mahse he Day hi kar hnih huam chhung, eng hunah pawh hman theih a nih avangin Champhai District chu kan tlai deuh dawn ta a ni. Free Concert hi Champhai Town Hall-ah neih tura ruahman a ni a, inbuatsaihna peng hrang hranga hma latu tur pawh inruatfel nghal vek a ni bawk. Free Concert neih turah hian Champhai District huam chhunga zaithiam langsar deuh deuhte chu an sawm kim dawn hle a, a buatsaihtu tur lam an phur tawh bawka, pui tham deuh taka hman tum a ni.

Tanpuina dawng nual
Mautam tam tanpuina chu YMA Branch, V.C leh pawl hrang hrangten Central YMA hnenah an thehlut nuala, tanpuina an pek CYMA in a dawn tawh zawng zawng hi Rs.71820.00 zet a ni tawh.

Pukah lut
Nimin khan Champhai Youth Adventure Club te chuan Ngur kham pang fangin puk remchang an hmuh ang angahte an lutkuala, a kalte hian hlawkthlak an ti hle.
Central YMA Hruaitute
Hriatloh palh pawh awm thei, mamawhna kan neih thut thil thu-ah Central YMA-a kan Office Bearer-te kan rawn tarlang nawn mai mai e.
President : JH Zoremthanga
Vice Pre : Lal Chungnunga
Gen.Secy : Lalruatkima
Asst Secy : Lalbiakzuala
Treasurer : Vanlalrema Rokhum
Fin Secy : R.Lalngheta
Anni bakah hian Central Executive Committee Members mi 56 an awma, heng CEC te hi Aizawl khawpui Branch atang chauha inruat thin a ni.

Palai man bawk aw
Section tina agent leh Palai semtute khan a man rawn ngaihven leh tawh teh u. Ngaihsak deuh kan awm laiin ngaihsak tha tawk lo kan awm zauh zauh mai, tangsauh teh ang u khai.

Karlehah peih tum
Karleh chhung hian Runmawi sak mek chu peih hman tum a ni a, tunah hian kan hmalaknate chak taka kalpui mek a ni. Member-te kan thawh ve theih a awm a nih chuan thumah inthlahrung hauh lovin a thawh zel theih e.

Exam hnai
Karleh atang khian +2 chuan term exam an tan leh dawn ta a, zirlaite thahnem ngai taka zir turiin kan inngen a ni. Tin, zan lamah zirlaite tibuai zawnga bengchheng siam lo turin mipui te kan inngen nghal bawk e.

Lawmthu
Bookroom leh Pu Vanenga Varte in inkar kawng laih zauhnaa awlsam leh chak taka kalpui a nih theihnan Power & Electricity Department chuan Electric ban min rawn sawn saka, PHE Department-in pipe an phum tawh sa rang takin min siamrem sak bawka. Heng bakah hian Education Department leh PS-II Zirtirtute chungah kan Veng V.C leh kan Branch YMA te an lawm tak zet a ni.

Road Show nei
Nimin khan Air-tel chuan Vengthlang Biak In kawtah Road Show an neia, Sim Card Re.1 man leh 299 man an pe chhuaka, heng an Sim Card pekchhuahte hi an tinung nghal vek a ni. Regional Officer Pu David Lalmuanpuia hnen atang thu kan dawn danin Sim Card hi nimin bikah 400 an hralh chhuak a. Rs. 1 = 250, Rs. 299 = 100, Rs. 49 = 50.

Crusade nei
Thawhtan zan atang khan Vengthlang North Kohhranah zan tin Crusade neih a ni a, he Crusade hian zanin thleng a awh ang. Crusade hi Mizoram Synod-in tun kum November-a MLA Election neih hma ngeia, Kohhran zawng zawnga Crusade neih chhuah vek tura a hmalakna kal zel a ni. Speaker-te hian inthlanna thianghlim, dik leh felfai a awm theihna turin Pathian thu nena la kawpin an tlangaupui thin a ni. Crusade hi Electric leh Venglai Kohhranah te neih a lo ni tawha, naktuk zan atang hian Venglai kohhranah chhunzawm leh tur a ni.

Kahrawt tlawh
Thawhtanni liam ta zan khan Vengthlang Branch KTP te chuan Kahrawt Branch KTP an tlawha, inkhawm banah Fellowship-te neiin hun hlimawm tak an hmangho a ni. Hemi zan veka Vengthlang North Br. KTP ten Electric tlawh an tum chu Crusade vangin thulh a ni a, naktuk zan hian an tlawh thung ang.

Kawng siamrem
NREGS Ni 100 inhlawhna hnuaia Bookroom leh Pu Vanenga Varte in inkar kawng laihthat chu zawh thawkhat a ni ta. Fur lai a nih avangin a kawng hi a diak lo thei lova, he kawng zawhtute pawhin kawng tha kan neihna tur a ni tih hriain tuar hram hram ang u. He kawng laih hi fuh tak a ni.

Check-up turin kal
Pu H.Lalthlamuana, Neuva Section chu Zirtawpni khan Gauhati lamah in check-up turin a kal leh ta. Dam tha taka rawn haw leh turin duhsakna kan hlan e.

Comments