Skip to main content

SAWRKAR UISA THIAMTEN NIHNIH CHHUNGIN RUIHHLO NUAI 7 MAN

SAWRKAR UISA THIAMTEN NIHNIH CHHUNGIN RUIHHLO NUAI 7 MAN : Champhai Police-te chuan nihnih chhung lekin Champhai Town huam chhungah Ruihhlo Cheng Nuai 7 man zet an man. Champhai Police hotute hnen atanga thu dawn danin, Police leh CID (SB) tangkawpte chuan nimin-zing khan New Champhai-ah rinhlelh thila an dapna lamah Lalthluaii kum 48, Kaphnawka fanu, Aizawl Bawngkawn ni a inchhal hnen atangin Heroin Hawng 6 (Gram 176) an man a. Champhai Police Station-ah ruihhlo neitu a puh hi ND&PS Act tlawh chhanin thubuai an siam sak a ni. Ruihhlo leh a neitu a puh hi nimin khan District Court-a hruai a nih hnuah Champhai District Jail-ah dahluh nghal a ni a. Ruihhlo (Heroin) man tak hlut zawng hi tualchhung hralhna a chhutin Cheng Nuai 3 (Rs. 300000) man a ni  Nimin chawhma khan Police Petrolling chuan Springdale School piah, Zotlangah Zokhawthar atanga Champhai pana tlan, Taxi MZ04 4049 atangin heroin Hawng 3, Gram 42, tualchhung hralhnaa chhutin Cheng 1,50,000 man chu an man a, a neitu ni-a…

Thuziak

Khawtlang Tan Enge I Tih Theih
Thailunghnema

Kan pi leh pute hunlai chuan khawtlang venghimtu chu thalai rualte a ni thin. Chung thalai rual chuan an thiamna leh finnate hmangin an khawtlang an ti ralmuangin Lal-te pawh an mahni avangin an hmel a uang thin a. Tunah erawh chuan kan Zoram thalaite avangin kan khawtlang a him tawh lovin kan khawtlang a rum tak meuh meuh a ni.
Thalaite hian hma kan sawn loh chuan khawtlang hian engtikawng mahin hma a sawn thei dawn lo. Keimahni avangin ban tlangah puan an pho ngam tawh lo te hi inngaihtuah harhna tham a tling in ka hria. Heti ringawt maia thalaite kan awm ta hi engvang nge ni ta ber ang le. Tu pawh phurhna nge ni ta ang?
Nu leh pa : A bul berah chuan nu leh pate hi mawhphurhna kan laktir thei awm e. An fanau rochante hi khawtlang tana mi tangkai leh khawtlang innghahna tham khawp nih tir ai chuan khawi lai Officer emaw niturin min zirtir nasa lutuk ta. Chumi tur chuan thlawmngaihna inzirtirna leh khawtlang tana tangkai thei tura inbuatsaihna an thlah thlam tial tial a. Chu chuan kan Mizo Tlawmngaihna a rawn ti hniam hret hret bakah changkanna thaloah thalaite min hruai lut ta. Hnathawh kawr nena awm aichuan kekawr kapfual deuh haka kuhva dawra nileng a thut kan zak tawh lo zawk. Pathian ngaihsak aiin style thar kan ngaihsak zawk ta a nih hi. Chuvang chuan nu leh pate hian kan fanau rochan kan enkawl dan leh kan fuih dan hi i thlak tawh ang u.
Thalaite : Nu leh pate mawh han phurhtir vak thin mah ila thalaite hi kan pawimawh ber tho tho. Keimah ni nun theuh kan inven that tawk lo avanga heti khawpa kan khawtlangin a tawrhna chhan bulpui ber kan ni tih i in hrenawn teh ang u. Tunah chuan sa leh ral lak kan khawtlang venhim a ngai ta lo, amaherawhchu ruihhlo lakah kan khawtlang hi kan venhim a ngai ta thung a ni. Chumai bakah thalai Officer lian kan awmlo te hi i inngaihtuah chiang ang u. BA, MA ka zir zo tawh tih ringawt lo hian i duh tawh lovang u, Politics inrawlh ve theih tawh lohna Central Service-ah te hian lut turin i bei ang u. Mi tih atana kan dan ringawt lovin khawtlangin nangmaha beiseina sang tak a neih kha ti puitlin turin kan theih tawp i chhuah tlang ang u. Private sikul-a hlawh tlem uma kumtluana buaiah hian i lungawi tawh lovang u. Tlawmngaihna lah a kum telin a thlahniam tial tial nihian a hriat ta. Kan inlak changkan tak em avang hian khawhar inah pawh kan zai tha peih lo te hi i sim ang u. Kan tih theih tawhah theihtawp chhuahin khawtlang tan hian i thawk hram hram ang u. Chankanna leh intih theihnana kan hman ruihtheih thil hi kan nih tur ang min nih tir theilo tu leh mi nuihza bura min siamtu a ni tih hriain Ruihhlo hi a Do mai pawh Do lovin i hnualsuat ngam ang u. I damchhung reiloteah hian khawtlang leh ram tan hian enge i hnutchhiah ve dawn?

Comments