Skip to main content

Champhai Tualchhung Chanchinthar

ADDL. CEO HOVIN VOTE CHHIAR TURA INBUATSAIHNA ENFIAH :Nimin khan  Additional Chief Electoral Officer Pu Krishna Mohan Uppu IAS   chuan  Champhai a rawn tlawh a, May Ni 23, 2019 a Lok Sabha inthlanpui vote tla  chhiarna tura inpuahchahna kalpui mek a rawn enfiah a ni.
Champhai District Election Officer Dr Naveen Aggarwal, IAS chuan inpuahchahna hrang hrangte NICConference Hall-ah powerpoint presentation hmangin   a sawi fiah a. Counting Center puahchah leh peihfel dante, Vote chhiar tur ruatna leh training pek tawh dante leh inbiakpawhna tur atana ruahmanna siamte a hrilhfiah a. CEO team ten Vote chhiar huna round tin report pekna tura duan Suvidha Counting Application hrilhfiahna an nei bawk a ni. Chawhnu lamah CEO Team-te hian EVM Strong Room leh  Vote chhiarna tura ruat Counting Hall pangate  an tlawh kuala, heng  an tlawh kualna hmunahte hian District Election Officer Dr Naveen Aggarwal, Champhai SP Pu Lalthiamsanga Sailo leh  District Election Official-ten an tawiawm a, ruahmanna …

Sermon Upa JC Rohnuna

Pathian tan pe rawh le

Gen.22:16-18; Malakia 3:10 Upa JC Rohnuna

Kum 15 vel, thangkhat lian lai liam tawhah khan Kohhrana ka rawngbawlpui pakhat, piangthar ngei ni a ka rin, zan dar 12 thleng thak thak pawha inkawmho nana Pathian thu tuipui em em chuan, “ Thilpek hi ka piantharpui lo niin ka hria,” a ti tlat mai ! Pakhat lah chuan, “Piangthar ila, Finance Campaign te hi a tul lo mai, a keng tel vek,” a ti ve thung a.
Piangthar ni a inhriate thu dawn dante pawh hi a inang lo viau dawn niin a hriat e.Kan thian pakhat ve thung chu hlim tak mai hian a lam a lam thin a.Chuti chung chuan nikhat chu, “ Engahmah lawm tak takna ka hmu lo,” zu han ti pek a mawle !!
Sawi tur ava’n tam dawn em ! Tawitein sawi rih mai ila. Abrahama hnenah Pathianin, “ I fapa, i neih chhun tak pawh i ui loh avangin mal ka sawm ngei ngei ang che,” tiin a zuk au va. Tichuan- (1) A thlahte vana arsi zat leh tuifinriat kama tiau vaivut zata tihpunte (2) hmelmate hnehtheihna leh (3) Thawvenna( Zalennate) Lalpa’n a tiam a ni. Abrahama chuan ringhlel hauh lovin, sum leh pai mai nilo, a fa neihchhun chu Lalpa tana halral turin, ama kut ngeia tihhlum tur pawhin a pe phal a sin! Ava’n ropui em ! Lalpa chu fakin awm rawh se.
Keini erawh hi chuan rin harsa ( kan ringhlel thin) kan tih avangin kan thil neih, Pathian atanga kan dawn nisi hi kan ui tlat thin. Nang hian Unau duhtak, i ui ve thin em le ?
Malsawmtu Pathian atanga kan hmuh chhiarsen loh hi mi tam berte hi chuan min dil tlemte ( sawma pakhat) pawh hi kan pe phal lo fo thin. Dawn thur thur erawh kan chak hle si. Malakia 3:8-10 ah hian, ‘ Sawma pakhat’ hi chu A ta niin a hauh tlat thu kan hmu a. Chutih rualin sawma pakhat pe lote chu, ‘MIN RUKSAK THIN’ min ti a ni. Unau, i ruksak ve thin em ? I la ruksak zel dawn em ?
Mal min sawmtu hi kan pek let chuan, ‘MALSAWMNA DAWN SEN LOH’ pe turin i Lalpa chu a intiam asin! Ring ngamte hnenah Lalpa a inpuangin, a malsawmna an dawng thin.

‘ A malsawmna dawng turin Pathian tan pe rawh le.’
Lalpa’n malsawm rawh se.

Comments