Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

Sermon

CHARLES HADDON SPURGEON
The Happy Preacher
Pathianni hmasa- Khawvel Sunday School Ni a kan zir atana ruat, kan zir hman leh tak si loh -Charles Haddon Spurgeon -a chanchin hi a then azar tal in zirho dawn teh ang le:
1.A pian leh seilenna: Charles Haddon Spurgeon -a hi Kristian chhungkaw ziktluak tak atanga seilian a ni a.Thlahtute atanga Kohhran bel mi tak an ni.A pa John Spurgeon-a hi Pastor a ni nghe nghe.A nu pawh hi mi khawngaihna ngah tak leh tawngtaimi a ni. A fate hi a mal mala an hming lamin a tawngtaisak thin.C.H. Spurgeon-a hminglama a tawngtaisak lai chuan Thlarauvin a la thuam tur thu leh Pathian tana mi tangkai tak a la nih tur thute a chham chhuak a ni. Tichuan, kum 15 a nihin a piangthar a.A nu tawngtaina chu chhanin a awm ta a ni.
2. A mizia : Lehkha thiam thei tak a nihzia hetiang hian a nuin a sawi : ‘Kum 6 mi naupang tam takin sipel chawpa lehkha an chhiar theih laiin Spurgeon-a erawh hi chuan bahlah miah lovin a chhiar thei tawh a.A zirlaipuite tan pawha awh tham khawpin zirna lamah malsawmna a dawng a. A zirpui, a aia upate pawh a zirtir thei hial awme,’ tiin a sawi a ni. Spurgeon-a hian a nunah harsatna a nei a. Chu chu sual nih inhriatna leh chu mi do hneh a harzia chu a ni. Amah ngeiin hetiang hian a sawi: “ Ka sualnate hi hneh harsa ka ti takzet a. Hneh tumin ka bei a, ka hlawhchham fo thin.Amaherawhchu, Krista ka rin atangin ka sualna zawng zawngte chu Krista chuan min lo phurhsak tawh a ni tih ka hria a, ka phurrit zawng zawng pawh lak bo a ni ta, ” tiin a sawi thin.
3.Thuhriltu ropui a ni: Spurgeon-a chuan thuhril hi nuam a ti thei em em a.Kohhran hmasate pawhin thuhrilh lamah nasa taka tan an lak thin thute leh thuhril chu Krista inpekna hriatpuina a nih thute chu a rilruah a intuhnghet hle a. ‘ Krista tana rawngbawl tur hian rawngbawltute chauh hi an tawk lova, ringtu zawng zawngte thawh tlan a tulthu uar takin a sawi thin. Zing takah thova, Pathain pawlin, tawngtai leh Bible chhiarin a hun a hmang thin a. Pathian thu a chhiar chuan a nunah eng nge sawi a neih tih ngaihtuah ran chungin a zir pah bawk thin a ni.
London mipuite chuan a thusawi thiamzia chu mak an ti a.Thuhriltu ropui, Prince of Preacher tih hial a lo nihna chhan tak chu- Kum 30 chhung teh meuh, Metropolitan Tabernacle a Pathian nitin tum 2 thu a sawi apianga mi singkhat zet an inkhawm theih ziah thin vang kha a ni ber awm e.Spurgeon-a hian Pathian rawng a bawl chhunga mawhphurhna chi hrang hrang a kova tlate chu hlim takin a hlen chhuak thin a. Chuvangin mi tam takina chanchin an sawinaah, Thuhriltu Hlim ( Happy Preacher) tiin an sawi fo thin.
Spurgeona hi tawngtai mi a ni a.Hetiang hian thusawi dawna tawngtai chung chang a sawi nghe nghe.
“ Tawngtai tam lo rawngbawltu chuan Pathian a ngai lova, mahni tling tawkah a inhria a.Amah leh amah a inbum lek a ni.Tawngtai tha hman mang lova thusawi hi mi chapo tihdan a ni a, Lalpa Thlarauvin a ithnun loh chuan tu thusawi mah hian thlarau a man thei lo.”
4. A Pathian thu kalpui dan thenkhat:
1) Pathian chu a hmasa ber leh a hnuhnung ber, engkim mai hi Pathiana innghat a ni tih hi a pawm tawp mai a ni.
2) Bible pum pui mai hi Pathian thuah pawmin Rinna leh thiltih tehna dik ber leh awm chhunah a ngai a ni.
3) Spurgeona chuan Pathian khawngaihna hi ropui a ti takzet a.Tlukna avanga a nihna chu a chhiat em avangin Pathian khawngaihna tel lo chuan engmah a ti thei ta lova, Khawngaihna tel lo chuan mi tumahin Pathian an hmu thei lova, an pan thei bawk hek lo.Chu khawngaihna chuan chin lem anei lova, ni ang mai hian mi sual leh mi thate chungah pawh a lo lang thin a.Chuvang chuan miin Pathian an lo hmu thei thin.
4) Kohhran leh thilsiam dangte hian Pathian nihna chu an tarlang ngei a.Mahse, Pathian hriatna tak tak leh hriatna famkim chu Bible atang chauhvin kan hmu thei a.Chu Pathian hriatna famkim pawh chu miin Thlarau Thianghlim puihna avang chauhvin a hre thei a ni tiin a sawi thin.

Comments