Skip to main content

Champhai

UD&PA DEPARTMENT HMALAKNA KALPUI MEK PUANGZAR :
Nimin chawhma khan UD&PA Department Champhai leh MJA Champhai District Member-te chuan inkawmhona hun DUDO Pisa, CHANEM Building-ah an nei a. UD&PA Department hmalaknate inhrilhhriatna hun an hmang.
He hun hi K. Lalhmuakliana, District Urban Development Officer (DUDO) Champhaiin kaihruaiin UD&PA kaltlanga hnathawh Swachh Bharat Mission (Urban), National Urban Livelihood Mission leh Housing For All hnuaia hmalakna hrang hrangte bakah department-in khawpui tih hmasawnna leh tih changtlunna tur hrang hrang a thawh mekte Chanchinbumite a hrilhfiah a. Department hmalakna hrang hrangte enzui puia, duhkhawplohna awmahte finchhuah zel thin turin a sawm a ni.
SBM (Urban) hnuaiah hian faina kawngah nasa taka hma lak chhoh mek niin, faina in zirtirna thuziak tar te, fai nunpui tura naupangte zirtirte, Short film siam te, Street play leh bawlhhlawh bawm semte kal pui mek a ni a. Kumin   hian   nasa leh zuala inzirtirna tha zawk a kalpui…

Sermon

Ringtute Hi Khawvel Eng Kan Ni
Chang thlan : Matthaia 5 : 14 - 16
Eng tel lo chuan khawvela nunna neite hi an dam khawchhuak thei lo. Eng hmanga chaw siam thei chauh vek an ni. Thil, a nihna ang taka kan hmuh fiah theihnan pawh eng a ngai a, eng awm lohna ah chuan kan chetvelna pawh a buai zo vek a nih hi. Thimah chuan kawng kan hmu thei lo va, hlauhawm leh hlauhawm lo kan thliar thei lo va, kan mit kan chhawr tangkai thei hek lo. Eng tel lo chuan kan khawsa thei lo a ni
Khawvel Eng - Isua : Isua hi khawvel eng a nih thu Johana 1:9, 8:12 ah te kan hmu. Isua tel lova khawvela nun kan hman chhung chuan thimah kan cheng tihna a ni. Nuamsa takin awm mah ila, Kawng leh Thutak leh Nunna Isua kan neih loh chuan kawngbo kan ni tho. Kan hlawhtlinna te, ropuina leh hmingthatna te pawhin kan damchhung bak a daih lo. Tin, kan nunna atana tha leh tha lo pawh kan finna atangin kan teh ang a, a dik zik tluak chuang lo . Kan hlimna leh lawmna pawh hian tawp chin a nei a, lungngaihna leh harsatna hun leh hmunah Isuan amah ringtute a pek thin thlamuanna tel lova kan hmachhawn a tul thin a ni. A pawimawh ber, Chatuan nunna kan chan dawn lehnghal.

Khawvel eng - Ringtute : Isua ringtute erawh chuan ama zarah eng an nei ve thung a. He eng hi ni(sun) eng ang mai a ni lo. Kan nun kawng zawng zawnga kawng dik zawh thei tura hruaina eng a ni. Thla khian amahin enna a nei lo va, ni eng vangin enna a nei. Hetiang chiah hian ringtute paw’n Isua zarah chu eng hlu tak, van thlenga min hruaitu tur chu kan nei ve a ni. He eng hi khawvel hmuhah hetiang hian kan eng chu kan chhi ve dawn a ni.
1)Pawnlama Danglamna : Chatuan nunna min pek hi a hlut em avangin Isua chuan lova ro phum ruk, miin a neih zawng zawng hralha, a lei ta angin a tehkhin a ni. He nunna hlu tak kan kawl avangin hian kan pawnlam landan pawh a lo danglam ta a ni. Biak ina kal ngai lo kha kan inkhawm ve ta fo va, a ri pawha tawngtai ngai lote khan chhung inkhawm te kan hruai ve ta a. Mite tana tawngtaite, Bible chhiar te a lo ching ta a. Zu leh ruihhlo uma phe phe thin khan a lo sim ta a, kan hmel pawh a lo faiin kan taksa pawh a lo mawi ta a ni. Bihar-a misual rual(gunda) piangthar pakhat chu a hmel landan leh nungchang a inthlak chiang bawk a, tunhmain gunda a ni ang tih rin a harsa khawp a ni. A hmel a nelawm a, a inngaitlawm a, pawn- lama a danglamna hi hmuh hmaih theih a ni lo. Tin, kan inchei duhdan thlengin a lo inthlak a. A rei deuh hnu phei chuan, keimahni tumna a kan sim theih loh kan tawngkam hman dan te thlengin a inthlak a, kan rilru kawi leh thinchhiatna thleng pawhin a lo bo thei hial a ni. Tin, a tul dan ang zelin kan sum lakluhna pawh a lo inthlak zel bawk a. Dawt sawi thin ka atangin Pathian thu a lo chhuak ta zawk a. He a tha zawnga danglamna hi kan nuna a thlen nasat poh leh khawvelah eng kan chhi nasa tihna a lo ni zel a ni. Heng danglamna kan sawite hi a hnu lawka danglam leh zel tur tihna erawhchu a ni lo. Heng danglamna hi kan nunphung nghetah kan la lut zel ang a, paih ngai paihin belh ngai kan belh ang a, kan nunah Isua eng a lang nasa telh telh ang.
2) Chhunglama Danglamna : Heng a chunga kan sawi pawnlama danglamnate hi a hmasa a chhunglama danglamna lo thlengin a siam an ni. Kan thinlung sak tak mai, keimahnia kan thlak theih loh kha Isuan min thlaksak a. Kan thinlung ber a inthlak chuan kan duhzawng, ngaihhlut zawng leh nunphung chu a lo danglam mai thin a lo ni. Pathian chungah kan tana thil min tihsak zawng zawng avangin kan lawm a, chu Pathiana kan lawmna chuan a duhzawnga nun ve chakna min pe ta a. Kan hnena awm, Isua chuan ka thinlungah thlamuanna leh lungawina min pe a, kawng dik min kawhhmuh zel bawk a ni. Thlarau Thianghlimin min chenchilh a, kan nuna a ngaimawhte min kawhhmuh zel a, chung thil thalo te chu paih ngam turin huaisenna leh chaknain min thuam zel thin. Keimahni chauh inhmangaih thin kha midangten Isua an neih ve duhna hial min pe ta zel a ni.
Heng danglamnate hmang hian ringtute chuan kan bula mite hnenah Isua eng chu kan chhi zel a. Tawngkama kan sawi loh pawhin mite’n an hmu thin. Kan thilpek dawn a zir zelin kan khawvel a zau hret hret a. Mite tana kan tawngtai te, Pathian tana thilpek hmang te hian hla zawkah eng kan chhi a ni. Kohhrana Pathian thusawi thin te, zirtirtute leh rawngbawltute’n an chhi zau leh a. Pathian thuhriltu( Evangelist) te, missionary te phei chuan zau zawkin khawvel eng an nihna chu an lantir thei a ni.

Comments

Popular posts from this blog

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…

Champhai Tualchhung

ni 22.12.2014 (thawhtanni)
PISTOL MAN :
    Ni 19.12.2014 (Zirtawpni) dar 8 vel khan Assam Rifles, Excise & Narcotics Deptt leh SIB Champhai te tangkawp chuan Zokhawthar leh Melbuk inkarah 9mm pistol an man a, a neitu nia puh Gintungmung kum 38, Tualdopau fapa Mualkawi, Myanmar leh Gintheihthanga kum 42 Khupnanga fapa te pawh an man nghal bawk. Pistol te hi Champhaiah cheng nuai khat leh sing ngaa ve ve a hralh an tum niin an sawi.

TANPUINA LUT ZEL :
    Ni 18.12.2014 (Ningani) zan a Pi Lalbiakthangi in, Venglaia mi kang sak that hna chu Inrinni khan thawh chhunzawm leh a ni a, in sakna atan hian tha 650 vel sen a ni tawh a ni. In hi a dung feet 24, a vang feet 18, Assam type chhawng hniha sak tur a ni a, Thawhtanni hi chuan pum fel hman tawh beisei a ni. In kang tuarte tanpui nan hian vawiin thleng khan cheng 127796 a lut tawh a, buhfai, thawmhnaw leh in chhung mamawh tur chi hrang hrang pawh Champhaia mi tlawmngai ten chhiat tawkte tanpuina atan hian thahnem tak an pe khawm tawh baw…