Skip to main content

Champhai

CHAMPHAI IN EYE DOCTOR NEILO PAWI TI :
Champhai District Hospital a Eye Doctor awm ta lo chu MZP Hqrs. Champhai chuan pawi an tih thu an sawi.
Zirtawpni a Executive thukhawmah Champhai District Hospital a Eye Doctor awm ta lo chungchang an sawiho a. Zirlaiten thisen chhuak meuha theihtawp chhuaha Doctor an ngenna hliam dam fel hmaa Eye Doctor in hna dang zawm a, Champhai a chhuahsan chupawi an tih thu an sawi a. Sawrkar tana MIMER a hlut ang chiahin CHamphai tan pawh District Hospital hi a hlu em em a, mit Doctor kan neih thuai theih nan hian Health Minister hnenah ngenna hmanhmawh thlak lehkha ziak a pek nise, an ti. hei bakah hian Champhai DIET Lecturer Allision Byhnasa, Siaha DIET lama transfer chu a aiawh rawn dah thuai turin sawrkarah ngenna thlen vat nise, an ti bawk.
Hetih rual hian Champhai DIET a Mizo zirlaite dinhmun pawh uluk taka enzui nise, an chanvo dik tak an chang em tih zirchian nise tiin, MLA Election lo awm turah Party tin hnenah Champhai khua ngei, Champhai khaw…

Vengthlang Kohhran {Kohhran Aw}

Tholeh Lalpa Inlar Chu
Chang thlan : Joh 21: 4-6
Pathian fapa lo lan chhan ber- Diabola hnathawh tiboral tura kan Lalpa he khawvela a len laini khan amah ringtute leh hetih hunlaia sakhaw hnarkaitute khan Pathian fapa inpuanna kha an hrethiam thin lo va. Hei hian rin hriatna mai atang chuan kan Lalpa rilru tawmpui chu sawi loh, kan hriatthiampui phak lohzia hi a va tarlang chiang em! Pa Pathian inpuannate, hmasang kum leh ni zawngte a Thlarau Thianghlim inpuannate chu an hmelhriat thawkhat hle laiin khawvel sual kalpuitu tur, Pathian Beramno nunzia leh a kamchhuakte chu amah lo lawma lo kuangkuahtu tur puithiam sakhaw rawngbawltute khan hlawkpuia, nun nana hman a hnekin an tan thil khaah a chang a, Pathian nung kutah an tluk phah hial a nih kha.( Rom 9:32).

Chunglam thiltihtheihna a kaihthawha a awm hnu chuan mi na zawng hnenah a inlar tawh lo tih hi i ngaihtuah ngai em? Amah lo lawma beiseina nena nghaktute hnenah chauh tholeh Lalpa nun chu a inlar si a. Tholeh Lalpa inlar chu a danglam ta hle mai. Mihring mihrinna hian a hmu thiam tlat lo. Mitthite kai thova, chaw an tlakchham pawha ei tur pe thintu kha riltam, ei tur mamawh angin an zingah a cheng ve thin anih kha( Naute u, ei tur engilo in nei lo maw?) Ringtute hnena Lal Isua riltama eitur zawnga mamawh a neih hi he khawvel thila tihtlai mai phak a ni lo va, a thupekte kan zawm hi a riltamna kan tihreh dan tak tur chu a ni zawk ang. Thlarau Thianghlima a inpuanna, a hnathawh lo thlen hian kan mihring nun ram a tuiral zo ta emaw tih mai tur hian min fan zo ngei thin. Hetia Thlarau Thianghlim zara khaw ngaihna Lal thutphah hnaih hi a hahdamin a thlamuanthlak reng a. Phatsan leh tawh lo tura damchhung ni zawng atan inhlan mawlh mawlh mai chu a hreawm thlawt lo a ni. Mahse, kan Lalpa riltamna hmu lo leh hre lek lo hian mahni tul tulin a inawih tlei theih khawp a sin. Tin, Thlarauva kan Lalpa inlarna dik tak chang si lo hian mahni thahnemngaihna pawhin a thu zawm tur leh a ram zauna atan hian rim takin thui tak chu a kal theih khawp mai. He mihring tha- hnemngaihna atanga hmalakna hian mimal leh a huhova rawngbawlna atan hmuh theihah sawtna leh tangkaina tam tak chu a nei teh meuh mai. Mahse, hei hian keimahni ngei pawh min tithlamuang zo lo va, kan thinlung chhungrilah Pathian hmaa tling zo tur chuan kan inngai thei chuang thin lo. A dik tak chuan, tholeh Lalpa inlarna chang lo kan nih chuan eng anga nasa pawhin ama tan rawngbawl ila, Pathian tan a pawmtlak chuang loh va, keimahni kan intihah nasa ting mai a ni. A nihna takah chuan Pathian Thlarau Thianghlim hruaina tel lova rawng- bawlna hi Pathian hnena mite hruaina aiin an mit tideltu mai a ni duh khawp mai. Chuvangin, tholeh Lalpa inlarna chang ngeia rawngbawl turin inbuatsaih ang u.
Tholeh Lalpa inlarna changa rawngbawltute chuan mahni ngaihdan leh remruatnate aiin Pathian duhdan an dah lal zawk tawh a. Tholeh Lalpa nun an tawmpuina avang chuan rawngbawlna nung, thiltithei leh hlawk zawk an nei zawk tawh thin. Phurrit anga ngai tawh lovin, hahdam takin, lawm chungin khawngaihna rawngbawl hna a nihna hrethiam chungin an lo hlenchhuak thei thin a ni. Tholeh Isua inlarna hi ringtute tan a hlu em em a. Ringtu nun bul leh thanlenna a ni a, hemi atanga nun bul tantu ni lo tan chuan Pathian thu engpawh hi a fiah mawh khawp mai. A hma a mi kha a lo dik hlei nem tiin an ngaihthlak hnuhnun apiang an sawi mawi thin. Tholeh Lalpa inlarna atang erawh chuan engkim hi a fiah thung.
Eng ang tak hian nge kan hnenah a inlar ve thin le? Ani chu kan tum dan leh kan beisei piahlamah tlawm takin a rawn inlar fo thin. Kan thlarau nun thanlen nana tha tura kan ngaih thil tam tak hi hlawkpuinana kan hman ai mahin kan chaklohpui zawk fo thin. Camping/Crusade a harhna lo thleng kan chan hnu rei vak lova kan chau leh thin te hi harhna changtute inpekna nep vang leh tumruhna neih tlem vanga kan puh thin hi a dikna chen thui tak a awm rualin rawngbawltute nunah thlarau chaw an hmuh tlem vang a ni ve thei tho lo maw?
Thlarau Thianghlimin a thinlung mit a tihvarsak chauhin, chumi ngei chuan tholeh Lal Isua inlar hi a hmufiah thei si a. Chuvang chuan, Thlarauva piang lo leh Thlarau Thianghlim tivuitu tan chuan kan Lalpa inlarna hi hriatthiam theih rual a ni lo ve.


===========================================================


BIBLE STUDY : ROM LEHKHATHAWN
( Rev. Wiliam Barclay hrilfiahna atanga lakchhawn )
Pathian hre duh lo nun ( Rom 1:28-32): Helai chang tluka Pathian hre duh lo nun awmdan tur sawi chianna hi a vang khawp ang. An nuna Pathian hmun kian duh lote chungah hian Pathianin rorelna a thlen a ni chiah lo, anmahniin rorelna an tawngbua a ni zawk mah. Miin Pathian a nun atanga a hnawla a nun rapthlak tak zia a chiang khawp mai. Mihring nihnain a ken tel, a awm pangngai leh a chhia leh hriatna hmanga a tih tur leh a tih miah loh tur a awm thin. Pathian hransantu chuan Pathian a zahna mai bakah a mihrinna pawh a hloh tel a ni. Heng thil hi lo chhui ila : 1) Fel lohna(Grik : adikia): Grik-ho chuan dikna an tih chu Pathian leh mihring hnena an chanvo pek hi a ni. Mi fel lo chu mihring leh Pathian dikna chanvo rawksaktu hi a ni. Amah leh amah inbiain mihring leh Pathian a hnawl thin. 2)Sualna(Grik : Poneria) Grik tawnga poneria hi sualna tih hian a hrilhfiah zo lo. Mahni chiahin kan tuar sualna a awm a, midang a tihnat tel pawh hian tumlawk reng a tih a ni kher lo thei. Grik-hovin poneria an tih chuan mi tihnat duhna a kawk. Phur taka, tumlawk renga mi tihkhawloh leh na tuartir duhna a ni. Grik hovin hmeichhia hi ponera an tih chuan mi pawisawilo suala thlemthlutu tihna a ni. Setana an kohna lar ber chu mi sual(ho poneros) tih a ni a, hei hi tumlawk rana mi thianghlimna leh thatna va bei a, va tihchhiatsaktu tihna a ni. Poneros chu misual pangngai mai ni lovin amah anga sual tura midangte duhtu, amah tluk leka hniama midangte hnuhhniam ching tihna a ni a, chhiatna thlen ching sualna sawina a ni. 3) Duhamna(Grik : pleonexia): He Grik tawngkam hi a awmzia chu neih belh duhna tihna a ni a, tam lehzual duhna anchhia an ti. Mahni hlawkna tur ringawt uma, midangte chanvo leh a huhova that tlanna tur hnawlna rilru sawina a ni. Theodoret chuan tam lehzual zel umna rilru, a lak tur ni miah lo pawh lak duh zelna rilru tiin a sawi. Hei hian kan nun peng tinreng a huam vek mai. Sum leh pai leh bungrua engpawh zahawmna leh rinawmna hnawl thaka neih tumna a kawk a. Mahni ta lo tur pawh neih tuma midang rahbehna a ni. Neih belh chak huam huamna , eng dan mahin a phuar loh hi pleonexia chu a ni. 4) Suahsualna (Grik : Kakia) : Kakia tih hi sualna sawinana Grik-ho hman lar ber, mihringin thatna a neih theihna zawng zawng nei ve lo sawina a ni. Kakos krites an tih chuan roreltu, dan lama thiamna, dikna leh nunphung thatna nei lo sawina a ni. Theodoret chuan “ Thinlung a chhe zawk lama her zel” sawinan a hmang. A tawi zawngin sualna zawng zawng tiakna hmun leh duah taka an thanna hmun ni tura tlakchhiatna a ni. 5) Itsikna(Grik : phthonos) : Itsikna tha leh tha lo a awm. Mahni chaklohna leh tlinlohna hmu a, mite entawna, sang taka invawrh tumna a awm a. Mi tha tak hmuh a, that ve tum chuang lo, mi thatnain a tihlunghnur a awm bawk. Hetiang itsikna hi mihring rilru kawikawm ber chi awmdan a ni. 6) Tualthahna(Grik : phonos) Isua chuan tharum thawhna mai bakah thinurna leh mi huatna rilru pawh paih tur a ti a. Thinlung atanga thinurna leh huatna rilru a bo thak hi a duhdan chu a ni. Mi kan va khawih kher loh pawhin kan khawih duh miah lo vang tih tunge sawi thei? Aquinas chuan “ Mihring chuan a langchhuak kan thlir a, Pathian erawh chuan rilrua tumna a thlir thung” a tih hi a dik hle awm e.

===========================================================

Editorial : Tawngtai Hi
Tawngtai hi Pathian kan biakna leh kan ralthuam, chakna kan lakna hnar pawimawh em em a ni. Kan inen fiahnan tlem han sawi ila.
Mipui aiawha kan tawngtaiin ka tih aiin kan tih hman thin hi a mawi. Lal Isua min zirtir angin Pa hnenah kan dil tur a ni a, a tira Lalpa tih mai aia Ka pa Thlarau Thianghlim han tih hi a dik zawk ang em aw? Tin, Pa hnenah ama hminga dil turin Isuan zirtir laia a tawpna a Isu, i hmingin ka dil a che tih hi a dikhlel bawk lo maw? Tunhnai mai atang khan Pathian hnena Lawmthu hlan mi thenkhatin kan ching a. Hriatthiam tho mahse, a tawngkam hi a dik zan lo deuhin a lang. Thilpek hi hlan tur a ni a, lawmthu hi chu sawi emaw hrilh emaw chi a ni lo’m ni? Mimalin Pathian kan biaknaah chuan kan thinlunga awm zawng zawngte zep leh insumna nei miah lova kan sawi hi a tha. Mahse, kan tawngtaina hmun leh hun a zirin inleihbuak vek a tul kher lo thei. Entirnan, chaw ei dawna thil chi hrang hrang sawi kual vak te, thilpek leh inkhawm hlanna a thildang sawi fe hnua, a tawp kharna ang leka kan tawngtai chhan sawi leh si te hi a inhmeh lutuk lem lo.
Engpawhnise, kan biak tak Pathian leh keini, a betute hi inpawh tha phawt ila. Kan lo sawi sual deuh a nih pawhin inpawhna nei miah lo va nalh taka chham ai chuan a tha zawk. Ani chuan min hrethiam em em ang tih a rinawm. Mi hma a kan din erawh chuan fimkhur ila kan tihna a nia.


==========================================================

CHAMPHAI VENGTHLANG KOHHRAN CHANCHIN
(April 2008 - March 2009)


5. Kohhran Hmeichhe dinhmun tlangpui :
Kohhran Hmeichhe Committee members 42 niin Ex-Officio 4 nen avaiin 46 an ni. Missionary 10 an chawm mek a. Group 7 ah inthenin Budget neiin member tin ten phur takin hma an la a. Bial leh Central Programme hrang hrangte Pathian hruaina in an ti hlawhtlingin Budget te an tlin thei ve zel a. Buhfaitham leh thilpek dangah hma an sawn zel laiin Nitin Chhung Inkawmah erawh an tlahniam deuh.
6. Kristian Thalai Pawl dinhmun tlangpui :
Branch Committee Member zawng zawng (Ex-Officio & Adviser tel in) 39 an ni a, Kumin chhungin Group li (4) ah an inthen a, Missionary 11 an chawm mek a, Bial leh Central atanga tih tur leh Budget a puitlin chho ve zel a ni. Dt. 4-7th. March 2009 khan Solfa Camping an nei a. Biak In hawngin Member 8-in nupui pasal an nei a ni.
7. Kohhran hmalakna dangte :
Kohhrana a mi harsa te tanpui nan Rs. 1,30,403 hman a ni a. Tin, October 2008 chhung khan Camping chhawng thum (3) leh Naupang pual chhawng khat (1) Gospel Thunder Team hmangin Biak In ah neih a ni. Endowment Fund hmangin mi 20 hnenah Rs. 2500/- zel vawk vulh nan hmantir an ni. Kristian Chhungkaw hmalakna chak taka kalpui a ni bawk. Ramthar rawngbawlna lamah Tirhkoh 73 chawm mek a ni. B.S.I rawngbawlna lamah pawh Budget te kan tlinin hmasawnna hmel a lang ve zel. Tunah hian Kum 2011 a Kohhran Centenary lawmnan hmalakna kalpui mek a ni. Thlarau lam dinhmunah harh tharna hmel sawi thamin lang lo mahse, Kohhran kan hlimin a pangngaiin kan la kal ve thei zel a. Kohhrana Pathian hnathawh langsar leh hmuh theih a lo lang chu Thilpek lama kan hmasawnna hi a ni.
Synod News
PYF.18th Biennial Conference : April 24-26 chhung khian Presbyterian Youth Fellowship Biennial Conference vawi 18-na,Muolhoi Presbyterian Church, Cachar Hill Tribe Synod-ah neih a ni dawn a, thupuiah ‘Thy will be done’ tih an hmang ang.Conference-ah hian Central KTP hruaitute, Mizoram Synod choir leh Bial thlanchhuah te atangin Palai pakhat theuh an kal ang a, Synod choir te hian April 26(Pathianni) chawhma Pathian Biak inkhawmah zaia rawngbawlna an nei dawn a ni.
Moderator programme:Synod Moderator Rev.Lalchhhanhima chuan April 18&19 hian Sialsuk,Sumsuih,Sateek, Aibawk leh Phulpui Kohhrante a tlawh ang a, Siliguri hmuna thawk Evangelist Teacher-te an tlawh nghal ang.Tin, Aizawl Theological College chuan April 21 (Tuesday) 10:00Am. khian Final Year Student-te tan Dedication -cum-Farewell Service,ATC. Chapel-ah an hmang ang a, chutah chuan Valedictory Sermon a sawi dawn bawk a ni..
Synod music:Synod music Instructor Pu Lalromawia leh pu H.Lalrinmawia te chuan Tlangnuam Kohhranah Hla hruaitu Training an neihpui.


===========================================================

BSI Bial & Bialtute
Kan kohhran hi BSI rawngbawlnaah kan harhthar nasa hle a, Collector te tan bial fan ngun a tha hle. Mipuiten kan remchan dana kan lo pek mai theihnan an hming kan rawn tarlang e.
Bial 1-na : DK mual zawng zawng
Bialtu : Pu Zoramlawma
Bial 2-na : Veng mawng lam
Bialtu : Nl. C. Darthangpuii
Bial 3-na : Char Veng
Bialtu : Pi Lalnuntluangi
Bial 4-na : Biak in mual hnuailam
Bialtu : Pu K. Lawmzuala
Bial 5-na : Dawr dung thla
Bialtu : Pi Lily Lalrinkimi
Bial 6-na : New Saron Veng
Bialtu : Pi Laldinpuii
Bial 7-na : New Saron kawng chung
Bialtu : Pu HS Zoramliana
Bial 8-na : IB Veng
Bialtu : Pu C. Rochungnunga
Bial 9-na : IB Veng lu lam
Bialtu : Pu HS Lalngaizuala
Bial 10-na: Rahsi Veng lu lam
Bial 11-na: Rahsi Veng lai
Bialtu : Pi Lalramhluni
Bial 12-na: Rahsi Veng mawng lam
Bialtu : Pu Lalpanliana
Bial 13-na: IB Veng lehlam
Bialtu : Pu V. Vanlalduha
Bial 14-na: Awmpui kawng phei
Bialtu : Pu C. Vanlalsiama
Bial 15-na : Awmpui hnuailam
Bialtu : Nl C. Laltani
Bial 16-na : Biak in mual thla
Bialtu : Pu Lalchharliana
T/Upa tharte
Nilai zan kalta khan Kan Kohhran rawngbawltu tur T/Upa atan heng mite hi kan thlang tling a,8 kan dila Pathianin 6 min pe a ni.
1)T/Upa H.Thangliana
2) T/Upa H.Nghakliana
3)T/Upa Vanlalhruaia Sailo
4)T/Upa C.Hualchhunga
5)T/Upa K.Lalthlengliana
6)T/Upa Dr.thangsailova
An tan Kohhran hote thahnemngai takin i tawngtai zel ang u..

=========================================================

Darthlalang : Engvang nge ?

Engvangin nge mite chu Hremhmunah an kal ang? Tual an thah vang te, ruk an ruk vang te, uirena suala an tluk vang te, an sual hrim hrim vang te em ni? Pastor lar tak leh Pathian mi hman tak Pastor J. Smith chuan a lehkhabu, Pathian Chhandamna tih buah chuan hemi chungchang hi heti hian a ziak :
Vawikhat chu nula pakhat hi a damlo na hle mai a. Zelin a awm a, a mumangah chuan a lo thi a. Vanram kawngkhar hmaah chuan vantirhkoh Gabriela hi a lo ding a. Gabriela chuan Nunna Bu hi a keu a, chu nula hming chu a zawnsak a. Chutah beidawng hmel pu deuh hian nula chu a en a, “ Nula, he lehkhabuah hian i hming a chuang ve lo tlat mai” a rawn ti a. Nula chuan makti hmel takin, “ Enga ni? Ka hming a chuang ve lo maw?” a ti a. Tichuan, Gabriela chuan Nunna Bu phek tin mai chu uluk tak hian a han keu nawn leh vek a, a tawpah chuan a rawn dak chhuak leh a, khawngaih hmel tak hian, “ Nula, i hming a chuang ve tlat lo a ni” a ti chuai raih a.
Nula chuan, “ Engtizia nge, eng thil kher nge maw ka tih a, ka hming Nunna Bu ah a chuan ve miah loh mai le?” tiin mangang takin a lo au chiam mai a! Gabriela chuan, “ Nula, i thiltih avanga heta hming chuang lo i ni hlei nem, i tih loh vang zawk a ni. Isua chhandamna ropui tak hi i thlahthlam vang a ni zawk e” tiin chiang takin a lo hrilh a.
Chumi hnu chuan nula chu a lo harh hlawl mai a, damlo na tak ni mahse a khum atang chuan a rawn tho chhuak a. Khum bulah chuan thingthiin a tawngtai nghal mawlh mawlh a. A chhandamtu atan Isua chu pawmin a damchhunga a hnungzui turin a inpe ta a ni.
Engvangin nge mite an boral thin? Pathian fapa mal neihchhun an rinloh vang a ni. “ Tupawh ringlo chu tun apangin thiamlohin an awm” (Johana 3:18) tih inziak ang khan. Hei chiah hi mite thiamloh channa chhan tur chu a ni.
Tualthattu i nih avangin i boral lo vang, i sim chuan tualthat chu Pathianin a ngaidam thei. Zu ruih ching leh rukhmang i nih avang pawhin i boral lo vang, i sim pawh Pathianin a ngaidam thei. Mahse, Pathianin a ngaihdam theih miah loh a awm: Chu chu a fapa Isua ring duh lo tute hi eng mi pawh ni se, a ngaidam thei lo. Isua Krista hi i chhandamtu atana i pawm duh tlat loh chuan Pathian lakah i tan beisei tur engmah a awm lo. Pathianin heng mite chhandamna turin ruahmanna dang engmah a siam tawh lo.

Comments

Chawngtinleri said…
T/upa chu a hma khan 7 tiro? a tlem ta zok sia...Pa Thangtea chu lompuiom hle mai!!

Popular posts from this blog

Champhai

CHAMPHAI IN EYE DOCTOR NEILO PAWI TI :
Champhai District Hospital a Eye Doctor awm ta lo chu MZP Hqrs. Champhai chuan pawi an tih thu an sawi.
Zirtawpni a Executive thukhawmah Champhai District Hospital a Eye Doctor awm ta lo chungchang an sawiho a. Zirlaiten thisen chhuak meuha theihtawp chhuaha Doctor an ngenna hliam dam fel hmaa Eye Doctor in hna dang zawm a, Champhai a chhuahsan chupawi an tih thu an sawi a. Sawrkar tana MIMER a hlut ang chiahin CHamphai tan pawh District Hospital hi a hlu em em a, mit Doctor kan neih thuai theih nan hian Health Minister hnenah ngenna hmanhmawh thlak lehkha ziak a pek nise, an ti. hei bakah hian Champhai DIET Lecturer Allision Byhnasa, Siaha DIET lama transfer chu a aiawh rawn dah thuai turin sawrkarah ngenna thlen vat nise, an ti bawk.
Hetih rual hian Champhai DIET a Mizo zirlaite dinhmun pawh uluk taka enzui nise, an chanvo dik tak an chang em tih zirchian nise tiin, MLA Election lo awm turah Party tin hnenah Champhai khua ngei, Champhai khaw…

Champhai

MZP TEN CHAWIMAWI : Nimin khan MZP Champhai Hqrs te chuan MZU-in Under Graduate result a tih chhuah taka Govt Champhai College atanga Top ten-a langte chawimawina hun an hmang. He hun Govt Champhai College Seminar Hall-a neih hi Lalthanfela MZP Hqrs Champhai Secretary chuan kaihhruaiin Asscociate Prof. Lalchhanhimi Khiangte, Principal Govt. Champhai College chuan khuallian niin a hmanpui a. Khuallian chuan thusawiin zirlai titha chawimawi nachang kan hre chho zel hi hmasawnna nasa tak a ni a, hetiang zirlai chawimawi tlak Govt. Champhai College-in kan nei pawh hi thil ropui tak a ni tiin an kal zelna turah duhsakna a hlan a. College zawhah hian zirna tak tak a intan chauh thu sawiin zirlai ngawr ngawr piah lamah hriatna tizau thei zawnga tan la turin fuihin zirna kawngah hian a tawp kan khar that hi a pawimawh hle a ni a ti. Govt. Champhai College chu nasa taka hma sawnin a zahpui awm tawh lo hle a ni a ti a, zirna lama hming lang thei zirlai nei turin tan a la chho mek a ni a ti ba…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…