Skip to main content

Champhai

CHAMPHAI IN EYE DOCTOR NEILO PAWI TI :
Champhai District Hospital a Eye Doctor awm ta lo chu MZP Hqrs. Champhai chuan pawi an tih thu an sawi.
Zirtawpni a Executive thukhawmah Champhai District Hospital a Eye Doctor awm ta lo chungchang an sawiho a. Zirlaiten thisen chhuak meuha theihtawp chhuaha Doctor an ngenna hliam dam fel hmaa Eye Doctor in hna dang zawm a, Champhai a chhuahsan chupawi an tih thu an sawi a. Sawrkar tana MIMER a hlut ang chiahin CHamphai tan pawh District Hospital hi a hlu em em a, mit Doctor kan neih thuai theih nan hian Health Minister hnenah ngenna hmanhmawh thlak lehkha ziak a pek nise, an ti. hei bakah hian Champhai DIET Lecturer Allision Byhnasa, Siaha DIET lama transfer chu a aiawh rawn dah thuai turin sawrkarah ngenna thlen vat nise, an ti bawk.
Hetih rual hian Champhai DIET a Mizo zirlaite dinhmun pawh uluk taka enzui nise, an chanvo dik tak an chang em tih zirchian nise tiin, MLA Election lo awm turah Party tin hnenah Champhai khua ngei, Champhai khaw…

YMA Palai

Vengthlang VC leh Branch YMA O/B ten Joint Sitting neih a ni
4thSunday,Vengthlang: Vengthlang Village Council Member leh Vengthlang Branch YMA O/B te chuan Ni /3/09 khan Joint Sitting an nei a. An thurel tlangpui chu a hnuaiah hian tarlan a ni:
1. Thlanmual hmuna thlanlung phun khawmna hmun tur chu buatsaih hmasak phawt nise. A hmun tur atana an lo ruat lawkah siam tur a ni.
2. Thlanmual that tur chu ruahmanna felfai leh changkang zawka siam tur a ni.
3. Vengchhung kawngpui siam ngaite leh Black Top tura chhawp chhuah te:-
i) Town Hall kawng hnuai
ii) Pu Zawna dawr atanga Bazar panna kawng
iii) Pu Darthangvunga In bul kawng
iv) Vengthlang North Biak In atanga Pu Lalnuntluanga In kawng
v) D.K Enterprise sir kawng
vi) New Saron kawng
vii) Pu R.Zamawia kawt kawng
Heng kawngte hi PWD Department-ah thlen tawh a niin an hmalakna nghah mek a ni.
4. Vengchhung mipuite humhalh a nih thrih nan fir leh uluk taka ngaihtuahin pem lut leh chhuak reng reng VC leh YMA te rawnin, an hriatpuina chauhvin lehkha pek thin tawh tur a ni.
5. Sorkar dan ding laiin a sawi angin tupawh in sa tur reng rengin bialtu VC te hriattir tur a ni.

--------------------------------

Job Card dilte tan
Job Card siam thar dil zawng zawngte'n Ni 6/4/09 (Thawhtanni) aia tlai lovah Ration Card Photostat copy (Xerox copy) pakhat VC Secretary Pu Lalduhkima Chhangte hnenah thehluh tur a ni e.

--------------------------------
Motor Insurance a hnai
Aizawl pan kher ngai lova Champhaia Motor Insurance tih theih turin ICICI Lombard chuan hma an la mek a. Tun atanga hun reiloteah motor insurance hi Champhaiah tih theih thuai a ni ang.

--------------------------------
Bial khawmpui hmang
Tunlai hian Presbyterian Kohhran chuan Bial Inkhawmpui an hmang mek a, Vengthlang Pastor Bial chuan Venglai Kohhran Biak In-ah Inkhawmpui hi hmangin nimin khan palai rorel inkhawm an nei a. Hetah hian kohhran inrelbawlna atana thil pawimawh te sawihoin an thu tlukna tamtak chu Synod-a kal zel turin Presbytery-ah an chhawpchhuak ve leh dawn a ni. He khawmpui hi zanin ah a tiak ang. Nakkumah Vengthlang North Kohhranin an thleng dawn a ni.

--------------------------------
Khelkawm intihsiakna zo fel ta
Ni 31.3.’09 atanga khelh tan Mizoram pum huap hmeichhe khelkawm intihsiakna chu Zirtawpni khan zawh fel a ni ta a. He intihsiaknaah hian KolasibDistrict chuan Aizawl District 1-0 a hnehin chak ber nihna an chang a. 2-1 a Lunglei District hnehtu Serchhip chuan pathumna an hauh bawk.

--------------------------------
Tumkau Ni
Vawiin hi Tumkau Ni a ni a, tukin zingkar hian Sunday Sikul naupang leh zirtirtute’n Isua Krista Jerusalem-a lal anga a luh hriatreng nan tumkau chawia kawng zawhin an au rual dawn a ni.

--------------------------------
Pawl 12 result
Ni 7.4.’09 (Thawhlehni) hian Pawl XII result a chhuah beisei a ni.
Fimkhur rawh!!
Tunlai hian sik leh sa a inthlak chho tan a, hritlang leh tlang hri leng a tam hunlai a nih avangin kan ei leh in-ah fimkhur tlang ila, mahni in leh a vel i vawng fai ang u.

--------------------------------
Committee nei dawn
Tunkar Thawhleni emaw Ningani, a remchang zawk zawkah Branch Committee neih tur a ni a. Committee member te kan inhriattir lawk a ni e.

--------------------------------
Pem lehkha la turte tan
Pem lehkha la tur reng rengin Identity Card leh Rs.5/- ken zel tur a ni a. Pem turte hian YMA leh VC te rawnin, an hriatpuina lo chuan pem lehkha hi a lak theih tawh loh a ni.

--------------------------------
Matric kan ‘passed’ tha
Matric result chhuakah khan Vengthlang Branch huam chhung atanga kan zirlaite an passed tha hle a. YMA Palai chuan kan lawmpui takzet a ni. Veng chhunga matric passed tharte hi hriat kim a harsat deuh avangin kan rawn tarlang thei lo va, issue lehah kimchang taka tarlan kan rawn tum dawn nia. Matric passed-te, in kal leh zelna turah duhsakna kan hlan a che u.


--------------------------------
Road Show nei dawn
Aircel chuan Naktuk hian Awmpui Phei-ah Road Show an nei dawn a. Non Stop, Talktime Rs.10 awmsa, Rs.30 in a lak chhuah theih dawn a. Book duh kan awm a nih chuan Voters ID Card Xerox copy 1 leh Passport Photo copy 2 kengin he Road Show neihna hmun hi pan mai tur a ni.

--------------------------------
Nuih tiza an rawn che dawn e!
Mizoram Drama Club zinga huhang ngah ber pawl Zephyr Drama Club chuan Champhai Town Hall-ah tun Thawhlehni hian show an rawn nei dawn a. Zephyr Drama Club bakah hian Comedian Search-a pahnihna leh FTH Chanchintlar chhiartu Lalchhanhima pawh a rawn kal tel dawn a ni. He show en tur hian A huaihawtute chuan vengchhung mipui zawng zawng min sawm a ni.
Zephyr Drama Show
Organised By Paula Group, Vengthlang North KTP Branch
A hun: Dt. 7.4.’09
Zan Dar 7:00Pm
A hmun: Champhai Town Hall
Ticket: Rs 100, Rs.50 leh Rs.20

--------------------------------

Lawmthu Sawina
Keini Lunglei District Women Hockey Team te hian Champhai Vengthlang mipuite hnenah lawmthu sawi kan ba nasa hle a. 3rd Inter District Women Hockey Tournament a kan naute duat leh hmangaih taka min lo thlen avangin kan lawm em em a ni. Hei hi kan lawmthu sawinaa Vengchhung nu leh pa, a bik takin kan thlen in te’n min lo pawmsak turin kan ngen tak meuh che u a ni.
Tin, Rih Dil kal nana motor min petu Champhai SP Pu C.Lalthanmawia chungah kan lawm em em a ni

P.Lalrinsangi (Masangi)
Manager
Lunglei Dist. Women Hockey Assn.
Lunglei Mizoram

--------------------------------

Kar khata ni khat C.K Press-ah!!
~Editor
Inrinni chawhma dar 11. C.K Press-ah ka lut a, Computer thlanglama kan News Editor-in he YMA Palai a buaipui hi ngaihdan thawh tumin News Ed. dangin an lo bial thap a. Imm.. thingpui helin kan Manager pawh a lo thu leh ran tawh e! YMA Palai buaipui tur hian dar 11 ah ka chhuak ziah a, a tlai ber ka ni ziah bawk a, ka inthlahrung lut ziah bawk a! “Hei le, Editorial leh news tlem. Vawiin chu a taima leh duhsak phu zualin article an rawn ziak hlauh e. A hnung chu a khat titih a ni mai. AK-47 chu in chem kalna a ni bawk a, ka khawih dawn lo ka tih tawh kha.” Min chhang lo va an nuih tet tet tawh chuan a tuk zingah AK-47 huangah hian ka inzawng hmu leh nawlh zel. Editorial Board zinga mi, hming lang ve dang hi engnge a chhan ka hre lo. La lang miah lo pakhat a awm a, zawt mai teh se, AK-47 huanga lang zing deuhte hian a chhuahtu in ngei dawn chuan kei chuan ka kut ka sil a nia. C.K Press pan ve mai rawh u!
‘Risk’ huai ve pangngai: Inrinni hi ni mak tak chu a ni. News hi ni dangah a tam hrim hrim em ka hre lo, Inrinni kher hi chuan vang duh tak a ni. A bikin section news. Section lam hian “News chhete kan neih kha maw. YMA Palai, news lama tuihnang lo zet hi i pe teh ang.” tih an rawn tum em em si lo va. Tih ngaihna awm hek lo, news risk-ah kan tlak leh nawlh thin. “Tukin khan Neuva Section kha an hnatlang ta em? Members 30 vel an thawk chhuak tih bawr velin i belh mai ang u” tih a nih loh leh “Ngawi rawh, a tawi lutuk. A thui thei ang berin i ziak teh ang u.” Chung chu Pathianni zingah tui takin in lo chhiar leh a! Mahse kan risk hi chu tlem te, a chhiartute chuan a tak tak leh tak tak loh pawh in hriat loh khawpa pawi tham lo a ni tih erawh ka sawi duh. Article a awm lo va, “Article han ziak teh.” kan inti leh ngawt zel a. “Ziah tur ka hre hleinem.” “Risk rawh!” Article te hi a lo risk theih a ni tih YMA Palai atang chiah hian ka hria.
Bat huai ve pangngai: Nia, kar khata ni khat hi chu dan awm lo mah se C.K Press-ah kei ka ni inti chin chu inhmuh khawm tur tih ang deuh hian kan nei a. Kan Jt. Editor erawh Sialhawk tlangdung lamah a taksa emaw a rilru tal awm a ngaih ziah avangin min rawn telpui tam thei lo va. Pawi ti mah ila lung lovah kan la lem lo. Kar khata ni khat C.K Press-a inhmukhawmte hi ba hlirin kan che nia. Kan thingpui in man hi hman atan tawh kan ba a, kan thil buaipui pawh hi ba hlirin Press-ah kan print tir a. Tunge rul tih leh tunge a hlawkna tel tih hi kan ngaihtuah ngai lo pawh ni lovin kan ngaihtuah pha meuh lo. Heng kan ba zawng zawng hi he YMA Palai man atanga inrul tawk tura ngaih a ni a, mahse a man luh dan atang hi chuan ngaihtuah chiang mang lovin khaw khat bat huai nih a ngai leh fo thin a, a ngai fo dawn niin a lang. Heng kan bat atang hian YMA Palai buaipuitute bakah a semtute thlengin, hlawkna engmah kan tel lo, i’n ti teh ang, tu huat thu ni lo se. A buaipui hi hlawkna a awm loh avangin kan hreh ngai chuang lo. Kan kovah a tla a, tha taka kan tih tur hlen hi kan tum ni. Sumdawnna thil a nih lo va, YMA thil pawimawh leh vengchhung chanchin kan inhriattirna a ni a, hlawkna tel a awm tur a ni hek lo.
Chuan, a chhiartute lam hi. Nangni chuan keini ni khat tha kha engtham mah a ni lo chungin Pathianni zingah in bih mual mual a. AK-47 a hming langte in chhaih zui bawr bawrh a. A vaw hot-tu kan ni hi a lawmawm tawk viau. Mahse hetia ba tam tak nei a min dah reng hi chu a zia lo lam deuh chu a ni. Kar khata ni khat hi thla khata vawi khat Rs.5/- in rawn chhanglet rawh u! Chuti a nih loh chuan kar khata ni khat C.K Press a inhmu khawm thinte leh he YMA Palai hi a ho der dawn tihna!

--------------------------------

AK-47
(Chawngkhum dan tlang huat loh, a hua hua sih hlawkah)
* Zion vengnu kha chu minduh hma loh chu ka bem ngat ngat dawn tih ka puang e.Lalroy-a, V-Sec
* TF min han en teh ka hmelchhe viau a mi? Heti maia min han hnawl mai le... Chhuana, N-Sec
* Chhuana ka bialnu hluite pahnih in ngaihzawn thu kha i sawi kher khera min chhaih luai luai a nia. TF-a, K-Sec
* Hmel a pawimawhlo, han zei em em phwt ila khawpui nula pawh nise kan zun ah an uai duai duai mai a lawm.Remna-a, N-Sec
* Motor chuan hi chuan zahmawh lampang hi han sawi ila kan hlimtlang a ni mai. Pi Muani m/o Ngurziki
* Zan dar 9 hnu lamah lo chuan keini a neitu deuh hi chu kan kal ngai meuhlo. Tlana, K-Sec
* Tunah zet chuan Kahrawt veng a kal kal a ngai tawhlo a pawimawhber ka kawl tlat tawh.Mahse a zawi theih khawpmai tunlai zet chu.Hlua(DK),V-Sec
* Saw ta tlangmawi tak saw khelmual atana hman, kei zawng ka zuam lul lo a ni.VL-a, K-Sec
* U Marem, Hockey hi hmeichhiain an lo khel ve thin a ni maw?Pi Hmingtei W/o Pu Marema
* Ka fate chuan min chhun fuh dawn khawp mai, mikhual an hmuhin ‘mikhual’’ an ti lauh lauh zel. Pu Lazova, K-Sec. Leader

Comments

Popular posts from this blog

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…