Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

Buatsaihtute Khawthlir

Champion Lawmnan
Image and video hosting by TinyPic


Silai i tung ngam ang

Nungcha humhalh hi kan sawi thin a, nungchate humhal tur hi chuan a mihring a bawk hi humhalh kan ngai leh thin. Kan nungchate humhalh tur chuan ram lamah keini mihringte hi kan inhumhalh a ngai tihna a nih chu.

Kan ramah hian nungcha, kan rama cheng kan neih thinte an bo zo tawh a, chuti chung chuan sapelh theuh theuh kan la bansam thei chuang lo. Sapelh hi nuamtawlna chi khat a ni. Sumdawn nana hman chi a ni lova, hunawl hnawh khah nana hman chi pawh a ni hek lo. Nuamtawlnaah chuan kan ram tana a chimawm ber pawl a ni bawk. Kan duh duhin sa kan kap a, kan heti hrim a nih chuan kan rama nungchate hi an thlalak bak hmuh tur a awm loh hun a thleng ta ve ang.

Sapelh hi khap chi a ni lo a ni ang e, sapho khuan khap lovin ‘hunting season’ an siam a. Nungcha inthlahchhawng chak deuhte chu an duhtawkin an kap mai thin. Mahse ‘hunting season’ a zawh chuan nungchate lakah hian kut an thlak ngai tawh lo. Hetianga ‘hunting season’ nei tur takngial pawh hian keini chuan a sa a lawi kan nei tawh lova. Ramsaa inthlahchhawng chak ber sakhi pawh hmuh tur kan nei ta meuh lo chu a nih hi le.

Kan rama nung-chate rawn tam leh theihna awmchhun chu sapelh hi bansan a ni. Nuamtawlna nuam tak a nih avangin bansan mai chi chu thil harsa tak a ni ang. Mahse sapelh phalrai leh tur chuan tuna kan bansan lailawk hi a ngai a ni. Ram leh hnam tan, silai i tung ngam ang u.

========================

Chhiartute Huang

C.YMA SPORTS - 2009 REPORT
Vantea, Secretary

Central YMA Sports, Inter Branch Tournament 2009, Dt.5-8.5.2009 chhunga neih zawh tak report hetiang hian pe dawn teh ang.

CYMA inbuatsaih dan Tun kumah hian CYMA chuan kum danga a tihdan thlakin, a duh duh Branch Aizawla kal mai tawh lovin Sub-Hqrs. hrang hrangah Qualifying a nei hmasa a. Chuta tithate chauh chu kan inel ta a ni. Hei hian a hun rei zawng a titawiin tha senthlawn pawh a tiziaawm hle. Tin, tun kumah hian Volleyball, Athletics leh Cricket-ah inelna hi buatsaih a ni a, nakum lamah Football leh Basketball-ah inelna hi buatsaih leh a ni ang. Hetiang zel hian a kum inkarthlaka inelna hi neih chhoh tura ruahman a ni.

Kan Branch inbuatsaihna lam Qualifying Round-ah kan Branch hian item 3-Volleyball (Mipa) leh Long Jump, Relay Race leh 100m Race-ah kan qualify ve a. Isaac Lalrinngheta s/o K.Lalrosanga chuan Long Jump-ah Lawmman 3-na a dawng tih loh chu lawmman lak kan nei ta lo, kan vanduai a ni! Volleyball Team hi TNT, Zuangtuiah theih ang tawkin an practice-a, Athletics-a tel turte Champhaiah anmahni remchan dan ang angin an inbuatsaih bawk. Tin sum leh paiah pawh kan inseng nuala, player pawh kan mamawh tur ang chu Sorkar hnathawk leh zirlaite pawh theih ang angin chawlh kan dilsaka, kan inbuatsaih nasa ve hle.

Intihsiakna tak takah Item kan telna turah te hian lawmman dawng vek thei tura inbuatsaih kan nih bakah kan inringtawk hle a, mahni inhmuh khumin midang pawhin min huphurh turah kan inngai ve tawp! Relay Race mipaah hian Champion ngei turin kan inngaia, Champhaiah 100x4 kan tlana, Aizawlah 200x4 (Champhaiah mi 1 in 100m theuh, Aizawlah mi 1 in 200m theuh tihna) kan tlan leh tak daih si avangin kan inbuatsaihna nen a inmil lova, lawmman kan dawng ta lo, 4-na erawh kan ni hram. Long Jump erawh lawmman kan dawnna awmchhun a ni a, kan tichhe hran love. Volleyball mipaah hian Mizorama Top Class player nei kan nih avangin Aizawl lam pawhin an huphurh ve ber kan ni a, Semi Finalah Hunthar Deciding-a hneh lovin Final kan lut zo talo a ni. Kan player-te inpekna erawh a ropuiin fak an phu.

Aizawl lam inbuatsaihna Infiamna leh zirna lamah pawh Aizawl lam khuan tih takzetin thil an lo ti thin a ni tih tun tum CYMA Tournament-ah hian a takin kan hmuhpui. Electric Veng Branch phei khu chuan tun tum Tournament-ah ringawt hian Nuai 1 chuang an seng nia! Hei hi an veng tanrual vang leh mi hausa leh neinungte inpekna vang liau liau a ni. A mihringah erawh kan nei tha zawk.

Lawmthu Lawmthu hi sawina tur a va tam em! Engkima min kaihruaitu Pathian chungah kan lawm a. Tin, Sorkar Officer, Zirtirtu, nu leh pa leh player-te chungah kan lawm hle. Khual thaa min thlengtu TNT chungah lawmthu kan sawiseng lo zawk ngei ang, engkimah min ngaihsakin min buaipui a ni tawp mai, kan lawm e. Sum leh paia min tanpuitu - Pu R.Chalbawia, Pu H.Laihuliana, Pu Bawithanga (Aizawl, anni hian sumfai bakah, eitur chi hrang hrang cheng tam tak man min pe bawk). Tin, kan Bialtu MLA Pu TT Zothansanga chungah hian kan va lawm em! Sum fai thahnem takin min tanpuia, Sorkar hotu biak atulin kan hmatheha, kan inkhel a hmuna min la enpuite kha kan chhuangin vannei kan inti teh a nia.Hetiang MLA kan nei hi khawi Branch mah kan it bik lo. A chungah hian kan lawm a ni tawp mai. (Lawmthu sawina hi Branch Committee-in a rel hunah hei aia chiang leh nasa zawk pawh hian kan la nei turah ngai ang, kan lawm em mai.)
(Kan Secretary pawh FY thil ngaihtuah paha kal emaw kan tih laiin Khatla nula nen thla an lo la dun a ni tih thu kan dawng. Ed.)

Comments

zt said…
A ropui ka t tho tho kei chu..englai mahin mihringte hi a chungnung leh chantha zokah a tan reng teih ngailoh ania..kan branch infiammite kan chhuang tho che u,,,Mahse..!! mahni aia tha zokte phak tum hi thil tha ber ani fo..i tang sauh sauh ang u..Kan MLA leh midang xong xong kha in fakm lutuk,midang kohhmuhtu nih tum xel ang u...
Anonymous said…
Kan vengah indoor stadium kan neih ve hunah chuan tun ai hian infiammi tha leh tam zawk kan chhuah ngei in beisei teh ang
Anonymous said…
In rawn up date tha e. Blog manager Pu Sangtea i fakawm e