Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

Champhai Chanchin

Tui pump nana hman tur enchhin
Greater Champhai Water Supply Scheme-a Electric hmanga tui pump-na khawl hman tur, 33 KV sub-station chu zirtawpni(8-5-09) tlai khan hlawhtling taka enchhin a ni. He 33 KV Sub Station-a transformer bunte pawhin an hnathawh tur angin hna an thawk thei a, Electric hmang chi tui pump-na khawl enchhin hun atan erawh chuan tun thla ni 14 leh 15 khi ruat a ni a, hetah hian tui pump-na khawl siamtu Company, Mather and Platt Pump Ltd, Pune atangin an aiawh pawh tel tura hriattir a ni. Hetihlai hian Greater Champhai Water Supply Scheme-a diesel engine hmangin tunlai hian tha taka tui pump theih a ni a, tui pump chu mipui tan tam tawk lo deuh mah se, Electric khawl hmanga pump theih a nih hunah chuan Champhai khawpuia chengte hian hnianghnar takin tui an dawng thei dawn a ni. Tunlai hian khawpui chhunga tui connection la duh chhung-kuate hnenah tui connection pek hna ngawrh taka thawh a ni a, hnathawh dan tun hnaia a hmuna entu, Principal Secretary, PHE changtu, Pi L. Tochhawng chuan tui connection latuten tui pipe sei tak tak hmanga hla tak atanga tui an la thin chu mipui tan harsatna siamtu a ni tih hriain hnai zawka an lak theih nan T-Cluster tam zawk siam turin Department mite a hrilh a, hei hi bawhzuiin cheng nuai 35 seng turin hna thawh tan a ni.
========================================
Police-in lawm
Inrinni(9-5-09) tlai khan Champhai Police ten Inter Office Volleyball a Champion an nihna sawm bikte nen zanriah kilhovin Champhai Thana ah an lawm a, Semi Final an khelhpui, Power Dept., MJA leh CDVA hotuten he hun hi an hmanpui.
=========================
Musical Meet
Tunkar Ningani(14-5-09) zan atang khian Venglai Kohhran Centenary Hall-ah Vengthlang Pastor bial Musical Meet neih tan a ni dawn a, thu leh hla a Intihsiakna chi hrang hrang neih a ni ang. Intihsiakna hi Medal Tally a kalpui a ni ang.
========================
Kawng ti ping
Zirtawpni(15-5-09) chhun dar 1 vel khan Khawzawl thlang Tuichang thlenhma kawngchhaka lung IR hovin an laa, an lunglak avang hian lung an duhaia tam a chim tak a vangin lirthei kal vel tlai dar 6 vel thleng an tangkhang phah a ni.
==============================
Famchang
Pi Laiziki (74) Pu Chawngkunga farnu chu Pathianni(10-5-09) dar 7:00 khan pumna avangin anmahni chenna inah a boral a, a unaunu Pi Nubuangi, Kahrawt-ah a ruang hi lak a ni a, Thawhtanni khan Kahrawt thlanmualah vuiliam a ni ang.Amah hi pasal neilo nula hnahkhat a la ni.
==========================
Item 2-ah 1-na
CYMA buatsaih (5-8,5,09) chhunga Inter Branch YMA Sport Aizawla neih zawh takah khan Champhai aiawha kal David Lalkhawngaiha S/o Rongheta, Venglai chuan Discuss leh Javeline Throw lawmman pakhatna a la ve ve.
=====================
Jail-ah MLA
Champhai North bialtu MLA Pu TT Zothansanga leh block hruaitute chuan Pathianni(10,5,09) khan District Jail tangte tan zanriah an buatsaih sak a, an chungah jail tangte an lawm hle tih thu kan dawng.
===========================
Bike ruk sak
Pu R.Lalremmawia (Marema) Bike Yamaha RX chu Dt 11,5,09(Thawhtanni) khawvar dawna thli leh ruah in Champhai a nuai lai vel khan misualin an ruk sak a, tun thleng in a awmna chin an la hre thei lo.
==================================
Hindi Training
Thawhlehni(12,5,09) chawhma dar 10:00 atang hian Zirtawpni(15,5,09) thleng awh tur Champhai Block huam chhunga Middle School Hindi Teacher training chu SSA Training Hall, Champhaiah neih tan a ni dawn.
===========================
NLUP kalpui huna Horticulture huam tur chinah VC-te training pe
NLUP Programme kalpui tur chungchang inhrilhfiahna ni pahin, Thawhtanni khan Horticulture Department in Programme a kalpui tur chin inhrilh hriatna leh Pre-Survey neih dan tur chungchang training chu New Champhaia Horticulture Department Training hall ah neih a ni a, he hunah hian Champhai Town chhung bakah Chhim lamah Dilkawn leh Bulfek zawl huamin, hmar lamah North Khawbung leh Ngur huamin V/C 25 huama VCP leh Secretary ten training hi an nei a ni.
Inkhawm kaihruaitu Pu C.Lalremsiama (Pu Mapuia) SDHO chuan tuna an inhmuhkhawmna chu NLUP kalpui a nih huna Horticulture dept.in a huam tur chin inhrilhhriatna leh chumi atana Survey hmasa lo neih lawkna a ni tih sawiin Horticulture Dept. hnuaiah hian Sapthei, Iskut, Grape leh Serthlum a huam dawn a ni a ti a.
Tih tak taka thlai chinga Hlawhtling thei tur chin hriatfiah hmasak phawt a ngai a, heng thlai chinna atan hian Khawchhak lam hawi ram chu a tha ber a, a dawtah hmarchhak lam hawi, chumi dawtah khawthlang lam hawi, chumi dawt lehah chuan chhim thlang hawi a niin Chhim lam hawi ram chu a tha lo bera ngaih a ni tih Pu C.Lalremsiama chuan a sawi.
Horticulture Dept. hnuaia thlai chin tur bikte hi Tui hmuh that theihna, Lui luang lak penin a chawm theih ram tuikawng emaw, Pipe hmang emaw chawm theih ram chu a tha ber a, hnianghnar taka tui hmu thei lo ramah heng thlai te hi chin hlawhtlin tak tak theih beisei a ni lo tih SDHO chuan a sawi bawk.
Khaw hrang hrang VC te chuan an mahni huam ah heng thlai Sapthei, Iskut, Grape leh Serthlum te hlawhtling taka ching thei tur leh ching duh zat (NLUP Trade atana thlang duh tur zat) te, an ram dinhmunte an lo survey vek ang a, May ni 20 ral hmain SDHO Office ah an thehlut ang a, May thla ral hma ngeiin Aizawla Horticulture Office ah thehluh leh tur a ni ang.
=====================================
MLA-in College tlawh
Champhai North bialtu MLA Pu TT Zothansanga chuan Thawhtanni khan Govt. Champhai College tlawhin an dinhmun a enfiah. MLA hi Principal Pu V.Suakbuanga’n lo dawng-sawngin college building te leh BCA zirna hmunte a tlawh a, Principal chuan building chhiat tawh thu leh thawktu indaih loh avanga harsatna an tawh thute lo hrilhin Pu TT Zothansanga hian a theih anga hma a lak tur thu hrilhin a lakah hian beiseina an nei sang hle. Pu TT-a hi vawiin hian Aizawl lam panin a chhuk zin chhuak leh dawn a ni.
=======================================
Training nei
Sub-Hqrs.YMA Camphai leh Wildlife Wing bultumin Nilaini (May ni 13) khan Murlen National Park leh Lengteng sanctuary catch Area khua Frince Village leh YMA hruaitute tan Training on Wildlife Protection Under protected area chu Sub-Hqrs.YMA Office, Tlang-rawtah neih a ni a, he hun rawn hmanpui tur hian Pu Liankima Lailung DCF Wildlife Division Aizawl leh Pu C.Lal-biaka DFO Wildlife Division, Khawzawl te an lokal a ni.
=========================================
Famchang
Tv.Lianthangvunga (20)New Champhai (Zopar hnuaia thawk) thin chu Thawhlehni(12,5,09) zing dar 8:45 vel khan a Tractor khalh chesual vangin Vaipuanpho, Ailawng kiangah a boral a, a ruang hi Postmortem a nih hnuah Thawhlehni zan khan Champhaiah a ruang hi rawn phurh chhoh a ni a, Nilaini khan New Champhai thlanmualah vuiliam a ni.
Biakdinthara (KUm 7) S/o Pu Chhuanawma, Zotlang chu nimin chawhnu dar 2:00 vel khan Pumna vangin an mahni chenna Inah a boral a, vawiinah vuiliam a ni.
======================================

Comments