Skip to main content

Champhai

CHAMPHAI IN EYE DOCTOR NEILO PAWI TI :
Champhai District Hospital a Eye Doctor awm ta lo chu MZP Hqrs. Champhai chuan pawi an tih thu an sawi.
Zirtawpni a Executive thukhawmah Champhai District Hospital a Eye Doctor awm ta lo chungchang an sawiho a. Zirlaiten thisen chhuak meuha theihtawp chhuaha Doctor an ngenna hliam dam fel hmaa Eye Doctor in hna dang zawm a, Champhai a chhuahsan chupawi an tih thu an sawi a. Sawrkar tana MIMER a hlut ang chiahin CHamphai tan pawh District Hospital hi a hlu em em a, mit Doctor kan neih thuai theih nan hian Health Minister hnenah ngenna hmanhmawh thlak lehkha ziak a pek nise, an ti. hei bakah hian Champhai DIET Lecturer Allision Byhnasa, Siaha DIET lama transfer chu a aiawh rawn dah thuai turin sawrkarah ngenna thlen vat nise, an ti bawk.
Hetih rual hian Champhai DIET a Mizo zirlaite dinhmun pawh uluk taka enzui nise, an chanvo dik tak an chang em tih zirchian nise tiin, MLA Election lo awm turah Party tin hnenah Champhai khua ngei, Champhai khaw…

Emanuel For World

LALPA IN SAK CHU
C. Hranghluna
LALPAN in a sak loh chuan,A satute chuan an thawk rim thlawn mai a ni: LALPAN khawpui a vawn that loh chuan,A vengtu chu a meng thlawn mai a ni.’ - Sam 127:1
Heti hian i`n sawi leh teh ang. Kan chhungkua kan inhmangaihna chu Pathian hnathawhna tura daltu nasa tak a ni thei a. A chhan chu chhungkua kan nih avanga kan inhmangaihna chuan phut let a nei lian duh riau a, chu hmangaihna hmang chuan inthunun tlat kan tum bawk a. Kan inhmangaihna chuan a beisei ang chhanletna a hmuhloh thin avangin, inhuatna leh hnawksak intihna thlengin a keng tel thin bawk a. Mihring taka kan inhmangaih em avang chuan kan chhungkaw chenho-na boruak thlengin a hrehawm vek thei a ni.
Kan chhungkuaa harsatna tawk mek chu ka nupui/pasal emaw ka fanu/fapa emaw a ni mai thei e. Mihring lama kan inlaichinna lam atanga inthlirna lam ai chuan, ‘thlarau bo’ pakhat angin in en thei i la. Chu thlarau bo chu Lalpan engtiang chiahin nge a tih ang tih ngaihtuah tel bawk ila. kan mihring inhmangaih tawnna-in a daih tawh loh hnuah pawh Krista hmangaihna mak tak hmangin, kan inkara inhuatna lo piang tur pawh chu thlaktlhleng a lo ni thin dawn a ni.
Tin, mihring taka kan inhmangaih huam huamna chuan mihring rilru bawk a chawk tho thin a. Chu chuan kan chhungkuaa sual inrawlh chu a tipunlun nasa thei hle bawk a ni. Mihring taka kan induat hliau hliauna te, zilhhau ngamloh khawpa sual kan inthup sak thinnate avang chuan, kan chhungkuaa sual inrawlh chu duat takin kan zuah thang lian hliau hliau thei tlat a ni.
Diktak chuan kan inhmangaihna chuan a tawpah inhuatna thalo emaw beidawnna chauh a hrin theih bakah; kan induat hliau hliauna pawh chuan sual a chhem alh theih avangin, mihring inhmangaihna chu a hnawksa thei hle a ni.
Tin, kan chhungkuaa harsatna lo thleng mek chu Lalpa thlirna atanga kan inthlir sakloh thin avangin, Krista atanga chhuak lainatna hmanga in en chu kan harsat tlat a. A ni chu thlarau bo a ni a, kei hi hruai chhuak tura Pathian hmanrua ka ni kan tih ngam chu a tul takzet a ni. Kawng tam takah chuan keimahni kan inhmangaihna chu a nasa hle bawk a, Krista retheihna tawmpui tura kan chhungkaw harsatna hmanga Lalpan min koh meklai hian, mihring rilru takin sual chu kan ning em em a. Kan chhungkuaa harsatna tawka te chu kan ngaidam hlei thei tlat lo va. A chhan pawh keimahni kan inhmangaih em vang ani fo mai. Lalpa kha chuan misualte lama sim tir tura lo kal a nih thu a sawi mai a, misual in a thlen leh chaw ei te kha a hrehloh tehlul nen. Keini chuan kan chhungkuaa harsatna chu kan zahpuiin kan ning em em reng a. Khawvel thil taka kan hmasawnna dal tu, kan rual pawlna leh rual el-na ti thuanawptu pakhat a nihna chu kan hrechiang em em a. Thlarau bo lainatna atang chuan kan inthlir ngai lo hrim hrim a ni. A pawi ngawt mai!
Kan chhungkuaa harsatna tawktu chu tha ve se, fel ve deuh se, Pathian thu awih ve se, chhungkaw tan tangkai ve se, a sual tih thinte chu bansan tawh se tih suangtuahna te chu kan hmang rim thin hle a ni. Phutna thinlung leh rilru atang ngawta kan in en a, kan infuih a, kan inteh thin avang hian, Lalpa duhdan leh ngaihdan chu kan rawn thiam mang tlat lo va. Kan chhungkuaa harsatna tawk tana Lalpa kan auh sak te,chu harsatna tawktu chu rawngbawlna pawimawh tak atana Lalpan min chhawpsak a ni tihna thinlung zawk a kan harsatna kan hmachhawn hian, kan harsatna te chu hrehawmin hautak hle mahse, kan thlarau lam nun atan hausakna nasa tak kan neihna luankawr a ni daih zawk tih kan hre thei ang. Hrehawmna hmanga Lalpan chaw rum a pek thin ringtu kan nihna chu kan hman thiam phawt chuan, kan chhungkuaa harsatna lo thleng hmang chuan hnehna chang tura chakna kan nei thei dawn a lo ni reng mai.
Kan harsatna tawhte chuan min ti kun ngawih ngawih a, tawngtaina leh biak in meuh pawh ngaina thei tawh lova sualin a thunun kan ni tawh hial em. Rawngbawlna kawnga kan mawhphurhna thleng chuan bansan kan duh rum rum em? Dik tak chuan Lalpa hlawkna tur thlir chunga Lalpa rawngbawl hna chu mahni inchhungah thawk mai tur kan nih lai hian, keimahni zawkin a hlawkna chu tel kan tum tlat a, a par tlan tum tlat chungin Lalpa hming kan lam thin a. Lalpan hna a thawh theihna tura kawng ken ai chuan, keimahni duhdan hmang chuan Lalpa chu che turin kan beisei leh thin. Mihring taka mahni kan inhmangaihna te, kan chhungkua kan hmangaihna te chuan mihring riltu mai a chawhthawh thin avangin, Krista rilru atanga Lalpa hmangaihna zawka kan in en theihnan kan mihring rilru chu kross hmaah vuiliam a nih i phal ang u. Pathian thil tum engnge? tih thlir chunga kan chhungkaw harsatna chu kan thlir theih phawt chuan, kan duhdan lam chu kan dah lal a rem hauhlo tih kan hre thei ngei ang. Lalpa chuan ei leh in, in leh lo, silhfen a kan hnianghnarna tur lam ngawt chu ni lovin, kan chhungkua chuan thlarau lam hausakna kan neih chu min duhsak si a. Amen.


==================================


Musical Meet hmang
Vengthlang Pastor Bial, Kristian Thalai Pawlte chuan karkalta Ningani zan leh Zirtawp zan-ahte khan Venglai Kohhran Centenary Hall-ah Musical Meet an hmang. Heng zan hnih chhung hian zaipawl intihsiakna neiin ‘Thianghlim Thianghlim’ KHB. No -1 leh ‘Lal Engkimtitheia’ Pu Vanmawia hla te chu intihsiak nan an hmang. Thawhtan zan hian Musical Meet hi chhunzaw, leh a ni anga, zaia intihsiakna hrang hrang, Solo, Quartet, Duet bakah faifuk intihsiak an hmang leh ang.

Bial Meet hmang
Bethel Pastor Bial, Kristian Thalai Pawlte chuan Inrinni leh Pathianni chawhnu leh zan te hian New Champhai Kohhhran-ah Meet an hmang mek. Inrinni hian Outdoor games hmanga intihhlimna neih a ni a, hun dang erawh bial hruaitute hnen atangin Pathian thuchah ngaihthlak thin a ni ang.

Revival Crusade nei ang
Bethel Pastor Bial, Lady Auxilliary Department (LAD) bul tumin Revival Crusade, Bethel biak in-ah Inrinni zan atanga Pathianni zan thleng hian neih a ni ang. Speaker Evan.PC.Hrangkhumi, Bethlehmem Veng, Aizawl a ni ang. Evan PC.Hrangkhumi hian tihdam rawngbawlna a lo nei tawh thin a, a rawngbawlna atanga Pathian tihdamna chang engemawzat an awm tawh a ni. He Crusade chhim tur hian taksa leh thlaraua natna nei a duh apiangte tan pan theih a ni e.

Sunday School training dawn
Ni 22, May hian Ruantlang Pastor Bial chuan Ruantlang Kohhranah Bial Sunday School Training an nei ang. Ni 23 hian Kelkang Pastor-in Biak Sunday School Training hi an nei chhunzawm anga, Pathianni ah training pe a lokal, Synod hotute hnen atangin Ruantlang Kohhran leh Kelkang Kohhrnahte hian Pathian thuchah ngaihthlak a ni ang.

Pastor retreat dawn
Ni 26-29 May`09 hian Presbyterian hnuaia Pastor bial vawng mek te, bial vawng lem lo leh Pastor pension tawh te, Pro Pastor te chuan intuaitharna ‘retreat’ ATC, Durtlangah an nei ang.

BSI campaign mek
Vawiin Pathianni chawhma hian BSI Bethel Area chuan AG kohhran, Bethel-ah BSI campaign an nei ang a, hehunah hian Upa C.Pakunga, Secretary, Bethel Area hnen atangin Pathian thuchah ngaihthlak a ni ang. Pathianni chawhnu leh zanahte hian Zion Kohhranah campaign hi neih chhunzawm ani anga, chawhnu inkhawmah hian Tual Upa PC.Rosiama, New Champhai in thu a sawi anga, zanah Upa Zachula,Vice President, Tlangsam hnen atangin thusawi ngaihthlak ani bawk ang. Tin, ni 24 may Pathianni chawhnu khian bethel Kohhranah hun hmang a ni bawk ang.

Jail-ah rawngbawl mek
Inrinni leh Pathianni te hian District jail, Champhai ah ‘New Life Gospel Team’ Speaker, Laithanngura Sailo leh a thiante chuan Pathian thuchah sawiin rawngbawlna an nei mek.

Bible Society ‘KANTU’Tun tumah hian BSI kantu chuan Kahrawt Local a kan a. Kahrawt Presbyterian Kohhran hian Budget Rs.26300/- neiin tunah hian Area-ah Rs.20000/- an chhunglut tawh a. Rs.6300/- tlakloh an la nei a ni. Kahrawt Kohhranah hian dan zawhkim 1132 an awm a, chhungkua 336 an awm a. Bial 14 ah inthenin, collector 19 an awm bawk a ni. BSI ah hian instalment a pe te, bial la fan loh te atangin Budget hi khum ngei an tum a ni. BSI Life hmanga Pathian hnathawh mak chu; Treasury Square a Pu K.Lalthawmmawia Press, ‘Rinawmna Press’ chu a chhak atanga motor breakfail-in a su a. A kawngkhar chu su-in a hlauhawm khawp mai a, in chhunga an khawl lian man to tak chu a su lo chiah a. Motor in a sut hma lawk hian an Press hi an lo Life hman a, chu chu an khawl himna chhan niin an ngai.

================================

THLARAU THIANGHLIM
‘Pathian rinna tak’
Tuna ka testimony rawn ziah chhuah hi keima thiltihtheihna ni lovin, Pathian kan rinna leh kan chettirna a taka kan hmanna a ni. Pathian thu hian rinna thu a sawi reng reng hi thil awmsa hman mai tur emaw a ni lova, thil awm lo te rin tir leh thilhmuh theih lohte hmuhtir hi niin a lang. Paula chuan thil hmuh theihte hi en lovin thil hmuh theih lohte kan zawng a ni tiin a sawi a.
Mosia leh Pathian chu an in be thin a, Mosian Pathian hnenah thil tul leh anmamawh chu a sawi thin a. Tuihna te, sava te, chhang hmang tein a thiltihtheihna a takin a lantir a, Pathian kan rinnaah hian rintlak a nihna a rawn lantir a. Hebrai 11:12 ah chuan rinnaa fak lo hlawh tawhin, tiin a sawi a, kan chhungte hnenah hian damlohna leh natna thusawi hi ka phal ngai lo reng reng a. An mangang hi, ‘Ka pa, engtinnge kan tih dawn?’ te hi an ti ve thin a. ‘In mangan thu sawi reng reng suh u, engkim mai hi Lalpa ta a ni a, Lalpan a ngaihtuah vek mai ang,’tiin ka chhang thin a ni a ni.
Hetianga rinna han zir meuh chuan, mihring lam atang chuan a buaithlakna lai a tam duh khawp mai a. An damloh changin damna thu sawiin Nazareth isua hmingin damna thu an puang ve thin a ni.Sum leh pai, ei leh in kan tlak chham chang pawh hian tisa taka kan chhungte hi kan pan ngai lo. Lalpa hnenah kan thlen thin a, Lalpa chet hun kan nghak mai thin a ni. Mihringte hi kan hmanhmawh thin a, Pathian hi kan duh aiin a che tlai thin a, mahse, Lalpa chu a hun takah a che thin a ni.
Ringtu tam takte chuan Lalpa hnathawh pawh nghak zo lovin chhungte hnenah kan nghat zawk thin a, Pathian chettir ai chuan chhungte chettir mai kan ching fo thin a ni. Hei hian rah thalo tak a rah chhuak thin a, nakin hnuah in uankhum nan kan hmang leh thin a, in phut let na te ani fo thin a ni.

- Evan.T.Sathiauva.

================================


HRIATZAUVA

Kap thak hiah khap!
Rapper ho hian an kekawr hi engvanga an kapa tham khawm ziah nge maw an nih le? Italy a Court of appeal chuan mipate tan khapna thupek thar chhuahin vantlang leh puipunna hmuna kap thak hian a khap hmiah mai!!
Italian mipate hian puithuna mak tak an nei ve a, engemaw an tih dawn hian vanneihnan tiin an kap khawih zeuh hi an ching thin a ni awm e.
Hman deuh lawk khan Italy rama Como khaw pa pakhat, kum 42 a upa chu vantlang hmuna a kap a hiah avangin euro 200 chawi turin a chungthu an rel a, a ni chuan ero 200 chu chawi duh lovin court sang zawkah a thlen leh a, Court of Appeal chuan he thutlukna hi a siam leh ta a ni.
Como khaw pa hi machanic a ni a, a dan hremi rawih chuan, ‘a tawhmhnaw a han siamrem chauh mai a nia,’ tia a`n chhan viau chung pawhin court chuan, ‘ Vantlang leh puipunna hmuna englo khawih hi chindan mawilo tak a ni a, mipuite zahlohna angah ngaih theih a ni. Khawtlang anga kan nunhona-ah hian awmdan leh chetdan mawi kan zir hram hram tur a ni a, midang mit tikham thei zawnga khawsak tum loh tur a ni,’ a ti.
Coert of Appeal chuan ngun takin hepa case hi an han ngaihtuah vang vang a, euro 200 mai nilovin, euro 1000 zet chawi turin a chungthu an rel ta hlauh a ni.
Thak hiah man a to duh hle mai!!

===============================

editorial

Heti tak a BSI rawngbawlna-in Pathian hnathawh mak ‘miracle’ a paipawn nasa hi khe-ngbettu-te tan pawh mak tih loh rual a ni lo!
Kohhran hrang hrang ten ‘BSI’ a inthlun zawm chunga pawl pawl ti lo pawl ‘Vanlalnau ang tah-na Kalvary’ an din hi chu-nglam khian a ordained ru riau a ni mahna!
Tin, Pathian la hre reng reng lo-te tan a hlu em a, a thawkkhum Bible hi Lalpan a humhalh te pawh a ni ta ve ang. Pathian ringtuten Bible hmanga Pathian hna-thawh mak tam tak an dawn lai hian erawh Bible bye bye tu-te tan chuan a hlui ru riau thung a.
Bible chhunga nunna Lalpa ‘pawh’ pha-tute tan chuan khawizu ang mai lah ni.
Heti taka BSI zara Bible kan hnianghnar hnu hian erawh kan Bible hian ngaihhlut a hlawhlo telh telh em a tih theih. Kan Pathian biakna buk ‘biak in’ ah meuh pawh kan keng tha peih meuh tawh lova, kan keu tha peih lo riauin a hriat bawk. Bible hi inchei nan leh in chhunga hun mawi atan chuan a pam hmai mah mah.
Tin, kan Bible meuhin hal a tawk hi engtia ngaih chi nge nia i hriat? A haltu thiamloh nge, a letlingtute thiam loh? Sipai bo kan bang leh ta map mai! Bible hal hian Bible ngaihnepna aiin Bible hlutzia min hriattir a nih chuan a tha zelah i ngai phawt teh ang.
Nia, Vawk Flu ‘Swain Flu or H1 N1’ tih vel in khawvel a chawh buai mup mup lai hian, BSI hmang hian ‘Bible Flu’ thehdarh hna i thawk zel ang u lah; chutin BSI hmanga Bible phena Isua hi ‘Life’ nana hmangin, BSI hmang vek a Krista humtu ‘Patron’ kan ni ngei ang. BSI hmang hian Lalpan malsawm che a duh e.

=================================

‘BALTADONO’

Baltadono-a chu kum 1905 vel lai khan Bolivia rama thingtlang naupang a ni a. Vawikhat chu an khuaa bible leh thuthlung thar zuartu pakhat a rawn kal a. Baltadono chuan a tet that reuh em avang chuan naupanga thu khawchang a neih zawng zawng sengin bu te pakhat NT leh Sam bu a lei ve a. Chumi ni tuklehah chuan an khaw pathian biakna in dar chu nasa takin a lo ri a, mipuite chuan chu ri chu an lo hriat thin tawh a nih avangin, eng thil nge thleng ta? tiin an biak in-ah chuan an rawn pung khawm ta chiam a. Chutah an khaw puithiam chuan an khuaah mi bawlhhlawh pakhat rawn lutin an khuaah lehkhabu pakhat bible an tih chu a rawn hralh thu a sawi a. Chu lehkhabu chu a lo lei apiangin tihchhiat vek tur anih thu a puangta bawk a. Tichuan bible leitute chuan an tichhe nual hlawm a ni.
Baltadono pawh chuan chu chu a hriatin bible chu a chhiar ta bik lova, pawh chhiat mai a ui deuh avang chuan wardrope chhung kil khatah chuan a vawm lut ve ta mai a. Hun a liam zel a, a lo tleirawl chhoh ve tak zelah chuan meizial zuk te a ching chho ve ta a. Vawikhat mei a han zu tur chuan meizialna tur lehkha a neih tak mai loh avangin, hmana a lehkhabu lei, warddrope kilkhat a awm ta mai mai chu a hre chhuak a, va la chhuakin phek hmasa ber chu a pawtthla a, vaihlo hnah nuai sawm chu paper-ah chuan a han dah a, uluk takin a zial a, a paper a that em avangin zial a awlin zuk a nuam a ti hle mai a. Lehkha zial thiam tir tan pawh awlsam taka zial theih a ni si a. A phek in dawt chuan a zu ta zel mai a ni.
Nikhat chu chutia vaihlo anuai sawm lai chuan a lehkha hman tur ah, ‘Boralte zawnga chhandam turin mihring fapa hi a lokal a ni reng a ni,’ Luka 19:10. tih hi a zu chhiar a..umm eng tak ni ang maw...? tiin Pathian thlarau pawlna mak tak pawh neia inhre lem lo chuan a zu bih nawn a, a vaihlo chu a dah lawk a, a phek pum chuan a chhiar ta vek a, a phek hnunglam a keu leh a, a phek dawt leh a chhiar chak ta tlat a, a pawh thlakna bu lam chu a bih zui ta zel a.
Thuthlung Thar a han chhiar zel chuan ngaihnawm a ti a, khua a lo thim chuan bati chhi turin a tho va, chhiar zel a ngai ta tlat a, bati chu a ral a, thlak a ngai a, a thlak ta zel a. A ma sawi dan takin a tuk khawvar ar a khuanga, khawfing chatin chhaktiang lenkawl a rawn en raih velah a tho va, a thingthi a, a kut suihin Isua Krista hnenah chuan a kun a, a sualte ngaidam turin a dil ta a ni. Zing chaw a eikham hnuah pawh chuan Baltadono pawh chuan a thil chhiar ngaihnawm tak mai chu a vei reng a, thinlungah a tharin hriatchian leh zual duhna a nei a. Chu lehkhabu dum te chu mak a ti hle mai a. A va ngaihnawm teh reng em a ti rilru a.
Matthaia leh Marka leh Luka bung 18 vel lai mai kha a lo zuk zawh tawh si avangin a bu pum neih a chak ta em em mai a. A inchhir leh hnuhnawh ngei mai, tihngaihna a awm si lo.Tichuan pawisa khawlin a tuak ta a. A pawisa neih ang ang kengin khawlian zawk, hla fe maich chuan a kal ta a, a lo zuk zawh tawhte telna bible Thuthlung Thar pum chu a zu lei ta a ni. Chutia a duhtawk a chhiar theih takah chuan Isua a lo ring ve ta a ni. A hnuah phei chuan bible pum pui a lei thei ta a. Midangte hrilh ve a chak a, Petera ang mai khan a thil hmuh leh hriatte chu sawi a chak ve ta em em mai a ni.
Bible pum a chhiar hnu phei chuan hriatthiamna thuk tak nen bible chu chhiarin mite tan malsawmna thlentu a lo ni ta a.
Kum 1947 vel lai khan khawvel hmun hrang hrang atanga Argentina rama missionary lokal a piangte puibawmin Pathian rawng a theih tawpin a bawl zui ve ta zel a ni.

=============================

CHRISTIAN KHAWVEL

Pakistan Christian raltlante Nekchepin An Awm

Pakistan khawpui Lahore atanga hla lo te Swat Valley-ah Taliban-hovin bu an khuar ngheh tawh avangin Pakistan Sawrkar chuan helho nuai chimih tumin beihpui a thlak mek a, silaimu leng karah mipui tam tak chu hmun him lam panin an insaseng mek thung. Hetianga ral tlan mipui pungkhawmte hi relief camp-ah an awm khawm a. Muslim mipui tam tak kara Kristian lo awm ve te chuan an khawtlang hruaitute lakah harsatna nasa lehzual an tawk mek thung. Thulakna-in a sawi danin Kristian, Sikh leh Hindu mipuite chu sawrkar hnathawk thenkhatten an register duh lova, ei leh bar dap kawngah an harsa hle. Pakistan Christian Congress hotupa Dr Nazir S.Bhatti chuan, “Sawrkar hnathawk registration khawihtute hian Muslim hovin sakhaw dang betute nena chaw bel intawm an duh loh tih chhuanlamin an hnawl a ni,” a ti. Bhatti hian Sawrkar chu Swat Valley atanga lachhuaka Kristiante awmkhawmna hran siamsak turin a ngen a, tunah hian Kristian 500,000 vel zet chu hetianga enhranna leh dodalna karah hian an khawsa mek niin a sawi bawk. Tunah hian United States chuan dollar maktaduai 4.9 lai chhawmdawl hna thawh nan hian a thehchhuak tawh a ni.

Christian pakhat that, midang 12 hliam
International Christian Concern (ICC) sawi danin March 2 daih tawh khan Pakistan-a Muslim firfiak intiamrual mi 25 vel chuan hmeichhia leh thenawm khawveng naupang chauh awm laiin Christian chenna in an bei chiam a, hmeichhia pakhat an thah bakah midang 12 lai an hliam bawk.
Hei hi February 26-a Christian tlangval pakhatin Muslim rual amah beitute laka thubuai a thehluh vanga thleng a ni a. He khua Sango Wali-a Presbyterian Church Kohhran Upa Emmanuel Shad chuan tlangval kum 17 mi Imran Masih chu February 26 khan a hnathawk haw lam Muslim hovin nasa takin an lo sawisa a ni.
Thubuai thehluh vanga thinur Muslim rual chuan silai, tiang, lung leh hmanraw dang eng engemaw hmangin Kristiante Biak In an tawng chiam a, a bul in thenkhat an bei zui nghal bawk. Terrorist-ho pawhin heng misual rual hi thlawpin chhanchhuah hna thawk turte pawh an lo dang a, inhliam enkawl tumtute pawh lo vauin an lo hnawt kiang zel a ni. Police-ten buaina an thelh dai theih hnuah meuh chuan Shahkeela Bibi an that hman a, midang 12 vel inhliamin a bul hnai Gujranwala hospital-ah dah an ni a, hliam na vak awm lovin an vaiin chhuahtir lehnghal an ni. Kristiante hian he thil thleng vang hian thubuai an thehlut naa Police-ten hma an la hlei thei meuh lova, rinhlelh mi 12 vel chauh an man.

=============================

Addict kha chhanchhuaktu ropui a lo ni
Kum 1998 atang khan mi pakhat, Childers chuan Sudan sawrkar nen iremna thuthlung siamin a ministry, Angels of East Africa chuan nitin mi 2400 eitur, mutna, zirna, damdawi, infiamna, Biak In leh school an pechhuak ziah a ni. Tunhmaa drug addict leh a zuartu ni bawk Childers chuan, “Khang hunlai kha chuan lo thi ta ila Hremhmun ka dai chiang ngawt ang. Nimahse A hnena ka inhlan atang khan chona thar a lo piang a, rawngbawlna thar a lo piang ta a ni’ a ti. Sudan rama buai tak, Sudan sawrkar leh LRA helho inbeih rengna karah mi tam tak in leh lo mumal nei lovin an awm a, hengho tana chhawmdawlna leh rawngbawl hna thawktu Childers hian nupui Lynn neiin fa pahnih a nei. A lehkhabu ziahah Childers chuan, “Hah leh rim takin ka taksa tichhe zawngin hun rei tak ka lo khawsa tawh a, ka dinhmun ang atanga sakhaw rawngbawltu ni tura rawn dingchhuak leh hi mi tlemte an ni. Mahse heng ka chhelna leh ka bula thil awm mila ka khawsak thiamna hi Pathianin min chherna a lo ni zawk a, Sudan leh Uganda rama ama rawngbawl turin min lo chher reng zawk a lo ni” a ti.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…