Skip to main content

Champhai

CHAMPHAI IN EYE DOCTOR NEILO PAWI TI :
Champhai District Hospital a Eye Doctor awm ta lo chu MZP Hqrs. Champhai chuan pawi an tih thu an sawi.
Zirtawpni a Executive thukhawmah Champhai District Hospital a Eye Doctor awm ta lo chungchang an sawiho a. Zirlaiten thisen chhuak meuha theihtawp chhuaha Doctor an ngenna hliam dam fel hmaa Eye Doctor in hna dang zawm a, Champhai a chhuahsan chupawi an tih thu an sawi a. Sawrkar tana MIMER a hlut ang chiahin CHamphai tan pawh District Hospital hi a hlu em em a, mit Doctor kan neih thuai theih nan hian Health Minister hnenah ngenna hmanhmawh thlak lehkha ziak a pek nise, an ti. hei bakah hian Champhai DIET Lecturer Allision Byhnasa, Siaha DIET lama transfer chu a aiawh rawn dah thuai turin sawrkarah ngenna thlen vat nise, an ti bawk.
Hetih rual hian Champhai DIET a Mizo zirlaite dinhmun pawh uluk taka enzui nise, an chanvo dik tak an chang em tih zirchian nise tiin, MLA Election lo awm turah Party tin hnenah Champhai khua ngei, Champhai khaw…

## Emanuel For World

THLARAU RAH
C. Hranghluna
‘ Chutichuan, hei hi ka ti a ni: Thlarau vah awm rawh u, tichuan tisa chakna chu in zawm dawn lo nia.’ - Galatia 5:16.
Ruihtheih thil emaw eiruk leh sual langsar lama kan fihlimna hi ringtu nun atan a tawk zo lo nasa em em a. Thil thalo tam tak kan tihloh avang hian fel emaw tha emaw kan inti mai ang tih a hlauhawm takzet a ni. Lalpa chuan thlarau dana awm turin min ti zawk a. Lalpa thu te hi a ropuina lai ber chu a thlarauna tak hi a ni a. A thlarauna pawh pha lo va Lalpa hi kan biak thin avangin, Pathian, Pathianna tak hre mang lov in kan ringtu nun hi a awm reng thei bawk.
Kristian kan nih vang ni kher lovin kan mihring pianpui hian midang hmangaih theihna a nei a, chu kan inhmangaih tawnna dan hmang chuan chhungkua, khawtlang leh ram thlengin kan siam thin a ni.
Mahse, mihring lama kan inhmangaihna ngawt chuan hmelma hmangaih theihna a nei hauh lo va. Kan chunga thate chauh hmangaih theihna te, kan thisen zawmpuite chauh hmangaih tul tihna te, keimahni thatna tur atan chauha hmangaihna sem zai te thlengin! Kan mihring atanga chhuak hmangaihna ngawt hi chuan Lalpa ropuina tur a ngaihtuah ngai lo va, a ma tanghma a sial em em thung a ni.
Mihring kan nihphung atang chuan midang kan hmangaihna te chu thil pawimawh tawp khawk a ni a. Lalpa lam atang erawh chuan mihring dana kan inhmangaih tawn liam liamna hi a hnawksak zawk thei fo tlat a ni. A chhan chu mihring maia kan inhmangaihna chuan langlo lama kan thlarau in lainat tawnna chu a thleng pha mang tlat lo va, Pathian chatuan thil tum induhpui khawp a hmangaihna ropui pawh kan nei hlei thei tlat lo.
Mihring lama kan inhmangaihna chuan khawvel lam thila kan ropuina tur te, khawvel lam a kan hlawhtlinna tur atan erawh chuan kan fate leh nupui pasal te tan duhsakna vawr tawp chu rang takin kan hlan mai thei thung a.
Lalpa thlarau erawh chuan kan chhungril nun chu thlarau lam thil a hrai puar te, kan nun saruakna Kristaa chhun khah te, a mah chauh chu kan mamawh dik tak, kan lungawi pui tur leh kan thlamuan pui tur a nihna te, kan manganna leh thawhrimnaah te chuan kan thlarau chu Kristaa chawlhna min tiam leh nghal a. A mak a ni!! Lalpa thil tumte hi kan tan a tha in a ropui takzet a ni.
Pathian mi, Krista ta kan nih avang hian thlarauva awm tur kan nihlai hian, kan nunphung tam ber, khawlaia kan mizia te, kan hnathawhna hmunah te, kan nitin eizawnnaah te leh kan chhungkuaah te hian, thlarau mi ni tura Lalpa min buatsaihna lam ngaihtuah hauh lo hian, keimahni nun nun in kan nung nawk nawk thin a. Diktka chuan kan mihring thatna leh felna phungleng pangngai ngawt hi chuan kan nunah thlarau lam thil a tarlang miah lo va. kan chhungkua leh kan eizawnnaah te chuan Krista hmel chu tuman kan nun atangin an hmu hlei thei lo tlat a ni. Pathian hriatna aiin kan hriatna kan rawn nasa zawk a, Lalpa chakna aiin kan chakna kan chhuang zawk a, Krista hausakna aiin kan hausakna kan ring zawk a, Pathian thiltihtheihna aiin keimahni thiltihtheihna kan hmang nasa zawk a. Diktak chuan Krista hian kan nunah hmun a chang mang tlat lo a ni.
Kan chhungkua siamtha tura kan beihna kawngah pawh hian kan mihring lama inhmangaih tawnna kan neihte hmang hian kan in enkawl nasa lutuk a. Kan inhmangaih em avang hian Krista kan in thlirpui hlei thei lo va. krista lam thil chu a pahnihnaah emaw kan dah pha hram a. Zirna lama kan hlawhtlin theihna tur te, nunphung tha nei tura thahnemngai taka in zilhhauna te, hlawhtlinna chang tura thawhrimna chung changte ngawt chu kan inhmangaihnaah chuan a lal ber fo mai. Kan Kristian nun thlengin a mawi tawk chauh te, mahni ngaihthatna tawk chauh te chuan kan Kristianna chu a thunun tlat bawk a. A pawi ngawt mai.
Lalpa chuan keimahni a thlarau lam rah lo chhuak tur chu min thlirpui zawk a. Talent tihpun pawh hian, keimahni theihna tihpun lam aimahin Krista theihna min kawltir pung zel tur chu min hrilh tum a ni mah zawk a. Nia, kan chhungkuaa ringtu la ni thei manglo te meuh pawh hian kan nuna thlarau rah chu an lawh a, an tlan theih tur an hmuh ngai miau loh chuan, rim taka thawka pulpit rawngbawlna emaw Kohhrana kan chanvo tha taka kan hlen chhuahnaah te chuan kan chhungkua chu an dam zo mang tlat lo a ni. Mari chu Lalpan Chungnungbera thiltihtheihnain a hliahkhuh dawn a ni tih a sawi a. Mari chuan ‘ I thu ang zelin ka chungah lo thleng rawh se,’ a ti a. Lalpa chu a duhdana keimahnia hna a thawh kan phal mai hian, Chungnungbera thiltihtheihna thlarau rah hrang hrang, hmangaihna te, insumtheihna te, etc. keimahni ah a lo thleng mai zawk dawn a ni. Kan nunah chuan thlarau lam rah lawh tur a awm reng reng lo a nih chuan Lalpa tan emaw kan mihringpui te tan pawh a beidawn thlak ngawt ang le.

===================================
SAKHUA
BSI Campaign
Pathianni Chawhnu hian BSI Champhai North Branch chuan BSI Campaign neiin Bethel Kohhranah hun an hmang ang. He hunah hian Upa Lalrizapa, Senior Vice President hnen atangin Pathian thuchah ngaihthlak a ni ang.

Pastor Quater thar
Bethel UPC (NE) chuan Pu K.Thuamluaia in, Vengthar a mi chu Rs.6,00,000/- in an lei a. Kar kalta Thawhtan khan Bethel bial vawngtu Rev.Biaksangzuala hian quater thar hi a luah nghal a ni. Tin, he Pastor quater hi hun kal zelah biak in sak nan la hman tum a ni bawk.

Jt.KTP ten tlawh ang
Ni 25 May`09 Thawhtan zan hian Champhai Joint KTP hruaitute chuan Mualveng Branch KTP an tlawh ang. He hunah hian Chairman atan Tv Lalremruata Sailo, Fin.Secy a ni anga, Solo; Tv Rinthangpuia, Kanan niin Pu Lalthlamuana Kawlni, Asst.Leader hnen atangin Pathian thuchah ngaihthlak a ni ang.

Upa thlang dawn
Zomi Baptist Churh Ngur Kohhran chuan Pathiannni hian kohhran Upa pakhat an thlang ang. He Upa thlan hun hmanpui tur hian Bethel bial tu Rev.Chinkhantuanga a ni ang.

Crusade mek
Thawlehni atanga Pathianni thleng hian UPC(NE) Kohhran Ngur-ah Pi PC.Hrangkhumi chuan tunakr Thawhlehni atanga Pathianni thleng hian Crusade a nei mek.

Camp lut duhtan
Ni 25-30 May`09 chhung hian Wesleyan Methodist Kohhran, Vengthlang chuan Evan Office Kailiana ruaiin Chhandamna Camping an siam dawn a. Camp fee a awm dawn lo va, a duh apiang Camp-ah hian lut turin an sawm e.

Family Palnning zirho
Ni 24 May`09 (Inrinni) hian Vengthlang Pastor Bial chuan bial chhung Kohhran hrang hranga KTP, Kohhran Hmeichhia leh Kohhran chhunga committee peng hrang hrangte ko khawmin Family Planning chung chang zirhona Venthlang Kohhran Centenary Hall-ah an nei. Inrinni zing dar 10:00 ah tanin Resource Person Rev.Zothansanga (Familly Guidance & Counselling Centre) hnen atangin thusawi ngaihthlak a ni a. A mah rawn tawiawmtu Joseph Zaihmingthanga hnen atangin Pathian fakna hla ngaihthlak a ni bawk. Tin, Rev.Zothansanga hian Inrinni zanah Vengthlang North Kohhranah thusawiin, Pathianni chawhma hian Venglai Kohhranah hun a hmang anga, Pathianni chawhnu-ah Electric Kohhranah hun hmang in, Pathianni zanah Vengthlang Kohhranah hun a hmang thung ang.

BSI Auxilliary in fang dawn
Aizawla BSI Auxilliary hruaitute chuan Champhai North Branch an rawn tlawh dawn a. ni 13-14 June`09 chhung hian Hnahlan-ah hun hmangin, ni 15 June hian Kahrawt Kohhranah an hmang anga, Ni 16 may hian Bethel Kohhranah hun an hmang thung ang.

Bible Society ‘KANTU’
Tun tumah hian BSI kantu chuan Venglai Local a kan a. Venglai Presbyterian Kohhran hian Budget Rs.39500/- neiin tunah hian Rs.32000/- an tlin tawh tawh a. Rs.7500/- tlakloh an la nei a ni. Venglai Kohhranah hian dan zawhkim 1540 an awm a, Collector 23 an awm bawk a ni. BSI ah hian instalment a pe te leh hmalakna dang te atangin Budget hi khum ngei an tum a ni. Tin, BSI hief Patron hi pali an neih bakah tun kum chhung hian Chief Patron 4 bawk hmuh an in beisei a ni. BSI Life hmanga Pathian hnathawh mak chu; Pi Chhawkhleipari, Tuikual ‘B’ chuan Pickle siamin a zuar thin a, Life Member ni turin tum khatah sum a nei lova, instalment in a pe tan ve a, hetia a pek tan atang hian, ‘Ka inhralh thei lutuka ka insiam daih thei ngang lo’ tiin a hlimzia a sawi. Hemi hnu hian a Pickle siamna hmanrua chu a Life leh ta bawk a ni.

================================

AIDS VEI TAM NA- CHAMPHAI
-F.Lalremruata
“ Champhai District ah AIDS vei an tam ber” tiin Champhai chu AIDS vei tamna hmun kan nih avangin, hmun tam tak in min lungten a ni hi ! Zoram Khawvelah hmingchhiatna vawr tawp kan tawng mek anih hi!
Ka ngaihtuah neuh neuh a. Eng vang a AIDS vei hi Champhaia pung chho ta viau nge anih chu aw ? tiin ngaihtuahna kil tin kil tang ah ka vah kual tir a. Chuta chhanna ka rilru a lo lang hmasa ta ber chu, sum siam nan hian AIDS vei hi kan pun hluai tir em ni chu ? tih thu hi a lo lang chho a. He thu ziah hi ka hreh viau nachung in Champhai hi kan mualpho em avangin, tun hnuah kan insiam that deuh theihna tur leh kan khawtlang hruaitu ten hmalak dan an lo thiam a, Champhai Districtah hian AIDS vei hi kan tam lem lova, thil kal sual kan tawn vang mai a ni tih kan lo hriat theih nan, inthlahrung tak chungin kan ziak lui hram a ni e.
Champhai District Jaila kan awm lai khan Pawl leh Home hrang hrang ten, Champhai District Jail chu Projectah min hmangin AIDS Awarness Campaign te neiin kan thisen te min lak sakin min test sak thin a. Chutih laia ka tawn hriat thenkhatte atang chuan kan Pawl / Home tih hmasawn kan tum lutuk na ah hian AIDS percentage tlem kan duh tak tak a nih ngai chuan, KTP,PYD,SAY,TKP leh Kohhran Thalai Pawl dang inkhawmna ah hian AIDS Awarness Campaign te neiin thisen te hi test sak ve ila; tunai hian kan percentage pawh hi a hniam phah ngei ang le.Tin, kan pawl hnathawhna kawng theuh ah hian sum siam kan duh anih pawhin a khaw pum lungt>n khawp a kan awmna tur hi chuan hma i la lo hram ang u. Jaila kan awm lai vek khan, Aizawl atangin Shaloam hovin min rawn tlawh a. Chuta lokal Chawnpuii ( MZP a kan President thin, C.Lalrokhuma u) chuan kan inkawm naah zawhna ti hian min zawt a, ka ph< chiang kher mai. ‘Champhaiah hian nawhchizuar mi za atanga za sawmriat (100-180) an awm tih thu report kan dawng a,hei aia tam hi an awm thei hial lo maw ?’ zu tia. Khaw dang laka Champhai record chu khitiang khi anih hmel.Champhaiah hian KS tia sawi tur hi hmuh tur an awm lo aniang, Pu B-a pawhin a hre lo tlat. Hmanah MZP Gen. Secy ka nih lai khan vai hmeichhe pakhatin a inah Burma mi a khawi khawm thin a, chu chu vai hnenah a zuar thin a, MZP in kan zilh a, a sim nghal hmak anih kha! Chu lah thangkhat lian zet a liam tawh si.Champhai khaw mipui ten kan hriat miah lovin khaw dang hriatah KS za chuang kan lo kawl reng anih chu(h), Mak thei ngei mai.
Tak a na, tak tak anih leh nih loh ka hre lo, mahse, AIDS vei tawh sa te hian tute emaw hnenah Rs.300/- hlawhin thisen an test tir thin an tih hi. Tak tak anih chuan kan khawtlang hruaitu te hian ngaihven a, bawhzui chi ani lo maw ? Kan AIDS percentage ti sang tu pawh ani thei hial asin. Dawn ti sei !!!!

=================================

‘Krista avanga channa’
Sorkar hnathawk pakhat chu a thawhna Company chuan Nuaikhat in an tham a, a ni chuan ‘E Kristian ka ni a, heng hi la thei ka ni lo,’ a ti a. Chu a agent chuan ka la tawktarh tlem deuh a nih hi ti niawm takin, Nuaihnih a rawn phawrh leh a. Chu pa chu a thinrim ta a, ‘Kristian ka ni a, heng hi ka la thei lo ka ti a, i hria a ni lawm ni? Kristain hi min va hmusit ve ka man tir dawn che,’ a ti a. Police ko turin telephone a chuh ta mai a, chutah zet chuan Company agent chuan thupha a chawi ta chul mai a. A man tir ta em lo a ni awm e.
He Mizopa hi cheng Nuaihnih hmaah a nung ngam hi a ropui ngawt mai. He a thil tawh hi min hrilh kauh kauh a, kei chuan fiamthu-in, ‘E a rawn tih leh hun chu min hrilh la, kan insem dawn a nia, in sakte ka mamawh si a. Chutiang lawmthu sawinate chu a tha a lawm. Nuaihnih lo la la, nuaikhat ve ve in kan insem dawn nia,’ ka ti a. A ni chuan, ‘I duh awm lo em mai, fiamthu pawhin chutin ti suh,’ min ti a. Fiamthu mah ni se ka ak ngei mai.
Chutianga Thlarau Thianghlim hnathawhpui ngam chu Mizoram hian kan mamawh a ni. Rethei pawh tling zo lo, BPL rethei zul tak takte chanvo neihsak tuma pa dulkiar pui pui te kan phi sek mai hi chu a zahthlak ngawih ngawih a ni. Hetiang Kristiante hian thih thamuanna ka nei pawh ti mahse, vanramah pawh an lut ngam tak tak dawn e mi? He khawvela Thlarau Thianghlim nena nung ngam lo hi thlamuang tak in thi pawh ni se, an ngaihtuah awm ngawt ang.
Juda Iskariot-a khan tangka 30 in a phat a, kan hmusit mai a. Keini hi engnge kan nih chiah? Mi hausa chauh pawh an ni lo. Rethei te te pawh peon tak ngial pawh hian hawn ruk tur an melh reng tho mai. I retheih leh huai takin rethei mai rawh. Retheihna chhuanlama kan va insawi khawngaihthlak te hi a tul reng reng lo. I nihna anga i lan ngam khan Thlarau Thianghlimin hna a thawk nasa thei daih zawk.
Lalpa avanga kan chan ngamnaah hian Thlarau Thianghlim hliahkhuhna kan chang zel zawk a ni.
- Rev.C.Lianhmingthanga.

==================================

TRUE JOKES

Vawi khat chu inkhawm hruaitu ka nih avangin hmanhmawh zetin bible nen hla bu nen biak in lam ka pan ta a. Tichuan dar chu an vuak mai loh avanga dar rik nghak kher lovin chair atang chuan kan ding ta a...mahse, ka thiltih chu zahthlak tak a ni...hemi zan atang hian dar vuak hun an lo ti tlai tawh chu niin..! Tichuan ka chair-na dawhkan atang chuan hlabu emaw tia ka ken chu kan belchiang leh a..pawi tak a ni!! Bible ve ve ka lo keng reng mai..kan thuhirltu hnenah chuan hun tawp hla thlan nen ka hlan ta vek a. Mahse, thusawi-tu chuan a rilru-ah engmah a awm hran loh avangin hla thlan chu ka kut-ah a dah ta ngawt a...tichuan hla bu en lovin hla chu kan khuangpu te zawn atan ka thlang ta ngawt a. Hei erawh tuman min hriatpui lo thung!! Mahse, a rukin ka talbuai nasa ngei mai!!

=====================================

KEIMAHNI

Bazar pui leh Bethel bazar nuhote hnen atangin chawhmeh kan dawng zel a, kan lawm e.
Pu R.Lalrintluangate chhung Bethel Veng hnen atangin Rs.3000/- kan dawnga, kan lawm takzet e.
Pu C.Lalchungnungate chhung Bethel Veng hnen atangin Rs.1000/- kan dawnga, kan lawm e.

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…