Skip to main content

SAWRKAR UISA THIAMTEN NIHNIH CHHUNGIN RUIHHLO NUAI 7 MAN

SAWRKAR UISA THIAMTEN NIHNIH CHHUNGIN RUIHHLO NUAI 7 MAN : Champhai Police-te chuan nihnih chhung lekin Champhai Town huam chhungah Ruihhlo Cheng Nuai 7 man zet an man. Champhai Police hotute hnen atanga thu dawn danin, Police leh CID (SB) tangkawpte chuan nimin-zing khan New Champhai-ah rinhlelh thila an dapna lamah Lalthluaii kum 48, Kaphnawka fanu, Aizawl Bawngkawn ni a inchhal hnen atangin Heroin Hawng 6 (Gram 176) an man a. Champhai Police Station-ah ruihhlo neitu a puh hi ND&PS Act tlawh chhanin thubuai an siam sak a ni. Ruihhlo leh a neitu a puh hi nimin khan District Court-a hruai a nih hnuah Champhai District Jail-ah dahluh nghal a ni a. Ruihhlo (Heroin) man tak hlut zawng hi tualchhung hralhna a chhutin Cheng Nuai 3 (Rs. 300000) man a ni  Nimin chawhma khan Police Petrolling chuan Springdale School piah, Zotlangah Zokhawthar atanga Champhai pana tlan, Taxi MZ04 4049 atangin heroin Hawng 3, Gram 42, tualchhung hralhnaa chhutin Cheng 1,50,000 man chu an man a, a neitu ni-a…

Sermon

Kristian Nun Laipui
Chang thlante : Philippi 4:4, Rom 14:6, Marka 8:6, Ephesi 2:14
Ringtute hi Isua Krista zuitute kan nih avangin kan nundan hi Kristian nundan a ni. Mahse, duhthusama tha chu a ni lo khawp mai, hmasawnna tur leh insiamtharna tur tam tak kan nei thin. Ringtu nuna a bulpui ber, engkim infawk khawmna leh intanna chu Krista a ni. Hei hi kan man fuh loh chuan kan nun a thang thei lo va, mite’n kan nunah hmuh tur an neih lo thin. Tuna kan sawi turte pawh hi Krista a innghat, chuta tanga lo arh chhuak zel tur chu an ni.

1) Lawmthu Sawi : Thuthlung Hlui leh Tharah he tawngkam hi chi hrang hrangin kan hmu -fak, inpuang, lawmthu sawina thilhlan, malsawm tih te hi. Lawmthu sawi hi Kristian nun laipui leh rawngbawlna tinreng innghahna a ni. Pathian kan chunga a thatna chhuichhuah sen loh avanga lawmna hi Kristian nun awmze neihtirtu a ni. Kan lawmthu sawina tur chhan lian ber chu Krista a Pathian khawngaihna lo lang hi a ni. Krista chunga kan lawmna chu a aiawha min rawn hmutu midangte hnenah lantir tur a ni. Pathian laka lawm tur hian thupek a awm fo. Paula’n Philippi mite leh Thessolonika khuaa mite chu engkima lawm fo turin a chah. Lawm nachang hre lo, kan tana min thawhsak nasatzia pawh ngaihtuah nachang hre lo leh Pathian laka vui ching ringtu nih hi a hlauhawm hle a ni. Pathian hnena lawmthu sawi hian Pathian ropuina leh a thiltihtheihna a puangchhuak thin. Engkima lawm tur tih hian a malsawmna leh thatna lam chauh a kawk lo va, hreawmna te, channa leh tuarnaah lawm tur tihna a ni. Isua khawvela a lenlai pawh khan Pathian hnena lawmthu a sawina kan hmu fo va, a tawngtainaah pawh Pathian a fakin a chawimawi thin a nih kha. Fapa meuh pawhin a Pa a chawimawi chuan keini pawhin kan ti ve tur a ni. Lawm chunga a rawngbawl tur kan ni a, kan lawmna avanga kan inhlanna chu keimahni tan te, Pathian ropui nan leh midangte tan malsawmna a lo ni dawn a ni.

2) Thuawihna : Thuthlung hluia ngaithla, benga hria, awih tih te hi thuawih sawina an ni vek a, Thuthlung Tharah chuan ring tih tawngkam hman a ni thung. Thuawih hian Pathian thu emaw a aw emaw lo chhanna a kawk. Pathian aw zawm lova hriat mai emaw dawn satliah mai emaw hi a ni lo va, inngaitlawm taka Pathian thil phut leh a thutiam ringa a thu zawm leh i he lova innghah thlap hi a ni. Thu- thlung Thara ring tih leh thuawih tih hi thliar hran hleih theih a ni lo. Rinnain mite’n Krista thuawihna famkim chu an tawmpui a ni. Abrahaman Pathian a ring a, Abrahama chuan ka thu a awih Pathianin a ti a ni. Isua Krista’n mihring zawng zawng aiawha thu a awihna chu Pathian thuthlung hlawhtlinna a ni a, sual bat tlaksakna a ni ta a ni. Thuthlung Hlui a inthawina pawh hemi avang hian tlak kim a lo ni ta a ni. Hei hian mihringpuite laka thu awihna hrang hrang a rawn hring ta zel a ni. Roreltute leh kan nu leh pate thu pawh kan awih zel tur a ni. Pathian thuawihna leh Amah rinna kan neih loh chuan Pathian laka hel, awihlo fate kan ni ang

3) Inremna : Thuthlung Hluiah chuan inremna sawinan thlem lungawina leh sual man tlakna tih hman an ni a, Thuthlung Tharah chuan sualte khuh bona, sual ta lo anga ngaihna tih te hman an ni. Inremna atana thawktu chu Pathian a ni a, a dawngtu chu mihring kan ni. Pathianin inremna a siam kan lo pawm hian dinhmun tharah kan chuangkai a. Mihring zawk hi a kal sual zawk, inremna mamawhtu kan ni a, Pathian chu a rinawm tluanchhuak zak a ni. Kan inremna hmanrua chu Isua a ni. Ani chu kan sualte avangin a thi a, ngaihdamna keinin kan hmu. Pathianin Kristaah chuan khawvel hi Amah nen inremin a siam a, hei hi chanchintha laimu leh Kristiante nun laimu a ni. Hmelma kan nih lai fapa thihna avanga Pathian nena inremna kan neih chuan inrema kan awm hnu chuan a nunna avangin chhandamna kan chang ngei ang. Inremna hi Pathian leh mihring kara tawp mai lovin mihring leh mihring inkarah a ni leh a, leia thil awmte leh vana thil awmte Krista a infawkkhawmtir hi Pathian thiltum a ni. Mahni hmasialna,chapona, duhamna leh intaina kan neih te hi inremna atana hnawksak an ni a, keimahni leh kohhran tan pawh chaklohna an ni. Isua pawhin mi pahnihin inrem taka rilru hmunkhat pu a an dil chu pek a tiam a ni. Pathian nena inrem ringtu kan intih chuan mite’n min rem lo mahse a theih chin chinah chuan keimahni lam talin mite kan va rem tur a ni ang.

Heng kan han sawi tak Kristian nun laipuite hi kan nunpui reng a tul a, kan chakloh lai pawha min puih peih reng Krista hi phatsan lovin, nitina kan nunah hengte hi vawng nung reng theuh ila, kohhran a nghet anga , Amah a lo lan hunah pawh humhim kan ni thei ang.

Comments