Skip to main content

Champhai

CHAMPHAI IN EYE DOCTOR NEILO PAWI TI :
Champhai District Hospital a Eye Doctor awm ta lo chu MZP Hqrs. Champhai chuan pawi an tih thu an sawi.
Zirtawpni a Executive thukhawmah Champhai District Hospital a Eye Doctor awm ta lo chungchang an sawiho a. Zirlaiten thisen chhuak meuha theihtawp chhuaha Doctor an ngenna hliam dam fel hmaa Eye Doctor in hna dang zawm a, Champhai a chhuahsan chupawi an tih thu an sawi a. Sawrkar tana MIMER a hlut ang chiahin CHamphai tan pawh District Hospital hi a hlu em em a, mit Doctor kan neih thuai theih nan hian Health Minister hnenah ngenna hmanhmawh thlak lehkha ziak a pek nise, an ti. hei bakah hian Champhai DIET Lecturer Allision Byhnasa, Siaha DIET lama transfer chu a aiawh rawn dah thuai turin sawrkarah ngenna thlen vat nise, an ti bawk.
Hetih rual hian Champhai DIET a Mizo zirlaite dinhmun pawh uluk taka enzui nise, an chanvo dik tak an chang em tih zirchian nise tiin, MLA Election lo awm turah Party tin hnenah Champhai khua ngei, Champhai khaw…

Tunkar Champhai Chanchin

Famchang
Venglai & Electric VCP lo ni tawh, Pu V.Tlanglawma chu Inrinni (3.5.09) zan dar 8:50 vel khan Cancer vangin anmahni chenna Inah a boral a, Pathianni khan Venglai thlanmualah vuiliam a ni.
Pi Monica fapa Ngunzathanga (40) Vengthar chu Inrinni zing dar 9:30 vel khan Ngur dai bula thlam ah chemte hmanga vih leh zai hluma hmuh a ni a, a thinhnun bulah vihna hnuhma awmin a hrawkah na taka zai a ni a, a ruang hi postmortem a nih hnuah nimin khan Bethel thlanmualah vuiliam a ni
Pu Thanmawia (51) S/O H.Chhunga chu Internal Bleeding vangin nimin chawhnu dar 2:15 vel khan Champhai damdawiinah a boral a, vawiin ah Zokhawthar ah vuiliam a ni ang.
=====================================
Farkawn khaw bulah inkap
Pathianni chawhma dar 11:40 vel khan Khawlrivunga (37) S/o Rovula, Samthang khua chuan Saduna (57) S/o Thiahhmuna, Falam, Myanmar chu Lamsial Power Project kiangah a dar ding lamah kapin an pahnih hian Farkawnah an tlan lut a, Farkawn YMA-ten kawlin Pathianni zan khan Champhai Police-te chu anmahni la turin Farkawn panin an kal. Farkawn atanga thu dawn danin Khawlrivunga hian sakei ka kap a, tiin Saduna hi a ruh lei turin a zawrh a, Khawlrivunga’n sakei a kap nia a insawina hmun chu hemite pahnih hian thian pakhat hruaiin an pan a, Saduna hian India pawisa cheng nuai 1 leh Burma pawisa Kyat 50,000 a keng a, sakei awmna hmun nia an sawiah pawisa hi inpek nise an ti a ni. Farkawn ram Zarhva lui atanga 1Km vela hla Lamsial Project huam chhungah Khawlrivunga hian Saduna inring lo lai chu a dar ding lamah a kap thut mai a, a hliam a nat vak loh avangin Saduna hi a tlanchhia a, an intihbuaina hmun atanga tlanchhiain Farkawn khuaah a tlan lut a, 8Km vela hla hliam tuar chungin a tlanchhe ta a, Farkawn damdawi inah enkawl zui nghal a ni. Saduna’n Farkawn a thlen hnu lawk hian amah kaptu Khawlrivunga pawh chu Farkawnah hian a lut veleh a, Farkawn YMA-ten lo manin an kawl nghal a, thil awmdan Champhaiah an rawn report a, Champhai police-te chu he thil thleng enfiah tur hian Pathianni zan khan an chhuak ta a ni. Khawrivunga’n Saduna a kahna hi tualchher silai a ni a, licence pawh nei lo a ni. Saduna dara silaimu tang chu doctor a awm loh avangin leh case la kal zel tur a nih avangin nurse ten an khawih ngam mai rih lo.
------------------------------------------
Mi kaptu police-ten la buaipui zel
Farkawm khaw bul, Lamsial Project huam chhunga Pathiannia inkahna thleng chungchang chu Champhai police te chuan theihtawp chhuahin an buaipui chho zel a, Thawhtanni khan thil tih tur tul leh pawimawh hrang hrangte a tam tham deuh avangin Thawhtan zan khan he pawikhawihna thlenga a mawhphurtu bera puh hi Champhai lama rawn hruai thlen a ni. Hetihlai hian he pawikhawihna thlenga mawhphurtu nia hriat Khawlrivunga (37) S/o Rovula hi Myanmar lam atanga rawn pem thla niin, an rawn pemna pawh a la rei lutuk lo niin Samthang atanga thudawn a ni a. Hetiianga Samthang khua tihmingchhe zawnga a che hi an dem tak zet tih thu kan dawng.
============================================
Kumtling lo pawngsual
Pathianni zan dar 6:30 vel khan New Champhai a hmeichhia kum tlinglo, kum 16 mi chu Robert Chinlamtuanga s/o Zelkhanthanga Bethel veng chuan hruaichhuak in a pawngsual a, pawngsual tu hi a pa Zelkhanthanga hian lo huma tlan bo tira puhin Champhai Police ten an man a, lock up ah an khung mek. Thu dawnna in a sawi dan chuan New Champhai tleirawl hi Munga of New Champhai inti chuan an in atangin a thlem chhuak a, Rickshaw ah inphurin, Zotlang piah, Springdale School kiangah Robert-a hian a pawngsual a, a dar leh biangah a seh sak nghe nghe a, Doctor-in he hmeichhe tleirawl hi a enfiah tawh a ni.
==========================================
NREGS chawl rih
NREGS inhlawhna chu Champhai district chhungah kalpui mek niin, Champhai bikah chuan hemi lam khawihtu Champhai BDO chu a zin bo mek avangin thawh tan theih a ni rih lo a ni.
=======================================
Superintendent-ah
Champhai DC Office-a Superin-tendent turin Pu B. Zamkhaw-nanga, BDO office-a Block Accountant ni mek chu Superintendent a kaisang a nih angin a rawn dah nghal a, a hna thar hi a rang thei ang bera zawm a tum a ni.
=======================================
Buhfai pe chhuak
Retailer te chuan Thawhtanni khan supply kudam atangin mipui hnena sem tur buhfai a la chhuak a, buhfai hi quota chanve, puitling tan kg 1 nau-pang tan kg chanve a sem tur a ni. Buhfai hi lo thleng leh tur a awm mai loh avangin mipui mamawhna a phuhru zo lo hle.
=========================================
MJA-in ral
Thawhtanni (4.5.09) khan MJA Champhai District chuan an pawl Treasurer Pu Lalhmingliana an ral a. Hemi hnu hian meeting nei zui nghalin, MJA Gen. Conference neih zawh tak report ngaihthlak zui a ni bawk a. An thurel thenkhat zingah Media chungchang zirhona hun I&PR Directorate lama thleng tura an rawn beiseina chu tihhlawhtlin nise, an ti a. He hun hi tun thla ni 29 khi tinzawn chhin niin, hei hi a remchan loh chuan June thla chawhma lama neih tura ruahman a ni. He hunah hian Mizoram hmun hrang hranga chanchinbu mite bakah Champhai khaw chhunga mi pawimawh zualte tana buatsaih a ni ang.
============================================
Lawi rutu man
Ngur khua a Pu DK Dawnga Lawipui, Rs 20,000/- man vel chu Burma a Chauleng khua mi pahnih Kaizamuang (26) s/o Thangdoliana leh Lianzakhup (19) s/o Khiambiaklian, Vengthara in luah ni a insawi te chuan an ru a, Pathianni zan khan Lawi neitu hian Vengthara an thlung lai hmu in a rutu te hi a man nghal a, Ngur a an hawnpui hnu ah Thawhtan zan khan Champhai police kutah an hlan.
===========================================
Swimming pool
DC, Keifangtlang kawng bula LAD Swimming pool chu swimming pool bula committee room sak chu pan theihin peihfel a ni ta a, a hmang duh tan DLAO hnenah ngaihven theih ani e.
======================================
Khawl enchhin turin inpuahchah
Greater Champhai Water Supply Scheme-a Electric hmang chi tui pump-na khawl chu tun thla ni 14 leh 15 khian en chhin a ni dawn. PHE Superintending Engineer, Pu C. Chawnghnuna sawi danin, tui pump-na khawl enchhinna-ah hian fimkhur thilah a siamtu Company, Mather and Platt Pump Ltd. Pune-a mi chu chah an ni a, an Company Agent tel ngeia en chhin tum a ni. He khawl tinung chhin tur hian Power & Electricity Department-a Inspectorate chuan Thawhlehni khan enchhin phalna, Provisional permission a pe a, power pekna tur, 33 KV Sub-Station siam thar charge theih nan hian Champhai Power Division-a Engineer-te chuan Nilaini atang khan thil en fel nawn leh ngaite an en fel bawk a ni. Hemi hma lam hian he tui laknaa hman tur hian 11 KV line thluna, power pawh lak tawh a ni a, mahse he tui pump-na khawl lian hian 33 KV a mamawh avangin thil tihsual palh awm loh nan 33 KV line thar leh Sub-station thar hi enfiah nawn leh a ni.
============================================
Chhungkaw Nite
Ruantlang Branch YMA chuan Central YMA thupui ‘Khawtlang Nun Siamthat’ chungchangah Ningani zan dar 6:30 atanga dar 7:30 chhung khan Chhungkaw Nite an hmang a, hetah hian In tinah chhungkuain an zirho tur paper sem a ni a, hemi hun chhung hian phone leh TV pawh off vek turin an inhriattir a, khua/veng thenawmte pawh hemi hun chhung hi chuan tlawh pawh lo turin an ngen bawk.
=============================================
Secretary lokal
Principal Secretary, PHE changtu, Pi L. Tochhawng chuan Greater Champhai Water Supply Scheme dinhmun hre fiah turin Nilaini khan Champhai a lo thleng a, Ningani khan Greater Champhai Water Supply Scheme hna kal mek enpuiin Tuipui lui kam a Dept. hmalakna a hmunah a en a ni.
===========================================
Champhai che tha
CYMA Sports Aizawl a neih mekah Champhai atanga kalte a che tha viau a, ningani khan Final engemawzat an khel a. Thu kan dawn danin 100m Race, 300m Mipa leh 1500m Race ah te Final an khel a, Hmeichhe Tug of War-ah Champhai aiawha kal Electric Veng chuan ningani khan final-ah champion lai Zemabawk an hneh zo ta lo a ni.
==========================================
Venglaiin ngen
Champhai Venglai Presbyterian Kohhran-a Kristian Chhungkaw Committee hmalaknain zirtawp zan dar 7-8 chhungin Kristian Chhungkaw zan an hmang a, Hemi chhung hian tute mah inlen pawh loh nise an ti a, Inbiakpawhna Landline & Mobile Phone, Television, Computer, Tape Recorder, Lirthei leh ri thei lam chi reng reng pawh hemi hun chhung hian titawp (Off) vek turin an kohhran chhungkaw tin an ngen bakah veng dang atang pawhin Venglai kohhran mi leh sate chu hemi hun chhung na na na chuan tutemahin Phone hmanga be buai lo tur leh he chhungkaw Zan Programme an hman chhunga tibuai lo turin an ngen bawk a ni.
==========================================
Inkhel thiam
C.Lalmalsawma S/o C.Lalthianghlima, Venglai chu SAIL, Kolkata-ah senior player-ah a tling a, tun season atang hian SAIL camp, Banpur Asansol, Kolkata a zawm nghal ang.
======================================
MSTA Sub-Hqrs.-in khawmpui hmang
Ningani khan 6th MSTA Sub-Hqrs. Confe-rence chu Kanan Veng Middle School ah neih a niin hetah hian zirna kawnga hmasawnna tur thu engemaw-zat an pass a, an Agenda zinga Zirtirtute mahni thawhna School theuhah regular leh punctual taka thawh nise, tun aia result tha neih tum theuh ni rawh se tih Sub-Hqrs. atanga rawtna lut chu a tlang zo ta lo.Hemi rual hian Middle School ah English Subject pahnih tal ni rawhse tih rawtna pawh a tlang zo lo bawk.
Middle School zirtirtu pawl kalkhawmte hian an pawl thil pawimawh hrang hrang an relho a, chungte chu - Headmaster awm lohna school-a Head-in-charge te special allowance pek ni rawh se tih te; Hindi teacher awm lohna school apiangah Hindi teacher dah vek ni rawh se, Merit Scholaship hi district wise-a siam ni rawh se; Education Service Rules hi a rang thei angin sorkarin min siam sak rawh se tih te; Budget allotment-ah hian Mizoram sorkar hian zirna atan percent tam tam zawk min dah sak rawh se tih te bakah MSTA inralna hi Rs. 50,000 a tihsan ni rawh se tih te a ni.
He MSTA Sub-Hqrs.Conference ah hian Pu C.Chhuanvawra President MSTA Gen.Hqrs.Aizawl chu khuallian niin chawhma lamah Report hrang hrang ngaihthlak a ni a, chawhnu lamah an member boralte sunna hun leh rorel inkhawm an nei a, chumi hnuah kum 2 chhung hruaitu tur MJA Champhai District kaihhruaiin an thlang a ni. Kum hnih lokal leh tur atana hruaitu tharte chu Pute - K.Lalbiakkunga (Roseland); C.Ralkapzauva (Bethel M/S); C.Lalrizapa (Govt. M/S); Vanlalnghaka (Kanan M/S); F.Lalrosanga (Mualkawi M/S); F.Lalramliana (Hmunhmeltha M/S); R.Vanlallawma (Vengthlang M/S) leh TBC Biakthansanga (Zote M/S) te an ni. Nimina MSTA Champhai khawmpui neiah tarlan dan chuan an pawl hian kum 2007 atanga kumin chhung hian Rs. 1,44,528 an thawk chhuak a; heta tang hian Rs. 67,036 hmang ralin tunkar thawhlehni thlenga an pawl sum la neih chu Rs. 77,492 a ni a, heng hruaitu tharte hian chanvo an insiam ang.
==========================================
Naktuk chawl ang
Zirtawpni khan Rihlipui staff zinga mi Offset hmanga chanchinbu hertu ber Vanlalhlua leh K. Lalremtluangi te chu Vengthlang Presbyterian Kohhran Centenary Hall-ah an innei a. Vanlalhlua hi chanchinbu hertu ber a ni a, zirtawp zan lama chanchinbu her hman an awm loh avangin Inrinni hian Rihlipui a chhuak thei lo a, chanchinbu latute zawng zawng hriatthiamna an ngen a ni.
==================================================
VC-te hriattir
Sanitation Officer, UD&PA, Champhai chuan VC tinte chu hriattirna pein Champhai khawpui thianfai tura sorkar mi rawihte an tlem tham avangin mahni veng theuh vawnfai kawngah VC tinte chu tan la thar turin a hriattir a, Kawngpui dunga cheng, dawr nei, workshop nei leh thingpui dawr nei reng reng chu an bawlhhlawhte a bawmah khawla, bawlhhlawh paihna motor a lo paih ngei turin a hriattir bawk a, kawngpui dunga thlai leh sa bakah hmanraw dang reng reng zawrh khap a ni tih a hriattir bawk.
======================================
Mipui awlsam nan
Champhaia lo zin PHE Secretary Pi L. Tochhawng chuan PHE hotute chu mipui awlsam zawkna turin Tui Connection pekna tur T-Cluster tam zawk siamna tur ruahman turin a hrilh a, hnathawktuten an bawhzui nghal. Ningani khan Pi L. Tochhong hian Cold Storage hmun a tlawh bakah Zokhawthar leh Rihdil te a tlawh a ni.
===========================================
DEO-ten hna zawm
Sum tihchingpen nia sawi chhuifiah a nih theihna atana an hna atanga suspend DEO te chuan tun hnai khan an hna an zawm fel leh tawh. Suspend an nihna sorkarin a thiat/hlip (Revoke) a ni.
=================================
Ni 100 inhlawhna
Khaw hrang hranga NREGS thawh dan tur DRDA leh BDO Office a thawktuten an buaipui mek a, karleh tir lamah Work Order pekchhuah theih beisei a ni. Sorkar hnathawk tam zawkin hlawh an lak theih loh vangin sum lengvak a tlem a, mipuiten NREGS inhlawhna hi an nghakhlel hle a ni.

Dil tharte tel lo ang
Champhai RD Block hnuaiah Job Card dil thar mi 500 vel an awm a, tun dinhmunah Job Card dil tharte hi hnathawk tur zingah an tel thei dawn rih lo niin thu dawn a ni a, Transfer te erawh an dilna angin hnathawh tur an in transferna hmun ah pek an ni thung ang
=========================================

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Sermon

Ringtute Hi Khawvel Eng Kan Ni
Chang thlan : Matthaia 5 : 14 - 16
Eng tel lo chuan khawvela nunna neite hi an dam khawchhuak thei lo. Eng hmanga chaw siam thei chauh vek an ni. Thil, a nihna ang taka kan hmuh fiah theihnan pawh eng a ngai a, eng awm lohna ah chuan kan chetvelna pawh a buai zo vek a nih hi. Thimah chuan kawng kan hmu thei lo va, hlauhawm leh hlauhawm lo kan thliar thei lo va, kan mit kan chhawr tangkai thei hek lo. Eng tel lo chuan kan khawsa thei lo a ni
Khawvel Eng - Isua : Isua hi khawvel eng a nih thu Johana 1:9, 8:12 ah te kan hmu. Isua tel lova khawvela nun kan hman chhung chuan thimah kan cheng tihna a ni. Nuamsa takin awm mah ila, Kawng leh Thutak leh Nunna Isua kan neih loh chuan kawngbo kan ni tho. Kan hlawhtlinna te, ropuina leh hmingthatna te pawhin kan damchhung bak a daih lo. Tin, kan nunna atana tha leh tha lo pawh kan finna atangin kan teh ang a, a dik zik tluak chuang lo . Kan hlimna leh lawmna pawh hian tawp chin a nei a, lungngaihn…

Champhai Tualchhung

ni 22.12.2014 (thawhtanni)
PISTOL MAN :
    Ni 19.12.2014 (Zirtawpni) dar 8 vel khan Assam Rifles, Excise & Narcotics Deptt leh SIB Champhai te tangkawp chuan Zokhawthar leh Melbuk inkarah 9mm pistol an man a, a neitu nia puh Gintungmung kum 38, Tualdopau fapa Mualkawi, Myanmar leh Gintheihthanga kum 42 Khupnanga fapa te pawh an man nghal bawk. Pistol te hi Champhaiah cheng nuai khat leh sing ngaa ve ve a hralh an tum niin an sawi.

TANPUINA LUT ZEL :
    Ni 18.12.2014 (Ningani) zan a Pi Lalbiakthangi in, Venglaia mi kang sak that hna chu Inrinni khan thawh chhunzawm leh a ni a, in sakna atan hian tha 650 vel sen a ni tawh a ni. In hi a dung feet 24, a vang feet 18, Assam type chhawng hniha sak tur a ni a, Thawhtanni hi chuan pum fel hman tawh beisei a ni. In kang tuarte tanpui nan hian vawiin thleng khan cheng 127796 a lut tawh a, buhfai, thawmhnaw leh in chhung mamawh tur chi hrang hrang pawh Champhaia mi tlawmngai ten chhiat tawkte tanpuina atan hian thahnem tak an pe khawm tawh baw…