Skip to main content

MIZORAM KAILAWN CHAMPHAI AH

MIZORAM KAILAWN CHAMPHAI AH : Nimin khan Government Champhai College Multipurpose Hall-ah Mizoram Kailawn-2019: Business Plan Contest hmanga Entrepreneurship chawikanna leh inelna buatsaih tur chungchanga  inhrilhhriatna leh zirtirna hun hman a ni a. He hunah hian Entrepreneurship lama tui mi te, Self Help Group, Sumdawnna lama tuimite, NGO aiawh, College Zirlai leh mahni kutkawih thiamna hmanga eizawnna ngelnghet din tumte an tel tha hle a ni.
He hun Planning and Programme Implementation Department, IIM Calcutta leh Mizoram Consultancy Group-te tangkawp buatsaih hi Pu Zoremthara Ralte, SDO Sadar chuan a kaihruai a.  Mizoram sawrkar leh IIM Calcutta-te hmalakna hmanga Entrepreneurship inzirtirna hun leh infuihtharna hun neih a ni chu lawmawm a tih thu a sawi a. Entrepreneurship chu sumdawnna bultanna thar, chona thar hmachhawna  kalphung bik neia awmze nei taka eizawnna siam tuma bultanna a ni, a ti a. Sawrkar hnain mi a daih vek tawh loh avangin mahni thiamna leh theihna hmanga intodel…

Buatsaihtute Khawthlir

Image and video hosting by TinyPic

THALAITE  INCHEINA  HI

Thalaite incheina hi tunlai titi tam chu a ni awm e. ‘Emo’ leh ‘Goth’ culture-in min chim a, kan thalai zawng zawng deuh thaw inthuamna a tawngchham tawh a. A thenin duh duh dana inchei an sawi mawi laiin thenkhati tunlai fash­ion chhuak thar hi a uchuak lutuk tiin kan en liam thei lo bawk a. Keini chuan ‘tur a ni’ tih leh ‘tur a ni lo’ tiin thu lai i la daih teh ang.

Fashion hi thil danglam chak pawl ber a ni awm e. Kum a vei hlek hi chuan fashion thar hi chhiar tham a chhuak hman tawh thin a. Chuvang chuan fashion tharlam mila kan inchei dawn a nih chuan kan sum neihin a tlin tur a ni phawt. Incheina rual pawl reng chi aiin fashion tharlam hian sum a heh zawk bawk a. Chutianga inchei chu kan tlin phawt chuan Emo emaw, Goth pawh nise, kan duh duh dana kan inchei a thiang. Kan ‘budget’ phak loh incheina erawh kan hnawl ngam tur a ni.
Incheinaah hian a hmun leh a hun thliar thiam a ngai khawp mai. Inkhawm leh pui punnaah hi chuan a zahawm thei ang bera inchei hi a fuh fo. Inkhawmna bikah phei chuan Emo leh Goth tih bawr vel fashion hi kan lalut tur a ni lo, an chhuahna atanga thil inang lo lutuk a ni.
Kan incheina hian eng ang mizia nge kan put tih hi kawng tam takin a lantir a, chuvang chuan incheina hi kan namnul mai mai tur a ni lo. Tin, Emo leh Goth tan leh tan lo pawl lo inhnial chiam hi a finthlak vak loh. Mihring chuan kan duhzawng duh theihna tur duhthlanna kan nei a, mimal zalenna a ni. Mahse kan duhzawng leh ngaihsan zawng hian sual lamah min hruai tur a ni lo. Min hruai a nih chuan duh leh ngaihsan chi a ni lo tih a ni mai.


CHHIARTUTE  HUANG
Ka puitling ta em ni?
  ~Master_J.F

 Ka kum lamah chuan naupang tia chhiar tur ka la ni. Mahse ka ngaihtuahna erawh a naupang chhia tawh tlat lo. Naupang-puitling hi an awm ngai a nih chuan chu chu keimah ka ni ngei ang le.
 Hmanah chuan: Khawchhak atangin hnehna chang ang maia ropuina keng tel zing ni a rawn chhuak a. Mahse chu ni ropuina leh enna a pek he leilung mawinate chuan thu a sawi pha lo. Inrinni zing a nih chuan nute bazar kal kan zui nghal chawt a, nilengin inkhelh, tuichen, buk lem sak, indo tih bawr vel bak engmah ngaihtuah tur a awm lo. Pathianni zing hi chuan tlemin nungchang a tha ve deuh, chawhnu lamah kan pangngai chho leh mai tih loh chu. Thawhtanni atanga Zirtawpni thleng hi chuan sikul kal ni tih takah thawh fuh tuk a awm thei meuh lo. He khawvel hian kan tan lungaihna tur leh rilru tihah tur a keng ve lo ang maiin kan khawsa a. Kan lungngaihna thlentute chu mi theihai ruk, zanriah nang hman lo khawpa haw tlai avanga hauh hlauh, tih vel chauh a ni. Kan titi duhzawngte kha ka la hrereng mai, “Jackie Chan-a khawlai leng mi pakhatin a lo sawisa hrep a, Bruce Lee a nih an ring.” “World Cup-ah khan Japan-in goalie-ah robot an hmang a, squash an pe a, a chhe vek!” Kha’ng thu kan awih thinzia kha! A aia titi han tuipui leh chuan tur hi a awm lo. Mahse chung hun chu he hun hian zawi muangin a her liampui a, tunah chuan Panlai kan hlimlai ni-ah an chang zo ta.
 Tunah chuan: Kum heti hi kan ni tawh a, thla khata cheng khat pawh thawh chhuah loh chu thil zahthlak tih ngaihdanin rilru a kap a. Eng sumdawnna nge buaipui ila tha ang? tih ngaihtuahin zanlai pel rawka men chang a tam ta. Chutah zeldinnaah lut chho zelin, thla khatah chuti zat chu lalut ta ila, chuti zat chu bank-ah dah ila, chuti zat chuan chhungkua ka chawm thei dawn. “Imm..Nu, nupui ka nei dawn!” Mahse nupui hi chu a nupui tur takah hian a ni buaina awm leh thin ni. Nupui tur sawi takah chuan engtiklai khan nge hmeichhia hi hmeltha ka lo tih tan? Thian anga inkawm thin kha indaidanna bangin engtiklaiin nge min lo dan a, thian aia chung deuha inhmuhna te hi a lo pian? Heng hi a ni lo’m ni puitling zia chu? Exam-a failed in rilru a luah ngai miah lo thin kha a nia, engtiklaiin nge subject ba, marble khawl taka kan khawl ruih hi a veia kan vei tak tlur tlur mai? Kum a vei hnem tual tual a, rilru tihahtu a tam tual tual. Chuti chung chuan ka puitling erawh ka la ti ngam si lo.
 A chhan chu maw..: Puitling chu ka la ni lo alawm, naupang chhe lawm rual comics leh games lawm a reh hleithei lo. Tunah phei chuan Comics lawm pawl din te a nih hi kan sawi leh thuak thuak tawh. Tin, mi puitling chuan harsatna leh rilru hahna an tawn reng rengin a tlan chhuahna tur kawng an dap chhuak thiam a. Ka rilru hahna leh ka harsatnate hi tlan chhuahna kawng ka hmu ngai lo. Mi puitling chuan an khawsakpuite a zirin an mizia an thlak zung zung thiam a, kei chuan ka mizia hi ka vuan nghet lutuk nge, a tul lohna thlengin ka vuan ngar ngar zel. Mi puitling chuan an inchhirna tur thil hi tam tak chu pumpelh lovin an ti ve ang, mahse thuhnu dawn lovin thutlukna an siamin chet an thawh ve mai mai ngai lo. Kei chuan ka thutlukna leh ka chet thawhna hi thuhnu dawn lova ka tih deuh vek an ni a, ka inchhirna tur thil pawh ka ti tam ta narawh e. Hetiang ringawt avang pawh hian puitling-ah chuan ka inchhiar thei lova, mahse hetiang ka ngaihtuah phak avang pawh hian naupang lah ka inti thei tawh hek lo.
 Puitling nih hi thil har tak a lo ni dawn e, kum upat leh upat loh hi puitlinna a ni hauh lo. Kan khawsa zia leh kan thutlukna te atang zawk hian a ni kan puitling-a kan puitlin loh ni. Chuvang chuan “Ka puitling ta em ni?” tih zawhna hi chu khup biha dam khawpa upa ka nih hunah pawh ka la inzawt awl chuangin ka ring lo.


Comments

sangtea said…
Hei le kan rawn chhawp leh ta rup mai che u a nia, a chhiar leh a comment lam chu nang mahni kutah dah a ni leh ta e.......
Anonymous said…
Comment a va lut tha lo ve. Tunkar chu kumina YMA Palai chhuak tawh zawng zawngah issue tha kan tih ber tum a la ni asin...I ngaihdan han sawi ve teh u'n.
te-a said…
a kan thu ziaktute ho hi an NAWI em a ni, a bak sawi thui vak ngaiin ka hre lo
Chhuaklinga said…
Ka hming an lan miah loh chu le..
Chhuaklinga said…
Ka chhiar chhuak dap a, a dik ka ti khawp mai, han tang zel teh u. Keipawh ka post thiam hunah ka la rawn ziak ve ang.