Skip to main content

Champhai

CHAMPHAI IN EYE DOCTOR NEILO PAWI TI :
Champhai District Hospital a Eye Doctor awm ta lo chu MZP Hqrs. Champhai chuan pawi an tih thu an sawi.
Zirtawpni a Executive thukhawmah Champhai District Hospital a Eye Doctor awm ta lo chungchang an sawiho a. Zirlaiten thisen chhuak meuha theihtawp chhuaha Doctor an ngenna hliam dam fel hmaa Eye Doctor in hna dang zawm a, Champhai a chhuahsan chupawi an tih thu an sawi a. Sawrkar tana MIMER a hlut ang chiahin CHamphai tan pawh District Hospital hi a hlu em em a, mit Doctor kan neih thuai theih nan hian Health Minister hnenah ngenna hmanhmawh thlak lehkha ziak a pek nise, an ti. hei bakah hian Champhai DIET Lecturer Allision Byhnasa, Siaha DIET lama transfer chu a aiawh rawn dah thuai turin sawrkarah ngenna thlen vat nise, an ti bawk.
Hetih rual hian Champhai DIET a Mizo zirlaite dinhmun pawh uluk taka enzui nise, an chanvo dik tak an chang em tih zirchian nise tiin, MLA Election lo awm turah Party tin hnenah Champhai khua ngei, Champhai khaw…

Champhai Tualchhung

ni 22.3.2014 (inrinni)


AMKA CHAMPHAI DIST. TEN KUM 14 TLIN LAWM :

    Nimin chawhnu dar 3 khan Champhai Tourist Lodge Conference Hall ah AMKA Champhai District kum 14 tlin lawmna leh National Level Medal lak lawmna hun hman a ni a, he hun hi Champhai District Bawrhsap Pu Sangdingliana IAS chuan khuallian niin a hmanpui
    He hun Pu Lucas Thangmangliana kaihhruaiah hian Khuallian Champhai District Bawrhsap Pu Sangdingliana IAS chuan thusawiin, kum 14 chhunga an hmasawnna hrang hrang chu lawmawm a tih thu a sawi a, player te chu chhuanawm a tih thu sawiin, Instructor leh AMKA Champhai District hruaitute inpekna leh thawhrimna chu a fakawm thu a sawi. Hei bakah hian Champhai DC chuan, AMKA Champhai District chu an kal zelna turah duhsakna hlanin, tanpui an ngaih hun apianga tanpui a inhuam thu a sawi a, hruaitute chu inthlahrung lova an harsatna neih ang te a hnena sawi hrehlo turin a chah a, National Level a hetiang zat medal an la thei chu lawmawm a tih thu sawiin, duhsakna a hlan a ni
    He hunah hian Pu Lenghmingthanga chuan Technical Report pein, National Karate & Kabudo Championship an khelh zawh taka an medal lak dan sawiin, AMKA Champhai District atang hian Fighter 5 kalin hengte hian Medal an rawn hawn vek a, G-3, S-2 leh B-3 an rawn hawn a, Kata ah hian Mizoram hian Gold an la la ngailova, Champhai hi a la hmasa ber an ni a, hei bakah hian Mizoram atanga kal naupang ber an nei bawk a, medal la tam ber an ni bawk. National Karate & Kabudo Championship vawi 8na neih zawh takah hian a kalna senso atan Pu Lucas Thangmangliana President chuan Rs 80,000/- a pe a, President chungah hian Technical Board hming pawhin Lenghmingthanga hian lawmthu a sawi.
    He hunah hian Dr. R. Laldinthara Champhai District Sports Committee General Secretary pawhin thu sawiin Champhai District Sports Committee hmingin lawmpuina a hlan a, AMKA hruaitute chu sports discipline dangte nena tehkhin rual an nihloh thu sawiin, an hnathawh chu fakawm a tih thu a sawi bawk
    Nimina AMKA Champhai District ten an kum 14 tlin lawmna leh National Level medal lak lawmna ah hian Technical Board te chuan AMKA Champhai District OB te leh Adviser te chu an hnathawh that avang leh an enkawlna hnuaia hmingthatna an chan theih avangin chawimawina thuziak an hlan bawk a, AMKA Champhai District hian Champhai DC hnenah hian IAS a a kaisan lawmpui nana chawimawina parthi an hlan bawk

VCP-TE PUALIN TB CHUNGCHANG ZIRHO :

    Nimin chawhma dar 10 khan I&PR Conference Hall CHANEM Building ah Christian Medical Association Of India leh District TB Centre tangkawpin Champhai District tan Village Headman Sensitization on TB Care and Control neih a ni
    He hun hi Pu Vanlalenga District TB Co-ordinator CMAI chuan kaihhruaiin, CMAI in TB dona kawnga an hmalaknate tarlngin, TB dona kawnga khatlang hruaitute pawimawhna leh sorkar hnathawkte nena tanho a pawimawh zia a tarlang bawk. He hunah hian, Resource Person Dr. R. Lianmawia District TB Officer Champhai District chuan, VC kalkhawm an nih angin an thawm chu a lian thei hle a ni ati a, tun hma chuan hri thalo tak tak Champhai ah a leng thin a, tunah chuan chung hri thalote chu hmuh tur an awm ta meuhlo chu dept hmalakna ai mahin VC te hmalakna a zara mipui kan lo thianghlim tak vang a nih thu a sawi a, khawtlang kan hrisel that chuan a hlawkna teltu chu khawtlang hruaitute kan ni tiin, TB chungchang zirtirna a pe bawk a, TB Vei hmuhchhuahna leh TB vei enkawlna chungchangah zirtirna pein, Revised National TB Control Programme (RNTCP) chungchang a sawi bawk a ni. He hunah hian Champhai District huamchhung atangin Village Council President mi 15 an tel thei a ni
    Christian Medical Assn. Of India hian Champhai District ah NGO 4, MSD&RD, Genesaret Society Champhai, CODNERC Khawzawl leh MHIP Kahrawt Branch te an thawhpui mek a, heng NGO hrang hrangte hian Champhai District huamchhungah zirtirna pein TB dona kawngah District TB Centre nena tangkawpin hma an la mek a ni.

DUHLOH PAIHCHHUAHNA IN SAKNA TUR SEM :

    Nimin Chawhma dar 11 khan BRC Training Hall ah PHE Dept hnuaia Nirmal Bharat Abhiyan atangin School Toilet sakna tur school 95 hennah sem a ni
    He hunah hian Pu Lawmawma DEO leh DPC RMSA ni bawk chuan, dik tak leh fel takin kan sum dawnte kan hmang tur a ni a ti a, April thla chhungin school toilet kan sa zo ngei ngei tur a ni tih sawi bawkin, diklo taka sum hmang an awm thin chu pawi atih thu a sawi bawk. Nimina School Toilet sakna tur hi school 95 te hnenah Rs 38500 theuha semchhuah niin, semchhuah zawng zawng hi Rs 36,57,500/- a ni a, hemi hma hian school engemawzat hnenah NBA hnuai atang hian school toilet sakna tur hi semchhuah alo ni tawh bawk a ni

EX SERVICE TEN ASSEMBLY NEI :

    Mizoram Ex-Service League Sub Hqrs Champhai chuan nimin chawhma dar 11 khan Karawt YMA Hall ah Assembly vawi 5-na an hmang
    He hun hi Pu Rohnaa Sailo, President MESLC Sub Hqrs Champhai chuan a kaihruaii a, Pu B Hranghlira Bethel Unit chuan hunserh hmangin LAlropuia Secretary hnen atangin Report ngaihthlak a ni bawk. He hunah hian khuallian Pu David-a Treasury Officer chuan thusawiin, hetiang hun pawimawh taka khuallian atana an sawm chu lawmawm atih thu a sawi a, Ex-Service kalkhawmte chungah lawmthu sawiin, an kal leh zelna turah duhsakna a hlan a, eng harsatna pawh nei se a bula sawi hrehlo turin a chah a, theihtawp alo chhuahpui tur thu a sawi bawk a ni. Khuallian bakah hian Pu Saizama DWW pawhin thu sawiin, chhiatni thatni a intawiawm that lehzual a ngaih thu a sawi a, inlungrual taka an kal theihna turin mitinte an pawimawh hle a ni a ti. He hunah hian Member boralte sunna hun hmang bawkin Pu Lalzika Vice President chuan lawmthu sawiin he hun hi khar a ni. Chawhnu lamah MJA Champhai District kaihhruaina in kum 2014-2016 chhunga Mizoram Ex-Service League Sub Hqrs Champhai hruaitu turte an thlang nghal bawk a ni.

YMA CHHANG SPORTS KHAR :

    Nimin chawhma dar 10:30 khan Champhai Town Hall ah Vengthlang Branch YMA Sports Sub Committee buatsaih YMA chhang Sports an neih chu khar a ni
    He hun Pu H. Zarzoliana Sports Sub Committee Chairman kaihhruaiah hian Pu F. Lalrinmuana Vengthlang Branch YMA President chuan, nimina YMA chhang te hi nakin lawka kan branch kut leh ke turte in ni a ti a, zu leh ruihtheih thil laka inthiarfihlim a, mihringin kan tlintawka tha a chhuak thei tura inzir zel turin a chah bawk a ni. Pu Mamuana chuan, faina chungchang pawh tarlangin, mihring ten Pathian kan an teuhna ber chu faina a ni a ti a, mihringte changkang taka min siamtu leh min tizahawmtu chu faina hi a ni tih tarlang bawkin, YMA chhang kalkhawmte chu fai taka awm a, nun vawng uluk tur leh khawtlang tana kut leh ke ni thei theuh tura nimin atang an nun hmang turin a chah bawk a ni.
    Nimin YMA Chhang Sports kharna hunah hian Khuallam, Zonunpar Cheraw leh Kantluang hmanga intihsiakna neih a ni bakah, lawmman sem a ni bawk a ni.

TUIALHTHEI DINHMUN :

MIZOFED : (6:00 AM - 7:00 PM)
    Petrol : Free Sale (Rs. 72.41)
    Diesel : Free Sale (Rs. 54.88)

ni 21.3.2014 (zirtawpni)



GOVERNOR DAWNSAWN DAN TUR SAWIHO :

    Nimin khan I&PR Conference Hall, CHANEM Building, Champhai-ah tun thla ni 25 atanga 27 a Mizoram Governor Pu Vakkom Purushothaman-a`n zanhnih riaka Champhai a tlawh turah lo dawnsawn dan tur sawihoin Champhaia Head of Officers, Party aiawh leh chanchinbumite an thukhawm.
    He meeting hi Champhai DC Pu Sangdingliana chuan kaihruaiin mipui vantlang tana Mizoram Governor lo hmuahna hmun atan Champhai Circuit House tual nise tiin, khawchhiat thlah inven nan Champhai Town hauh lawk ni bawk se an ti. He hmuahna leh lawmna hun hi chawhma dar 11 ah tanin Champhai District Bawrhsap  in lawmna thu a sawi ang a, Special Item hmuhnawm tak tak entir tum a ni bawk. Hemi zawkah hian Champhai Circuit House-ah NGO te, Journalist te leh Department Officer leh Governor hian a kawm leh dawn a ni. Governor in Zokhawthar a tlawh huna lo dawnsawn dan tur chu Zokhawthar VC te kutah dah nise an ti a. Tlangsam Winery a tlawh hunah chuan a changtu Department -Excise & Narcotics, Horticulture Department leh Champhai Grape Growers Society ten lo dawngsawng se an ti. Governorin Champhai a thlen hunlai Aizawl a a let leh dawn hunah Circuit House atanga Helipad kawng chu Traffic clear vek nise tiin an rel bawk a ni.
    Mizoram Governor Pu Vakkom Purushothaman hian ni 25.3.2014 (Thawhlehni) hian Champhai rawn thlengin, a tukah Zokhawthar leh Tlangsam Winery leh hmun dang dang a tlawh leh ang a. Ni 27.3.2014 (Ningani) ah Shelter Home a tlawh hnuah Aizawl ah a let leh ang. Governor hian Champhai a tlawh vawikhatna tur a nih avangin amah lo dawngsawng tur hian uluk taka inbuatsaihna neih a ni a. He hun hmang turin Committee chuan mi zawng zawng a sawm a ni.
    NGO hrang hrangten Governor lo hmuak duh kan awm a nih chuan ni 24.3.2014 (Thawhtanni) Chawhma dar 11 aia tlai lovah DC hnenah inhriattir tur a ni.

MEDAL LAWM DAWN :

    AMKA, Champhai District chuan vawiin tlai hian Tourist Lodge Conference Hall ah National Karate Championship neih zawh taka Champhai fighter ten Medal an lak lawmna hun an hmang dawn a, he hunah hian Champhai DC Pu Sangdingliana chu khuallian a ni ang a, he hun hi AMKA Champhai District kum 14 tlin lawmna a ni nghal dawn a ni. National Karate Championship ah hian Mizoram aiawhin Champhai atangin fighter 5 tirhchhuahte chuan Gold Medal 3, Silver Medal 2 leh Bronze Medal 3 an rawn hawn thei a ni.

CDBBA THUKHAWM :

    Nizan khan Champhai District Basketball Association (CDBBA) Executive Committee chuan 2013-2014 kumtawp Committee an nei a, Secretary, Finance, Technical, Information & Publicity leh Documentation atangin rpeort ngaihthlak a ni a. General Body Meeting chu tun thla ni 29 (Inrinni) chawhnu dar 2 ah I&PR Conference Hall ah neih nise an ti a. Agenda neite chuan ni 26.3.2014 ral hmain Gen. Secretary R. Lalbiakzuala hnenah thehluh tur a ni. General Body Meeting ah hian Affiliated Club/Unit aiawh mi 2 theuh tel tur a ni a, rorel zawhah hian 2014-2016 hruaitu thlanna neih nghal a ni ang a, inthlan buaipui turin District Sports Committee sawm nise an ti bawk.

TUIALHTHEI DINHMUN :

MIZOFED : (6:00 AM - 7:00 PM)
    Petrol : Tanky Full (Rs. 72.41)
    Diesel : Nil (Rs. 54.88)
RD PUMP : (6:00 AM - 5:00 PM)
    Kan biak theih loh avangin a dinhmun kan rawn tarlang thei lo.


ni 20.3.2014 (ningani)



YMA CHHANG INFIAMNA NEIHPUI :

    Tunlai hian Vengthlang Branch YMA Sports Sub Commitee te chuan an veng chhung naupangte tan YMA Chhang Sports an nei mek
    YMA Chhang Sports hi niminpiah khan District Sports Complex New Champhai ah hawn a ni a, he intihsiakah hian Football, Tug-Of-War, Volleyball, Dodge Ball, Basket Ball leh Colour Fighting hmanga intihsiakna neih a ni a, tunkar zirtawp ni hian Champhai Town Hall ah kharna hun hman a ni anga, he hunah hian KHuallam, Zonunpar Cheraw leh Kantluang hmanga intihsiakna neih a ni leh dawn a ni

TB VEI 23 :

    Champhai District TB Centre chuan kumin chhung hian TB vei mi 23 an enkawl mek January thla khan TB vei 9, February thla ah 7 leh March thla ah 7, an enkawl a, heng zinga 14 hi Khaka TB hmuh an ni a, 3 te hcu chuap pawn lam TB leh mi 6 chu chuap TB, khaka hrik awmlote an nei. Tunthla ni 24 hian Eye Ward District Hospital ah World TB day an hmang dawn a, TB chungchanga hriat duh nei leh zawhna zawt duh tan hun siam a ni anga, mipuite he huna tel ve tur hian an sawm a ni. Champhai DC Pu Sangdingliana chu khuallian tura beisei a ni bawk

IMEM RECITATION :

    Tun thla ni 20 zan dar 7 atang hian IMEM, Studio CHANEM building ah IMEM Recitation Competition 2014 Opening Function neih tur a ni a, Category I leh Category III ten mahni Bible chang duh zawng hmangin First round thawhkhatna intihsiakna an nei nghal dawn a ni.
    Hei bakah hian zirtawp zan hian Category II ten mahni Bible chang duh zawng hmangin first round thawhkhatna intihsiakna an nei ve n ghal ang a, Ni 24 zanah Bible chang thlan sa hmangin first round thawh hnihna category tin ten intihsiakna an nei dawn a ni. He IMEM Recitation Competition hi IMEM channel ah Live a pek chhuah a ni ang.

TUIALHTHEI DINHMUN :

MIZOFED : (6:00 AM - 7:00 PM)
    Petrol : Tanky Full (Rs. 72.41)
    Diesel : Nil (Rs. 54.88)
RD PUMP : (6:00 AM - 5:00 PM)
    Kan biak theih loh avangin a dinhmun kan rawn tarlang thei lo.
 


ni 19.3.2014 (nilaini)



PARA-GLINDING BASIC COURSE TRAINING HAWNG :

    Nimin khan Mizoram Tourism Development Authority (NTDA) bul tum Para Glinding Basic Course Training chu Champhai District Bawrhsap Pu C. Sangdingliana`n a hawng.
    Hawnna inkhawm Tourist Lodge Hall Champhaia neihah hian Khuallian District Bawrhsap chuan thusawiin Tourism Department in hetian glam bul tanna atana Champhai an rawn thlang chu lawmawm a tih thu sawiin a ram leh mipui pawhin an dawl zawh ngei a beisei thu leh hetiang atana hmun remchang leh tha tak tak a tam thu a sawi a. Tun hi chu bul tanna mai chauh a la nih thusawiin Mizo te hi kan neu lova, Kan pian nen pawh a inrem a, sports leh adventures lam kawng hrang hrangah beiseina sang tak a awm tiin tun atang chuan Champhai mipuite pawhin vansang lam kan melh chho tan tawh dawn a ni a ti a, DC chuan Hringlang Tlang chu para Glinding atana hmun remchang tak, Rihdil kam leh Zokhawthar phai kam vela tum thlakna remchang a nih thu a sawi a, training turte pawhin uluk leh fimkhur taka che tur leh ruihtheihthil laka inthiarfihlim ngei tura ngenin, hlawhtlinna rah tha tak an neih ngei nana duhsakna hlan in Para Gliding Training hi a hawng a ni.
    Captain Saner, Director Adventure World, Nasik, Maharastra pawhin thusawiin, insumtheihna chu he training ti tura pawimawh ber a nih thu a sawi bakah mihring hlimna leh inkaihhruaina dan tha vawnhim chu vawiinah leh naktukah pawh a ngaih pawimawh ber tur a nih thu a sawi.
    He hun kaihhruaitu Pu Vabeiha Hlychho, Tourism Department Director chuan Para Gliding Basic Course Training Champhaia neih dan tur chungchang report pein hma an lak dan leh hmachhawp dang report a pe bawk. Mizoramah thlen in (Accomodation) a that loh em avanga Tourist Lodge an ngaihpawimawh hmasak thu sawiin tunah hian Mizoram pumah Tourist Lodge 42 siam a nih tawh thu leh luah mai theih tep 16  vel a awm thu a sawi a. Khualzin te hip nan AERO sports hrang hrang Para Gliding etc., lamah Tourism chuan nasa taka hma lak an tum thusawiin hemi atan hian Ministry of Tourism chuan cheng nuaih 468 a ruahman thu leh chu chu infiamna lam hmanraw hrang hrang leh training hrang hrang leh tul dang atan a hman a nih tur thu a sawi bawk a ni.
    He huna thusawitu dang Principal Govt. Champhai College Pu Lalnunmawia chuan thil la awm ngai lo Champhaia a lo awm chu lawmawm a tih thusawiin Champhai tan mai bakah Mizoram tan pawh thil tha tak a nih thu a sawi bawk.
    Chawhnu lamah Kanghlai Tlang (Mualnuam) ah Adventure World mi leh sa ten Para Gliding entirna hun an hmang a, helai hmunah hian chawlhkar 2 chhung awh tur Para Gliding zirna neih chhunzawm nghal a ni ang.

MJA MEETING :

    Nimin khan MJA Champhai District General Body Meeting Press Club ah neih a ni a, hetah hian April ni 15 a General Conference Aizawla kal dan tur leh Agenda turte an ngaihtuah a, Conf-ah hian inthlan kum a nih avangin a tam thei ang kal anih theih nan kal chhunga Chanchinbu chawlh mai nise an ti a. Conf. kal paha a remchang a nih chuan Tuirial Hydel Project tlawh nghal nise an ti bawk. Champhai District MJA Silver Jubilee Souvenir chu Champhai District chhunga YMA Branch hrang hrangte present vek nise hei bakah Champhai khawpui chhunga Library nei Insitution hrang hrangah pek ni bawk se an tih bakah District hrang hrang MJA te thawn nise an ti bawk.

 TUIALHTHEI DINHMUN :

MIZOFED : (6:00 AM - 7:00 PM)
    Petrol : Tanky Full (Rs. 72.41)
    Diesel : Nil (Rs. 54.88)
RD PUMP : (6:00 AM - 5:00 PM)
    Petrol : Nil (Rs. 79.80)
    Diesel : Nil (Rs. 59.96) 


ni 18.3.2014 (thawhlehni)



SUB-HQRS. YMA HRUAITU NOMINEE :

    Nimin khan Sub-Hqrs. YMA Champhai Executive chu an Office, Tlangrawtah an thukhawma, thlathar April ni 2-4 chhunga Khawhaia Sub-Hqrs.  YMA Conference neih tura hruaitu atana YMA Branch hrang hrang atanga hruaitu tur hming an thehluhte enfiah, scrutiny neih a ni a, Thuthmun Branch atanga Conference Agenda thehluhte an thlirho bawk.
    YMA Branch hrang hrang atanga nominate thehluhte hi 10 niin an zinga pakhat chuan phatna siam, pawm sak a nih tak avangin Kum 2014-2016 chhunga Sub-Hqrs. YMA Champhai hruaitu atana Nominee te chu mi 9 chauh an ni ta ani. Hruaitu atana thlan theih tura chhawpchhuahte chu :
    F. Lalrinmuana        Vengthlang branch
    H. Laltuliana        Zotlang Branch
    K. Lalramhluna        Tlangsam Branch
    Lalchhanhima Zofa    Dinthar Branch
    Lalhlupuia        Venglai branch
    Lalrochharliana Varte    Zotlang Branch
    PC Lalrawnliana    Vengthlang N’ Branch
    R. Lalchhuanawma    Vengsang Branch
    VL Chama Hnamte    Kahrawt Branch

CDFA EXECUTIVE THUKHAWM :

    Nimin tlai khan CDFA Executive Committee chu Pu K. Hrangthianga In, Vengthlang North ah an thukhawm.
    He Committee hi C. Hualrikhuma, CDFA President chuan a kaihruai a, Committee chuan Santosh Trophy vawi 68-na neih zawh taka Champhai District Player pathum ten Champhai an lo hawn huna lo hmuah dan chungchang an relho a. MPL khel lai an nih avangin Club hotute nen inberawn a, tunkar chhunga an lo haw hman a nih chuan ropui taka lo hmuah nise, an ti a. An lo haw hman dawnlo a nih chuan, Chanchinbu kaltlanga chawimawina thuziak leh lawmpuina hlan nise, an ti.
    CDFA Executive hian May thla Chawlhkar hnihnaa MFA Cup Champhai in a thlen turah Player Selection Committee siam nghalin IC Hranglura kaihhruaina hnuaiah Secretary atan PC Ramnunsiama an ruat. K. Lalbulliana, NL Thanga, Zonunthara leh Tv. Vanlalenga Khiangte te Member atana ruatin Champhai aiawh player thlan ni atan hian tun thla ni 28 an ruat bawk a ni. Hei bakah hian Committee chuan MFA Cup an thlen turah Fun Raising Sub-Committee pawh an din nghal bawk a. AIFF Refree Development Course leh MFA General Body Meeting Champhai a nghah tur chungchangte leh Tlangsam Sporting Club buatsaih Lal Thanghlianga Memorial Tournament chungchangte pawh Committee ah hian ngaihtuah a ni bawk a, tlaiah chawhlui an kilho nghal bawk.

VC-IN KAWNG SIAM :

    Venglai VC te chuan PWD nena tangkawpin Pu C. Lalrizapa in kawt kawngpui cheithat hna an thawk mek.
    Venglai VC te hian kawng siamna tura hmanrua tulte an lei a, PWD lamin thawktu leh hmanraw tul dangte an thawh ve thung a, tunah hian Alkatra Barrel 10, thing trip 5, Rora Trip 3, Balu Trip 2 an lei tawh a, an kawng siam hi Metre 76 a sei niin, tunah hian an zo thawhkhat tawh a ni. Venglai VC te hian tunah hian an vengchhung cheithat hna an thawk nasa hle a, Venglai kawng chuan hnuai lam White Slub hna pawh an thawk mek bawk.

DC-IN HAWNG ANG :   

    Vawiin hian Champhai Tourist Lodge ah Aerosports lauching programme hman a ni dawn a. Zing dar 10:30 ah Champhai DC Sangdingliana chuan a hawng dawn a ni. He hun hmang tur hian nimin khan Tourism Director Vabeiha Hlychho huan Champhai a rawn thleng.

AR NOTE SEM ANG :

    Vawiin chawhma dar 10:30 atang hian AH&Vety Dept. chuan Ar note an sem dawn. AH&Vety Dept. te chuan vawiin hian Backyard Poultry Farming hnuaia arvulh thlangtu mi 72 te hnenah ar note an sem dawn a. Champhai North leh South Constituency atangin Beneficiaries 36 ve ve te hnenah an semchhuak dawn a. Hemi rual hian Ngopa, Khawzawl leh Khawbung Block te pawhin an huam chhungah an semchhuak bawk ang.

BOXING ZIR DUH TAN :

    Boxing zir duh tan vawiin atangin Boxing Hall, Tlangrawtah Coaching Class tan a ni dawna. A zir duh tan zing dar 6:00 leh tlai dar 3:30 ah a hmuna kalin emaw Phone No. 8731916424 ah zawhfiah theih a ni ang.

TUIALHTHEI DINHMUN :

MIZOFED : (6:00 AM - 7:00 PM)
    Petrol : Tanky Full (Rs. 72.41)
    Diesel : Nil (Rs. 54.88)
RD PUMP : (6:00 AM - 5:00 PM)
    Petrol : Nil (Rs. 79.80)
    Diesel : Rs. 500 man (Rs. 59.96) 


ni 15.3.2014 (inrinni)



ZIRTIRTU IGNOU HNUAIA ZIRLAI THARTE LAWMLUT :

    Nimin chawhma dar 11:00 khan I &PR Auditorium CHANEM Building ah Champhai DIET IGNOU PSC-1933P Induction Meet 2014 chu neih niin, he hun hi Champhai Addl. DC Pu Zoengsanga'n a hmanpui.
    Champhai Addl. DC Pu Zoengsanga chuan thiamna famkim nei tura Human Resource Development kalpui thei tura ruahmanna kalpui mek hi tih hlawhtlin anih theih nan thawktute leh thiamna dawngtu zirlaite pawhin theih tawp chhuah tlan atul thu a sawi a, zirna lama mithiam, hna nghet nei mumal lo tam tak an awm mek laiin, sorkar-in min dahna dinhmun theuhah lungawi tak leh rinawm taka thawh hi mimal tin mawhphurhna a ni, Pu Zoengsanga chuan a ti a. Mahni hna a rinawm leh inpezo apiangte hi mi zahawm an ni tih tarlangin, sorkar school a zirtirtu tam zawk leh hlawh tam zawk hlawhtute school aiin hlawh tlem zawk a thawk Private school-ah zirlaiten thiamna tha zawk an neih theihna chhan hi chhut ngun atul hle tih sawiin.
    Pu Zoengsanga chuan zirlaite hmakhua ngai chunga thahnem ngai taka thawk turin a chah bawk a, an naupangte a theihna awm zawng zawng haichhuahsak hi zirtirtute mawhphurhna a ni tih sawi bawkin, sorkar school ten naupang kan nei ta manglo chu pawi a tih thu sawiin, mahni school theuhte luh chakawm taka kan siam theihna turin zirtirtuten tan kan la tur a ni a ti.
    He Induction Meet hi Champhai DEO Pu Lawmawma'n a kaihruai a, IGNOU Aizawl Regional Director Dr. SR Zonunthara'n Induction Speech neiin, Mizoramah IGNOU Study Centre 41 awm mekah Master Degree Programme Stream 15, Bachelor Degree Programme Stream 9, Post Graduate Diplome Programme Stream10, Post Graduate Certificate Programme Stream 2, Diploma Programme 10 leh Certificate Programme Stream21 kalpui mek anih thu a sawi.
    IGNOU hi 1985 din tan niin, Khawvel ram 35 chuangah a in zarpharh tawh a, India rama Regional Centre60 kal tlangin thiamna lamah Certificate course atanga Doctor of Philosophy Degree thleng a pe thei a, tunah hianMizoram bikah IGNOU zirlai 10,000 chuang awm mekin, zirlaite senso a tlem thei ang ber tibuk a ni a, Tribal zirlai tan zirna fee pek tawhte sorkarin a pek let leh thin avangin IGNOU hi senso awm lova zirna sang zawk zirna ti a vuah hial a ni. Champhai DIET Programme In-charge IGNOU PSC, Pi Hnamte Rebecca Lalbikdiki'n zirlaite hriattur tul pawimawh zual tarlanna a neih bakah Champhai SDEO Pi K. Lalsiamliani'n zirlaite fuihna thu sawiin, Champhai DIET Principal Pu RL Thianghlima'n lawmthu a sawi bawk.
    Right To Education 2009 in a phut angin kum 2015 hma ngeia zirtirtu untrained zawng zawngte training vek tura a phut avangin he training hi IGNOU kaltlangin Mizoram sorkar chuan a buatsaih a, training chhuakte lo chu zirtirtu atan lak an ni tawh dawnlova, hetiang traininga chhuakte hi trained teacher atana pawm an ni anga, Mizoram a Untrained teacher zawng zawngte trained an nih theih nan regular class leh Open distance Learning Mode hmanga remchanna siamsak an ni.

RAN TALHNA IN TUR SAK MEK TLAWH :

    Nimin zing khan JD Traite. Asst Project Manager NABARD Champhai chuan Rural Infrastructure Development Fund (RIDF) atanga din Animal Slaughter House a tlawh
    He hunah hian JD Traite. Asst Project Manager NABARD Champhai chuan RIDF Project atanga din tur AH&Vety Dept hnuaia Animal Slaughter House sak mek chu a hmunah tlawhin an hnathawh dante a enfiah a. JD Traite hi Lalramliana Sailo. Asst Engineer AH&Vety Dept, Zairemthanga JE, Dr. Laltlanmawia DVO Champhai leh C. Lalthanpuia Chief Manager MCAB Champhai Branch ten an tawiawm a, kawng hrang hranga hmasawn dan leh an hna kalphungte an enfiah a ni Slaughter House sak mek hi ran talhna hmun tur a ni a, a nihna tur anga din a nih hunah chuan Champhai mipui ten sa thianghlim zawk kan ei thei anga, hmasawnna ropui tak a ni dawn a ni tiin JD Traite Asst Project Manager NABARD chuan a sawi.
    Tunah hian engemaw chen sak a ni tawh a, Fur pui lo thlen hma a Cement work zawh hman an tum thu hnathawktute chuan an sawi.

MJA HRUAITU :

    Nimin khan Mizoram Journalist Assn Champhai District Elected OB thukhawm chuan, kum 2014-2016 chhunga an thawhpui tur member dangte an ruat MJA Champhai District Elected O/B meeting chuan Gen. Secy. ah Lalhmingliana Chhawkhlei Editor, Info.& Publicity Secreatary ah - R. Lalfakawma Rihlipui, Finance Secretary ah C. Lalrinsanga Pasaltha Editor te an ruat a, Executive Member atan C. Lalthantluangi Dumde Editor leh Lalrotluanga Ralte Khawzawl Times Editor te an ruat bawk a, vawiin chawhnu dar 2 hian Champhai Press Club ah OB meeting hmasa ber an nei dawn bawk a ni.

SAWIHO :

    Nimin chawhnu dar 1 khan MFA Honorary Vice Pre Pu Lalnunmawia chuan CDFA, Champhai NGO Coordination leh District Sports hruaitute a Office ah a kawm. Nimina inkawm khawmnaah hian MFA Honorary vice President Pu Lalnunmawia chuan Santosh Trophy vawi 68-na khelh zawh taka Champion Mizoram Players-te hmuahna neih a nih dan report a pe a. India ram champion an nih theih avanga leh India ram puma Mizoram pholangtu Mizoram Teamte chu an fakawm thu a sawi a. He inkawmkhawmnaah hian Santosh Trophy vawi 68-na Champion Team-a Champhai Tlangval 3; Zico Zoremsanga Captain, Khungleng. Lalruatthara Hmunhmeltha leh Laldanmawia Sialhawk te an tel chu lawmawm an tih thute sawi ho a ni a. Champhai Tlangvalte hi Champhai an lo haw huna lo hmuah dan tur chungchangte an sawi ho a ni

ZOTLANG INDOOR STADIUM :

    Zotlang Indoor Stadium chu sak tan mai tur tawh niin a sak hna hi NBCC hnuaia Contractor, Sukam Construction Pvt. Ltd., chuan an thawk dawn ani. Bank-ah Current Account leh Taxation Registration pawh Champhai-ah an tifel tawh a, tun thla chhung hian Sukam Company te hi Champhaiah an rawn inbun fel dawn nia thudawn a ni. Zotlang Indoor Stadium tur hi Mizoramah a lian ber dawttu tur niin a vaia sak nana senso tur hi cheng nuai 2238 a ni a, kum hnih chhunga zawh tur a ni.

 TUIALHTHEI DINHMUN :

MIZOFED : (6:00 AM - 7:00 PM)
    Petrol : Tanky Full (Rs. 72.41)
    Diesel : DCSO Permit (Rs. 54.88)
RD PUMP : (6:00 AM - 5:00 PM)
    Petrol : Nil  (Rs. 79.80)
    Diesel : Rs. 500 man (Rs. 59.96)


ni 14.3.2014 (zirtawpni)



CHAMPHAI DC THARIN CHARGE LA FEL :

    Nimin khan Champhai DC thar Sangdingliana chuan DC Charge la felin, Champhai District tana theihtawp a chhuah tur thu a sawi.
    DC thar hian Addl. DC Zoengsanga hnen atangin nimin khan Charge a la fel a, kan palai in Champhai DC Sangdingliana a kawmnaah Champhai chu mahni khua ang maia a lo en a nih thu a sawiin, hetianga khaw nuam taka hna a thawk leh thei tur chu amah pawh a phur hle tih a sawi a. Media mite chu thawhpui atan sawm nghalin, kawng tinrenga Champhai District hmasawnna atana thawh hopui atan a sawm a ni. Champhai DC thar Sangdingliana hi kum 1991 December atanga kum 1994 June thla thleng khan Champhai ah ASO-II in a awm tawh a, Kum 2005 December atanga 2006 July thleng khan Addl. DC ah lo awm tawh bawkin, Champhai DC a a rawn awm hma hian DM&R leh Industries ah Addl. Secretary hna  achelh a ni. DC thar hian Champhai hmasawnna tura theihtawp chhuah a tum thu a sawi a. Champhai District chhunga a hmalakna tur hrang hrang awmte sawiin, theitawp chhuaha arang thei ang bera hmalak a tum thu a sawi.

MELBUK LEH HNAHLAN TUILAK :

    Tunlai hian PHE Dept. chuan Melbuk leh Hnahlan ah tui lak hna chak takin an kalpui mek.
    PHE Department chuan Melbuk khua tui pekna tura Pipe Line an siam chu zo fel tawhin Service Reservior siam hna hi tan thuai tum a ni a, hun reilote chhunga peihfel hman an beisei a. Hnahlan tui lak hna pawh chak taka kalpui mek niin Pipe Line siam zawh a ni tawh bawk a. Service Reservior siam hna pawh thawh mek niin, Tuithing tuikhuah hna pawh thawh a ni tawh bawk a, he hna hi zawh a nih hunah chuan Tui hnianghnar zawk neih theih an inbeisei thu PHE Dept. hotute chuan an sawi.
    Hei bakah hian PHE Dept. hotute chuan Public Point atanga tui la ten pipe hmanga tui la tawh lova, a hmun ngeia dawh tawh turin mipuite an ngen a. Tui bill pek hun chhung, dar 10 atanga tlai lam dar 2 inkarah tui bill hi pek thin nise an duh thu an sawi bakah, tui bill thla thum chhung pelote Disconnect zel an nih dawn avangin chhungtinte tui bill pek ngaipawimawh turin an ngen bawk a. Khua lo thal zelah tui renchem taka hmang turin PHE Department hotute chuan mipuite an ngen bawk.

SANGHA TUITIR :

    Champhai District Fisheries Development Officer Lalthanzuala hmalakan in Champhai District a a vawi khatna atan Damdawi hmanga Sangha tuitir a ni. Sanghate hi Gonopro FH Damdawi hmanga chiu a ni a. Pu Lalrintluanga Dil leh Hmunhmeltha dil a sanghate chiu niin, Champhai District a a vawikhatna ni turin hlawhtling takin damdawi hmang hian tui tir a ni tih thu kan dawng.

NAUPANG KUM TLINGLO HNATHAWH ENFIAH DAWN :

    Nimin khan Champhai District Juvenile Justice Board chu Principal Magistrate BT Lala Sakachep hovin DCPO Office ah an thukhawm a, thubuai 4 an ngaihtuah zingah thenkhat chu an chingfel niin thu dawn a ni. Naupang kum tlinglo motor silna hmuna chhawrte chu District Child Protection hotuten an enfiah dawn bawk niin thu dawn a ni.


KAWNG LAI MEK :

    Dungtlang - Khawbung kawng thawh mek chu tunkar emaw kartir lamah emaw zawh hman beisei a ni. Dungtlang - Khawbung kawng siam nan hian a vaiin YMA Gen. Cong. an thleng tur denchhen a senral te nen cheng nuai 40 vel a ni a, Dungtlang -Khawbung kawng hi an zawh chuan Champhai khawpui chhung kawng chei an tan leh mai theih tur thu PWD EE chuan a sawi. Champhai kawng siamna tur sum cheng nuai 70 chu tunah hian tihfel vek tawh niin, tun thla chhung emaw thla thar tir lamah emaw Champhai khawpui chhung kawng siam hna hi an tan theih tur thu PWD EE chuan a sawi.

LUNG HAL DIL :

    Champhai Quarry neiten lung hal an dilna ngaihtuah turin karleh khian Geology & Mineral Resources Department atangin Asst. Controler of Mines chu Champhai ah a lokal dawn, Champhai atang hian lung hal dilna hi 8 a awm nia hriat a ni.

TUIALHTHEI DINHMUN :

MIZOFED : (6:00 AM - 7:00 PM)
    Petrol : Tanky Full (Rs. 72.41)
    Diesel : DCSO Permit (Rs. 54.88)
RD PUMP : (6:00 AM - 5:00 PM)
    Petrol : Rs. 500 man  (Rs. 79.80)
    Diesel : Free Sale (Rs. 59.96)

ni 13.3.2014 (ningani)



MSU BODY MEETING :

    Nimin chawhma dar 11 khan MSU Federal Body Meeting vawi 3-na chu I&PR Auditorium CHANEM Building ah neih a ni He hun hi Zodinpuia President General Hqrs. MSU chuan a kaihruaiin, Lalchhuanmawia Sailo, Secretary District Hqrs. Champhai chuan hunserh ahmang a.R. Lallawmsanga General Secretary General Hqrs chuan Report pein Rorel tan nghal a ni.
    Nimina Federal Body Meeting ah hian Agenda 7 chhawpchhuah nin, Ram pum huap inkhawmpui reng reng zirlaiten Exam pawimawh an neih laia neih a nihlohna turin MSU in hma la rawh se tih te, Mizoram Sorkar hna a rualbanlote tan 3% seat reservation awm hi luahkhat tur dik ten an luahkhah theih nan MSU in hma la rawh se tih te, India ram leh pawn hmun hrang hrnaga Mizo zirlaite leh hnathawkte buma an awm tawhloh nan MSU in hma la rawh se tih te, Zirtirtu ai kal la leh mahni thawhna hmuna awm duhlote MSU in dapchhuakin a tul angin hma la rawh se tih te, MSU Chanchinbu Kulva hi thlakhat lak man Rs 20 ah tihpun ni rawh se tih te, Higher & TEchnical Education Directorate in Directorate hran Hiigher leh Technical a then hran a nih theih nan hmalak ni rawh se tih te nimin rorel hian an passed a, heng an passed takte hi Executive Committee kutah dah zuiin anni hian hma an la dawn a ni. Hei bakah hian Nikum 2013 a General Conference North Vanlaiphaia neih a Rorel na a thu passed tak te hmalak chhunzawm dan report ngaihthlak a ni bawk.
    MSU Federal Body Meeting vawi 3na ah hian Mizoram hmun hrnag hrang atangin Rorel Palai 170 vel an kalkhawm a, nimin nilenga rorel niin, tlaiah chawhlui an kilho nghal bawk a ni. MSU Federal Body Meeting hi Aizawl pawna vawi khat neihna a ni a, zanin hian Champhai Town Hall ah MSU Nite hman a ni ang. MSU General Conference 2014 hi Aizawl ah neih a ni dawn bawk a ni.

KARATE THIAM LO HMUAK :

    Nimin chawhnu dar 1 khan February ni 22 & 23 a YMCA Nandanam Chennai a National Karate & Kabudo Championship vawi 8na neih zawh taka kum 11 hnuai lama Champion R. Lalruathlui Medal lak chu Champhai Park LAD Picnic Spot ah lawmna hun buatsaih a ni
    He hun Pu R. Vanlalhruaia Zote kaihhruaiah hian Lenghmingthanga Instructor leh Head Coach chuan technical Report a pe a, R. Lalruathlui chu an category ah a te ber pawl a nih thu a sawi a, heti chunga Champion a ni thei chu a huaisenna leh a thawhrim rah liau liau a nih thu a sawi tel bawk. He hunah hian Pu Lucas Thangmangliana AMKA Champhai District President chuan thu sawiin, Karate hian Thuawihna, Tumruhna leh Thianghlimna a kengtel tlat a ni a ti a, he thil pathum hi tha taka kan vawnnun chuan hlawhtlinna kawng a inhawngzau hle a ni a ti, President chuan, AMKA Champhai District hmingin lawmthu a sawi a, a kal lehzelna turah duhsakna hlan bawkin, AMKA Champhai District hmachhawpte a tarlang bawk a, New Champhai a Cheng Vaibelchhe 20 senga Karate Inpui sak anih tur thu te, Parl. Secy Pu TT Zothansanga’n Karate Mat a pek tur thute bakah India ram hmun hrang hranga Karate thiamte chahchhuakin Karate Show Ropui tak Champhai a buatsaih an tum thu pawh a sawi bawk a ni.
     He hunah hian Pu Lalhmingmawia Pachuau MJA President pawhin thu a sawi a, Karate hi Mizoram pum huap mai nilo, India ram thlenga Champhai hming chawilartu pawimawh tak an ni a ti a, Assn. naupang tak ni mah se, Champhai tana an thiltihte hi a chhuanawm hle a ni ati. MJA President chuan, mawhphurhna hlenchhuah pawimawh zia sawiin, hruaitu thenkhat, nihna chauh duh, mawhphurhna hlenchhuak zolo an awm thi chu pawi a tih thu a sawi a, hengte hian Champhai an tihhmingchihat mai bakah pawl an tibuai thei a ni a ti a, hruaitu kan nih chuan kan mawhphurhna leh kan koa tlate kan hlenchhuak ngei tur a ni tih sawiin, AMKA Champhai District hruaitute chu entawntlak a tih thu a sawi bakah an chungah lawmthu a sawi bawk a ni.
    Hei bakah hian Pu C. Lallianpuia District Sports Committee Vice President leh DCSO, Chief Adviser ni bawk Pu C. Lalluaia te pawhin thu an sawi ve bawk a ni. R. Lalruathlui hi tunah hian Kum 8 niin, Champion tur hian mi 6 a hneh a ni


ni 11.3.2014 (thawhlehni)



CANARA BANK CHAMPHAIAH :

    Champhai a Bank thar tur Canara Bank chuan anihna anga hna an thawh theihna turin tunlai hian ngawrh takin hna an thawk mek.
    Canara Bank Champhai Branch hian tunah hian Manager an la neihloh avangin anihna tur anga hnathawh ala theihloh thu thawktute chuan an sawi a, tunlai hian Account hawn hna thawh mek nii, Account hi Rs 100 leh Rs 500 in a hawn theih a ni. Canara Bank hian Mizoram chhungah Branch 5, Aizawl, Lunglei, Champhai, Lawngtlai leh Kolasib ah te an nei tawh a, District Capital dang Saiha leh Mamit ah pawh branch thar hawn an tummek thu an sawi a, North East ah hian Branch 92 awmin Bangalore ah Head Office an nei a, Guwahati ah Circle Office an nei bawk a ni.
    Canara Bank Champhai Branch hian ATM pawh neih nghal an tum a, a nihna ang tura kal tur chuan Manager an neih phawt a tul tih an sawi a, a duh tan account hawn theih reng a nih thu an sawi

JAIL VENG-AH CHAPCHAR KUT :

    Inrinni khan PWC leh MZI Champhai buatsaihin Champhai District jail-ah Chapchar Kut hman a ni. PWC leh MZI Champhai buatsaih Chapchar kut hi Pu Lalrosanga Chhangte Suparintendent-in kahhruaiin Govt Champhai College Principal Pu Lalnunmawia kutpa atan hman a ni a. Pu Lalrosanga Chhangte chuan thusawiin, Nimina lo kal khawm leh he laia hmuna awm mek te hian kan chunga thil thleng hi kan tana thatna tur zawk a ni tih kan hriat lova, a chhe zawnga kan hman chuan thil chhe ber a thleng thin a ni. Mahni intihlum te hian an chunga thil thlengte an tana tha tura ngai lovin, a chhe ber an ngaihtuah avanga an mahni intihlum thin an ni a. Keini pawh hian kan hun tawn mek hi kan tana tha tura hun rem chang rawn inher a ni tih kan hriatreng a pawimawh a ni a ti a. Chapchar kut hman pui tura kal zawng zawngte chungah lawmthu sawi a sawi bawk a ni. Kut Pa Pu Lalnunmawia chuan sawiin, “ Mizo ten kan kutpui ber Chapchar kut hi hlim takin kan hmang tur a ni a, Mahni hnam ziaa Pathian fak hnam apiang hi Kohhranah pawh an thangduang a thin, Keini pawh hian Pathian duhdanin ruihtheih thil tel lovin kan hmang thei a ni a ti a, Jail-a a kal fo thu leh thu pawh vawi tam tak a sawi tawh thu sawiin, Jail chhunga hian hawihhawm leh fel taka an awm chu Jail an chhuahsan hunah pawh chhawm zel turin a chah a, Jail chhunga nun dan mawi tak hi vawng nung renga hrereng turin a fuih bawk a ni. Pu Lalnunmawia chuan jail tangte chu Champhai khua an hmangaih tak tak a nih chuan sual kawng zawh tawh lo turin a ngen a. Chapchar kut an hman mek chu An nun hluite theihnghilha Champhai khawtlang tana a tha zawnga ke an pen tan na ni a hmang turin a ngen bawk a. Mi pakhat sual avangin khawtlang a buai thin a, vawina he laia awm te hian bul kan tan phawt chuan champhai hi kan siam tha ang a, District dangte aia chungnungin kan awm theih dawn bakah, kan khawtlang hi a lo thlamuang tawh dawn a ni tiin, vawina kan hlimna hian chhungkua leh khawtlang thleng phak rawh se a ti bawk. Kut Pa hian tangte hman turin thilpek a pek bakah, Champhai zaithiam hrang hrangte an zai bawk a ni.

KELKANG  ZONE FOOTBALL TOURNAMENT :

    Vawiin hian Kelkang zone football Association Championship Tournament zokhawthar Field-ah tan a ni dawn. Kelkang Zone Football Association Championship Tournament hi vawiin chawhma dar 10 hian Zokhawthar Field-ah hawnna inkhawm neih tur a ni a. He hawnna inkhawm hi Pu Lalrinzauva Kelkang Zone FA President-in a kaihruai ang a, Rev H Malsawmzuala chuan hunserh a hmang ang. Champhai District Football Association President pu C Hualrikhuma leh Pu Khuahluma Zokhawthar VCP te’n thu an sawi dawn bakah, Hawnna inkhawm ah hian Kelkang Zone FA adviser boral ta Pu F Hrangvuana sunna hun hman a ni ang a. Zorinpuii FC Zokhawthar leh Kelkang GSA te’n opening match an khel ang. Kelkang zone football Association Championship Tournament-ah hian Team 17 telin pool 4 ah then an ni a, Pool tin a team te hi inkhelkual vekin Point hmu sang 4 ten Quarterfinal an lut dawn a ni.

REMEDIAL TEACHING :

    RMSA bul tumin Class IX zirlaite tan nipui chawlh chhungin Govt H/S, RMSA school leh Adhoc Aided School-ah te Remedial Teaching pek tura ruahman a ni. Hei hi school engemawzat-ah chuan nimin khan kalpui tan niin vawiin chawhma dar 9 atang hian chhunzawm leh tur a ni a, Nikum lam khan subject thlan bik neiin skul thenkhatah lo kal pui tawh niin, naupang chaklo deuh tana hlawkthlak lehzuala kalpui chhunzawm zel a ni.

IN KANG TUAR TANPUI :

    Inrinni zing khan Khawbung khawtlang hruaitute’n TBC Lalnuntluanga te inkâng tanpuina tur thilphek an hlân.
    TBC Lalnuntluanga In hi Zirtawpni khan bungraw chuh hman lohvin a kang a, an in hi Assam Type; a chung = Rangva, a bang = Title, a chhuat = Thingphel a ni a. A chhuat thing phel leh a bangrel leh rangva chûm te chu a kang chhe hle a, rangva pawh hman leh tlâk awm lovin a kang chhe bawk a ni. Bialtu MLA Pu T.Sangkunga chuan hnatlâng thingpui lum nân Rs 5000/- leh chhiat tawk chhungte tanpui nan Silpoulin 2 leh Rangva Bundle 4 a pe a. RD Department, Khawbung RD Block in Rs 5000/- leh Khawbung Welfare Committee, Aizawl chuan Rs 1000/- chhiat tawkte hi an pe bawk a ni. Inkang seng fel a nih vel leh khawtlang hruaitute thukhawm nghâlin Chhiat tawkte tanpuina tur khawn chu Khawbung Branch MHIP kutah dah a niin Zirtawp zan khan khawn nghâl a ni a; VC leh YMA te’n nimin khan In sakna hmanrua tur an dap nghal bawk a ni. In tin atanga tanpuina khawn khawm chu Inrinni zing khân Pu B.Vanlallawma kaihhruainain hlan a ni a. Thuamhnaw leh Bungbel thahnem tak, Rizai 15 leh Blanket 4, pawisa fai Rs 16600/- leh khawnni lo mimal leh pawl thawhlâwm engemaw zât hlan an ni.

TUIALHTHEI DINHMUN :

MIZOFED : (6:00 AM - 7:00 PM)
    Petrol : Tanky Full (Rs. 72.41)
    Diesel : Tanky Full (Rs. 54.88)
RD PUMP : (6:00 AM - 5:00 PM)
    Petrol : Free Sale (Rs. 79.80)
    Diesel : Free Sale (Rs. 59.96)
 

ni 6.3.2014 (ningani)



HIGH SCHOOL ZIRTIRTUTE TRAINING :

    Nimin chawhma dar 10 khan I&PR Auditorium CHANEM Building ah Champhai District chhunga H/S SMDC memberte tan training neih a ni
    He hun Pu C. Hualrikhuma Dy. DPC RMSA kaihhruaiah hian, Pu Lawmawma DEO leh DPC RMSA ni bawk chuan thu a sawi a, School tihchangtlunna tura pawisa kan dawnte hi tangkai tak leh a nihna takah kan hmang tur a ni tih sawiin, kan sum hman dante hi a langtlang tur a ni a ti. Pu Lawmawma chuan, SMDC te hian school sak chungchangah thu kan nei tur a ni tih sawiin, contractor te thawhpui thiam a, a nih dan tur diktaka sak a nih theihna turin SMDC member ten kan vil uluk tur a ni a ti a, khawtlang nu leh pa kan nih angin, kan fate thanlenna kawngah leh an zirna kawnga SMDC te hian mawh kan phur hle a ni a ti a, Contractor te zingah danlo anga thawk an awm thin avangin school sakte pawh a nih dan tur anga sak a nilo thin chu pawi a tih thu sawi bawkin, school building tha kan neih theihna turin huaisen leh rinawm takin SMDC ten hma kan la ngam tur a ni a ti.
    Hei bakah hian, Zirtirtu aikal la leh thawktha peihlo ten zirna an tichhiat thu sawi bawkin, hetiang an awm a nih chuan dan anga an chunga action lak a nih theihna turin hotute hnenah hriattir thin turin an ngen bawk a ni. Pu Lawmawma chuan, thlen chin atanga hmasawn turin kalkhawmte a fuih a, nimin training atanga hma sawn a, rilru thar nena hna thawk theuh turin Champhai District chhunga HS Zirtirtu leh SMDC member kalkhawmte a chah bawk a ni
    He hunah hian Chairman, Pu C. Hualrikhuma Dy. DPC RMSA pawhin thu sawi ve bawkin, nu leh pate chu an fate zirna kawngah an inthiarfihlim ta lutuk a ni a ti a, zirtirtute kuta engkim dah hi thil tha a ni berlo tih sawi bawkin, zirtirtute leh nu leh pate kan tangtlang tur a ni a ti a, tunlai hian zirlai naupangte zingah study camp neiloa matric passed theih tawhloh anga ngai an awm ta chu pawi atih thu a sawi a, nu leh pate pawhin mahni inlum atanga matric a passed theih zia hrilhre tur leh zirtirtute tanrual pui theuh turin a ngen a, he thu hi kalkhawm SMDC member ten mahni veng theuha sawidarh turin a chah bawk a ni. Pu Hualria chuan, a sawi zelna ah Champhai District hi kan hmingchhelo a ni ati a, District dangte entawn leh zir ber kan ni chu kan thawhhona avang ani ati a, vawngnung a, theihtawp chhuah zel tura a chah bakah Vapar, Tuipui leh Hruaikawn ah te HS thar din anih tur thu a sawi a, RMSA hmalak dan thenkhat a tarlang bawk a ni
    Nimin training ah hian chawhma lama Dr Lalsangliani Co-ordinator chuan RMSA kalphung leh thiltum a sawi a, chawhnu lamah Samuel Lalrinzuala Chhangte Co-ordinator Finance and Accounts in Finance leh a kaihhnawih thil a zirtir bawk. Nimin training ah hian Govt. HS leh RMSA H/s te an kal tha hle a, vawiinah chhunzawm leh tur niin Adhoc Aided H/S SMDC te tan chhunzawm leh a ni ang.

MOTOR CHESUAL :

    Nizan dar 12 vel kha New Chalrang atanga Champhai lam Km 2 velah Super Ace MZ-04-6125 chu chesualin mi 1 in nunna a chan He motor hi vawkte phur niin Champhai atanga Sialhawk a phurh tur niin vawkte 60 a phur a, heng zinga 1 hi a thi bawk. Kan thudawnna in a sawi danin, motor chetsual chhan hi a ke puah vang niin a sawi a, he motor a chuang leh vawkte neitu Pi Lianzami Kum 41 Pu Roremlian nupui Champhai Electric veng chu ka pawh chhawn lovin a boral nghal a ni. Motor a chetsual hian Driver chu kawngah vakchhuakin New Chalrang ah zualko in a kal a, khawchhung-a mite nen ruang hi an zu hlawm ta niin kan thudawnna chuan a sawi. Motor Driver PC Lalhmunmawia Tlangsam hi Khawhai Damdawi inah dahluh nghal niin nimin khan champhai rawn panpui a ni a, ngaihtuahawm erawh a nilo thung

CHHAKTIANG KUT LEH CHAPCHAR KUT :

    Tunkar Zirtawp ni a Chapchar Kut leh Chhaktiang Kut hman turah nimin khan Final Rehearlsal neih a ni Chapcharkut leh Chhaktiang Kutpui vawi 2na ah hian Pu TT Zothansanga Parl. Secy., kutpa atana ruat tawh chu code Of Conduct in a phuar tawh avangin Kut Pa a nih a rem leh dawnlova, zanin hian Sub Hqrs YMA chuan Kut Pa tur hi an ngaihtuah dawn a ni.
    Zirtawpni Chawhma dar 10:30 ah Kahrawt Field ahChapchar Kut leh Chhaktiang Kutpui hi tan a ni ang. Hemi atana a huhoa lam turte nimin chawhnu dar 1 khan Final Rehearlsal neihpui an ni a, tarlan tawh angin he kut hi Sub Hqrs YMA chuan a thleng dawn a, he kutah hian mizo lam chi hrang hrang bakah MUP Sub Hqrs champhai in Kut hlado chhamin Tlang an tlir anga, MHIP Sub Hqrs in kum 1785 atanga nimin ni thleng costume Parade an entir ang. He kutpui ah hian Champhai District khaw hrnag hrang bakah Mizoram pawn atangin Rihkhawdar chu lo tel tura beisei an ni.

THUBUAI 14 ZIAK LUT :

    February thla chhung khan Champhai Police Station ah thubuai 14 ziahluh niin Ruruk thubuai a tam ber Thubuai ziahluh zawng zawng 14 zinga 7 chu Ruk ruk thubuai niin, mi in rawk thubuai 1, zu casa 1, mi bumna thubuai 1, mi kutthlak thubuai 1 leh damdawi case 3 ziahluh a ni.

 TUIALHTHEI DINHMUN :

MIZOFED : (6:00 AM - 7:00 PM)
    Petrol : Free Sale (Rs. 72.41)
    Diesel : Free Sale (Rs. 54.88)
RD PUMP : (6:00 AM - 5:00 PM)
    Petrol : Free Sale (Rs. 79.80)
    Diesel : Free Sale (Rs. 59.96)


champhai tualchhung chanchin 

Comments

Popular posts from this blog

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…

Champhai

MZP TEN CHAWIMAWI : Nimin khan MZP Champhai Hqrs te chuan MZU-in Under Graduate result a tih chhuah taka Govt Champhai College atanga Top ten-a langte chawimawina hun an hmang. He hun Govt Champhai College Seminar Hall-a neih hi Lalthanfela MZP Hqrs Champhai Secretary chuan kaihhruaiin Asscociate Prof. Lalchhanhimi Khiangte, Principal Govt. Champhai College chuan khuallian niin a hmanpui a. Khuallian chuan thusawiin zirlai titha chawimawi nachang kan hre chho zel hi hmasawnna nasa tak a ni a, hetiang zirlai chawimawi tlak Govt. Champhai College-in kan nei pawh hi thil ropui tak a ni tiin an kal zelna turah duhsakna a hlan a. College zawhah hian zirna tak tak a intan chauh thu sawiin zirlai ngawr ngawr piah lamah hriatna tizau thei zawnga tan la turin fuihin zirna kawngah hian a tawp kan khar that hi a pawimawh hle a ni a ti. Govt. Champhai College chu nasa taka hma sawnin a zahpui awm tawh lo hle a ni a ti a, zirna lama hming lang thei zirlai nei turin tan a la chho mek a ni a ti ba…

Champhai - Tualchhung Chanchinthar ni 7.5.2018 (thawhtanni)

KHAWTLANG ENSAN LEH MOTOR TIHCHHIAT SAKAH VAU - CHAIRMAN CZMCW :
Champhai to Zokhawthar Maxi Cab Welfare te chu Zirtawpni atang khan Zonunsanga Huan hnai zawk bulah an duty tan.
Kum khat chhung vel chu Champhai to Zokhawthar hi Rs. 150 in an tlan hnuah Zokhawthar khuaa Consumer, YMA leh VC te chuan an Rate san hi an duh lova, rate hlui  Rs. 100 a tlan leh turin Sumo neitute chu an ti a. Mahse Sumo neitute chuan Rs. 100 chuan an tan awmzia a awm loh avangin an tlan thei lova. Zokhawthar Sonsumer, VC leh YMA te chuan Zokhawthar khua luh phal lovin RIhdil kal tura Sumo Hire pawh kal tlang an phal lo va, an motor halsak leh vuakchhiat sakah hial vau in, Mualrawt ah Thawhtanni atang khan an Duty niin R. Kapthanga, Chairman Champhai to Zokhawthar Maxi Cab Welfare chuan a sawi.
Hetih lai hian khualzinte erawh chuan Sumo rate Rs. 150 chu awm an ti niin an sawi a. Zokhawthar Sumo Counter atanga km chanve pawh tlinglo Tiau Lei thlengin Taxi leh Bike hmangin Rs. 100 leh Rs. 50 a hran a Passenger te…