Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

Champhai Tualchhung

ni 1.4.2014 (thawhlehni)



EVM LEH VVPAT AWMNA HMUN TUR RUAHMAN FEL :

    Lok Sabha inthlanpui neih tura Champhai District chhung bik a hman tur EVM leh VVPAT te awmna hmun turchu nimin chhun dar 11: 00 Am khan Champhai DC Office NIC Room-ah Political party hrang hrang aiawhte awmlaiin ruahman fel (randomise)a ni a, nimin vek khan Political partyte awmlai hian EVM leh VVPAT te hi hman tlak an ni ngei em tih enfiahna (commission) pawh DC Conference Hall- ah leh General Room-ah uluk taka neih zui nghal a ni bawk.
    Champhai District chhunga Polling Station 133 awm mek zingah Voters Verifiable Paper Audit Trial (VVPAT) leh EVM commission-ah hian political party hrang hrang ten Mock poll felfai taka neiin, EVM khawl siamtu Bharat Electronic Limited (BEL) technicial 2 te bakah District Election Officer Pu R. Vanrengpuia leh AERO ten an vil a. Heng EVM leh VVPAT enfiah takte hi Strong room-ah kalh hnan nghal a niin, uluk tak ven zui nghal a ni a. Polling party tinten Polling Station an pan hunah chauh lakchhuah a ni ang.
    Champhai District chhung A/C 5-ah Lok Sabha inthlanpui neih turah hian Tuichang A/c (Khawzawl)ah leh Champhai North leh South A/C bikah chauh hman rih a ni dawn a, Tuichang A/c ah hian Polling Station 8-ah hman a ni ang a, Champhai NorthA/c ah 9, Champhai South A/c ah VVPAT 10 hman tura ruahman a ni bawk.
     Nimin khan Sallem Mohhammed, IAS General Observer for General Election to Lok Sabha 2014, Champhai District viltu chuan Champhai a lo thleng a, Official te nen inthlan lo awm tura hmalakna thlirin DC Conference Hall-ah meeting an nei nghal a ni. Observer hian tun Lok Sabha inthlan lo awm tur atana Champhai District inbuatsaihna kalpui dan a rawn enfiah dawn a, Ningani hian Serchhip lam a pan leh ang.


TUIAH HARSATNA TAWK :

    Champhai District Hospital chuan tunhnai khan tui an neih loh avangin harsatna nasa tak an tawk.
    Champhai District hospital hian kar kalta Inrinni atang khan tui hman tur an nei lo va, tui hman tur an neih loh avang hian Inzaina puan leh hmanruate tihfai leh suk kawngah te, ei leh in, inthiarnaah te, thawktute leh damlo ten harsatna an tawh thu damdawi in thawktute chuan an sawi a, Champhai District chhunga Hospital lian bera tui avanga harsatna an tawk thin chu pawi an tih thu leh tui avanga harsatna hi thleng tawh lo se an duh thu an sawi bawk.


CAMPING CENTRE HAWNG :

    Pathianni chawlhnu dar 3 khan Chhanchhuahna In,Camping centre chu Champhai Vengthlang Bialtu Pastor Rev.Lalramdinthara Colney chuan a hawng.
    He Camping centre hawnna inkhawmah hian Rev Lalramdinthara Colney chuan thusawiin he Biakin hi Pathian thutak puanchhuahna leh Pathian leh mihring intawhna hmun, Thlarau thianghlim zara Isua thisena sifaina kan channa hmun, a mite’n Pathian kan chawimawina leh kan fakna hmun tur ani tiin he camping centre hi a hawng a ni. He hawnna inkhawm hi Upa Lalchungnunga, Chhanchhuahna In Committee Chairman chuan kaihruaiin Upa JC Rohnuna Secretary in report a pe a, He camping centre hi tawngtairualnaa hlan niin Vengthlang kohhran zaipawl an zai bawk a ni.
    Chhanchhuahna In, camping centre hi pastor bial hrang hrangte din niin,an enkawlna kawngah harsatna an tawh avangin a tira enkawltute hian Champhai Vengthlang Kohhran kutah an dah ta a, Vengthlang Kohhran hian an enkawl chhunzawm ta ni. He camping centre hi Rs 21,020491 senga sak niin, Sermon Hall,a dung ft 60, avang ft 30 a zau, mi 300 bawr vel leng thei tura ngaih a ni a, sermon Hall bakah hian inthiarna kaw 10 leh Choka ft 30 azau sak tel a ni bawk. 


PHUL LEM PHAH :

    Chhangphut Field-a phul lem phah hna chu MFA cup tan a nih hmaa zawh hman tuma chak taka hna thawh mek a ni.
    Chhangphut field-a phul lem phah hna hi CDFA-in may thla chawlhkar hnihnaa MFA cup 2014 a thlen tur, tan a nih hma ngeia peihfel hman tura chak taka hnathawh mek a ni a, tunah hian side drain khuh hna thawh mek niin, khelmual thlang lam chu khuh zawh tawh a ni a, tunkar chhung hian chhak lam pawh khuh zawh hman tum a nih thu, Site Engineer Vanlalhriata chuan kan palai a hrilh a. Karleh chhung hian boulder chap darh hna pawh zawh hman an inbeisei thu leh chhak lam atanga tui hawk rawn luang tur chu LM school bul atangin SM School lamah lak pen a, a bak zawng chu Field chhak kawngpui sirah side drain laihah luantir tura ruahmanna kalpui mek a nih thu a sawi bawk.
    Tunah hian phul lem phah tur chu lo thleng kim tawhin phah theih tura peih a nih velah a phah hna hi an thawk tan nghal dawn a ni. 


ZAI DAWN :

    Vawiina AIR buatsaih zaipawl kutpuia zai turin nimin khan Champhai Vengthlang Pastor Bial Zaipawlte chuan aizawl an pan.
     Vawiin chawhnu dar 1 atanga tan tur,Vanapa hall-a All India Radio buatsaih he zaipawl kutpuia zai turin nimin khan Vengthlang Pastor Bial zaipawlte hian aizawl an pana,he huna zai tur hian Mizoram hmun hrang hrang,kohhran hrang hrang atangin zaipawl 19 sawm an ni a,Presby.kohhran atangin synod choir,bawngkawn leh Cahmphai vengthlang Pastor bial te an zai anga, Aizawl khaw pawn atangin Champhai Vengthlang Pastor Bial leh Baptist Zaipawl,Lunglei Serkawn te chiah zai tura sawm an ni. Champhai Vengthlang Pastor bial zaipawl members te hi Convener hovin vawiin zan hian Champhai panin an lokir leh ang.


TUIALHTHEI DINHMUN :

MIZOFED : (6:00 AM - 7:00 PM)
    Petrol : Free Sale (Rs. 72.41)
    Diesel : Tanky Full (Rs. 54.88)



champhai tualchhung chanchin 

Comments