Skip to main content

SAWRKAR UISA THIAMTEN NIHNIH CHHUNGIN RUIHHLO NUAI 7 MAN

SAWRKAR UISA THIAMTEN NIHNIH CHHUNGIN RUIHHLO NUAI 7 MAN : Champhai Police-te chuan nihnih chhung lekin Champhai Town huam chhungah Ruihhlo Cheng Nuai 7 man zet an man. Champhai Police hotute hnen atanga thu dawn danin, Police leh CID (SB) tangkawpte chuan nimin-zing khan New Champhai-ah rinhlelh thila an dapna lamah Lalthluaii kum 48, Kaphnawka fanu, Aizawl Bawngkawn ni a inchhal hnen atangin Heroin Hawng 6 (Gram 176) an man a. Champhai Police Station-ah ruihhlo neitu a puh hi ND&PS Act tlawh chhanin thubuai an siam sak a ni. Ruihhlo leh a neitu a puh hi nimin khan District Court-a hruai a nih hnuah Champhai District Jail-ah dahluh nghal a ni a. Ruihhlo (Heroin) man tak hlut zawng hi tualchhung hralhna a chhutin Cheng Nuai 3 (Rs. 300000) man a ni  Nimin chawhma khan Police Petrolling chuan Springdale School piah, Zotlangah Zokhawthar atanga Champhai pana tlan, Taxi MZ04 4049 atangin heroin Hawng 3, Gram 42, tualchhung hralhnaa chhutin Cheng 1,50,000 man chu an man a, a neitu ni-a…

Champhai Tualchhung

ni 2.4.2014 (nilaini)



SUB-HQRS. YMA CHAMPHAI INKHAWMPUI :

    Vawiin atanga Zirtawpni thleng awh tur hian Sub-Hqrs YMA Champhai chuan Khawhaiah conference an nei dawn.
    Kumin Sub-Hqrs YMA Conference-ah hian agenda Hnam lam leh zai lama hma kan sawn theihna turin Sub-Hqrs YMA in hnam lam leh zai intihsiakna buatsaih rawh se tih te, Foreigner ten in hmun lo ram an neih theih lohna dan hi a nihna ang taka ken kawh a nih theih nan Sub-Hqrs YMA in hma la rawh se tih te, Conference neih a, inkhawm chhunga chhimtu sahawk lutuk thin hi a reh theih nan Branch tinah inzirtir ni rawh se tih te, Champhai Sub-Hqrs YMA huam chhunga Mizo nunze mawi chhawm nung zel tura hmalak ni rawh se tih te, YMA hla bu a hla tha tak takte tuai thar leh nan Champhai Sub-Hqrs huapin Branch YMA zaipawl intihsiakna buatsaih ni rawh se tih te, Sub-Hqrs YMA huam chhunga luidung leh nungchate humhalh chungchangah chak zawkin Sub-Hqrs YMA in hma la chhunzawm zel rawh se tih te, Dan bawhchhetu man an nih a, sorkar tana thuhretute court a koh an nihin TA/DA pek thin hi a beitham lutuk a, tihpun a nih theih nan Sub-Hqrs YMA in hmala rawh se tih te, Champhai District chhunga police te indaihlohna leh hmanraw lama indaihlohna sukiang turin Sub-Hqrs YMA in hmala rawh se tih te, Chhiatni/Thatni ennawn turah zai khata kan kal theih nan Sub-Hqrs YMA huapin sawiho ni rawh se tih leh, VC roll ah hian voters id neite chauh thun ni rawh se tih te an ngaihtuah dawn a ni.
    Conference-ah hian kum 2014-2016 chhunga hruaitu thlan tur niin hruaitu atan VL Chama Hnamte, F. Lalrinmuana, H. Laltuliana, K. Lalramhluna, Lalchhanhima Zofa, Lalhlupuia, Lalrochharliana Varte, PC. Lalrawnliana leh R. Lalchhuanawma te chhawp chhuah an ni. Tarlan tawh thin angin Sub-Hqrs YMA Conference hi Khawhaia neih tur a ni a. Khawhai Branch YMA chuan khaw hmun hluia pandal an sak chu hman theih turin an peihfel tawh a, conference thleng tur hian inbuatsaihna pawh zawhfel a nih tawh thu an sawi.
     Hetihlai hian MHIP Sub-Hqrs Champhai chuan vawiin atanga Zirtawpni thleng hian Venglai Community hall-ah Conference an hmang ve dawn bawk a ni.

MPF IN MIPUITE NGEN :

    Champhai South Mizoram People’s Forum (MPF) chuan April 9, 2014-a MP inthlan lo awm turah inthlanna thianghlim tak leh muanawm tak a awm theih nan mitinte rilru diktak pu turin a ngena,ngaihtuahna thianghlim leh zalen taka mahni duhna ngeia vote thlak theuh tura an ngen thu thuchhuah siamin an tarlang.

LAWI THI ENFIAH MEK :

    Tunlai hian Tiau leh Tuithoh lui ah Lawi pul hri a leng mek a. Tiau bula awm Vaparah chuan lawi leh bawng pawh engemaw zat an thi tawh a, he ran pul hri hi Tiau mawng lam atanga rawn darh chho zel niin a hriate chuan an sawi.
     Tuithoh a lawi leh bawng, la dam tha ni a hriat ho chu in lama enkawl turin khalh haw mek an ni a. Engemawzat chuan tihral dan an ngaihtuah mek bawk. AH&Vety Dept chuan niminpiahpiah atang khan bawng leh lawi hnena vaccine pek runpui hi an nei mek a, tunkar hian zawhfel hman beisei a ni. Lawi leh bawngte hi a hmuna kalte chuan sangha hraina atana chinai leh tur hman nasat vanga thleng nia an ngaih thu kan palai an hrilh.

TLANGVAL CHHUANAWM :

    Mizo Writers Club chuan translation book of the year 2013 atan Champhai Kanan veng tlangval VLC Vanlalhriatrenga lehkhabu lehlin ‘I HNEH THEI’ tih chu an thlang a. VLC Vanlalhriatrenga hian tunah hian ATC ah B.D a zir mek a, he lehkhabu tel hian lehkhabu 7 a tichhuak tawh a ni.

BORUAK THIANGHLIMLO :

    Lohal vanglai, thla hmasa ni 15 vel khan ramkang avangin Champhai khawpui boruak a chhe hle.
    Boruak thianghlim dan tehna hi Champhaiah hian hmun hnihah dah a ni a, thla hmasa ni 18-a reading laka a lan danin residential area, Dawrkaikawn bawr velah hemi ni hian Nitrogen dioxide chu dar 10 leh dar hnih inkarah 8.4 Below Disaster Level vel a ni a, sulfur dioxide pawh hemi hunchhung vek hian 4.8 Below Disaster Level vel a ni bawk. Chawhrualin hemi ni hian boruakah nitrogen dioxide 4.5 BDL vel a ni a, sulfur dioxide hi 2.8 BDL vel a ni bawk. Station II Champhai vengthlangah chuan lohal ni khan dar 10 atanga dar hnih chhungin boruaka nitrogen dioxide tam berin 9.5 BDL vel a awm a, sulfur dioxide hi 5.9 BDL vel a awm bawk.
    Chawhrual chuan hemi ni hian Nitrogen dioxide hi 5.3 BDL vel a ni a, sulfur dioxide hi 3.7 BDL vel a ni bawk. Nitrogen Dioxide hi 9 BDL chunglam a nihin mihring tana pawi thei tura ngaih a ni a, sulfur dioxide-ah hian 4 BDL chu a him china ngaih a ni bawk.

RAWNGBAWLNA NEI :

    Rev.John Park chuan nizan atang khan Zotlang Presbyterian Kohhran ah rawngbawlna a nei tan.         Rev.John Park hi South Korea mi, USA-a methodist Pastor hna chelh mek a ni a, Zotlang Presbyterian Kohhran ah hian nizan atang khan rawngbawlna nei tanin, zan lamah a hnen atang hian sermon ngaihtlak thin a ni ang a, chhun lamah fellowship leh sharing hmanga hun hman thin a ni ang. He a rawngbawlna hian Pathianni lo awm tur thleng a awh dawn a ni.
    Hetihlai hian Vengthlang Presbyterian Kohhran chuan nimin khan Chhanchhuahna inah rawngbawltute tan camping an buatsaih tan a, karleh hian mipui nawlpui tan neih chhunzawm leh a ni ang.

MP THLAN TUM LO :

    Selam VCP VTK Munga hnen atanga thu dawn danin, Selam Govt.Primary School-a zirtirtu, a ngheta thawk awmchhun an sawn a, tunah hian admission hawng tur zirtirtu takngial pawh an nei lova, Selam VC kaihhruai NGO leh Political party inzawmkhawmte chuan tun thla 7 hma ngeia sorkarin he school-a thawk tur zirtirtu 5 tal an dahloh chuan, Lok Sabha inthlan lo awm tur chu Boycott an tum.

 TUIALHTHEI DINHMUN :

MIZOFED : (6:00 AM - 7:00 PM)
     Petrol : Free Sale (Rs. 71.23)
    Diesel : Tanky Full (Rs. 54.88)



champhai tualchhung chanchin 

Comments