Skip to main content

Champhai

CHAMPHAI IN EYE DOCTOR NEILO PAWI TI :
Champhai District Hospital a Eye Doctor awm ta lo chu MZP Hqrs. Champhai chuan pawi an tih thu an sawi.
Zirtawpni a Executive thukhawmah Champhai District Hospital a Eye Doctor awm ta lo chungchang an sawiho a. Zirlaiten thisen chhuak meuha theihtawp chhuaha Doctor an ngenna hliam dam fel hmaa Eye Doctor in hna dang zawm a, Champhai a chhuahsan chupawi an tih thu an sawi a. Sawrkar tana MIMER a hlut ang chiahin CHamphai tan pawh District Hospital hi a hlu em em a, mit Doctor kan neih thuai theih nan hian Health Minister hnenah ngenna hmanhmawh thlak lehkha ziak a pek nise, an ti. hei bakah hian Champhai DIET Lecturer Allision Byhnasa, Siaha DIET lama transfer chu a aiawh rawn dah thuai turin sawrkarah ngenna thlen vat nise, an ti bawk.
Hetih rual hian Champhai DIET a Mizo zirlaite dinhmun pawh uluk taka enzui nise, an chanvo dik tak an chang em tih zirchian nise tiin, MLA Election lo awm turah Party tin hnenah Champhai khua ngei, Champhai khaw…

Champhai Tualchhung

ni 5.4.2014 (Inrinni)



FINAL  BRIEFING NEI :

    Vawiin khan Champhai Town Hall ah Lok Sabha inthlan lo awm tura duty tur,Polling Parties te tan Final Briefing neih a ni
    He hunah hian SDO (Sadar) Pu Benjamin Lalzama chuan thusawiin, election a duty turte chuan zamlo leh hlauthawngloa an hna thawk theuh turin a chah a, vawi khat duty na turte pawhin an thiante zawt hrehlo tura chahin, fimkhur taka thawk turin a chah bawk a, vote thlak reng rengte chu hming sign tir zel tura chahin, Mizoram, Lehkhathiam rama kut zungpui nem kan tam ta lutuk chu zahthlak a tih thu a sawi.
    Pu Zoengsanga Addl. DC pawhin thu sawiin, Tender vote a awmlohna turin an hna uluk tak leh fimkhur taka thawk turin a chah a, ruihtheihthil ti mi an awm a nih pawhin, inthlan chhung na na na chuan engmah an intihbuai tir tur a nilo a ti. Addl. DC chuan, inthlan hi DC leh Election ta bik anih loh thu a sawi a, mi zawng zawng ta leh an mawhphurhna anih thu sawiin, an tihsual palh avanga an nupui fanau ten an tawrh lohna turin fimkhur takin kan thawk tur ani a ti. Pu Zoremthara Ralte BDO Champhai leh K. Lalngaihzuala Asst. Engineer NIC te pawhin thu an sawi bawk He hunah hian inthlan laia tih tur leh tihloh turte ngun taka hrilh an ni a, voters slip hman dan te, EDC hman dante, awlsam zawka form fill up dante zirtir an ni a, polling station a duty ten hna chak zawka an thawh theihna tura an hna insem dan turte an hrilhhriat bakah, zawhna leh chhanna hun hman ani bawk
    Vawiin Polling Parties te Final Briefing neihna ah hian inthlan a duty turte chu an kalpui turte leh an duty na hmun turte hrilh an ni a,naktuk Pathian ni hian an hmanraw ken turte pek an ni anga, ni 7 ah hmun hla zual 13 ten an duty na hmun tur an pan ang a, a dangte chu a tuk ni 8 ah an duty na hmun tur panin an chhuak ang

SILAI MAN :

    Tukin zing khan Champhai Police te chuan Khankawn Check Gate ah Silai AK-47 4 leh M4A1 silai 1 bakah a mu thahnem tak an man. Champhai Police Khankawn Check Gate a duty te chuan Maxi Cab MZO1- D, 1616 chu lo check in,he motor ah hian phalloh thil Burma Wine phurh a ni a, Police te chuan motor chu dap zelin,heng silaite hi hmuh a ni ta a, Police ten silai an hmuh veleh an zinga pakhat chuan silai hi la in a tlanpui nghal a, Champhai Police te chuan umzuiin heng silaite hi an man a, a tlanpuitu erawh chu man a nilo thung.
    Heng silai leh a mu bakah hian,a neitu leh mawhphurtu nia ngaih,V. Laithanga kum 47, V Ngunliana Fapa,Saron Veng Aizawl leh a thurualpui, Zamanga kum 44, Chawngliana (L) fapa,Tahan Myanmar nia insawite chu man an ni a, tlanchhe ta 2nd Driver erawh man ala nilo thung. Heng silai bakah hian, AK 47 mu 1,200 leh M4A1 mu 12 mantel a ni bawk. Mawhphurtu zing ami V. Laithanga hi Pawngsual leh No. 4 thubuai lo awrh tawh a ni a. Khawnkawn Check Gate a Champhai police te hian tun hma pawhin zu leh ruihhlo chi hrang hrang bakah sorkar phalloh thil thahnem tak an lo man tawh thin a ni.

TOTAL BANDH NEIH DAN TUR REL :

    Vawiin chawhnu dar 1:30 khan Sub Hqrs YMA Office Tlangrawt ah Sub Hqrs YMA kaihhruaina in,Champhai khawchhunga pawl hrang hrangte chuan Meeting pawimawh tak an nei         He hun Pu PC Zohlira Sub Hqrs YMA President kaihhruaiah hian, Mizoram NGO Coordination Committee in a lo rel tawh angin, Tripura Transit Camp a Tuikuk ten vote an thlak duh loh zia lantir nan leh vote hi chhiar a nih loh nan,darkar 72 chhung,April ni 7 zing dar 5 atanga April ni 9 thleng hian,khauh taka Total Bandh neih tur tih chu a bawhzui dan tur relin YMA, MHIP, MUP, MZP leh MSU te an thukhawm a, an ngenna ang hian he bandh hi tha taka thlawp nise an ti a, tukthuan eikham ah Pawl hrang hrang OB chinte chu Sub Hqrs YMA Office Tlangrawt ah kalkhawm ni se an tih bakah, Duty Badge siam ni se an ti a, special case a kal ngaite hriathran an awlsam zawk theihna turin,Badge siam ni se an ti bawk a, hun danga Bandh neih anglo takin khauh lehzuala thuneihna kenkawh nise an tih bakah,veng hrang hrang YMA te chu an veng chhunga a tam thei ang ber lo puangzar turin an ti bawk a ni.
    He Total Bandh ah hian,Sub Hqrs YMA Office Tlangrawt ami chu information Centre atan hman a ni dawn a ni. Puan tawh thin angin,Tripura Transit Camp a Tuikuk ten vote an thlak duh loh zia lantir nan leh vote hi chhiar a nih loh nan,darkar 72 chhung April ni 7 zing dar 5 atanga April ni 9 thleng hian khauh taka Total Bandh neih tur a ni a, Mizoram mipui zawng zawng ten,ram leh hnam rilru pu chunga thahnemngai taka he Total Bandh hi tihlawhtling turin,NGO Co-Ordination Committee chuan a ngen a, Mizoram mipui vote nilo, Tuikuk VOte hmanga MP thlan tlin an lo awm a nih pawhin,Mizoram hmangaihna avanga inhnukdawk leh nghal turin,NGO- Coordination Commttee chuan candidate te a ngen nghal bawk a ni.
    He Total bandh hi Thawhtan ni zing dar 5 atanga nilai ni thleng awh tur a ni a, he bandh hian Chanchinbu mi leh chanchinbu semtute, bawnghnute sem, damdawi ina thawk, tui sem, damlo, P&E Control Room Duty leh dan leh thupek kengkawhtute a huam dawnlo a ni

TOURNAMENT SIAM DAWN :

    Tlangsam Sporting Club, Tlangsam Lal Chhungkua leh Champhai District Volleyball Assn tangkhawm chuan,tun thla ni 30 hian Thanghlianga Sailo Memorial Tournament chu an buatsaih leh dawn Tlangsam Sporting Club a neih tur he tournament ah hian a duh apiang tan tel theih a ni ang a, lawmman pakhatna hian Rs 20,000/- leh Trophy, 2-na in Rs 10,000/- leh Trophy an dawng dawn a, Best Spiker, Setter leh Best Promising Player te thlan an ni ang. April ni 26 thleng Entry Fee Rs 500 pek theih a ni. Volley Ball Tournament bakah hian,FootBall Tournament pawh buatsaih nghal a ni ang a, Football ah hian Champhai District huamchhunga Club leh veng ten an khel thei anga, CDFA hnuaia Registered player te chuan an in registered na club tan bak an khel thei lovang, Club/Team pakhatin Re-inforced in players 3 an la thei anga, Re-Inforced Players chu club/veng tello ami an ni tur a ni. Tul bik thilah chuan CDFA leh Organising Board kutah dah a ni anga, Entry Fee hi April ni 18 thleng pek theih a ni dawn a, Champion hian Rs 30,000 an dawng dawn a ni

RAWNGBAWLNA LAM :

@@ Vengthlang Kohhran chuan Synod Revival Speaker Upa R.Lalhmachhuana leh a thiante, 'Mi lungngaite thian Team' ruaiin tunkar chhung khan Chhanchhuahna in ah rawngbawltu camp an nei a, rawngbawltu 50 vel an lut a. Karleh hian mipui camp neih leh tur a ni ang.
@@ Zomi Baptist church chuan nizan atanga Pathianni zan thleng awh turin Zomi Baptist Youth Fellowship, Conference chu Sesih khuaah an hmang mek a, Mizoram pum huap inkhawmpuiah hian Speaker Rev.Gin Lam Thang MA,BD hnen atangin Pathian thuchah ngaihthlak thin a ni.
@@ Nizan atang khan Mizoram pum huap Wesleyan Methodist Kohhran Hmeichhe inkhawmpui chu Champhai Biak In ah neih tan a ni a. Inkhawmpui thupui, 'Inthawina aiin thuawihna ka duh' tih chu mi hrang hrangin an sawi thin ang a, khawmpui ni naktuk zan hian a tiak dawn a ni.

DAMDAWIIN LAM :

@@ Champhai District Hospital ah chuan OPD a inentir zawng zawng hi mi 556 an ni a, Dental OPD ah mi 153 inentirin,Eye OPD ah mi 29 an inentir bawk a, Ultrasound ti mi 14 an awmin, X-Ray mi 61 an awm bawk a, Damlo Admit 103 awmin,heng zinga 1 hi a boral a, damlo referred 1 a awm bawk. Zaipui tawk mi 15 leh zai tenau tawk mi 27 an awm a, mit zai 1 awmin nau nei mi 24 an awm. JSY hi mi 53 hnenah pek a ni a, JSSK hi mi 161 hnenah pek a ni bawk a, amaherawhchu tunah hian JSY leh JSSk hi pek tur a awm tawhlo thung. Tunah hian Damlo 39 an awm mek a ni.
@@DM Hospital Vengthlang ah chuan OPD ah mi 89 an inentir a, Damlo 13 admit niin,nau nei mi 1 a awm bawk a, Zaipui tawk mi 1 leh zai tenau tawk mi 6 an awm a, X-Ray ti mi 11 awmin,EcG ti mi 4 an awm bawk a, tunah hian damlo 1 a awm mek a ni

DOCTOR DUTY DAN TUR :

    Karleh thawhtan a Champhai District Hospital Doctor te duty dan tur hetiang hi a ni OPD ah Dr. J. Lalramchhuanga Medicine, Dr. C. Vanlalhlua Surgeon, Dr. Zodinthara MO, Dr. LT. Lawta Mo, Dr. Lalbiaktluangin Eye leh Dr. Thangsailova Dentist te an thu anga, Dr. B. Lalduhawma Gynaecologist chu OT ah a thu bawk ang

TUIALHTHEI DINHMUN :

MIZOFED : (6:00 AM - 7:00 PM)
    Petrol : Free Sale (Rs. 71.23)
    Diesel : Free Sale (Rs. 54.88)


ni 4.4.2014 (zirtawpni)



MJA IN DC KAWM :

    Zirtawpni chawhma dar 11:30 khan Champhai DC, District Election Officer leh MP Election ERO ni bawk, Pu Sangdingliana IAS kaihhruaina in DC Office Chamber ah,MJA Champhai District member te nen Press Meet neih a ni. He hunah hian Champhai khawpui chhunga thuthar thehdarhtute an kal tha hle a. DC chuan thuthar thehdarhtute chu mi pawimawh tak an nih thu sawiin, MP Election lo awm turah pawh hian mipuite finchhuah a, mipuite hrilhhriat kawnga tanrualpuiah a sawm a. MP Election ah vote thlak kan tlem ziah chu pawi a tih thu sawiin, vote thlak hi kan tihtur a ni tih hria a, Mizoram District dang zawng zawngte aia vote thlak that berna ni tura tanla turin media te chu a ngen a ni. Champhai District Election Officer Pu Sangdingliana chuan, MLA inthlana thuneitute leh Thuthar theh darhtuten thawhhona tha tak an nei chu lawmawm a tih thu sawiin, MP inthlan lo awm turah pawh hian thawhhona tha tak an neih leh a beisei thu a sawi a, hmun ralmuang tak a nih avanga inthlanna muanawm leh felfai tak neih a beisei thu pawh tarlang telin, inthlan laia duty tur force mite pawhin Champhai an lo thlen tawh thu a sawi bawk. He hunah hian Pu R. Vanrengpuia Election Officer chuan, MP inthlan lo awm tura kawng hrang hranga hma lak tawh dante a tarlang a, EVM 1st leh 2nd Randomization pawh neih a nih tawh thu te, Strong Room a hman theih tura dahthat a nih tawh thute a sawi bawk. Election Officer chuan, Mizoram hi Constituency pakhat a nih avangin inthlanna a duty tur ten Postal Ballot aiah EDC an hman tawh tur thu sawiin, EDC hmang turte tan naktuk thleng hun hawn a ni ang, a ti a, hemi hmang hian duty tur ten an duty-na hmunah theuh vote an thlak thei tawh dawn a ni. Tun tum Lok Sabha inthlan ah hian Mizoram hmun hrang hrang Polling Station 312 ah EVM VVPAT hman tur a ni a, Champhai District bikah Polling Station 27, 22-Tuichang ah 8, 23-Champhai North ah , 24 Champhai South ah 10 hman tur a ni a, Zirtawpni khan DC Office Staff te chu VVPAT hman dan chungchangah Briefing neihpui an ni a, naktuk chawhma dar 11 hian Champhai Town Hall ah Polling Parties te Briefing neihpui leh an ni ang. Hei bakah hian MJA memberte chuan Champhai hmasawnna tur hrang hrang sawipui bawkin,Champhai DC chuan theihtawp chhuaha hma a lakpui tur thu pawh a sawi bawk, kum 2009 Lok Sabha inthlan aia kumin a vote a tlak that theihna tura hmalak ni se an ti bawk.

VENGSANG TLANGVAL FEL MI KUT TUARIN THI :

    Ningani zan dar 9:30 pm vel khan Champhai Kahrawt Field a Mela neihna bul,Champhai DLAO Office tualah Vanlalhlua,mi kut tuara thi chhawnga a awm chu Champhai District Hospital panpui anih hnuin a boral. Champhai Police hotute hnen atanga thu dawn danin, Vanlalhlua kum 42, Upa Lallianluauva Sailo fapa,Champhai Vengsang ami chu ningani khan a thiante 2 nen Kahrawt Field a Mela neihna hmunah hian an kal a, Kahrawt tlangval 2, Lalduhthusama kum 27 S/o Roenga leh Lalrinmuana kum 24 S/o Lalhmingmawia te nen an intibuai a, Vanlalhlua hian alu ah hliam tuarin, nikhaw hre lova a awm chu a thianten Damdawi in an panpui hnuah a boral zui nghal. Vanlalhlua khawihtu ni a puh Lalduhthusama leh Lalrinmuana te hi ningani la la khan Police ten man nghalin, tualthah thubuai awrhtir an nih hnuah,ningani vek khan Champhai District Jail-ah an dahlut nghal a ni. Vanlalhlua hi ningani khan an chenna in Champhai Vengsangah lumenpui niin,Zirtawpni khan District Hospitalah Post mortem anih hnuin,Vengsang thlanmualah vuiliam a ni. Champhai Police te chuan ningani a thil thlen dan chungchangah,Vanlalhlua thiante 2 hi Zirtawpni khan thu an zawh fiah bakah,Vanlalhlua thih thu a mawhphurtu a puh Lalduhthusama leh Lalrinmuana te pawh thu an zawtfiah tawh a, kut an thlak ngei tih an phat loh thu Police hotute chuan an sawi.

FINANCIAL LITERACY CAMPAIGN NEI :

    Zirtawpni zing zing dar 7:00 khan Tlangsam Community Hall-ah Lead bank Office leh NABARD huaihawt Financial Literacy Campaign neih a ni. Zirtawpni zing zinga Lead bank Office leh NABARD huaihawt Financial Literacy Campaign Tlangsam Community Hall-a neih hi Pu Lalnunzira Tlangsam VCP chuan a kaihruaia, Bank hrang hrang SBI, HDFC, Apex Bank leh NABARD aiawhten he hun hi an hmanpui a
    He hunah hian mipuiten bank account an neih a pawimawh zia leh tangkai dante inzirtir a ni a, Mipuite'n bank lama harsatna an tawh leh hriatduh an neih ang te in hrilhhriatna leh zirtirna hun hman a ni bawk.Financial Literacy Campaign-ah hian Mipuite'n tun aia tangkai zawka bank an hman theihna tur leh pawisa khawl pawimawhzia te leh loan chungchang te inzirtirna hun an nei bawk.

MHIP KHAWMPUI TIAK :

    MHIP Sub Hqrs Champhai Conference vawi 13-na chu Zirtawpni khan chhunzawm leh niin hruaitu thar thlan a ni. Zirtawpni chawhma khan Lengkhawm zai hmanga intihsiakna neih a ni a, Pi VL Rochhari chuan kaihruaiin, Branch hrang hrang ten Lengkhawm zai an intihsiak a, chawhnu lamah hruaitu tur thlan an ni a, President ah VL Rochhari Vengthlang North, Vice President- Laldinngheti Bethel, Secretary ah Lalhmachhuani Bethel, Asst Secretary ah Lallawmzuali Vengthlang, Treasurer ah Laltlanthangi New Champhai leh Fin. Secretary ah VL Duhawmi Vengthlang te thlantlin an ni MHIP Sub Hqrs Conference hi zanin hian a tiak dawn a, Result puan leh lawmman sem a ni anga, Lawmman te hi Pu Lalhmingliana EE, Minor Irrigation chuan a sem dawn a ni.

SUB-HQRS. YMA CHAMPHAI INTHLANG :

    Champhai Sub-Headquarters YMA Conference vawi 4-na, Khawhaia neih mek chu zanin hian a tiak dawn ta. Zirtawpni zing zing khan Khawhai Town Hall-ah kum 2014-2016 chhunga Champhai Sub-Hqrs YMA hruaitu thlan a ni a, President-ah VL Chama Hnamte, Kahrawt; Vice President-ah H.Laltuliana, Zotlang; Secretary : F.Lalrinmuana, Vengthlang; Asst. Secy-ah PC Lalrawnliana, Vengthlang North; Treasurer: R.Lalchhuanawma, Vengsang leh Fin Secy ah K Lalramhluna, Tlangsam te thlan an ni. Sub-Hqrs YMA Conference-ah hian khaw thenawm atanga palai lehlâng nen,Palai kal zawng zawng hi mi 820 vel an ni a. Conference chhung hian Pu K Zohmingliana, Secretary, DWSC, Champhai District chuan Water and Sanitation Awareness Campaign a pe thin a. Tuihna tlem chak avanga mipuite'n ramngaw humhalh lama hma nasa zuala kan lak a pawimawh thu te, ruahtui khawl pawimawhzia te, kan fai loh avanga kan hriselnain a tuar theih dan te zirtirna a pe a ni. Pu Lalramchuailova DFO chuan "Global Warming - Climate Change" tih thupui hmangin,palaite Thing leh mau chereu zel vanga khawvel lum tual tual chungchang" zirtirna a pe bawk a ni. Kum 2016 Champhai Sub-Headquarters YMA Conference chu Hnahlânah nghah a ni. 
 
 



champhai tualchhung chanchin 

Comments

Davida said…
Pu Sangtea zarah chanchinthar kimchang takin kan hriat phaha, a lawmawm thin e.

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung Chanchinthar

ni 19.9.2016 (thawhtanni)
DC IN FAI ZUI ZEL TURIN MIPUI TE NGEN :
Champhai District in faina leh thianghlimna kawnga hma a sawn zel theih nan Champhai District Bawrhsap chuan thuchhuah a siam.
DC chuan India Sawrkar laipui hmalaknain Swachh Bharat Mission hnuaiah Faina leh thianghlimna chu thupuia neihin hemi kawng ahmalakna hi chak taka kalpui mek ani a. Rampum huapa inthiarna neih dan chungchanga tlang mite chenna Hill State zingah pawh mizoram chu 6-na niin, District bil tehnaah District fai ber 10 thlan chhuahah Champhai chu 9-na kan lo ni thei ta hi a chhuanawmin, mimal leh sawrkar hmalakna hi a lawmawmin a fak tlak hle a ni, a ti a. Tunah kan State leh District dinhmun atanga hmasawn zel hi kan tum leh hmabak a ni tih hriat theuh hi a pawimawh takzet a. Chuvangin tun atang chuan mi tupawh In sa tur reng rengin Ek In an sa tel ngei ngei tur  ani, tih a tarlang.
Hei hi Village Council tinin an veng/khuaah khawng taka ken kawha nih theih nan hma an la theuh tur a ni a. Tin, an bial chh…

Bethel YMA (BYMA)

BRANCH EXECUTIVE COMMITTEE NEIH A NI
Bethel. March.27Sunday) : Branch Executive Commiittee vawi thumna chu ni 24.3.09(Thawhleh) zanah YMA Office-ah neih a ni.
Branch Executive Committeee hi President Pu Lalsanglura Zote in kaihruaiin member sawm pariat an kal thei a, Pu C.Lalfaka Senior Adviser chuan Committee te tluang taka neih theih nan Pathian hnenah tawngtaina neiin rorel tan a ni.
Rorel I-na Kan Branch Vice President Pu S.Lalruatsanga chawlh dilna chu ngun taka sawi ho a nih hnuin a rawn dilna chu zahawm viau mahse tun atan chuan la pawm sak lo mai ni se an ti.
Rorel II-na Branch-ina a thunun mek Pu Nanghekmanga, Pi Nianglianchini, Pu Thangkhanlanga te ngaihdam dilna chu ngun taka ngaihtuah a nih hnuah an dilna pawm sakin thunun an nihna chu hlih sak a n ni.
Rorel III-na Central YMA atang Branch tina YMA chhang din theih ni se an tih chu kan Branch-ah pawh ngun taka sawi ho a nih hnuin kum 2009 atan kan Branch-ah pawh din ve nise an ti a, Section Wise-a din nise April thla chhunga …