Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

ni 26.9.2016 (thawhtanni)


A NAU NUNNA CHHAN ATUM AVANGIN A NUNNA A HLAN :
Ni 24.9.2016 (Inrinni) tuk thuan eikham dar 10 velah khan Tlangsam naupang unau pahnih chu vanduaithlak takin tuiah an tla hlum a. Lalbiakfela kum 7 mi chuan a nau nunna chhan a tumna lamah a nun a chan.
Lalbiakfela kum 7 leh Lalngaihkima kum 5, Pu VL Ruatkima Fanai fate chu MGNREGS atanga Tlangsam VEC ten Community Farm Pond an siam ah an tla thlum. Lalbiakfela leh Lalngaihkima te unau bakah an patea fapa Lalmuanchhana te nen an ni pasal Pu C Lalramlawma lu meh tir turin an kal a, he tah hian chaw an ei nghal a, Chaw eikhamah an unau hian Pu C Lalramlawma te
kawmthlanga Tlangsam VEC ten MGNREGS atanga Community Farm pond an siam ah hian an kal a, a naupang zawk Lalngaihkima kum 5 mi zawk hi tuiah hian a lut hmasa zawka, a rawn lan har em avangin a u zawk Lalbiakfela kum 7 mi hian a nau chhan tumin Tui ah hian a lut ve leh nghal a, an kalpui Lalmuanchhana chuan an pil rei em avangin an ni Pi Baby Vanlalhlupuii a han ko a. 
Pi Vanlalhlupuii hian tanpuitu au in Pu T Remsangpuia leh a fapa Vanlalnunzira te chuan an thawm hria in an tlan nghal a, Lalngaihkima ruang zawk hi an la chhuak nghal a. Lalbiakfela awm loh thu an hriat chhuah hnuah zawng lehin Lalbiakfela ruang pawh hi hmuh zui ve leh nghal a ni a. An ruang hi Dil mawngah a lo awm tawh avangin tuiah hian an awm rei tawh rin a ni. An ruang hi tlaivarpui niin nimin khan vuina hun hman ani ang.

TUIPUI TLAWHCHHAN KHUA TEN HUMHALH :
Tuipui tlawhchhan khaw hrang hrang Branch YMA Joint Committee chuan October ni 1 atanga November ni 15 thleng khian eng hmanrua maha Tuipui Luidung nungchate man lo turin mipuite an ngen.
Inrinni-a Khawbung Water Supply Scheme Pump House, Tuipuia Tuipui Tlawhchhan Joint Committee thukhawm chuan kum danga mipui henna ngenna an siam angin Nghalim fuan hun leh Lengphar phul hun Oct. 1 - Nov. 15 thleng chu eng hmanraw hmang maha Tuipui Luidung nungcha man lo turin mipui an ngen thar leh a. Nikum 2015 lama mipui an ngenna a hlawhtlin avangin Tuipuiah hian sangha a pung hle a ni. Kumin hian Tuipui Luidung venghim turin YMA Branch hrang hrangte chu chan insemin him taka sangha a fuan theih nan riak luta sangha fuan ven an tum a. Sanghafuan Video thlalak nei theite chu lawmman tha tak Joint Committee chuan siam sak a tum bawk a. Biate leh Khawbung Branch YMA te chuan Tuipui lei bul bik-  Tlaikuang li leh Zawngtah lui chhuah inkar an humhalh pawh nasa zawka hma an lak mek thu an sawi a. Mipui an inzirtirna chuan a kum tela rah tha a chhuah thu an sawi.

CHAMPHAI CHHEHVELAH KHAWINGHAL KHAWI :
Champhai leh a chheh velah kum 10 vel kalta atang khan mithenkhatin hlawhtling tain Khawinghal an khawi thin a, khawinghal hi Mizo Pipu hun lai atanga Mizo nuna hmun pawimawh tak luahtu a ni.
Khawinghal in bu a siam tirh lai, Fur intan hun laiin Khawinghal bu chhep tira a “LAL” chu la chhuakin khawinghal bu tur an siamah an dahlut mai thin a. Nghalpui lal hi a vahsawn ve vak loh avangin a khawi pawh a awl sam hle a ni. Khawinghal khawitu thenkhat chuan mahni inbul leh huan/ramah Cement Concrete in a bu tur hi Feet 4 atanga feet 5 bial vela lianin an siam a, fel taka chhin lehin a kawngka an siam sak a. Thla 2-3 hnuah khawinghal ur chauvin awlsam takin an la mai thin a. An urchauh khuaite hi reilote ah an harhzui leh mai thin.
Piputen thlang an tlak lai atang tawhin Khawinghal hian Mizo nunah hmun pawimawh tak luahin, khuai zinga an ngaihsan ber a nih bakah puithuna thil vangin mitthi ruang sawngbawlna kawngah pawh hmun pawimawh tak a luah a, mitthi ruang ur thin laiin Khawnghal Aitu ruang chu khawinghal in a ven tlat avangin tho leh rannungin an bawm ngam lo niin an lo ngai thin a ni.

NGUR TLANGVAL 2-NA :
Aidu Motors, LPS Comedian Search Season 9 neih zawh takah Lalrinfela Fanai, Darlawng khua chu 1-na a ni a. Lalrohlua, Ngur khua chu pahnihna a ni a, Vanlalhriata Pachuau, Khawruhlian khua chu 3-na a ni. Pakhatna hian Rs. 50,000; 2-na hian Rs. 30,000; 3-na hian Rs. 20,000 an dawng a ni.

MZP HRIATTIRNA :
MZP Hqrs. Champhai inzirlaite Scholarshop Form Fill Up sak mek chu Website an update avangin Adhaar Card neilo tan Bank Passbook thlalak upload a ngai tawh dawn tih thu dawn a ni.

GAS DOUBLE THEIH :
Mizofed Champhai a Gas Connection nei, kum 2015 chin, la Double lo tan ni 15.10.2016 ral hmain Double theih a ni a. Voter ID Xerox 1, Adhaar/Ration Card 1, Gas Card, Subcription Voucher (SV) leh Rs. 2000 ken a ngai ang.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 60.17/litre)
Diesel    : Free Sale (Rs. 50.20/litre) 

Comments