Skip to main content

Kumin chhungin Vaibelchhe 9 chuang man ruihhlo man tawh

Kumin chhungin Vaibelchhe 9 chuang man ruihhlo man tawh : Kumin kum tir atanga nimin thleng khan Champhai Police te chuan ruihhlo chi hrang hrang Cheng Vaibelchhe 9 chuang man an man tawh. Ministry of Social Justice hnuaia National Institute of Social Defence (NISD) bul tuma ni thum chhung awh tur, Champhai District chhunga Police-te Damdawi hman khawloh laka inven dan tur zirtirna hun, nimina SDPO Conference Hall, Champhai Vengsanga neih tanah he thu hi Course Coordinator, Champhai Addl. SP Francis Lalnuntluanga Ralte chuan a sawi a. An ruihhlo man te hi Heroin Kg 1.926, Rs 69,56,800 man; Ganja Kg. 108.43, Rs 5,48,000; Methaphetamine Kg 29.228, Rs 3,90,00,000; Pseudoephedrine Kg 335, Rs 5,14,56,000 man te a ni, a ti.  Champhai Addl SP hian training-ah hian drugs leh ruihhlo dang, thalaite suata ram leh hnam run mektu hi engtia lo beih tur nge? Kohhran, chhungkua leh khawtlanga bua khuar tlat hi engtin nge nuai bo anih theih ang tih te zir a nih dawn tih a sawi a. Ruihhlo leh a kaihhn…

ni 27.9.2016 (thawhlehni)

DC OFFICE ATANGIN CERTIFICATE LACHHUAK TAM : Champhai Deputy Commissioner Office chuan Income Certificate, Residential Certificate leh Tribal Certificate thahnem tak nitin an pe chhuak mek. Champhai DC Office-ah hian Income Certificate, Residential Certificate leh Tribal Certificate dil nitin mi tamtak an fuankhawm thin a, nimin thleng khan Certificate dilna thehlut thahnem tak an la awm reng a. Nitin Judicial Branch atangin Certificate te hi chawhrualin mi 160 vel hnenah pechhuak ziah thin ang an ni a. Heng Certificate diltu tam ber te chu zirlai niin Scholarship dilna form-a thil tel atan heng certificate te hi dil an ni. Central Sorkarin Scholarship dil theih hun chhung September thla chhung pawtseiin zirlai scholarship dilna zirlai ten an mahni theuha an buaipui a ngaih tak avang te leh Scholarship hi zirlaite'n anmahni inbuaipui angaih tak avangin Income Certificate, Residential Certificate leh Tribal Certificate diltu te hi kumtin scholarship dil hunah an tam em em thin a, kumin hian kum dang aiin an pung niin a lang. Hetih lai hian MZP Champhai Hqrs chuan zirlai naupang scholarship dil tur te man tlawm zawkin an fill up sak mek a, Primary school zirlai naupangte Rs 50 leh Middle School naupangte Rs 100 zelin MZP Pisa pui CHANEM Building-ah an fillup sak a ni. RUIHHLO MAN : Inrinni zan khan Champhai Excise & Narcotics Dept leh Kahrawt Branch YMA tangkawp te chuan Heroin an man. Champhai Excise & Narcotics Dept leh Kahrawt Branch YMA tangkawp te chuan Inrinni zan tir dar 6:50 khan Tuipui Bazarah Heroin No. 4, Gram 3 leh a neitu Moses Vanlalruatkima kum 22, T Vulluaia, Khawzawl Venthar a cheng nia insawi chu an man a. Moses Vanlalruatkima hi ND&PS Act hnuaiah thubuai siam sak niin District Jail-ah dah luh a ni. BUH VUI TAN : Champhai zawla buh chinte chu tunlai hian a vui tan leh mek a, puan tawh thin angin kumin hian nikum lam aiin ruahtui a tlak that avangin buh hi hlawk zawka thar chhuah beisei a ni a. Champhai zawlah bik chuan Tui awm loh avanga lo siam theih loh a awm lo nia hriat a ni. Buh te hi October thla chawhnu lamah chuan seng tan theih beisei a ni a. Buhseng vang lai tak tak hi chuan Champhai zawlah hian mi sang telin buhseng hna an thawk thin a ni. IN SAK THAT SAK : Pathianni zan ruahsur vanga lei tawlhin In a tih chhiat chu nimin khan Mualkawi khawtlang chuan a siam thatna an thawk. Hnatlang hian mi 200 vel thawk chhuakin In chhia bakah hian Mualkawi khawchhunga hmun hrang hranga lei tawlh te thenfai hna an thawk nghal bawk a ni. VAWIIN DINHMUN : MIZOFED POL (Tuialhthei) Ph :8414965293 (Mon - Sat :- 6:00 AM - 7:00 PM) (Sunday :- 12:00 Noon - 3:00 PM) Petrol : Tanky Full (Rs. 60.17/litre) Diesel : Tanky Full (Rs. 50.20/litre) *Load a rawn thlen chuan Free Sale ve ve tur a ni. MIZOFED LPG (Gas) (Vawiina an semna hmun) NIL

Comments