Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

ni 28.9.2016 (nilaini)


TOMATO LEI SAK TURIN MIPUITE NGEN :
Champhai District a awm Tuipui khuaa Tomato chingtute chuan an Tomato thar chhuahte leisak turin Zoram mipuite an ngen.

Tuipui khuaah hian chhungkaw 103 awmin heng zinga chhungkaw 16 chuan ram Tin 20 chuang hmunah Tomato hi chingin Inrinni thleng khan Tomato hi Quintal 600 chuang lai an thar chhuak tawh a. Tomato chin hi eizawnna bulpuiah an hman avangin tunlaia a hralh chhuahna lama harsatna an tawh avangin an buai phah hle a, an harsatna te hriatthiampui a, an Tomato thar chhuahte leisak turin Zoram mipuite khawngaihna an ngen a ni

RTI WEEK HAWN DAN TUR REL :
Nimin chawhma dar 11:30 khan Champhai DC Office Conference Hall-ah RTI Week hawnna Programme hman dan tur ngaihtuahin District Bawrhsap hovin District Office hrang hranga SPIO leh SAPIO te`n meeting an nei.
Meeting hi District Bawrhsap Pu Vanlalngaihsaka, IAS in a kaihruai a. Kumin RTI Week hi October ni 5-7 chhunga hman tur a nih avangin a hawnna chu October ni 5, tlailam dar 2 ah, Government Champhai College Auditorium-ah neih turin meeting chuan a rel a. Champhai District Bawrhsap hovin Head of Office te leh SPIO leh SAPIO zawng zawngte bakah Champhai khawpui chhunga VC te leh YMA, MUP leh MHIP Sub-Headquarters hruaitute leh sawm bikte nen hun hman a ni ang a, mithiamten RTI Act leh a kaihhnawihah zirtirna pein kalkhawmte tan sawihona hun buatsaih a ni bawk ang.

ZONE CHAMPIONSHIP TOURNAMENT HAWNG :
Nimin chawhma dar 10 khan Parliamentary Secretary, Pu TT Zothansanga, Champhai South bialtu MLA chuan Rabung Playground No. 1 ah Rabung Football Zone Centre thar hawnna leh Zone Championship Tournament hawnna a hmanpui a. Tlailamah Pamchung tlawhin khaw mipuite nen inkawmhona hun tha tak an hmang bawk.
Khuallian, Parliamentary Secretary Pu TT Zothansanga chuan Rabung Footbawll Zone  thar hawnna leh Zone Championship Tournament hawnna ah thu sawiin thalai naupang te te a boral kan tam chhan chu ruitheihthil vang a nih thu sawiin infiammi kalkhawmte chu ruitheihthil leh a kaihhnawiha fihlim turin a chah a. Football chu theihtawpa beitute tan eizawnna tling a nih thu a sawi bawk. Parliamentary Secretary chuan Rabung khuain BPL survey kalpui mekah huaisen leh dik taka tehna kalpui a BPL awmlohna khuaa an inchhal thei chu chhuanawm a tih thu leh VAGY Model Village nih a inhmeh hle a ni a ti bawk. Pu TT Zothansanga chuan infiammite fuihin Rabung Zone chu Champhaiah I-Day Tournament-ah an champion chuan siala lawm sak a tum thu a sawi a. Khuallian chuan Rabung field leh Murlen field chei that sak thuai a tum thu leh Zone thar lawmpui nan leh tournament puihna turin Rs. 20,000 a pe bawk.
Pu C Hualrikhuma CDFA President pawhin thusawiin Rabung Zone Football Association a piang ta chu lawmawm atih thu sawiin, Football-ah hmasawnna atana hmang turin a chah a. Zone FA chu CDFA, MFA leh AIFF thlenga inkhaidiat fel tak anih avangin Zone hruaitute chu dan anga Zone Football kaihruai turin a chah bawk. Zone hrang hrangte an chak tawk loh avangin thiah ngai hiala awm thin chu thil pawi tak a ni a ti a. Rabung Zone FA chu Zone nung tak ni turin a chah bawk.
Rabung Football Zone hi Champhai District Football Association (CDFA) hnuaia Zone 11-na niin he Zone hian khaw panga a huam a. Tuna Rabung Football Zone tournament-ah hian mipa team 12 leh hmeichhia team 7 an tel a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 60.17/litre)
Diesel    : Free Sale (Rs. 50.20/litre) 

Comments