Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

ni 18.10.2016 (thawhlehni)


CHAMPHAI DISTRICT AH HEARING NEI TAN :
Champhai District chhunga Assembly Constituency panga huam Special Summary Revision kalpui mek a Electoral Roll Hearing neih chu lo duan lawk tawh angin nimin khan tan a ni a, October ni 28 thleng a awh ang. Assembly Constituency-tin (Champhai North, Champhai South, Lengteng, Tuichang leh E. Tuipii...) a AERO-te leh Electoral Roll hearing neih meka mawhphurh tura ruatte chuan Voter thunluh thar, Electoral Roll a awmna hmun sawn, hming leh Address siamthat ngai leh Electoral Roll atanga paih tura dilna endikin Polling Station tinah nimin khan endik hna an thawk tan a ni.
Electoral Roll Hearing neih hun tura ruat October 17-28 chhung hian Champhai District chhung Assembly Constituency 5 huama dilna lut zawng zawngte chu enfiah hman turin chak taka hmalak chhoh a ni. Champhai District chhung Assembly Constituency panga ah hian Polling Station 134 awm mekah Vote nei thei mi 80,862 an awm a; 40,226 chu mipa niin 40,637 chu hmeichhia niin, mipa aia hmeichhe voter tam zawkna hi 411 a ni a.
Champhai North leh Champhai South bial-ah te mipa aiin hmeichhe voter an tam zawk a ni. 21 Lengteng Assembly Constituency-ah Voter 16,467 awmin, mipa 8,356 leh hmeichhia 8,111 an awm a, 22 Tuichang Assembly Constituency -ah voter 15,611 awmin, mipa 7,838 leh hmeichhia 7,773 an awm a. 23 Champhai North Assembly Constituency -a voter 17,727 awm zingah mipa 8,720 an awm laiin hmeichhia 9,007 an awm thung a. Mipa aiin hmeichhe voter 287 in an tam zawk a. 24 Champhai South Assembly Constituency-a voter 16,609 awm zingah mipa 8,038 an awm laiin hmeichhia 8,571 an awm thung a, mipa aia hmeichhe voter tam zawkna hi 533 a ni. 25 East Tuipui Assembly Constituency-ah voter 14,449 awmin, mipa voter 7,274 leh hmeichhe voter 7,175 an ni.

AR HOTU LOKAL :
Niminpiah khan Assam Rifles Camp. Darthlalang tlangah Expendition Team te chuan Mizo mipui te leh Assam Rifles te thawhhona tha leh inpumkhatna a awm zel theih nan Expendition for Peace an nei.
Expendition Team te hi Serchhip atangin Brigadier MS Molkha, SM, DIG, Hq23 Sector Assam Rifles leh Col. Ku Karumbiah, SM, Commandant 10th Assam Rifles leh khawtlang hruaituten an rawn vai liam a. Champhai ah hian DC Vanlalngaihsaka leh Addl. SP Lura Hauzel te leh mi pawimawh te leh zirlaiten an lo dawngsawng a. Zam lamah Cultural Programme hman niin Ex-Servicemen te leh khawtlang hruaitute bakah Sawrkar mipuimawh ten hun an hmanpui bawk.

OIL ENDIK :
Nimin khan Mizofed Pump tuialhthei a thleng a, Lefal Metrology ten a that leh that loh endikin, phal chin chhungah a awm a, pump a dah tir a ni. Kar kalta Thawhtanni pawh kahn tuialhthei lo thleng hian enfiah hnuahdan phal chin a nih avangin an dahtir tawhbawk niin thu dawn a ni.

LO HMUAK DAWN :
Tata Motors Zothan Autoworks LPS Pro-Fight, 2016 zawh fel taka Lighweith a PC Lalmuankima, Saron Veng Round 2-na minute 1:46 a Knockout hmanga hnehna chana Champion leh title fight zana Fighter of the Night ni bawk Johnkenty HC Vanhlimpuia, Tuipui khua chu vawiin hian Aizawl atangin a rawn haw chho dawn a, Tuipui khua chuan khawtlang huapin an lo hmuak dawn niin thu dawn a ni. Vengthar Nula Lalhriatpuii Light Weight a pahnihna pawh vawiin hian Champhai rawn panin Vengthar mipuiten ropui taka lo hmuah an tum bawk.

NUNNA THAR ZANINAH:
Mizo Kristian Flim thar, Nunna Thar chu zanin atangin Govt. Champhai College Multipurpose Hall ah tichhuah a ni dawn ta. Ticket hi zawrh chhuah mek niin a hmunah pawh lei tur a awm bawk ang. Ticket man hi Rs. 100, Rs. 200 leh Rs. 300 a ni e.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Beisei (Rs. 62.26/litre)
Diesel    : Service Tanky (Rs. 52.88/litre) 

Comments