Skip to main content

Kumin chhungin Vaibelchhe 9 chuang man ruihhlo man tawh

Kumin chhungin Vaibelchhe 9 chuang man ruihhlo man tawh : Kumin kum tir atanga nimin thleng khan Champhai Police te chuan ruihhlo chi hrang hrang Cheng Vaibelchhe 9 chuang man an man tawh. Ministry of Social Justice hnuaia National Institute of Social Defence (NISD) bul tuma ni thum chhung awh tur, Champhai District chhunga Police-te Damdawi hman khawloh laka inven dan tur zirtirna hun, nimina SDPO Conference Hall, Champhai Vengsanga neih tanah he thu hi Course Coordinator, Champhai Addl. SP Francis Lalnuntluanga Ralte chuan a sawi a. An ruihhlo man te hi Heroin Kg 1.926, Rs 69,56,800 man; Ganja Kg. 108.43, Rs 5,48,000; Methaphetamine Kg 29.228, Rs 3,90,00,000; Pseudoephedrine Kg 335, Rs 5,14,56,000 man te a ni, a ti.  Champhai Addl SP hian training-ah hian drugs leh ruihhlo dang, thalaite suata ram leh hnam run mektu hi engtia lo beih tur nge? Kohhran, chhungkua leh khawtlanga bua khuar tlat hi engtin nge nuai bo anih theih ang tih te zir a nih dawn tih a sawi a. Ruihhlo leh a kaihhn…

ni 31.10.2016 (thawhtanni)


DISTRICT & SESSION JUDGE HAW DAWN :
Champhaia Cham mek, District & Session Judge Lucy Lalrinthari chuan Inrinni khan Champhai District Court hmun a enfiah bakah District Session Court hmun tur Zote khawtlang in ram an pek Bigha 7 chuang a zau chu a tlawh nghal.

District Session Court luah lailawk tura ruahman Zote khaw chunga IIDC hmun chu uluk taka a fankual bakah he IIDC a Building saksa, Session Court Building, District Judicial Mafistrate Court Building leh Malkhana Building etc. tura ruahmante chu a enfiah nghal bawk a. Kumin ngei a District Session Court hi Champhaiah dah a nih theih nan chak taka hmalak tum niin, November thla tir atanga helai hmun hi cheibawl zui mai tha tih a nih bakah tha thawh ngaiah YMA ten hantlan an inhuam reng thu dawn a ni bawk.
District & Session Judge hi Addl. District & Session Judge Vanlalenmawia bakah Champhai Chief Judicial Magistrate (CJM) charge la mektu F. Roluahpuia leh a thawhpui ten Champhai Court lam atangin an tawiawm a. Champhai Police hotu Excise Superintendent bakah MJA Champhai District leh YMA Sub-Hqrs. Champhai hruaitute ten an tawiawm bawk. District & Session Judge hi tukin zing hian a hote nen Aizawl panin an liam thla leh tawh dawn a ni.

BIATE AH VAGY VILLAGE HMALAKNA :
Zirtawpni khan BNRGSK Hall Biate ah VAGY Village a hmalak dan tur sawihona hun leh Free Mobile Health Clinic hawnna hun neih a ni.
He hun hi Vanlalngaihsaka IAS Champhai Bawrhsap chuan kaihruaiin R. Vanlalvena MLA, Aizawl South Bialtu leh Model Village a puangtu chuan thu sawiin, Khawtlang hmasawnna leh Model Village a chengte hian eng nge kan tih tur tih kan hriatchian a ngai a. Biate khua hi kan pu leh pute atanga khaw lar kan nih avangin kawng engkimah hma kan sawn a ngai a ni, a ti. He hunah hian Charge Officer VAGY Lalrinzuala Khawzawl BDO hnen atangin Report ngaihthlak a ni a. RV Hluna Biakte VCP chuan lawmthu sawiin he hun hi a khar a ni. 

RUIHHLO MAN :
Inrinni chhun dar 1:30 vel khan Champhai Police DSB leh Zokhawthar Police te chuan Champhai, Aizawl leh hmun danga Heroin No 4 thawn darh thin nia an rinhlelh Lalpekawii (51) d/o Pakulha, Khawmawi Myanmar chu Zokhawthar thlanmual bulah manin, a kut atang hian Heroin hawng 2, sahbawm bawma dah chu an man. Thu dawn danin Lalpekawii hi thubuai siam sak niin Jail a dahluh a ni a, ruihhlo an man hi Rs. 70,000 man hu vel niin sawi a ni.

QUARTER FINAL :
Vanbawia Memorial Football Tournament khelh mek chu nihnih chhung chawlh lailawk a nih hnuah vawiin atang hian Quarter Final khelh chhunzawm leh a ni ang. Dar 11 ah Zotlang FC leh Electric FC; Dar 1 ah Ruantlang FC leh Vengthlang FC te an khel bawk ang.
Naktuk chawhma dar 11 ah Police FC leh FC Tlangsam an inkhel ang a, chawhnu dar 1 ah Kahrawt FC leh Kanan FC te an inkhel ang.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Service Tanky (Rs. 62.26/litre)
Diesel    : Free Sale (Rs. 52.88/litre) 

FIRE  OFFICE : 
(03831)234026

Comments