Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

ni 25.11.2016 (zirtawpni)


DISTRICT LEVEL KHELO INDIA TAN :
Nimin khan Champhai Town hall ah District Level Khelo India chu tan a ni.
Kum 17 hnuailam intihsiakna tur hawnna inkhawm hi C. Lallianpuia, Champhai District Sports Committee Chairman chuan a kaihruai a. Khuallian Vanlalngaihsaka, Champhai DC chuan thusawiin, District Khelo India chu Block inelna, PYKKA thlakna tur akumin atanga kalpui tan ani a, kuminah kalphung thlak danglam hret avanga inbuatsaihna hun a tam loh avangin, a nihna ang tur takin kalpui theih a ni dawn lova; mahse, hlawhtling taka
neih erawh a beiseiawm hle ani, a ti. DC chuan District Khelo India in a tum ber chu thingtlang atanga indiamna lama talent neite haichhuah a ni a, hemi tur hian infiammite chu theihtawp chhuah a, an talent te pho chhuak ngei turin a fuih a, District Khelo India hi a hawng a ni.
Tun tum District Khelo India, Champhai District ah hian Champhai leh Khawbung RD Block te an tel a, intihsiakna hrang hrang : Football, Athletics, Hockey, Badminton, Boxing, Table Tennis, Judo, Taekwwondo, Weightlifting leh Wrestling ah te mipa leh hmeichhiaten intihsiakna an nei dawn a ni.

TUI HNIANGHNAR NEIH DAN TUR ZIRHO :
Nimin khan Chief Engineer PHED Zone II buatsaihin SE, PHED Champhai WATSAN Circle Office ah Workshop on Sustainable development goals for Champhai WATSAN Circle PHED neih a ni.
He workshop hi Er. Lalremsiama, Cheif Engineer, PHE Department Zone II ho a neih niin, PHE Department hnuaia JE/Sectional Officer leh a chunglam te telin Champhaiin tui hnianghnar zawk an neih theihna tura hmalkana kal mek te thlir ho a ni a. Champhai WATSAN Circle huamchhunga khaw 104 ten kum 2030 a tuihniang hnar zawk a an neih theih dan tur chungchang thlir ho niin, heng khaw 104 a In tin kawt kaiah tui pek an nih theih dan tur leh nitin mipakhatin tui litre 50 zel a hman theihna tura khawtin tui an lak theih dan tur ruahmanna leh thil pawimawh leh tul  te tarlan a nih bakah khaw hrang hrangte haratna sutkian dan tur sawiho a ni a. Khaw hrang hrangte tana tui lakna tur ruahmanna kal mek bakah, tui lakna tur nei tha lo tan tui dahkhawlna tuizel lian hun sak leh ni tha chakna hmanga tui pump dan turte ruahmanna te tarlan ani bawk.

MIDDLE SCHOOL SPORTS :
Tunlai hian Middle School Zone hrang hrangte chuan Sports an nei mek a. Zirlai naupangten intihsiakna chi hrang hrang hmangin inelna an nei a, kar hmasa lam khan Zone  thenkhat chuan nei tawhin kar leh lamah Zone thenkhat chuan an nei bawk ang.
Kar hmasa lam khan Primary School te pawhin Sports hi an lo nei tawh bawk a ni. Khawzawl South Zone, Middle School Zonal Sport chu Chawngtlai ah nghah a ni a, School hrang hrang 8 te an tel a. neihdawn Govt. MS chu pakhatna an ni a, Khawzawl MS II chu pahnihna niin, Tualte Govt. MS  chu 3-na an ni a. Sports ah hian Atletics, Football leh Volleyball hmanga inelna neih a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Service Tanky (Rs. 61.72/litre)
Diesel    : NIL (Rs. 52.22/litre) 
* Diesel a lo thlen chuan Service Tanky a ni ang.

FIRE  OFFICE : 
(03831)234026

Comments