Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

ni 28.11.2016 (thawhtanni)


BETHEL MISSION SCHOOL CHE THA :
Zoar Vanlalchhanhimi, bethel Mission School a pawl 9 zirlai chuan kar kalta Ningani leh Zirtawpni a Lawngtlaia State Level Science Exhibition neih zawh takah lawmman 2-na a dawng a. National Level ah state ai a awh leh dawn a. He Exhibition hi SCERT leh STAM te tangkawpa buatsaih a ni.


INTER HIGH SCHOOL QUIZ :
Champhai District Inter High School Quiz 2016 chu Zirtawpni zan khan Quarter Final zawhfel a ni.
Zirtawpni zan khna match hnih a awm a, BC Lalthlamuana English Academy II te chuan 150-140 in Champion lai Bethel Mission School an hneh a, PES Khawzawl Vengthar II chuan 110-70 in Venglai Secondary School II te an hneh a, Team hnihte hian Semi final an lut a ni. Zan hmasa lamah BC English Academy I leh Venglai Secondary School I te chuan Semi Final an lo lut tawh bawk a.  Semi Final hi zaninah neih tur a i a, zanin hian Team li te hi an inlan kim dawn a ni. Semi Final hian zan hnih a awh ang a, a zan khatnaah English leh SS zawhna bakah GK leh a dang an chhang ang a, zan hnihnaah Science leh Mathematics an chhang dawn a ni.

VC TEN SIAM THA :
Venglai VC te chuan an vengchhun gkawngpui siam hna chu tunlai hian an thawk mek.
Venglai VC te hmalakna in vengchhung kawngchhe lai chu Black Topping bakah White Topping hmangin hma an la mek a. Heng bakah hian hmun lun lai hmun thumah tank lian Emergency a hman theih turin an lo siam tawh bawk. Venglai VC te chuan vengchhung mipui te thawhhonaah lawmawm an tih thu an sawi bawk a ni.

BUKNA AN ENFIAH :
Inrinni zing khan District Metrology Dept. chuan Champhai Bazarpui a bukna an enfik a. Sazuar leh thlai zuarte bukna endiksak an ni a, an bukna hi a dik tlangpui tih hmuh niin, a thalo leh diklo an siam that tir nghal a ni. Gas lo thleng pawh Metrology te hian an enfik nghal a, a bur hi a buk a tling thawkhata an hriat thu an sawi. Mipuite pawhin a semnaah buk thlapa lak tum turin an ngen a ni.

KHAWBUNG YMA TEN IN SAK SAK :
Khawbung Branch YMA te chuan YMA Section hrang hrangte inthawh chhawkin an huamchunga mi harsa chenna in tur an sak sak.
In an sak sak hi mahni khawsa parawl , ke lam that loh vanga hna rum thawk thei lo a ni a, mahnia in leh lo din thei din hmunah a din loh avang leh a chenna in chu a sawp rawp deuh tawh avangin Khawbung Branch YMA te hian hnatlangin an sak sak a, In hi a dung 18ft leh a vang 16ft a zaua sak a ni a. Inrinni khan a chhuat thingphel phahin an zofel a ni. In sakna tur hian mi tlawmngai ten tangkafai leh in sakna chak te an thawh khawm bakah Khawbung BDO leh VC ten tangkafaiin an tanpui a, Bialtu MLA T. Sangkunga`n in chung tur rangva bundle 4 a tum sak bawk.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Sem rual (Rs. 61.72/litre)
Diesel    : Service Tanky (Rs. 52.22/litre) 
*Vawiin atangin pawisa note hlui Rs. 500 leh Rs. 1000 te an dawng thei tawh dawn lo a ni.

FIRE  OFFICE : 
(03831)234026

Comments