Skip to main content

Posts

Showing posts from December, 2016

RUIHHLO TAM THAM TAK MAN

RUIHHLO TAM THAM TAK MAN : Inrinni chawhma khan Champhaia Excise & Narcotics Enforcement Staff duty-ten Champhai leh Zokhawthar inkara Maxicab  pakhat atangin tunlaia ruihhlo lar leh hlauhawm tak, Methamphetamine tam tham tak chu Zokhawthar panna kawng, Champhai District Park pengah he ruihhlo hi zin bag siam danglam chhuat hnuaiah thuhruk a niin, Excise & Narcotics Staff-ten uluk taka an enfiah hnuah he ruihhlo hi an man chhuak a. Ruihhlo neitua puh Tinsianmunga kum 50, Tinzama fapa, Tahan Pyi Daw Ta, Myanmar a cheng ni a inchhal chu man a niin, midang ta a ken sak angin a insawi thung a.  He ruihhlo hi Mum 50,500 a tam niin, tunlai tualchhung hralhna a chhutin Cheng 75,75,000 man a ni. Tinsianmunga hi ND & PS Act tlawhchhanin thubuai siam sak a ni a. Champhai District Hospital-ah a hriselna enfiah a niin, Inrinni chawhnu khan District Court-ah hruai a ni a. Champhai District Jail-ah dahluh nghal a ni. Inrinni vek khan Excise & Narcotics Enforcement Staff duty-te hian…
ni 16.12.2016 (zirtawpni)
INBUMNA AWM THEI CHUNGCHANG ZIRHO :
Reserve Bank of India hmalaknain nimin khan I&PR Auditorium-ah tlawmngai pawl, khawtlang hruaitute leh thuthar thehdarhtute tan bank tangkaina leh inbumna chungchang zirho a ni.
He huna khuallian Pu CC Lalchhuangkima, Champhai DC charge la mektu chuan thu sawiin, he training hi pawisa lama inbumna thleng thin, Mizoramah pawh chiahpuam avanga kan buaina ang kha a thlen tawh lohna tura Chief Secretary hmalakna buatsaih a ni, a ti a, a hlawk tur ringawt kan zawn thin avangin kan chesual thin a. Heng inbumna pumpelh tur hi chuan bank-ah kan sum hi dah ila a him ber a ni, tiin, kalkhawmte chu an thil zir chhuahte mahnia vawng mai lovin midang zirtir a, chhungkua leh khawtlangah awareness campaign hi an remchan dan anga kalpui ve turin a chah a ni.
ni 15.12.2016 (ningani)
THISEN PE :
Nimin khan Govt GM Higher Secondary School NSS Unit te chuan a mamawh a piangte hman turin thisen an pe.
Nimin khan Govt Gm Higher Secondary School NSS Unit-Champhai te chuan te chuan Champhai District Hospital Blood Bank a dah turin thisen an pe, Thisen hi Zirlai naupang 25 te pein Mipa 28 leh hmeichhia 8 ten an pe a, Unit 53 an pe thei a ni. Tun hnaiah Champhai District Hospital Blood Bank-a vawikhata thisen pe hnem ber an ni a, nikum khan Unit 65 an lo pe tawh bawk a ni. Govt GM Higher Secondary School NSS Unit te hian tunkar zirtawpni hian N Khawbungah Special an nei dawn a, Tuikhur siam that hna an thawk ang a, zankhat riakin Inrinniah an lo haw leh ang.

ni 14.12.2016 (nilaini)
PES ZIRLAI TEN AN SUM THAWH KHAWMIN TANPUINA SEM :
UD&PA Dept. leh Presbyterian English School, Vengthlang te tangkawpa buatsaihin nimin khan faina kawngzawh neih a ni.
He hun hi CHANEM Building tual atanga tan a ni a. Upa C. Keikhuma, PES Vengthlang Board Member chuan kawngzawh hi tawngtaina nen a hawng a. CHANEM tual atang hian bazar lamah kawng hizawhin Awmpui pheiah hun an hmang a, DK Traffic Point ah a kharna an siam a ni. PES hi UD&PA Dept. in Swachh Bharat a kalpuia Model School an kal tawp ni a ni a, faina lama mipu izirtirna atan kawngzawh hi an buatsaih a. An kalnaah hian faina lama inzirtirna thu an puan chhuah bakah naupangte chuan faina lam hawi thuziak an keng bawk a. Awmpuiphei leh DK Traffic Point ah hian lam hmuhnawm tak tak entiriin mipui te chu faina lama hmasawn zel turin an sawm nghal bawk a ni.
ni 13.12.2016 (thawhlehni)
YMA TEN TUIPUI LUI HUMHALH THA :
Tuipui tlawhchhan khaw hrang hrang Branch YMA Joint Comt kum tawp thutkhawm chu Inrinni khan Tuipui Pump House ah neih a ni.
He hunah hian E. Lungdar leh Leng Branch YMA te chu khawtlangah hmalakna kalpui laklawh an neih avangin an tel thei lova, a bak YMA Branch te chu an tel kim thei a ni. Branch hrang hrang aiawha kalten nungcha humhalhna kawnga an hmalak dan an report a. A bikin nghafuan hun laia lui kal loh tih leh sangha him taka a fuan theih nan venhim tih chu Branch tinten hlawhtling takin an kalpui a.
ni 9.12.2016 (zirtawpni)
YMA PALAI KUM 25-NA PUALIN ZALENNA DAR VUAK A NI :
Ni 8.12.2016 (Zirtawpni) zan dar 7 khan Champhai Vengthlang Branch YMA chanchinbu YMA Palai kum 25-na (Silver Jubilee) ropui takin Awmpui pheiah lawm a ni.
YMA Palai hi ni 13.10.1991 khan chhuah tanin kum 2016 hi a kum 25-na niin ropui takin lawm a ni. Tv. C. Lalthanpuia, Chairman Org. Comt. chuan lawmna inkhawm hi kaihruaiin Pu C. Zonunpuia, Secy Org. Comt hnen atangin report ngaihthlak a ni a. Article inziahsiak a lawmman late hnenah lawmpuina thuziak hlan a nih bakah YMA Palai lo enkawl tawh mi 68 hnenah chawimawina thuziak pek a ni bawk. Pu R. Rosiamliana Ex-Editor YMA Palai in kum 25-na hriatrengna Souvenir tlangzarhin, souvenir hi mi tlawmngai ten man to zawkin a hmunah hian an lei nghal a ni.
ni 8.12.2016 (ningani)
ZOFEST HMANG CHHUNZAWM ZEL :
Zofest 2016 ni 2-na chu nimin khan neih chhunzawm a niin, AH & Vety Minister Pu C. Ngunlianchunga chuan a hmanpui. Zofest Souvenir a tlangzarh bawk.
Minister chuan ram rorelna-in kan karah ramri kham mahse Zohnahthlakte thinglungah erawh ramri kham theih anih loh thu sawiin, ‘Zofate Jerusalem’ anih angin Mizoram pawn atanga inpui pantute hi khua leh tui a siam mai hi tha a a hriat thu leh, hemi kawngah zirlaite chu ke pen chhuak turin a chah a. Inlungrualna in hnam ropui a siam thei angin inpumkhatna leh in unauna tha in hnam a tungdingin, hmasawnna a thlen thin a ni, a ti. Inpumkhatna tak tak nei turin Zo-hnahthlakte pawmtlan theih tur Hming neih atul thu leh inbiak pawhna Tawng mumal tak neih a pawimawh thu Minister Pu C. Ngunlianchunga chuan sawi telin, Hnam bil
ni 7.12.2016 (nilaini)
ZOKHAWTHARAH ZOFEST TAN A NI TA :
Zohnathlak hnam peng hrang hrangte in unau na leh inpumkhatna tha zawk neihna tura MZP in a buatsaih Zofest vawi 6-na chu nimin atang khan Zokhawthar ah tan a  ni a. Environment and Climate Change Minister Lalrinmawia Ralte chuan a hmanpui.
Nimin chawhma Zofest hun hman, MZP General Hqrs. President lalsangzuala Ngente kaihhruaiah hian Minister Lalrinmawia Ralte chuan Ram inrelbawlnain a nghawng, Zohnathlak tlang hrang hranga in beng bel tawhte lungrual taka huang khata lawiza hun tur chu ramtina Zofate nghahfak a nih thu a sawi a. Zohnathlak, hnam hrang hrang, thlahtu chi khat kan nihna tichhe theitu leh min telkhawmtu pawimawh ber inunauna leh inpumkhatna tichhe theitu chu inlungrual lohna a nih thusawiin, Zohnahthlakte Inkhawmpui, Zofest chu lungrualna tlanga hlangtu leh a chhelai siamthatu ni thei se a duh tih a sawi.
ni 6.12.2016 (thawhlehni)
ZOFEST TAN DAWN :
MZP buatsaih Zofest vawi 6-na chu vawiin atanga tunkar Ningani thleng khian Zokhawtharah hman a ni dawn.
Nimin khan thlen kim ni niin December ni 9 ah a tiak dawn a ni. MZP chuan Zofest hi vawi 6 an buatsaihna tur niin kum 2002 khan Churachandpur, Manipur ah a vawikhatna atan an lo nei tawh a, Aizawl ah vawi thum nei tawhin kum 2012 khan Darchawi, Tripura State ah neih a lo ni tawh a, kum 2014 khan Halflong Assam ah neih a lo ni tawh bawk. Zofest in a tum ber leh thupui ber chu Zofa chi peng hran ghrangte in unauna leh inpumkhatna tha zawk neih a ni a, kum 2016 Zofest ah hian Lalthanhawla, Chief Minister chuan naktipah khuallian niin a hmanpui dawn a, vawiinah Lalrinmawia Ralte, Minister of State chuan a hmanpui ang a, naktukah Ngunlianchunga, Minister of State in khuallian niin a hmanpui bawk ang.
ni 5.12.2016 (thawhtanni)
ZANIN ATANGIN PRAISE DANCE 2016 :
Champhai Cable Network (CCN) buatsaih Taj Cement Praise Dance 2016 atana inbuatsaihna chu ngawrh taka kalpui mek a ni.
Praise Dance ah hian Junior Category ah team 12 te chuan tel turin hming an pe lut tawh a. Senior Category ah team 12 bawkin he intihsiaknaa tel tur hian hming an pe lut tawh bawk. Inelna hi zanin atanga tan tur niin, zanin hian unior Catefory te an inlan dawn a, naktuk zanah Junior Vek hian an chhunzawm leh ang. Senior Intihsiak hun chu High School Exam lai a nih avangin ni 12 leh 13 ah sawn a ni a, ni 14 leh 15 khian Final an nei leh dawn a ni. Final ah hian zaithiam Andrew Laltlankima chuan Guest Judge niin hun a rawn hmanpui ang.
ni 3.12.2016 (inrinni)
DISTRICT HOSPITAL FAI BER NIH LAWM :
Nimin khan Champhai District Hospital chuan SWACH BHARAT ABHYAN MISSION MIZORAM, KAYAKALP 2016 District Hospital felfai ber an nih lawmna hun an hmang. 
He hunah hian Dr. Lalnuntluangi, Medical Superintendent chuan Champhai District Hospital a inbuatsaih dan leh hma an lak dan hrang hrang bakah,Hospital-a thawktute,Sawrkar Dept hrang hrang leh NGO hrang hrangte puihna avanga District Hospital felfai bera thlan an nih thu a tarlang a.
ni 2.12.2016 (zirtawpni)
BC ENGLISH ACADEMY-II THIAM BER :
Champhai District Inter High School Quiz 2016 chu nizan khan Final nein, a hmarbawk a ni ta. BC English Academy II te chuan Final a an bitum Venglai Secondary School I chu Point 250-200 a hnehin an champion.
Final ah hian English, SS leh Mizo atangin zawhna pangngai 3 an chhang a, Science leh mathematics ah zawhna 4 chhangin heng hian Point 10 theuh a pu a ni. mathematics a zawhna pahnih leh Scoence a zawhna pakhat Mark 20 pu chu hun rei zawk neiin an chhang bawk a. Hei bakah hian Rapid Fire Round ah an Subject zawng zawng, General Knowledge leh Mental health zawhna, a vaiin zawhna 15 chu minute 1 chhungin an chhang a, Audio leh Visual Round a awm bawk.
ni 1.12.2016 (ningani)
MJA PRESIDENT IN BORDER AREA PROGRAMME HMANPUI :
Art & Culture, Mizoram leh North East Culture Centre te buatsaih Border Area Programme chu nimin khan zawhfel a ni.
Border Area Programme tawp ni puala inkhawm tawi buatsaihah khuallian Pu C.Lalhnunpuia, Champhai District MJA president chuan thu sawiin, Mizote hi India ram zau zawkah min hre lo an la tam hle a, min hriat theihna kawng remchang hi infiamna, media leh kan hnam ziarang hmangin a ni, a ti a, hemi kawngah hian hmabak kan la ngah a. Theihtawp kan chhuah a tul a ni, tiin a sawi.