Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

ni 9.12.2016 (zirtawpni)


YMA PALAI KUM 25-NA PUALIN ZALENNA DAR VUAK A NI :
Ni 8.12.2016 (Zirtawpni) zan dar 7 khan Champhai Vengthlang Branch YMA chanchinbu YMA Palai kum 25-na (Silver Jubilee) ropui takin Awmpui pheiah lawm a ni.
YMA Palai hi ni 13.10.1991 khan chhuah tanin kum 2016 hi a kum 25-na niin ropui takin lawm a ni. Tv. C. Lalthanpuia, Chairman Org. Comt. chuan lawmna inkhawm hi kaihruaiin Pu C. Zonunpuia, Secy Org. Comt hnen atangin report ngaihthlak a ni a. Article inziahsiak a lawmman late hnenah lawmpuina thuziak hlan a nih bakah YMA Palai lo enkawl tawh mi 68 hnenah chawimawina thuziak pek a ni bawk. Pu R. Rosiamliana Ex-Editor YMA Palai in kum 25-na hriatrengna Souvenir tlangzarhin, souvenir hi mi tlawmngai ten man to zawkin a hmunah hian an lei nghal a ni.

Vengthlang Branch YMA in a lo rel angin YMA Palai Silver Jubilee pual hian YMA in a ensan mek mi 2 te hnenah Jubilee dar vua in an ensan mek chu hlih a nih thu Branch President Pu C. Laltanpuia`n a puang bawk.
Thawhhnihna ah Section hrang hrangte atangin Beat Group, lam leh thildangte hmangin intihsiakna hun hlimawm tak hman a ni bawk.
He hun hi Pu C. Lalbiakzauva, President, SYMA Champhai in a hmanpui bakah Zaithiam Tetei Ralte leh Sangkimi Khiangte ten kalkhawmte zaiin an awi bawk.
YMA Palai hming hian internet kaltlanga zau zawka rawngbawlna a nih beiseiin kum 2008 khan www.ymapalai.blogspot.com siam a ni a. Mizoram mai pawh nilo hmun hrang hrang atanga ngaihhlut a hlawh tak em avangin veng bil hming put tir loin www.champhai.net a thlak leh niin vawiin thleng hian Champhai tualchhung chanchinthar leh Veng hrang hrang chanchinbu chhiar theihin an la dah zel a ni.

SUB-HQRS. YMA EXECUTIVE MEETING NEI :
Nimin khan YMA Sub-Hqrs. Champhai chuan an Conference Hall ah Executive Meeting an nei.
SEC Meeting hi C. Lalbiakzauva, President in kaihruaiin, PC Lalrawnliana, Secretary chuan Executive Meeting hnuhnung ber atanga nimin thlenga YMA Sub-Hqrs. hmalakna hrang hrang ngaihthlak ani bawk. He meeting ah hian November thla chhunga Central YMA, LE&IT leh Mizoram Building & Others Construction Workers Welfare Board in a buatsaih Cement Mistiri Training neih zawh tak chu thlir let niin, Cement Mistiri Training neih zawh tak chu thlir let niin, Cement Mistiri Training hlawhtling taka neih zawh a ni tei chu lawmawm an tih thu leh mi 84 laiin an training chhuak thei chu hmasawnna tha tak a nih thu tarlan a ni.
Hei bakah hian Kristiante hunpui Krismas leh Kumthar lo thleng tura YMA hmalakna tur hrang hrang pawh sawiho niin kum danga tih thin angin Branch hrang hrangten anmahni huam chhungah Duty Post siama Duty thin nise tih a ni a. Dan leh thupek kengkawhtute a tul anga tanpui thei tura inkau reng nise tih a ni bawk. Heng bakah hian thuneitu lamah Prison Van in Branch hrang hrangte hunpui chhung hian a tam thei ang ber tlawh tur te, Dan leh thupek keng kawhtuten Branch hrang hrang Duty post a tam thei ang ber tlawh thin turte leh New Champhai ah Enforcement Duty dah tura ngenna siam nise tih a ni bawk.
Home hrang hrang ten hlim taka Krismas an hman theih nan tanpuina Genesaret, Grance Reciever Home, Metakhen, Emmanuel After Care, TNT MZ Home ah te sem nise tih a ni bawk. He meeting ah hian YMA Sub-Hqrs. thut hmun Branch hrang hrang OB te Volleyball Tournament siam nise tih niin IIDC Zote ah December ni 17 ah neih nise Entry Fee Rs. 200 nise kum 2016 OB te tan buatsaih nise tih a ni bawk.

BLOCK LEVEL CHILD PROTECTION COMT. MEETING :
Nimin khan BDO Conf. Hall Ruantlangah Block Level Child Protection Committee neih a ni.
He hun hi H. Rodinliani, Prog. Assistant MGNREGA, BDO aiawh chuan a kaihruai a, Champhai Block-a Town Area pawn VCP khaw 15 theuh kalkhawmin thutkhawm hi neih a ni a. Juvenile Justice Act kaihhnawiha dan leh hrai chungchangah Vanlalsawmi, Social Worker chuan zirtirna a pe a; Vanlalhruaii, ICPS leh Lalrinchhani, DCPO te chuan POCSO Act chungchangah zirtirna an pe bawk. hei bakah hian Village Level Child Protection Committee din chungchang rel a ni a, a hmunah hian sawrkar notification chhuah angin Vaikhawtlang, Murlen, Tualcheng, Lungphunlian, Khuangphah, Hnahlan, NE Khawdungsei, Vapar, Ngur, North Khawbung, Mualkawi, Kelkang, Zokhawthar, Dilkawn leh Kelkang ah te Committee hi din nghal a ni.

EXCISE REPORT :
November thla chhung khan Champhai Excise & Narcotics Dept. te chuan MLPC Act hnuaiah thubuai 19 an ziak lut.
Champhai Excise & Narcotics Dept. te hian November thla chhung khan MLPC Act hnuiah thubuai 19 ziak lutin mi 5 an man a. Thla hmasa chhung khan Rakzu Litre 411, Zubilh lai tin 117, Foreign Beer Caned 448 leh Zubilhna hmanrua dawidim gram 1 an man bawk. Heng bakah hian Heroin no 4 Gram 2.050 an bakah ND&PS Act hnuaiah thubuai 5 ziak lutin mi 8 an man bawk.

AN LAWM DAWN :
Vawiin chhun dar 1 hian Govt. Champhai College chuan NAAC Accreditation a B++ an nihna lawmna hun chu an College Multi Purpose Hall ah an lawm dawn a. He hun hi Chief Minister Lalthanhawla chuan khuallian niin a hmanpui ang. He hun hi Champhaia Head of Office zawng zawng leh tlawmngai pawl hrang hrangte an sawm.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Service Tanky (Rs. 61.88/litre)
Diesel    : Sem rual (Rs. 52.08/litre) 

FIRE  OFFICE : 
(03831)234026

Comments