Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

ni 17.1.2017 (thawhlehni)


METH AN MAN :
Inrinni zan khan Champhai Excise & Narcotics Dept. te chuan Methamphetamine an man.
Champhai Excise & Narcotics Enforment Staff, Duty te chuan Inrinni zan dar 10:30 vel khan Ruantlang dai, Zokhawthar Road ah Zokhawthar to Aizawl Sumo Service passenger Lanpu s/o Hlasue, kum 28 Tamu, Myanmar a khawsa nia insawi hnen atangin Methamphetamine 2200 tablet, 222.2 gram an man a. Hei bakah hian Inrinni zan vek khan Champhai khawpui chhungah Heroin man a ni bawk. Heng mite pahnih hi NDPS Act hmangin thubuai siamsak an ni a, CJM Champhai Court ah thawn nghal an ni.


TUI-AH TLAHLUM :
Pu Lalzawmngheta kum 42, Ruantlang Mualveng chu nizan hmasa khan tuiah a tlahlum.
Pu lalzawmngheta hi nizan hmasa a leng chhuak chu inah a kir tawh lo a. A chhungte ngaihtha lovin khawtlang an pun hnuah nimin khan Ruantlang khawtlang chuan Pu Lalzawmngheta zawn hna hi an thawk a, nimin chawhnu dar 2 vel khan Mualvenga tuichhunchhuah ah a ruang hi hmuh a ni. A ruang hi nizan tlaivarpui niin, vawiinah vuiliam a ni ang. Pu Lalzawmngheta hian a fate 3 a kalsan a ni.

YMA IN TUIALHTHEI KHUAHKHIRH TUM :
Nimin khan YMA Sub Hqrs. Champhai Office ah tunlaia Tuialhthei ramsanga phurh chhuah tam lutuk khuahkhirh a nih theih dan tur thlirhoin thutkhawm a ni.
He hun hi F. Lalrinmuana, Vice President SYMA Champhai chuan kaihruaiin Tlangsam, Zote, Ngur leh Ngur Vengsang Branch YMA aiawhte kohkhawm an ni a. Mizoram chanvo tur tuialhthei phurh chhuah a ni thin chu thil pawi tak a nih tih a tarlang a. Mizoram tuialhtheite hmundanga phurh chhuah thin a nih avangin Mizoram tuialhthei indaihlohna a nasat thin avangin  YMA te hian hmalak a ngaihthu tarlan niin YMA Branch hrang hrang hmalak tawh dan leh Tuialhthei an man tawh te hmalakzui dan tur chungchang thlirho a ni bawk.
Tuialhthei, dan lova hmun danga phurh chhuah awm thin te khuahkhirh a nih teih nan nizan leh zaninah Ngur leh Ngur Vengsang Branch YMA te Duty leh phawt se; Zote ah Zote Branch YMA Duty ve leh phawt se. Central YMA in ro an rel dan a zirin ruahmanna siam thar leh nise, tih a ni bawk.

CANDIDATE ATAN PRESIDENT SAWM TUM :
Nimin khan Kahrawt YMA Hall ah Champhai North Block I, MNF Executive Committee neih a ni.
He Committee ah hian nakkum 2018 a MLA inthlan lo awm turah Champhai North Assembly Constituency Candidate atan Party President leh Chief Minister hlui Zoramthanga sawm nise tih chu lungrual takin an pawm. He thutkhawm, Pu PC Zohlira, Block President kaihhruaiah hian kumin chhunga Party dang atanga MNF zawm thar voters 40 chuang an awm thu report a ni a. Mi thar lawmluh zingah hian Hlunkhawsawia, New Saron, Vengthlang; ZNP atanga MNF zawm thar chuan thu a sawi.
MNF Hqrs. atanga circular an hmuh angin February thla chungin Unit inthlan zawh vek nise, Unit inthlan hun atan hian February ni 20 leh ni 24 an ruat nghal bawk.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 66.97/litre)
Diesel    : Free Sale (Rs. 56.67/litre) 

FIRE  OFFICE : 
(03831)234026

Comments