Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

ni 18.1.2016 (nilaini)


CHAMPHAI VENGLAI MUP IN HAWNG :
Nimin khan Venglai MUP in chu hawn a ni. hawnna inkhawm hi MUP, Venglai Unit President C. Thawma`n a kaihruai a, Venglai VCP R. Chalhnuna chuan hawngin Upa R. Lalngaihthanga`n Pathian hnenah a hlan. he hunah hian H. Zobuanga, MUP Venglai Unit Vice President hnen atangin building sak dan report ngaihthlak niin insakna tur hmun petu VC te hnenah lawmthu a sawi a ni.
Venglai Unit te hian nimin vek khan MUP din champha vawi 50-na pualin hun an hmang a, nikum chhunga an member boralte sunna hun chu Venglai Community Hall-ah neiin kum 2017-2019 chhunga hruaitu tur an thlang nghal. President -ah C. Thawma, Vice President H. Zobuanga, Treasurer H. Bualhleithanga te thlangin thlantlin te hian an thawhpui tur Secretary te an ruat leh dawn a ni.

Nimina hawn tak Venglai MUP in hi kum 2015 July thla atanga sak tan a ni a, tuna thla ni 8 khan luah tura sak zawh fel a ni a. A sakna atan hian cheng 3,34,590 hman niin, Champhai South MLAJH Rothuama hnen atanga fund an hmuhte, BDO Champhai atang te leh Venglai VC atanga sum an hmuh bakah Unit sum neihsa te an hmang a, mi tlawmngaite atangin insak tanpuina thahnem tak an dawng bawk a. MUP in an neih teihna tura hmalatute hnenah MUP Venglai Unit chuan lawmthu an sawi a ni.
Nimin kha MUP Golden Jubilee a nih angin Mizoram hmun hrang hrangah a lawmna hun hman a ni a. Champhaiah chuan a hranpaa Programe siam ni lo mah se remchan dan angin Unit hrang hrangten he hun hi an hmang a ni.

R-DAY FOOTBALL INELNA KHEL TAN :
Nimin atang khan Champhai District Football Association buatsaih Republic Day Football Tournament chu khelh tan ani ta.
Republic Day Football Tournament hi 2nd Division Club te tana buatsaih niin, Team 11 in lan theiin Pool 4 ah then an ni a, Pool tin ami te hi inkhel kual vekin Point hmudang pahnih ten Quarterfinal an lut dawn a ni.
Nimin inkhel hmasa berah kahrawt FC leh Vengthar FC inkhelin hun pangngaiah Goal awm lova an inhneh tawk hnuin Tie Break ah kahrawt FC in 5-4 in hnehna an chang a. Pool A ah hian Team hnih chauh an awm avangin Quarterfinal lut chiang sa ve ve an ni. Inkhel vawi hnihnaah Venglai FC leh Kanan  Fc an inkhel a, Kanan hian si 4 faiin hnehna an chang a. Inkhel vawi thumnaah Police FC leh Zote FC inkhelin Police chuan si hnih faiin hnehna an chang a. Inkhel hnuhnung berah FC Vengthlang North leh Dinthar FC te inkhelin Vengthlang North hian si 10 faiin Dinthar FC te hi an hneh a ni.
Vawiin hian inkhelh hi chhunzawm leh a ni ang a, Match 3 awmin dar 11:30 ah FC Vengthlang North leh Zotlang FC an inkhel ang a, Dar 1 ah Police FC leh New Champhai DC an inkhel ang, Inkhel hnuhnung ber dar 2:30 ah FC Tlangsam leh Venglai FC an inkhel bawk ang.

TRAINING NEI MEK :
Champhai District a Science leh Mathematics zirtirtute tan niminpiah atang khan Inservice Teachers` Training chu YMA Sub-Hqrs. Hall, Tlangrawtah neih a ni.
Inservice Teachers` Training hi RMSA buatsaih niin, niminpiah hawnna hun hi K. Lalrintluanga, Addl. Director (Retired), School Education chuan a hmanpui a, eizawnna atana zirtirtu hna tih thupui hangin Associate Professor Lalchhanhimi Khiangte, Govt. Champhai College chuan zirtirna a pe bawk.
Nimin khan Lalzarmawii, Councillor ART Centre, Champhai chuan HIV leh AIDS tih thupui hmanga zirtirna a pek bakah, chawhnu lamah Vinty Vanneihtluangi, Advocate hnen atangin hmeichhe lam kaihhnawih dan tih thupu ihmanga thusawi an ngaithla bawk. Vawiin hian C. Hualrikhuma, Dy DPC RMSA hnen atangin Physical Education ngaithlak a ni ang a, chawhnu lamah Games & Sports an nei nghal dawn a ni. Hei bakah hian tunkar chhungin C. Lalremliana, Social Worker; Lalrengpuii, DPO, RMSA leh Vanlalchuailova, DFO Champhai ten zirtirna an la pe dawn bawk a ni.
Inservice Teachers` Training hi nikum atanga kalpui tan niin, nikuma pawisa tih thih avanga harsatna an tawh hnuah nimin khan chhunzawm leh a ni a. Science leh Mathematics zirtirtutehian training hi Zirtawpni thleng an nei dawn a ni.

HALL HAWNG :
Govt. Champhai College zirtirtute sum thawhkhawm leh sum remchang dang hmanga sak Table Tennis Hall chu nimin chhun khan Lalnunmawia, Principal chuan a hawng. He hall hi Common Room chung far tihrehna atan leh tangkai taka infiamna tura buatsaih a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Tanky Full (Rs. 66.97/litre)
Diesel    : Tanky Full (Rs. 56.67/litre) 

FIRE  OFFICE : 
(03831)234026

Comments