Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

ni 20.1.2017 (zirtawpni)


KUT HNATHAWKTUTE NI HMANG :
NLUP Implementing Board Chairman Pu J.H.Rothuama hovin nimin khan Kahrawt Community Hall, Champhaiah “Kuthnathawktute NI” ursun taka hman a ni a, Champhai khawchhunga Sawrkar Pisa hrang hrang hotute bakah tlawmngai pawl hrang hrang aiawhte bakah kuthnathawktu thahnem tak an tel a ni.

Khuallian Pu JH Rothuama chuan kalkhawmte hmaah thu sawiin kuthnathawktute chawisan tumtu Mizoram sawrkarin “Kuthnathawktute Ni” hi a ngaipawimawh hle a, NLUP nen pawha inkaihhnawih tlat anih avang hian NLUP tanpuina dawngtute tan phei chuan ngaihthah chi a nilo a ti a, NLUP tobul atanga tun dinhmun thleng sawilangin khuallian chuan NLUP ang a ruahmanna tha hi khawvel ramdangah sem a awm thu a la hriat loh thu leh he ruahmanna hi a that em avangin India hmarchhak State dang te pawhin Mizoramah rawn kalin an rawn zirchiang tawh a, Arunachal Pradesh phei chuan kalpui ve tumin tunah hian an inbuatsaih mek a ni a ti a, NLUP chu za ah za a hlawhtling theilo tih chu thudik anih rualin a hlkawhtlinna hi a namailo ani tih erawh ngaihthah chi a nilo a ti bawk.
Pu JH Rothuama chuan NLUP hmalakna tichak lehzual turin Sawrkarin UNO peng pali Mizoramah a sawm lut a, an ni hian kawng hrang hrangah hma la in tunah hian a zar kan zo tan mek a ni a ti a, Serthlum chungchang pawh sawilangin mithiamten Serthlum thar hlawk dan leh natna laka vend an te, a hralhchhuahna tur te tunah hian uluk takin an zirchiang a, a hmawr bawk tep anih tawh thu leh hei hian rah tha a chhuah ngei a rin tlat thu a sawi bawk. NLUP chu vawikhat sem a tawp mai tura duan a nilo tiin kuthnathawh kan uar sauh sauh a, tan kan lak nasat lehzuala kan trade thlana theihtawp chhuah chu kan tih tur a ni tiin NLUP beneficiary te a fuih bawk a ni.
Kan ramin hma a sawn tak takna turin Sawrkar inhuam viau mahse mipui lam an inhuam a thahnem an ngaih ve tho a ngai a, sawrkar leh mipuite chu tan la tura an inthurual a pawimawh a ni a ti bawk. NEDP chungchang pawh sawilangin tun dinhmun atanga ramin hma a sawn lehzualna tura Sawrkar ruahmanna anih avangin mipuite pawhin belchiang a a hlawhtlinna tura theihtawp an chhuahpui a ngai a ni a ti bawk.
Nimin Kuthnathawktute Ni puala inkhawm hi Champhai District Bawrhsap Pu Vanlalngaihsaka’n a kaihruai a, AMFU senior Vice-President Pu K.L. Thanga’n kuthnathawktute fuihna thu sawiin NLUP beneficiary hlawhtlingte zing atang mi pali – Pu R.Vanlawma, Champhai Vengsang (WRC-I), Pu Phillip Kristiana, Electric Veng, Champhai (Broom), Pi HS Zokhuma, Champhai Kanan (Carpentry) leh Pu Lalramnghaka, Tuipui (M.Orange) ten hlawhtling tura hma an lak dan leh kuthnathawktute fuihna thu an sawi a, Pu James Vanlalluaia, DAO, Champhaiin lawmthu sawiin hnu a khar a ni.

MLA IN ENPUI :
Nimin zingkar khan Champhai South Bialtu MLA JH Rothuama leh Organising Committee te chuan kumin October thlaa Zotlanga YMA Gen. Conference Vawi 71 na a thlen turah pandal sakna tur hmunhma an enho a. A hmunhma siam rem leh laih zawl ngaite thawk nghal turin a hrilh bakah a senso tur a tumsak dawn avangin MLA chungah hian an lawm hle tih thu dawn a ni.

PAWNGSUALTU A PUH ZAWNG MEK :
Zirlai naupang pawngsualtu a puh Thekte khua Lalnunmawia chu Champhai Police ten an zawng mek.
Thudawnna in a tarlan danin Lalnunmawia hian Thawhtanni tlai khan Middle School zirlai naupang chu a pawngsual a. Thawhlehniah Serchhipah kal nghalin hetihlai hian an chhungte chu inremna zawngin an lo inbia a. An inrem theih loh hnuah Lalnunmawia hi Thekte ah hian kir lehin Champhai Police Station a inpe turin kut tuartu chhungte hian ti a, mahse inpe loin a tlanbo zui ta a, he thu buatsaih thleng hian a awmna chin hriat a la ni lo bawk. Kut tuartu chhungte hian Champhai Police Station a FIR an thehluh hnuah MZP Hqrs. Champhai chuan niminpiah khan FIR an thehlut zui veleh a, pawikhawihtu hi man ngei tura Police te chu ngein, Police kutah hian ainpe lo a nih chuan anmahni in zawn an tum thu MZP hruaitute chuan an sawi.

FOOTBALL INELNA :
CDFA Republic Day Football Tournament chu nimin khan Pool Match kelh zawh  ani.
Nimin inkhel result
Tlangsam FC  3-2 Kanan FC
Zote FC 1-0 New Champhai
Zotlang FC 5-4 Dinthar FC

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 66.97/litre)
Diesel    : Free Sale (Rs. 56.67/litre) 

RD PUMP
Petrol    : Free Sale 
Diesel    : Nil

FIRE  OFFICE : 
(03831)234026

Comments