Skip to main content

Champhai

CHAMPHAI IN EYE DOCTOR NEILO PAWI TI :
Champhai District Hospital a Eye Doctor awm ta lo chu MZP Hqrs. Champhai chuan pawi an tih thu an sawi.
Zirtawpni a Executive thukhawmah Champhai District Hospital a Eye Doctor awm ta lo chungchang an sawiho a. Zirlaiten thisen chhuak meuha theihtawp chhuaha Doctor an ngenna hliam dam fel hmaa Eye Doctor in hna dang zawm a, Champhai a chhuahsan chupawi an tih thu an sawi a. Sawrkar tana MIMER a hlut ang chiahin CHamphai tan pawh District Hospital hi a hlu em em a, mit Doctor kan neih thuai theih nan hian Health Minister hnenah ngenna hmanhmawh thlak lehkha ziak a pek nise, an ti. hei bakah hian Champhai DIET Lecturer Allision Byhnasa, Siaha DIET lama transfer chu a aiawh rawn dah thuai turin sawrkarah ngenna thlen vat nise, an ti bawk.
Hetih rual hian Champhai DIET a Mizo zirlaite dinhmun pawh uluk taka enzui nise, an chanvo dik tak an chang em tih zirchian nise tiin, MLA Election lo awm turah Party tin hnenah Champhai khua ngei, Champhai khaw…

ni 17.2.2017 (zirtawpni)


THILPEK DAWNG THIANGLO :
Nimin khan Champhai College Multipurpose Hall ah Champhaia Gazetted Office chinte tan Property Return chungchanga rhaittur pawimawh te inhrilhhhriatna hun hman a ni.
He hunah hian Vanlalzuala Chhangte, Superintendent, Vigilance Dept chuan kalkhawmte chu zirtirna a pe a. Property Transaction chungchangah Rule 18 of CSS (Conduct) Rules, 1964 chu hman anih thu sawiin, mahni hlawh atanga transaction nei tur chuan sawrkar hnathawkin a hming emaw, an chhungkaw member dangte hming leh power of attorney hminga lak sawn theih loh thil a lei dawn emaw, a tiral dawn a nih chuan sawrkarah a hriattir thin tur a ni a. Lak sawn theih thil khawih chetna reng reng a neihin, a thla 2 basic pay aia sang a nih chuan thla khat chhungin sawrkar a hriattir tur  ani tih thu te a tarlang a. Laksawn theih hian tlereuh, unsurance policy, share, loan, lirthei leh inchhung bungraw hrang hrang a huam a ni.

Hei bakah in immovable leh movable  property transaction chungchanga sawrkar phalna dilin, sawrkar atanga ni 30 chhuga chhanna hmuh loh chuan phal anga ngaih tur a ni a. Chhungkaw member dangin an hlawh emaw thawh chhuah atanga an lei dawn a nih chuan sawrkar hnathawkin sawrkara report a ngai lo tihte tarlan a ni bawk. Annual Property Return chungchang a sawifiah bawk a. Kumtin January atanga December chhunga property transaction reng reng chu a kum leh January ni 31 ral hmain sawrkara thehluh tur a nih thu te leh document thil tel ngaite tarlangin, insak dawna sawrkar hriattir dan tur kalphung te, Annual Property Return thehlut lo emaw a diklo chu an chunga action lak theih a nih thu te bakah property return chu document kimchang taka thlawp a tul thu te sawiin, heng document ngai te hi a sawi lan gtel bawk.
Nimin training ah hian Rule 13 of CSS (Conduct) Rules, 1964 a thilpek chungchang pawh zirho a ni a. Sawrkar hnathawk tumahin thilpek reng reng a dawng tur ani lova, an chhungkaw member leh midang hminga a dawn pawh remtihsak a ni lo bawk. Chhiatni/thatni leh vantlang thiltih khawmnaah chuan official-a indawrna a neihpui lohte hnen atangin bithliah zat awmin thilpek hi dawn theih a ni a. Group A atanga Croup C te dawn theih zat hi bituk a ni a. Thildangah chuan sawrkar hnathawkin sawrkar phalna la hmasa lo chuan eng thilpek mah a dawng thei lo tihte sawilan tel ani bawk. Hemi hnu hian zawhna leh chhanna hun hman a ni.

CM-IN HNAHLAN LEH VAIKHAWTLANG TLAWH :
Chief Minister Lalthanhawla chuan nimin khan Hnahlan leh Vaikhawtlang a tlawh.
Chief Minister Lalthanhawla hi Hnahlan Community hall ah mipui thahnem takin an lo hmuaka . Chief Minister chuan thusawiin, Pathian tih chunga hnathawh chuan Pathian pawh kan lamah a tang thin a ni, a ti a. Mipui pungkhawm te chu rinawmna leh Pathian tihna nen hnathawk turin a chah a ni. Sawrkar pawhin mipui thawhrim rah chu a peipunna tur ngaihtuahin NEDP a duang thu a tarlang a. Hnahlan Community hall chung siamthatna tur chu remchang hmasa berah a pek tur thu a sawi bawk. Hemi hnu hian Chief Minister hian Congress Block Conference hmanpui turin Vaikhawtlang a pan nghal a ni.
Chief Minister hi vawiin Champhai a ODF lawmna telpu iturin nizan khan Champhai a rawn kir  ang. CM hi MLA 2 bakah Champhai DC leh SP leh Official ten an lo hmuak a ni.

YMA SUB-HQRS. EXECUTIVE THUKHAWM :
Nilaini khan SYMA Executive Meeting chu SYMA Conference Hall Tlangrawtah neih a ni.
He meeting, C. Lalbiakzuava, SYMA President kaihhruaiah hian SYMA Rorel Inkhawm neih tur ruahmanna siam niin, SYMA Rorel Inkhawm hi march ni 14, 2017 (Thawhlehni) ah PD Sena hall, Champhai Kanan Vengah neih tur a ni dawn a. SYMA hnauia Group leh Thuthmun Branch hrang hrang Agenda neite chuan February thla chhunga theh luh vek nise tih a ni a; Programme leh tuldang te SYMA OB te kutah dah a ni bawk.
Chin National Day February ni 21-23 a Falam, Myanmar a neih tura SYMA in sawmna a dawn angin telpui nise, PC Lalrawnliana, Secretary, SYMA; V. Lalduhawma, Fin. Secretary; R. Lalchhuanawma, Treasurer’ RC Rodawla SEC leh C. Lalawmzuala, President jail Veng Branch YMA te intirh nise, an ti a. Chin National Day tanpuina atan SYMA hmingin Rs. 6,000 pek nise tih a ni bawk. Hei bakah hian Champhai Gas (LPG) harsat chungchangah IOC General manager Champhaia cham mek chu kawm nise tih niin, nimin zing khan General manager hi kawm nghal a ni bawk.

CDBBA IN PRESS CONFERENCE KOH TUM :
Nimin khan Champhai District Basketball Assn chuan CCN Pisa-ah Emergency Executive Meeting an nei.
C. Vanlalnghaka, President, CDBBA kaihhruai he thutkhawmahhian Minikins Basketball Club-in MSL 4 Qualifying an khelh chungchang ngaihtuahin MSL Board te rorelna chu diklo an tih thu leh hemi chungchangah hian CDBBA General Body Meeting koh nise, an ti a. Affiliated Unit : Khawbung, Ngopa leh Khawzawl te chu he huna rawn tel tura beisei an ni a, General Body Meeting ah hian Press Conference mumal taka neih nise, tiin an rel a ni. General Body Meeting leh Press Conference hi tun Inrinni hian I&PR Conference hall a neih turin an ruahman bawk.

ODF LAWM DAWN :
Tukin zing dar 10 atang hian DC Indoor Stadium, Keifangtlang ah Champhai District chu Mizorama ODF Districthmasa bera puan a nih lawmna hun chu ropui takin Chief Minister Lalthanhawla hova lawm a ni dawn ta. Programme hi phek hnung lamah tarlan a ni e.

KTP DAY :
Nimin kha KTP Day niin Mizoram hmun dang rualin Champhai ah pawh he ni pual hian hun hman ani.
KTP Day hi Synod Executive Committee (SEC) rel angin kum 2016 atangin February ni 16 hi KTP Day atan hman tan a ni a. KTP Day hman tur hi kum dang angin CKTP in ruahmanna a siam lova, kum danga ruahmanna lo siam tawh sa zul zuiin Branch hrang hrangte chuan KTP Day pual hian hun an hmang a. Hriattheih chinah chuan KTP Day pual hian Biak Inah KTP FLag an tar bakah Vengchhung tifai leh Biak In leh a vel ti faiin hun an hmang a, Branch thenkhat te chuan intihhlimna lam hawi Prog. buatsaihin hun an hmang bawk.

TRAINING AN PE :
Nimin khan SDEO Office ah ICDS Workers leh Primary School zirtirtu training neih a ni.
Lalnunpuia, Prosthetist and Orthotist, NILD-NERC chuan kalkhawm te hnenah lawmthu sawiin naupangten an zirnaa harsatna an tawh dan chi hrang hrangte hriattirin engti ang a enkawl tur nge an nih tih a sawifiah a. Zirlai naupang piangsual, kutbul emaw kebul emaw bakah rilru lama harsatna tawk tam tak an awm thin a, chung mite enkawl dan chu chipchiar takin a lem nen entirin zirtir an ni a, hetihrual hian a mamawh zual mi pathumte hnenah Wheel Chair pek nghal an ni. Wheel Chair dawng tur hian Disability Certificate neih a ngai a, chu bakah Voters ID emaw UID emaw Ration Card a hming lanna neih tur  ani a, Income Certificate Original leh passport size thlalak pahnih neih a ngai bawk.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 66.97/litre)
Diesel    : Semrual (Rs. 56.67/litre) 

RD PUMP (9862137196)
Petrol    : Free Sale 
Diesel    : Nil

FIRE  OFFICE : 
(03831)234026

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…

Bethel YMA (BYMA)

BRANCH EXECUTIVE COMMITTEE NEIH A NI
Bethel. March.27Sunday) : Branch Executive Commiittee vawi thumna chu ni 24.3.09(Thawhleh) zanah YMA Office-ah neih a ni.
Branch Executive Committeee hi President Pu Lalsanglura Zote in kaihruaiin member sawm pariat an kal thei a, Pu C.Lalfaka Senior Adviser chuan Committee te tluang taka neih theih nan Pathian hnenah tawngtaina neiin rorel tan a ni.
Rorel I-na Kan Branch Vice President Pu S.Lalruatsanga chawlh dilna chu ngun taka sawi ho a nih hnuin a rawn dilna chu zahawm viau mahse tun atan chuan la pawm sak lo mai ni se an ti.
Rorel II-na Branch-ina a thunun mek Pu Nanghekmanga, Pi Nianglianchini, Pu Thangkhanlanga te ngaihdam dilna chu ngun taka ngaihtuah a nih hnuah an dilna pawm sakin thunun an nihna chu hlih sak a n ni.
Rorel III-na Central YMA atang Branch tina YMA chhang din theih ni se an tih chu kan Branch-ah pawh ngun taka sawi ho a nih hnuin kum 2009 atan kan Branch-ah pawh din ve nise an ti a, Section Wise-a din nise April thla chhunga …