Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

ni 6.2.2017 (thawhtanni)


YMA SUB-HQRS. INHLANTHARNA NEI :
YMA Sub-Hqrs. Champhai chuan an huamchhunga thuthmun Branch 25 hruaitu tharte hlanna leh kumpian hawnna chu Inrinni khan Venglai Community Hall ah an nei.
He hun hi F. Lalrinmuana, Vice President, SYMA Champhai chuan kaihruaiin K. Hrangdawla, SEC Champhai chuan kum 2017 chhunga SYMA Champhai huamchhunga Branch hrang hrang 25 te Pathian hnenah tawngtaiin a hlan a. H. Laltuliana, SEC chuan hruaitu tharte fuihin YMA Branch hruaitute chu an tlin bik avanga thlan tlin an i lova, khawtlang amawhphurhna an kuta dahin thlan chhuah an ni, a ti a. Branch hruai kawngha fimkhur taka kal a ngai bakah, entawn tura hmahruaitu kan nih hun a awm tih kan hriatreng a tul a ni, a ti. Hmun hlauhawm leh harsatna, chhiatna hmuahte kan awm a tul fo thin a. heng huna biru chi kan nih chuan hruaitu ni tlak kan ni lo tihna a ni a. heng hmunah hian hmahruaitu kan nih a ngai a, a ralmuang chinah hnung dawl tur kan ni tih kan hriat thar a tul hle a ni, a ti. YMA hruaitu chuan dikna leh rinawmna hi kan nunpui tur  ani a, hleih nei lo leh duhsak bik nei lova rorel tur kan ni, a ti a. YMA-ah hian chhungkhat laina induhsakna chuan hmun a chang tur a nilo, a ti bawk.

YMA hi Political Party te Politics khelmualah kan tang tur ani lo, Party hruaitu pawh awm mah ila YMA huangchhungah hian Politics hi kan seng lut tur  ani lo, a ti. Thawhhonaah chuan inlungrualna a pawimawh thu a tarlang tel bawk. he hunah hian R. Lalhluna, SEC in YMA Kumppuan  ‘Ram leh hnam humhalh’ chu a hawng a. PC Lalrawnliana, Secretary hnen atangin December ni 8, 2016 atanga Fenruary ni 2, 2017 chhunga SYMA Champhai hmalakna te ngaihthlak a ni bawk.
SYMA hnuaia Group hrang hrangte leh Thuthmun Branch hrang hrang ten Mizoram chhunga tuialhthei a ruka hmun danga phurhchhuah thinte khuahkhirhin hmun 7 ah Duty mek a ni a, hemi atan hian Rs. sing 2 sen ral a nih tawh bakah Branch hrang hrangte`n an pawisa eng emaw zat an seng ral tawh bawk. Krismas leh kumthar vuak vetah mipuiten ralmuang taka hunpui an hman theih nan Branch hrang hrangte an huamchhung theuhah an duty a. Central YMA leh Mizoram sawrkar atanga pawisa an dawn SYMA hnuaia Group hrang hrang hnenah Rs. sing 5 theuh leh thuthmun Branch te tana hman tur Rs. sing 5 chu a bo bang awm lov ahman ral a nih thu te tarlan a ni. Mioram sawrkar nen ruihhlo do beihpui thlakna kal zelah kumpuan Squad din niin Heroin No. 4 can 25 chuang leh chhin sen bur 12 man tawh niin Ganja Kg 48 an man tawh bawk a, thuneitute hnenah thubuai 20 chuang ziahluh tawh a ni tih tarlan a ni bawk.

MELBUKAH DAWR A KANGRAL :
Inrinni tlai khan Champhai atanga kilometer 22 a hla Melbuk khuaa nepnawi zawrhna dawr chu bungrua engmah chuh hman lovin a kang ral.
Kangmei chhuah chhan hi dawr chhunga Petrol dah kkan vang nia hriat a ni a, kangmei chhuak vang hian mi 2 in hliam an tuar a, nunna chan erawh an awm lo. In dang a kankai hmain mi tlawmngaiten an thelh hman a ni.
Kangmei chhuahlai hian a neitu Pi Hranghluni`n dawr a nghak a, an dawr chhungah hian an lirthei 6 hman tur Diesel Barrel 3 leh Petrol Barrel 2 bakah hman chawp tura an chhawp chhuah sa Petrol 100 Litres vel a awm a. Meihawl hmanga meilum bawm an chhem chuan a bula Petrol chu man thutin thelh rual loh a nasa in kangmei hi vawi leh khatah a chhuak thut a ni.
Dawr neitu Pu Hranghluni hi pawnah a insa seng hman a, dawr bungraw leitu Pi Parlianthluaii kum 33 mi chu a tlan chhuah ve hman loh avangin Dawr hnunglam kilah a tlanlet a. Thichhawnga a awm tawh chu meialh karah bang rekpawpin mi tlawmngai ten an chhanchhuak a. Kang thelhtu zing a mi Lalramhmangaihzuala kum 18 pawh eirawngbawlna gas puak meialh hlawmin a tuam vangin a ban leh nghawngah a kang hliam bawk.

PAWISA LEM MAN :
Zirtawpni kalta chhun dar 12:30 vel khan Champhai Police te chuan pawisa lem, Rs. 2000 note pathum leh a neitu Abdul Manaf kum 23 s/o Mokoddaf Ali leh Abdul Latiff, Karimganj District a mi ve ve te chu an man a, thubuai siamsak niin Inrinni khan District Jail ah dah luh an ni.

BASKETBALL ZIRNA :
Inrinni khan Vanlallawma Indoor Stadium ah basketball Academy chuan Level 1 zo in zirlai 27 te hnenah Certificate an hlan.
Basketball Academy hi Nov. 4,2016 atanga tan in Feb. 4,2017 ah Session zoin Inrinni khan Exam neih tir nghal an ni a, Admission ti hi mi 42 an ni a, chumi zing atang chuan mi 27 kal tluanin, heng kal tluan thei te hi Coach 4 ten Exam an neihpui a, practical neih nghal zel in exam hi an vaiin an pass a, lawmman hi a hmunah sem nghaliin CDBBA President C. Vanlalnghaka eh Academy Director R. Lalbiakzuala te chuan lawmman hi zirlai te hnenah an hlan a ni. Level 2 hi March ni 4 ah tan leh tur a ni a, tel leh theuh turin an sawm a ni.

THISEN PE :
Inrinni khan Bethel Branch YMA te chuan kum 34 tlin champha pualin Champhai District Hospital Blood Bank a dah turin thisen Unit 33an pe. Thisen hi an Branch YMA Inah an pe a. Bethel Branch YMA hi kum 1983 Feb. ni 1khan Champhai Vengthlang Branch atangin an indang a, tunah hian YMA Member 783 awmin, mipa 523 leh hmeichhia 260 an awm mek a. Bethel Branch atang hian YMA Branch pahnih Vengthar leh Zion Veng Branch te an lo in dang tawh bawk a ni.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 66.97/litre)
Diesel    : Service Tanky (Rs. 56.67/litre) 

FIRE  OFFICE : 
(03831)234026

Comments