Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

ni 7.2.2017 (thawhlehni)


ROAD SAFETY WEEK HMANG :
Nimin khan champhai District Road Safety week hawn a ni a, Champhai Addl DC Pu C Lalzarliana chu khuallian niin a hmanpui.
Khuallian chuan Mihring nunna hlutzia sawiin lirthei thununtu te mawhphurna chu chiang taka hriat a pawimawh thu a sawi a. Motor khalh inthladah lo leh hawihawm taka khalh hi Driver te mawhphurna a nih thu tarlangin mipui ke a kalte pawh motor ken na chang hria a lirthei tlan lai dip zawnga kal lo turin a chah a ni.
Zo nun ze mawi chu driver te leh passenger ten vawng nung zel se a duh thu a sawi a. Uluk taka lirthei thunun leh enkawl hian tawhsual a tihtlem phahin accident vanga nunna chan thin pawh a titlem ngei a rinthu a sawi bawk.

Inkhawmah hian champhai Addl SP PU V.L. Lura Hauzel chuan motor vehicle Act leh Motor Vehicle Rules chungchangah kalkhawm te chu zirtirna a pe a. Road Safety week hawnna inkhawm hi Pu K.Lalrinsanga MVI in a kaihruaia, Official hrang hrangte leh zoram Drivers Union aiawh te an tel a ni.

DAN BAWHCHHIA 95 :
January thla chhung khan Champhai Traffic Police te chuan lirthei dan bawhchhia 95 an man.
Heng lirthei dan bawhchhia anman zingah hian ke pali nei tam berin 46 man an ni a, dan bawhchhiate pawisa tlingkhawm hi Rs. 16,200 a ni a. Lirthei ke pahnih nei dan bawhchha 38 manin, an pawisa chawi tliangkhawm hi Rs. 8500 a ni a. Ke pathum nei dan bawhchhia 11 manin an pawisa chawi tlingkhawm hi Rs. 3500 a ni bawk. Lirthei dan bawhchhia 95 te pawisa chawi tling khawm hi a vaiin Rs. 18,200 a ni.

CHHINCHHIAH ANG :
Tlangsam Branch YMA chuan Thlanmual ram hek zel tur venna atan Tlangsam thlanmual a ruang phum te chu chhinchhiahna mumal tak nei turin a ngen a. Kum 2017 march thla ral hnu a thlan chhinchhiahna awm lo te chu thlan thar laih hnan zel tawh tur a ni tih an inhriattir a ni.

TT FOOTBALL TROPHY :
Nimin khan Parl. Secretary TT Zothansanga Football Trophy Hnahlanah khelh chhunzawm a ni.
Champhai North A/C huam te tana buatsaih Inter Village Football Tournament hi Hnahlanah khelh niin, nimin khan Match 4 khelh a ni a. Inkhel hmasa berah D&D Vanapa Team in si 7 faiin Vaikhawtlang an hneh a. Selam in si 3 faiin North Diltlang an hneh a. Dr Lalsangluaia Team in si 8 faiin Vapar an hneh a. Lalbiakenga Team in si 3 faiin Bapui an hneh bawk.
Vawiin hian Pool Match khelh chhunzawm leh a ni ang a, Dar 9 ah Pamchung leh Khuangphah, Dar 11 ah Vapar leh Vaikhawtlang, Dar 1 ah D&D Team leh Bapui te inkhelin inkhel hnuhnung ber dar 3 ah Tualcheng leh N. Diltlang an inkhel bawk ang.

VAWIIN DINHMUN :
MIZOFED POL  (Tuialhthei) Ph :8414965293
(Mon - Sat :- 6:00 AM - 7:00 PM) (Sunday :- 12:00 Noon - 3:00 PM)
Petrol    : Free Sale (Rs. 66.97/litre)
Diesel    : Coupon (Rs. 56.67/litre) 

FIRE  OFFICE : 
(03831)234026

Comments