Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

ni 14.3.2017(thawhlehni)


MFA CHAMPION TEAM ROPUI TAKIN HMUAK:
Inrinni tlai khan MFA Cup Champion Team Bethel FC te chu Bethel Chhurahmun Hall-ah hmuah an ni.
He hmuahna hunah hian Champhai DC Pu Vanlalngaihsaka chuan thusawiin, MFA Cup-a Champhaiin hlawhtlinna a chang chu a lawmawm hle a. Player naupang tak tak te chu an fakawm hle a ni, a ti a, hmalam hun eng tak an nei a, chu chu ti chhe lova tan la leh zual turin a chah a,
hetiang taka team tha dintu CDFA hruaitute hnena lawmthu a sawi bawk. Anmahni hmuak tura khaw chhe kara mipui kalkhawm chu khawtlang kan inlungrualna tilang tu a ni, tiin, player te chu an kal lehzelna turah duhsakna a hlan a ni.
Pu C.Hualrikhuma, CDFA President pawhin thu sawiin, Champhai hian kumbithliah chi ah player dik lo kan tirchhuak ve ngai lova, chakna pawh kan chang ve ngai lo, mi thenkhat ka atang chuan demna pawh kan tawk thin, mahse chung mite hnenah chuan kumbithliah awm lohna MFA ah min lo thlir dawn nia tiin kan hrilh thin a, vawiin ni a hetianga hlawhtlinna ropui tak hmu thei tura player te thawhhona tha tak chu a fak thu a sawi. CDFA hian kalphung mumal tak neiin kum tin hian First Division team 6 kan nei ziah a, champion te chu MFA Cup-ah Champhai aiawha tirh thin an ni a, Bethel FC te chu kan beisei phak bak a chethain, champion nomawi nen an rawn haw thei hi kan lawm hle a ni, a ti.
He hunah hian Team Manager Pu Lalmuanawma chuan an inkhelh dan tlangpui report tawi a pe a, an lawmna tizualtu chu Goal chhuah lova Champion an ni thei chu a nih thu a sawi ve bawk.

INVIT HLUM:
Ni 12.3.2017 (Pathianni) tlai thimhlim khan Champhai District chhunga mi, Chalrang khuaah zurui pakhatin a thianpa a vihhlum.
Chalrang khawtlang hruaitu hnen atanga thu dawn danin nimin tlai dar 5:30 vel khan Lalruatmawia kum 30  Pu C. Lalbiaksiama (fam) fapa, Chalrang khua chu a lennaah a lenpui PC. Sanghluna (53) Pu PC Rohlira (fam) fapa, Chralrang khua nen inhnial buaiin Lalruatmawia hi PC. Sanghluna thinrim chuan Chemte Inches 21 vel a seiin a pum veilamah a vit a, a vihna lai bakah Lalruatmawia hian a hnungzangah hliam na vak lo a nei bawk a, a taksa hmundangah erawh hliam dang hmuh tur a awm lo a ni. Hetianga rawng taka hmanraw thawha kut inthlakna a thlen hnuah hian an lenna chhungte leh thenawm khawvengten Lalruatmawia hi Khawzawl PHC panpui nghalin Khawzawl PHC-ah hian a hliam tuar lovin a boral ta a ni.

KUM 65 CHIN HNEN THILPEK PE:
Nimin zing khan Pu T.Sangkunga, 25 East Tuipui A/C Bialtu MLA in kum 65 chin chunglam tana Shawl sem programme a kalpui mek chu Farkawn Mualah khar a ni a. Kum Upa zawkten thlasik khawvawt an tawrh nawm zawkna a nih beiseiin bialtu MLA hian a bialchhungah shawl 1500 a sem a. Tukin zing khan Farkawnah shawl sem hi khar a ni a, mi 190 in an dawng a ni. Bialtu MLA Pu T.Sangkunga hi a hman rem chan loh avangin he hun hi East Tuipui South Block Congress President, Pu MC Parhmingthangan a hman pui a ni.

THISEN PE:
Nimin khan Vengthlang North Branch YMA chuan an raising Day pualin District Hospital blood bank-a dah tur thisen an pe.

Blood donation campaign hi Vengthlang North YMA inah neih a ni a, district hospital blood bank-a a duh apiangte hman turin vawiin khan thisen unit 23 a, pe a, a petu hi mipa 15 leh hmeichhia 8 an ni. Thisen hi blood bank-a thawkte chuan a hmunah kal chilhin an laksak a ni. Vengthlang North Br YMA hian raising day pualin thisen hi pein, tun tum hi raising day an lawm vawi 7-na a ni.

KHAUH LEHZUALA HMALAK TUM:
Tuipuiral Group YMA Coordination Committee chu  nimin khan Khawbung Zawlbukah neih a ni a. Comt ah hian Tuipuiral huam chhunga hmun hlui leh thilpawimawh chhinchhiaha, document-a fel taka vawng turin Documentation Sub-committee din nghal a ni a. Tiau luidung humhalh te, ruihhlo donaa tanho dan tur te, chhiatni inkaihhruaina inang tlang zawk hman te leh, Group inrelbawlnaa thilpawimawhte rel a ni.

NORTH KHAWBUNG ZONE FOOTBALL TOURNAMENT ZO:
North Khawbung Zone Football Tournament chu Inrinni khan khelh zawh niin Zawltui FC, Ngaizawl an Champion.


Comments