Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…

ni 12.4.2017 (nilaini)


BAWNG VULHTU TEN DVO PISA KAI TUR LA DANG ZEL :
April ni 4 atanga lungawi lohna lantir mek Tlangsam leh Vengsanga a bawng vultute chuan Vety Complex ah lungawilohna an la lantir chhunzawm zel.
Champhai Vengsang leh Tlangsam bawnglian vulhtute hian Chamul MD, DVO ni bawkin an bawnghnute man Rs. 25,64,083 a batsak la pek loh avanga an lungawi lohna lantirna chu chhunzawm zelin, AH&Vety Dept. Office Pisa kai tur an dang leh a, an bill tun thlenga an la hmuh loh avangin Office an la dang chhungzawm zel a, Vety Office hi ni 5 chhung chu hawn theih a ni tawh lo a ni.

Bawng vulhtute chuan CHAMUL a bawnghnute an chhun luhna Bill chu a bo a bang awm lova an hmuh hma chu Office dan chhunzawm zel an tum thu an sawi nawn leh a. Hetih rual hian DVO Lalchungnunga Pudaite chu biak tum thin mah se biak theih turin a awm ngai lo va, a chenna ah pawh kalin amah hi a awm ngai lo va, khawi hmunahpawh awm se, zawn hmuh ngei an tum thu an sawi tel bawk.
Hetih rual hian intepui ak a Office an dang chu NGO hrang hrang YMA, MHIP, MUP leh MZP ten an ngen angin an iptepui an dah tih an tarlang tel bawk. Bawng vulhtute harsatna hi sawrkar chuan a ngaihtuah tawh a, an leiba rulhna turah hian thu mumal a la awm loh avangin bawng vulhtute hian tawp mai an la tum lo va, a tul a nih chuan kawng danga lungawi lohna lantir chhunzawm pawh an tum tawh niin thu dawn a ni.

INENTIR THAHNEM :
Champhai District Hospital ah nikum March thla atanga kumin February thla thlenga OPD a inentir zawng zawng mi 38,288 an ni.
Champhai District Hospital hi Champhai District bakah Champhai hnaih Myanmar lam thlengin damlote chuan an hmang tangkai hle a, nikum March thla atanga kumin February thla thleng khan damdawi ina riak lut damlo 3421 an awm a, Casualty a dah luh mi 3130 an awm bawk. Nau piang zingah 659 an dam chuak a, boral 6 an awm thung a, damlo boral mi 80 awmin, nausen boral 18 an awm bawk.

EXCISE REPORT :
March thla chhung khan Champhai Excise & Narcotics Dept. te chuan MLPC Act hnuaiah thubuai 11 an ziak lut.
Champhai Excise & Narcotics Dept. te chuan March thla chhung khan thubuai 11 ziak lutin mi 2 an man a. Rakzu litre 122, zubilh lai Tin 170 leh Foreign Beer can 240 an man bawk. NDPS Act. hnuaiah thubuai 4 ziak lutin mi 4 an man a. Heroin No. 4 gram 55,400 an man bawk.

RUAHTUI TLA THA :
Thla hmasa khan Champhai District chhungah ruahtui millimeter 116.2 a tla.
March thla ruahtui tla hi kum 7 chhunga a tlak tam ber pahnihna niin kum 2010 March thla ruahtui 148mm tla chu a phak lo va, hei hi kum 7 chhunga March thla a ruahtui tlak tam ber tum a ni. Kum 7 chhunga ruahtui tlak tlem ber tum chu kum 2013 kha niin 2.45mm a tla a ni. Kumin February thla khan ruahtui 8.8 mm tla in kumin chhung hian ruahtui 125mm a tla tawh a ni. Hetihlai hian loneitute chuan lo an hal mek a, nimin khan Champhai khawpui chhung chu meivap leh meikhuin a bawh nasa hle.

TEIKHANG REUNION HMANG :
School Education Minister H. Rohlun chuan Assembly Speaker in Sialkal tlangdung hmasawnna atana a din, Sialkal Range Development Council (SRDC) kaltlangin hmasawnna hna tam tak thawh a ni tawh,a ti.
He thu hi Champhai District Teikhang Re-Union Vawi 2 na a hmanpuinaah a sawi. Khuallian chuan Chief Minister in he reunion hi hmanpui a tum ngei thu leh rokhawlhna lian tak avanga a remchan tak loh thuah mipui hriatthiamna a ngen a. Teikhang khawtlang leh sawrkar thawhdunna a that avangin Teikang khawtlang pawhin nasa takin hma an sawn a ni, a ti.
Ngopa BDO Lalhruaitluangi pawhin mipuiten sawrkar Scheme hrang hrangte a nihna ang taka hmang tangkai tura fuihin faina leh zirna lamah theihtawp chhuah turin kalkhawmte a chah a ni. Teikhang Re-union hi January 24, 1987 khan hman a lo ni tawh a, tun tum hi a vawi hnihna niin Teikhang khua in kawng hrang hranga hma an sawn theih nan infuihtharna hun atan an hmang a. Teikhang khaw mipui bakah Teikhang khaw chhuak Mizoram chhung leh pawna awm thahnem tak an tel a ni.

TUIALHTHEIH DINHMUN :
MIZOFED POL
Petrol : Service Tanky (63.09)
Diesel : Sem rual (53.61)

Comments