Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…
ni 27.7.2017 (ningani)

NGO TEN KAWNG CHUNGCHANG BUAIPUI :
Niminpiah khan Champhai District Joint NGO hruaitute chuan Aizawl to Champhai National Highway No. 6 kawngpui siam that turin Mizoram PWD E-in-C leh Highway CE te sawipui in theihtawpa hma la nghal turin ngen. Aizawl - Champhai National Highway No. 6 chhe lutuk chungchang leh Champhai chak lakna ber leh awmchhun he kawngpui hi siam tha turin Mizoram PWD E-in-C leh Highway CE te sawipui in theihtawpa hma Ia nghal turin an ngen a, hmalak dan tur leh rawtna te an thlen a ni. Tun dinhmuhah hian he kawng siam tha tura Contractor kuta an pek fel tawh-Seling to Keifang, Kawlkulh to Khawzawlah te hma an lak mek dan te leh Fur a nih avanga hma an lak chak theihloh thu te Dept. hotute hian Io sawifiahin, a theih ang ang leh a chak thei ang ber a he kawngpui siam hna hi thawk nghal turin Highway Chief Engineer K.Lalsawmvela hian Contractor leh Department hnathawktute a hrilhin a sawipui nghal bawk. Central Ministry of Transport atangin Annual Plan pawmpuina hmuin Aizawl to Seling, Keifang to Kawlkulh leh Khawzawl to Champhai kawngpui te Sorkar kumthar 2017-2018 chhung a siam turin chhawpchhuah mek a nih thu dawn a ni bawk. 

RUIHHLO MAN LEH TA :
Nizan hmasa khan Champhai Excise & Narcotics Dept te chuan Heroin No. 4 leh a neitu nia rin an man.
Nizan hmasa dar 6:30 vel khan Champhai Excise & Narcotics Dept te chuan Mizofed Petrol Pump, Champhai Jail Vengah Champhai to Aizawl Sumo Service atangin Heroin No.4 Gram 27 leh a neitu nia puh Josua Lallianzuala kum 21 , s/o Lalrinsanga (L) Aizawl Electric Venga khawsa nia inchhal chu an man a. Josua Lallianzuala hian No 4 hi Champhai Electric Veng atangin Rs. 5900-a a lak anih thu a sawi a, Champhai Excise & Narcotics Dept te hian nimin chawhma dar 11:15 vel khan Josua Lallianzuala'n Heroin a Ieina nia a sawi Zorinsangi d/o RTC Rokhuma (fam) Champhai Electric Venga khawsa nia in sawi hnen atangin Heroin Gram 1.9 an man bawk. Champhai Excise & Narcotics Dept te Heroin man hlut zawng hi tualchhung hralhna rate-a chhutin Rs. 85,200 man vel a ni.
Heroin neitu-a puhte hi ND&PS Act hnuaiah thubuai siam sak niin nimin khan Champhai District court ah hruai niin District Jail-ah dahluh nghal an ni a. Champhai Excise te hian Rakzu litre 30 Muaizenah Ieh Vengsang ah litre 15 ah an man bawk.

TUIPUIRAL GROUP YMA TEN TLAWH :
Kawlphetha Mega Watt 5 pe chhuak tur Tlawva Small Hydel Project thawh mek chu niminpiah tlai khan Tuipural Group YMA ten tlawhin hnathawktute hmasawn dan an enpul. Cheng vbc 56, nuai 70 senna tur, Tlawva Small Hydel Project thawh mekah hian Power House innghahna tur siam mek a ni a. Meter 337-a thui tuilak Iuhna tur leh kilometre 2.7-a thui power-channel te, leinawi paihna tur Desilting Tank Ieh tuidahkhawlna Forebay te chu zawhfel a ni tawh a. Khawl khawhvirtu tur tuidawt lian innghahna tur siam mek a ni bawk.
Hnathawktu 80 chuangin awm chilhin chhun zan zawmin hna thawk mahse, fur ruahtui tlak tam Iai a nih avangin hna a sawt mawh hle tih hnathawktute chuan an sawi.

INTUAITHARNA HUN NEI DAWN:
Catholic Kohhran Champhai Parish chuan Parish Council lo rel tawh angin zanin atanga Pathianni zan thleng khian Holy Cross Biak in, Chhura hmunah Retreat - Tawngtaina nena chhungkua intuaitharna, inkaihhruaina leh Counselling tih thupui hmangin an nei dawn a. Rev Fr. Caleb Laldawngsanga leh Catechist Paul R.Biakchhawna te chu Resource person an ni ang.

PANTU NGAH :
Family Guidance & Counselling Centre, Champhai chuan pan a hlawh hle. Kum 2014 June thla a hawn, Aizawl khaw pawn FG&CC hmasa ber hi hawn anih atanga tun thlengin harsatna hrang hrang nei ten an pan nasa hle a. Kumin bikah counselling centre hi mi 258 in an pan tawh a ni. Centre hi Rev.Jonathan Pachuau chuan a thutchilh mek a, pan duh tan Awmpui pheiah pisa neiin Ph 234055 ah hian Office chhung biak theih a ni bawk.

GANJA SUAT RUNPUI NEI :
Nimin zing khan Vengthlang North Branch YMA te chuan Ganja suat hnatlangah neiin an Branch huam chhungah chuktuah huan leh vantlang rama Ganja to te vaiin suat hnatlang an nei a, Ganja thahnem tak suatin hengan Ganja suat te hi an tichhe nghal ani. Tunlai hian SYMA Champhai thuthmun Branch te chuan YMA kumpuan 'Ram leh Hnam humhalhna" hmalakna peng pakhat Ruihhlo do bawhzuina atan an huam chhungah Ganja an suat mek zel a. Vengthlang Branch Ieh Kahrawt Branch YMA te pawhin Ganja hi an lo suat tawh bawk ani. Hetihlai hian Kumpuan bawhzuina atan Tlangsam Branch YMA tepawhin Chhandanma Camping an buatsaih mek bawk a, tunkar Inrinni khian an chhuah hman beisei ani.

Petrol : Sem rual  (61.71)
Diesel : Sem rual  (53.19)

Comments