Skip to main content

Champhai

CHAMPHAI IN EYE DOCTOR NEILO PAWI TI :
Champhai District Hospital a Eye Doctor awm ta lo chu MZP Hqrs. Champhai chuan pawi an tih thu an sawi.
Zirtawpni a Executive thukhawmah Champhai District Hospital a Eye Doctor awm ta lo chungchang an sawiho a. Zirlaiten thisen chhuak meuha theihtawp chhuaha Doctor an ngenna hliam dam fel hmaa Eye Doctor in hna dang zawm a, Champhai a chhuahsan chupawi an tih thu an sawi a. Sawrkar tana MIMER a hlut ang chiahin CHamphai tan pawh District Hospital hi a hlu em em a, mit Doctor kan neih thuai theih nan hian Health Minister hnenah ngenna hmanhmawh thlak lehkha ziak a pek nise, an ti. hei bakah hian Champhai DIET Lecturer Allision Byhnasa, Siaha DIET lama transfer chu a aiawh rawn dah thuai turin sawrkarah ngenna thlen vat nise, an ti bawk.
Hetih rual hian Champhai DIET a Mizo zirlaite dinhmun pawh uluk taka enzui nise, an chanvo dik tak an chang em tih zirchian nise tiin, MLA Election lo awm turah Party tin hnenah Champhai khua ngei, Champhai khaw…
ni 3.8.2017 (ningani)

ENTREPRENEURSHIP ZIRTIRNA PE:
New Economic Development Policy (NEDP) hnuaia Entrepreneurship summit neih tur leh business plan contest chungchang inzirtirna chu nimin khan Champhaiah neih a ni.
Govt Champhai College Multipurpose Hall-a hun hman hi Remlalliana Hnamte, SDC, DC Office Champhai chuan a kaihhruai a Resource person Lalhruaitluanga (EDS Master Trainer) leh Anna Zorinmawii, IIMCIP Local Team ten zirtirna an pe a ni. Lalhruaitluanga chuan Entrepreneurship Development Scheme sawifiahin he Scheme kalpui tur hian Mizoram State Entrepreneurship Development & Monitoring Committee din a ni a, chumi hnuaiah chuan hmalatu turpeng hrang hrang siam leh ani, a ti a. Kum 2017-18 atan EDS ah hian Cheng Nuai 500 dah a ni a, he sum hmang hian entrepreneurship tihhmasawnna leh inzirtirna chu  chu Mizoram hmun hrang hrangah neih a ni, a ti.
Lalhruaitluanga chuan, zirlaite hian kan lehkha kan zir chhuah hnuah hna kan inchuh dawn a. Sorkar hna kan indaih tawh lova,  Entrepreneurship lamah kawng tam tak a awm a, mi huaisen tan chuan hlawhtlinna tur huntha a inhawng reng a ni, a ti a. Entrepreneurship lama ke pen turte chu sorkarin a puih theih dan hrang hrangte a tarlang a. Mizorama a vawikhatna atan entrepreneurship summit chu October thlaa buatsaih tur leh, he summit hian sumdawnna lama hmasawn tur kawng hrang hrang inkawhhmuhna te tarlangin, helama tuite chu tel turin a sawm a ni. Business plan contest, sumdawnna atana ruahmanna kawnga intihsiakna, www.mizorammkailawn.org website kaltlanga tel theih chungchang te, helama tuite hriat tur tul hrang hrangte a tarlang tel bawk.
Entrepreneurship project hi August ni 31, 2017 thleng thehluh theih ani a; heng project lutte zinga tha thlanna result chu September ni 25, 2017-ah puan a ni ang a, heta tlingte tan Group Camp leh Training buatsaih a ni ang. A chhawng hnihna Entrepreneurship Summit hi October ni 10, 2017 ah neih ani anga, hetah hian B-Plan Contest Final Result puan a ni bawk ang. Anna Zorinmawii chuan website thar, Mizoram Kailawn chungchang a sawifiah bakah EDS-a Mizoram sorkar leh IIMCIP te hmalakna tur hrang hrang, hlen chhuah an tumte a tarlang bawk.

KUMDANG PHALO :
Nimin khan Champhai Grape Growers Society te chuan Grape chingtute Grape rah that an lei.
Champhai Grape Growers' Society te chuan nimin khan kumin chhunga a vawihnihna atan Tlangsam Winery-ah Grape chingtute Grape thar chhuah an lak sak a. Grape rah te hi Society member-te thar chhuah chiah lei sak rihin an duhkhawp an hmu lo a nih chuan Society Member te ta lo pawh an lei sak dawn a ni. Grape hi Kg 1 Cheng 30 zela lak sakin kar hmasa khan a thawh khatna la tawhin Quintal 49.29 an lak sak tawh bawk. Grape chingtute hnen atang thu kan dawn danin kumin hian kum dang aiin Grape an thar chhuak tlem zawk a, Kumin hian ruahtui a tlak tam avangin Grape rah hi a hmin hman Ioh bakah Grape hnah natna a tam hle tih an sawi a, Grape rah tam tak a hmin hmain an til a, a til lo te pawh Grape rah hmin pangngai angin a thlum lo bawk niin an sawi.
Champhai Grape Growers' Society te hian MS Radiant Company Guwahati ah Grape tui supply mekin Mizoram Baptist Kohhran hnenah Sacramental Wine an siam sak bawk a. Champhai Grape Growers’ Society hruaitute chuan Grape thar chhuah a tlem avangin an mamawh ang tawk Grape rah an hmuh an inbeisei loh thu kan palai an hrilh bawk.

PATHIAN HNENAH HLAN ;
Niminpiah khan YMA Sub-hqrs Champhai chuan Mizorama ruahsur nasa leh tuilian avanga chhiat tawkte tanpuina tur vehbur khawn tlingkhawmte Pathian hnenah hlanna hun an hmang.
He hun hi H.Darhmingliana,  Asst Secretary SYMA Champhai chuan kaihhruaiin, C.Lalhuapzauva CSM, Vengthlang Corps in Pathian hnenah a hian a. SYMA huam chhunga Thuthmun Branch leh Group te'n Mizoram chhunga khuarel chhiatna tawkte tanpuina tura vehbur an khawn zawng zawng hi avaiin Rs. 9,87,927 a ni a, Central YMA a direct-a chhunluh Rs. 94,130 a ni a; SYMA kutah Rs. 8,93, 797 a Iut a ni. SYMA thuthmun Branch leh Group zingah Sialkal Group tih loh chuan vehbur hi an khawn zo tawh a. Tuichangral North leh Tuiphal Group te hian YMA Sub hqrs Champhaia chhunglut lovin CYMA ah an chhunglut nghal a  ni. SYMA Champhai chuan chhiat tawkte tanpuina tura sum thawhtute zawng zawng chungah lawmthu an sawi a, tanpui ngaite tanpui hi mizo kristiante kan nihna tilangtu a ni tih an tarlang.
Tidim Zomi, Myanmar unau ten tanpuina an khawn SYMA chhunluh an duh angin lo dawn sawn nise; August ni 7 ah Zokhawtharah SEC ten lo hmuakin August ni 8-ah SYMA Hall Tlangrawtah inhlanna hun hman ni se. He hunah hian Champhai District thuneitute leh tlawmngaipawl hrang hrangte sawm ni se, an ti .a. Tidim Zomi duhdan hre rengin tanpuina tur sum bakah Buhfai 50 Qtls an khawn chu suma chantir lovin CYMA ah hlan ni se tih a ni bawk.
Tanpuina luh dan ;
Thut hmun Branch 25 te atangin Cheng 4,86,360
Tuipuiral Gr. YMA-a Branch 21 atangin Cheng 1,20,201
Vanhnuailiana Gr. YMA-a Branch 8 atangin Cheng 31,150
Kawlkulh Group YMA-a branch 12 atangin Chang 66,396
Khawzawl Gr. YMA-a Branch 20 atangin Chang 1,50,020
Vanapa Group YMA-a Branch 9 atangin Cheng 39,650
Tuichangral North Gr.-a Branch 9 atangin Cheng 51,610
Tuiphal Group YMA-a Branch 5 atangin Cheng 42,520

BEIHPUI  NEI :
Champhai Vengthlang Pastor Bial chuan Thawhlehni atang khan Upa C Lalrintluanga, Planter for Christ ruaiin Revival Beihpui chu Vengthlang Presbyterian Biak inah an tan a. Tun thla ni 28-31 khian Bial pumpui infin khawmin Vengthlang Biak inah hian an nei zui leh ang.

HUN REMCHANG INHAWNG:
India rama Football League sang ber ISL Club North East United leh Mizoram football inelna sang ber MPL Club Dinthar FC Aizawl tangkawpte chuan North East United Academy-a awmtur naupang inkhel thiam zawnna  August ni 7, karleh Thawhtanni khian Champhai-ah an nei dawn a, January ni 1, 2001 hnu lama piang mipa naupang te tan trial theih a ni dawn a, trial turte chuan passport size copy 2 leh Birth Certificate ken tur ani ang.

CHAWIMAWI :
Hmunhmeltha chhunga VC leh NGO hrang hrang YMA, MHIP leh MUP meeting-in an lo rel tawh angin niminpiah khan Hmunhmeltha khawtlang chuan an khaw tihmingthatu Lalruatthara hmuahna Hmunhmeltha YMA Hall-ah an buatsaih a, Lalruatthara hnenah chawimawina hlanin khawtlang hruaitute'n chawhlui an kilpui bawk.

FOOTBALL INELNA :
Independence Day Football Tournament khelh mek nimin inkhel hmasa zawkah  Bethel FC in 1 - 0 in Vengthlang FC an hneh  a, inkhelh hnuhnung zawkah FC Vengthlang North chuan Zokhawthar Zone Champion Dilkawn chu 3-1 in an hneh. Nimin hian India U-23 Captain, ISL season thara Kerela Blasters tana inlan tur Lalruatthara, Hmunhmeltha leh ISL Saason thara Mumbai City tana inlan tur Lalchhawnkima, Champhai Kanan Vengte chawimawina hun hman ani bawk.
Vawiin hian Match 3 a awm ang a, Chawhma dar 11 :00 ah Rabung Zone Ieh Champhai United an inkhel ang a, Dar 1:00 ah North Khawbung Zone leh Bethel FC an inkhel ang a, tlai lam dar 3:00 ah Hnahlan Vengthlang FC leh Vengsang FC an inkhel ang.

Petrol : Free Sale  (62.79)
Diesel : Sem rual  (54.14) 

Comments

Popular posts from this blog

Champhai Tualchhung Chanchinthar

ni 13.12.2013 (zirtawpni)

INKALPAWHNA AVANGIN HARSATNA AWM :    Nimin chawhma dar 11 khan Bethel Community Hall ah Directorate Of Geology & Mineral Resources buatsaihin Sensitization & Awareness Programme On Quarry Operation neih a ni
    He hun hi Pu Lalhmachhuana Joint Director Geology & Mineral Resources chuan a kaihruaia, Pu H. Lalbiakkima Geologist Senior chuan Geology & Other Related Issues tih thupui hmangin zirtirna a pe a, Pu Lalremmawia Ass. Controller of Mines chuan thupui pathum, The Mizoram Minor Minerals Concession Rules 2000 tih te, Safety Precedures in Mining tih bakah Safety Restrictions As Per DGMS & Other Norms tih thupui hmangte in thu a sawi bawk a ni. Nimina mithiam thusawitute chuan, Champhai District huamchhungah hian Tuialhthei a awm an rin thu an sawi a, oil Company ten rawn luhchilh an tum laiin inkalpawhna lamah harsatna an tawk ani tih an sawi a, an motor lian leh khawlte rawn phur turin kalkawng lamah harsatna an tawk deuh a ni an ti. J…

Champhai Tualchhung

ni 21.11.2015 (inrinni)
COLLEGE PRINCIPAL “HMABAK - LAIZAWN PHUBA”:
    C.Vanlalpekhlua lehkhabu ziah "Hmabak-Laizawn Phuba" chu nimin khan Govt. Champhai College Seminar hall-ah tlangzarh a ni.
    Tlangzarhna inkhawm hi Pu Lalnunsanga Fanai chuan a kaihhruai a, Lalsiammawia Sailo chuan lehkhabu thlirlawkna a neih hnuah Pu Lalnunmawia, Govt. Champhai College Principal chuan he lehkhabu hi a tlangzarh a ni. Tlangzarh pah hian thu sawiin GCC Principal chuan, thu leh hla lamah Champhai hi Mizoramah chuan kan la hnufual hle a. Mi thenkhat chuan thuziak mi hi engtikah emaw Champhaiah hian an rawn la chhuak ve mai dawn niin an sawi thin a. Tunah hian chu hun chu kan thleng mek niin a lang a, a lawmawm hle a ni, a ti a, lehkha ziak leh chhiar kawngah thangtharte chu hmasawn tura a duhthu sawiin, hemi atan hian C.Vanlalpekhlua chu a entawntlak hlea a hriat thu a sawi tel bawk a ni.
    Lehkhabu ziak C.Vanlalpekhlua pawhin thu sawiin, he lehkhabu hi thawnthu tawi a lo ziah tawhte a khaw…

Bethel YMA (BYMA)

BRANCH EXECUTIVE COMMITTEE NEIH A NI
Bethel. March.27Sunday) : Branch Executive Commiittee vawi thumna chu ni 24.3.09(Thawhleh) zanah YMA Office-ah neih a ni.
Branch Executive Committeee hi President Pu Lalsanglura Zote in kaihruaiin member sawm pariat an kal thei a, Pu C.Lalfaka Senior Adviser chuan Committee te tluang taka neih theih nan Pathian hnenah tawngtaina neiin rorel tan a ni.
Rorel I-na Kan Branch Vice President Pu S.Lalruatsanga chawlh dilna chu ngun taka sawi ho a nih hnuin a rawn dilna chu zahawm viau mahse tun atan chuan la pawm sak lo mai ni se an ti.
Rorel II-na Branch-ina a thunun mek Pu Nanghekmanga, Pi Nianglianchini, Pu Thangkhanlanga te ngaihdam dilna chu ngun taka ngaihtuah a nih hnuah an dilna pawm sakin thunun an nihna chu hlih sak a n ni.
Rorel III-na Central YMA atang Branch tina YMA chhang din theih ni se an tih chu kan Branch-ah pawh ngun taka sawi ho a nih hnuin kum 2009 atan kan Branch-ah pawh din ve nise an ti a, Section Wise-a din nise April thla chhunga …