Skip to main content

Champhai Tualchhung Chanchinthar

ADDL. SECRETARY HOIN ZOKHAWTHAR CHUNGCHANG SAWIHO :Zokhawthar Welfare leh CTU te buaina kal zel avangin Champhai Bazarah chawhmeh hralh chhuah tur a vang tan hle. Bazar a chawhmeh zuar te hnen atanga thu kan dawn danin, chawhmeh tam zawk hi Zokhawthar lam atanga lakluh ani a.CTU te'n Zokhawthar kawng an dan atang hian chawhmeh an khawlsa in a daih lo tan mek a. Tualchhung thar tlem azawng chauh zawrh tur an hmu tawh a, nitin chawhmeh zuara ei zawngte'n an eizawnna ber hetianga dan beh a ni chu pawi an tih thu sawiin, he an buaina hi chinfel thuai ni se an duh thu an tarlang a. 
Hetianga Zokhawthar kawng dan a nih avanga chawhmeh hralh tur avan tak avang hian chawhmeh man pawh a to phah ni a sawiin, thlai chi hrang hrangte hi Cheng-40 leh 50 inkar velin a man pangngai aiin a to tawh niin an sawi bawk. Zokhawthar atanga lakluh nepnawi zuartute pawhin an neih sa a zawh tep tawh thu an tarlang a, an dawr a kawrawng tan hle a, an thil zawrh man erawh a man pangngai rengin an la zuar…
ni 7.8.2017 (thawhțanni)

RORELTUTEN SAKHUA LEH KOHHRAN BOSAN:
Mizoram hmun hrang hrangah Exodus Movement chungchang sawi fiaha hun hmang mek, K Sapdanga chuan Inrinni khan Champhai a thuthar thehdarhtute hnenah ram hmasawnna tura kalphung thar an duante a tarlang. He hunah hian K. Sapdanga chuan 'Political party kal tlanga ram  in relbawl danah duhthusam tawk lo tam tak a awm avangin Mizoram chu India ram state hnufual fak zingah kan tel mek a ni, a ti a. Khawsak  senso hautak ber pawl Ieh, Sum hnar project nghahfak neilo State kan ni a. Development leh Zirna tichhetu
chu kan politics kalpui dan a nih thu leh Thangtharte nghahfak erawh sawrkar hna a nih laiin lehkhathiam sing tel hna hmulo  an awm mek a. Roreltu ten sakhua leh kohhran an bosan mek a, Cancer leh HIV+ rate ah kan sang uchuak hle si a. Tuna kan dinhmun thlir hian ram mipui te hi kan dam tlang tak zet em. 
Sapdanga chuan kan ram dinhmun tlachhe mek tungding tur hian Media hmanga siam that tum chu a hautak thu leh mitha leh beisei kai ten Party an luh chilhin ram siam the turin an hlawhchham zel si avangin, kalphung thar a siam tum hi kawng awmchhun a nih tawh thu leh Sorkar tha siam duhtute chu an tanrual chuan chak tham an awm tih a sawi bawk.

TANPUI NGAITE TANPUITU VAPHAI BR YMA:
Damlohna avanga thingtlang lo thlawh chhunzawm theilo Pu Nihlima te lo chu lnrinni khan Vaphai Branch YMA te chuan an thlawh zawh sak.
Pu Nihlima hi hun rei tak hna thawk thei lova a awm hnuin an eizawnna pui ber thingtlang Lo neih chu a nupui Pi Hmingsangzuali chuan amahin a thawh chhunzawm a. Pi Sangi hian an Lo hi theih ang anga thlo-in hnuhpui pawh tlai lutuk lovah a thlo zo thei a. Kar hmasa khan Pi Sangi hi dam Io ve lehin, hna  thawk hlei thai lovin a awm ve leh a. An harsatna te hriain Vaphai Branch YMA te chuan lnrinni khan Pu Nihlima te lo hi an thlawh zawh sak a, mi tlawmngai 40 chuang an thawk chhuak a ni. Hetih rual hian Vaphai Branch YMA te chuan ruihhlo do kawnga an hmalakna chu tha thlah lovin an kalpui reng a. Myanmar atanga Burma Zu BEDC tlawn 150 leh Ganja kg 5, Khuangthing khuaa phurh tlang an tum chu Zirtawpni lam khan an lo man tawh bawk a ni.

CHAK ZAWKA HMALAK TUM:
Kar kalta Zirtawpni khan Commerce & Industries  Minister H. Rohluna chuan Salchal khua a NEDP hnuaia khaw chhung kawng siam mek chu a hmunah kalin a enfiah. Kawng hi Metre 530 vel niin Metre 400 vel chu siam zawh tawh niin la zawh loh hi siam chhunzawm mek a ni. Hliappui khua a NEDP hnuaia kawng Ieh Side Drain siam tur proposal awm te chu enfiah bawkin chak zawk a hmalakpui atum thu a sawi bawk.

NU HOIN HALRAL LEH TA :
Inrinni khan MHIP Sub-hqrs Champhai Anti-Gutkha Squad leh Anti-Tobacco Squad ten Champhai Town Area chhungah Joint operation an neih a Gutkha an man khawm  Rs. 20,000 man hu vel chu MHIP Sub-hqrs pisa tuala an halral.

CHHUNZAWM ZEL:
YMA Sub-hqrs huam chhunga Ganja suat beihpui thlak kal zelah Inrinni khan Zion Veng branch chuan an huam chhunga Ganja suat hna an thawk.

MEMBER TE PUALIN HUN HMANG:
Inrinni khan MNYF Champhai South Block chuan an Member te pualin an Party Policy SEDP zirhona an buatsaih. He zirhona hi an Office, Hnam Run, Venglai-ah neiin TJ  Lalnuntluanga, Secretary MNF Gen. hqrs in hmanpuiin zirtirna a pe a, Champhai North Block Thalai hruaitute leh sawm bik dang ten an hmanpui bawk.

BALL PETSIAK CHHUNZAWMNA : 
Inrinni khan Independence Day Football tournamentah match thum khelh a ni. Inkhel hmasa berah Vengthlang North FC chuan North Khawbung Zone chu 12-1 in an hneh a, Dilkawn F C chuan 3-2 in Bethel FC an hneh bawk a Zotlang FC in Rabung Zone chu 1-0 in an hneh bawk.
Vawiin hian match thum bawk khelh a ni dawn a, intum turte chu Vengthlang North FC leh Vengthlang FC Hnahlan Zone leh Champhai United, Rabung Zone leh Vengsang FC te an inkhel ang.

Petrol : Service tanky  (63.70)
Diesel : Sem rual  (54.88)

Comments